使徒 4

彼得㧯約翰在議會受審問

1 彼得㧯約翰還對眾人講話个時，有兜祭司 #4:1 「祭司」另外有兜古卷係「祭司長」。、聖殿个警衛長，㧯撒都該人忽然來到。 2因為兩個使徒教訓人，講耶穌已經復活，用恁樣來證明死人復活个事，這兜人非常譴， 3所以就捉佢等，將佢等關在監獄到天光，因為該時天已經暗。 4總係，該兜聽道理个人有盡多相信；信徒个總數單淨男仔人就將近五千人。

5第二日，猶太人个領袖、長老，㧯經學教師在耶路撒冷聚集開會。 6大祭司亞那㧯該亞法，並約翰㧯亞歷山大，還有大祭司个親戚全部在該位。 7佢等喊使徒企在佢等个面前，問講：「你等靠麼介能力，奉麼人个名做這事呢？」

8 彼得被聖靈充滿，應講：「民間个領袖㧯長老啊， 9若係𠊎等今晡日受審問係關係這瘸腳个人樣般得到醫好這件好事， 10你等大家㧯所有个以色列人應當知：這企在你等面前个人，佢完全得到醫好，係因為拿撒勒人耶穌基督个名所發出个能力。耶穌被你等釘死在十字架頂，總係上帝已經使佢對死復活。 11關係這位耶穌，聖經講過：

你等个泥水師傅所㧒掉个這垤石頭，

已經成做地基中最重要个 #4:11 「地基中最重要个」抑係譯做「屋棟个拱心石」。。

12只有通過耶穌，正有拯救；因為在天下人間，上帝無賜別个名，使𠊎等做得靠它來得救。」

13該兜議員看到彼得㧯約翰恁勇敢，又知佢等係無受麼介教育个普通人，就感覺盡奇怪。佢等知佢兩儕識跈過耶穌； 14總係，佢等無話好講，因為佢等看到該得到醫好个人企在彼得㧯約翰个塍頭。 15該兜議員就命令佢兩儕出去議會个外背，然後參詳， 16講：「𠊎等愛樣般對付佢等呢？佢等明明行一個大神蹟，住在耶路撒冷个人全部知這件事，𠊎等也無法度否認。 17總係，為到愛避免這個事在民間越傳越闊，𠊎等來警告佢等，做毋得再用該儕个名對人講麼介。」

18佢等就喊佢兩儕倒轉來，警告佢等無論樣般做毋得再用耶穌个名講道抑係教訓人。 19總係彼得㧯約翰應佢等講：「在上帝面前，聽從你等較著，抑係聽從上帝較著呢？你等自家想看仔！ 20𠊎等所看到、所聽到个，做毋得無講。」 21因為恁樣，議會就再一擺嚴嚴警告佢等，然後放佢等出來。議會想毋出愛樣般刑罰佢等，因為眾人攏總為所發生个事頌讚上帝。 22同時，在這個神蹟中得到醫好个人已經四十零歲。

信徒同心祈禱

23 彼得㧯約翰一下得到釋放，黏時轉信徒該位去，將祭司長㧯長老所講个話對大家報告。 24佢等聽到，就同心大聲祈禱上帝，講：「創造天、地、海，㧯其中萬物个主宰啊！ 25你識通過聖靈，用你个僕人 — 𠊎等个祖先大衛个嘴講：

列國做麼介妄想反叛？

萬民做麼介空空計謀？

26世上个王䟘起來準備；

掌權个官也聚集共下，

想愛攻擊主㧯佢个受膏者基督。

27事實就係恁樣，希律㧯龐修‧彼拉多在本城㧯外邦人並以色列人勾結，愛攻擊你神聖个僕人耶穌，就係你所選立个基督。 28佢等同謀，照你个大能㧯旨意所預定愛實現个一切去做。 29主啊，佢等恐嚇𠊎等，這下求你鑒察，並使𠊎等，就係你个僕人，會勇敢傳你个道理。 30求你伸手醫治病痛，也使𠊎等會通過你神聖个僕人耶穌个名行神蹟奇事。」

31佢等祈禱後，聚會个地方就搖動；佢等全部被聖靈充滿，勇敢傳上帝个道理。

財產公用

32這群信徒全部同心合意，無一個人講佢所有个財產係屬自家个；所有个東西大家公用。 33該兜使徒用大能力見證主耶穌个復活；上帝大大賜福給每一個人。 34在佢等當中，無人欠麼介。該兜有田有屋个，就將賣田產家業个錢帶來， 35放在使徒个面前，分給每一個需要个人。

36有一個在塞浦路斯出世个利未人，名安到約瑟，使徒喊佢巴拿巴 (意思就係「鼓勵者」)； 37佢賣掉佢个一垤田地，將錢帶來，交給使徒。

Currently Selected:

使徒 4: THV12Hdb

Highlight

Copy