使徒 14

在以哥念

1在以哥念也發生共樣个事。保羅㧯巴拿巴去猶太人个會堂；佢等个講道使盡多猶太人㧯外邦人成做信徒。 2總係該兜毋信个猶太人煽動外邦人，使佢等惱信徒。 3佢兩儕在該位住好久，大膽談論主个事。主賜給佢等行神蹟㧯奇事个能力，用恁樣證明佢等所傳關係主恩典个信息係真實个。 4城肚个眾人就分派，有兜扶猶太人，有兜扶使徒。

5該時，外邦人㧯猶太人並佢等个領袖決心愛傷害使徒，用石頭㧹死佢等。 6使徒知這個事就閃走，去呂高尼个路司得城㧯特庇城，並附近个地區， 7在該兜地方繼續傳福音。

在路司得㧯特庇

8在路司得城肚有一個人，出世就瘸腳，從來毋識行過路。 9佢坐在該位聽保羅講道。保羅注目看佢，看出佢有信心，會得到醫好， 10就大聲講：「你䟘起來，企直！」該人就跳起來，開始行路。 11眾人看到保羅所做个事，就用呂高尼話大聲喊講：「神明化身變做人，降臨在𠊎等个中間囉！」 12佢等就喊巴拿巴「宙斯」，喊保羅「希耳米」，因為佢帶頭講話。 13城外宙斯廟个祭司牽等牛，帶等花，來到城門口，愛同眾人共下獻祭給使徒。

14 巴拿巴㧯保羅聽到佢等想愛做个事，就扯爛衫，跳入人群，大聲講： 15「各位，你等做麼介做這兜事呢？𠊎等㧯你等共樣，也係人！𠊎等來這位傳福音，係愛喊你等離開拜偶像這兜虛空个事，來信該創造天、地、海，㧯其中萬物个永生上帝。 16在過去个世代，佢由在萬民行自家个路； 17總係，佢一直行各樣个好事來證明自家个存在，就像：使風調雨順，五榖豐登，俾你等豐衣足食，心滿意足。」 18雖然使徒恁樣講，也險險無法度阻止眾人向佢等獻祭。