使徒 20

保羅又訪問馬其頓㧯希臘

1暴動停下來後，保羅召集信徒，鼓勵佢等，也同佢等辭別。然後，佢離開該位，去馬其頓。 2佢行遍該兜所在，對信徒講盡多鼓勵个話，然後去到希臘， 3在該位住三隻月。保羅準備坐船去敘利亞个時，發現猶太人愛謀害佢，所以決定對馬其頓該條路轉去。 4同佢共下行个人有庇哩亞人畢羅斯个孻仔所巴特，帖撒羅尼迦人亞里達古㧯西公都，特庇人該猶，還有提摩太，並亞細亞人推基古㧯特羅非摩。 5佢等歸陣先行，在特羅亞等𠊎等。 6過了除酵節，𠊎等對腓立比開船，五日後到特羅亞，同佢等會合，在該位住一禮拜。

保羅最尾一擺訪問特羅亞

7拜六暗晡 #20:7 「拜六暗晡」抑係譯做「禮拜日暗晡」。，𠊎等共下聚會，分享愛个筵席。保羅因為第二日愛出發，就對大家講道，一直講到半夜。 8𠊎等在樓頂个房間聚會，有點好多个燈火。 9有一個名安到猶推古个後生人坐在窗門項，保羅講道講盡久，佢緊來緊想愛睡，後來就睡落覺，對三層樓頂跌下去。大家扶佢䟘起來，看到佢已經死掉。 10保羅下樓，伏在佢个身上，揇等佢，講：「毋使緊張，佢還有性命！」 11佢又上樓頂去，擘餅來食。佢繼續談論盡久，到天光正離開。 12佢等將該後生人生生送轉厥屋下，大家就大受安慰。

對特羅亞到米利都

13𠊎等先上船，駛去亞朔，準備在該位接保羅。這係佢所安排个，因為佢自家愛行路去。 14佢在亞朔同𠊎等相會，𠊎等就接佢上船，然後向米推利尼出發。 15𠊎等又對該位開船，第二日到基阿个對岸；又過一日，在撒摩停船，再過一日到米利都。 16保羅早就決定毋停在以弗所，免得在亞細亞省延纏時間。佢趕緊愛去耶路撒冷，希望盡量在五旬節前趕到。

保羅臨別个勉勵

17 保羅對米利都派人去尋以弗所教會个長老，請佢等來見佢。 18佢等來到，保羅對佢等講：

「你等知，𠊎到亞細亞省个第一日開始，一直樣般同你等共下， 19𠊎事奉主个時節，凡事謙卑，常常流目汁，又因為猶太人个陷害，經歷盡多磨煉。 20你等也知，無論在眾人面前，抑係在你等個人屋下，𠊎傳、𠊎教个時，凡係對你等有利益个，𠊎就無保留。 21無論對猶太人抑係外邦人，𠊎攏總認真勸佢等，愛離開罪惡，轉向上帝，信𠊎等个主耶穌。 22這下，為到順服聖靈，𠊎愛上耶路撒冷去。𠊎毋知在該位會堵到麼介事； 23𠊎只有知，聖靈在逐個城市指示𠊎，有監獄㧯災難等等𠊎。 24總係，𠊎所關心个，並毋係自家个生命，只有全心完成𠊎个使命，成就主耶穌所交給𠊎个工作，就係為上帝恩典个福音做見證。

25「𠊎在各位當中同大家共下出入來往，宣傳上帝个國。這下𠊎知，你等以後無法度再見到𠊎。 26所以，𠊎今晡日正式㧯你等講，若係你等中間有人沈淪，毋係𠊎个罪； 27因為𠊎已經將上帝个旨意傳給你等，完全無保留。 28你等自家愛細膩，也愛為聖靈所交託你等照顧个全群來細膩。愛牧養上帝 #20:28 「上帝」另外有兜古卷係「主」。个教會，就係佢通過自家孻仔个死 #20:28 「自家孻仔个死」抑係譯做「自家个死」；「死」原文直譯係「血」。所救贖个 #20:28 「救贖个」抑係譯做「買來个」抑係「得到个」。。 29𠊎知，𠊎離開以後，會有兇惡个豺狼混入你等中間來傷害羊群。 30就係在你等中間，也有人會講花撩，愛迷惑信徒去跈佢等。 31所以，你等愛警醒！愛記得在過去个三年中，𠊎樣般日夜用目汁勸話、教導你等每一個人。

32「這下，𠊎將你等交在上帝个手㧯佢恩典个道理底背。這道理會堅定你等个信心，又使你等承接上帝為佢所有个聖徒所準備个福氣。 33𠊎從來毋識貪麼人个金銀抑係衫褲。 34你等知，𠊎用這雙手做事來供給𠊎㧯同工个需要。 35𠊎凡事做你等个模範，愛俾你等知，應當恁樣認真做事來幫助軟弱个人。愛記得主耶穌親身講過个話：『給人比領受較有福氣。』」

36講這兜話以後，保羅就㧯佢等全體跪下來祈禱。 37眾人大噭，揇等佢，唚佢來辭別。 38佢等非常傷心，因為保羅講，以後無法度再見到佢。佢等就送佢上船。

Currently Selected:

使徒 20: THV12Hdb

Highlight

Copy