使徒 13
13
聖靈選派巴拿巴㧯掃羅
1在安提阿教會中，有幾個先知㧯教師，就係巴拿巴，西面 (偏名「烏漢」)，古利奈人路求，同分封个王希律共下長大个馬念，還有掃羅。 2佢等敬拜主、禁食个時，聖靈㧯佢等講：「你等愛為𠊎派巴拿巴㧯掃羅，去做𠊎呼召佢等擔任个工作。」 3所以，佢等禁食祈禱後，就為巴拿巴㧯掃羅按手，派佢等出去。
在塞浦路斯
4 巴拿巴㧯掃羅既然受聖靈差派，就下西流基去，對該位坐船去塞浦路斯。 5佢等一到撒拉米，就在猶太人个各會堂傳上帝个道。約翰‧馬可在該位協助佢等工作。
6佢等行遍全島，一直到帕弗，在該位堵到一個名安到巴‧耶穌个術士；佢係一個猶太人，也係假先知。 7佢㧯島上个總督士求‧保羅盡有交情。總督係聰明人；佢請巴拿巴㧯掃羅來，愛聽上帝个道。 8總係，術士以呂馬 (以呂馬係佢希臘个名) 反對佢等；佢想愛阻止總督接受這個信仰。 9這時，掃羅 — 又安到保羅，被聖靈充滿，就䁯該術士， 10講：「你這魔鬼个孻仔，一切正義个仇敵，充滿各種邪惡㧯詭詐个人！你歪曲主个真道，還毋肯停嗎！ 11這下主愛責罰你；你會青盲，暫時看毋到日光。」
以呂馬个目珠即時矇矇烏暗；佢四處緊摸，求人牽佢。 12總督看到所發生个事，對主个道理感覺盡希奇，就相信。
在彼西底个安提阿
13 保羅㧯佢个同伴對帕弗開船，來到旁非利亞个別加；約翰‧馬可在該位離開佢等，轉耶路撒冷去。 14佢等對別加繼續向前行，到彼西底个安提阿。在安息日，佢等去到猶太人个會堂參加禮拜。 15讀了摩西个法律㧯先知个書以後，管會堂个喊人去㧯佢等講：「兩位兄弟，若係你等有勉勵眾人个話，請講！」 16保羅就企起來，比手勢，講：
「以色列同胞㧯所有敬畏上帝个外邦人啊，請聽𠊎講！ 17以色列人个上帝揀選𠊎等个祖先。佢等住在埃及做外國人个時，上帝使佢等成做大个民族，用大權能个手帶佢等出埃及。 18在曠野，佢忍耐 #13:18 「忍耐」另外有兜古卷係「看顧」。佢等四十年。 19佢消滅迦南地七個民族，將該土地交給佢等做產業。 20這兜事个經過大約有四百五十年。
「以後，上帝又為佢等設立士師，直到先知撒母耳个時。 21後來，佢等討愛有一個王，上帝就對便雅憫支族選出基士个孻仔掃羅，立佢做佢等个王，共四十年久。 22廢掉掃羅後，上帝又選立大衛做佢等个王。關係大衛，上帝講：『𠊎已經尋到耶西个孻仔大衛；佢係合𠊎心意个人，佢會遵行𠊎一切个旨意。』 23對佢个後代，上帝照自家个應許為以色列人設立一個救主，就係耶穌。 24耶穌開始工作以前，約翰對全體以色列人傳道，喊佢等離開罪惡，接受洗禮。 25約翰个使命會完成以前，佢對以色列人講：『你等想𠊎係麼人？𠊎並毋係你等所期待个；總係，佢就會到了，𠊎連㧯佢脫鞋也無資格。』
26「各位同胞 — 亞伯拉罕个子孫，㧯所有敬畏上帝个外邦人啊！這拯救个真道就係愛傳給𠊎等个！ 27總係，住在耶路撒冷个人㧯佢等个領袖毋知佢係救主，也無明白每一個安息日所讀个先知書。佢等將耶穌定罪，堵堵好應驗先知个預言。 28雖然佢等尋毋到判佢死刑个理由，還係要求彼拉多治死佢。 29佢等做了先知書所寫關係耶穌一切个事以後，就將佢對十字架頂取下來，放在墳墓肚。 30總係，上帝使佢對死復活； 31在一站時間當中，佢好多擺顯現給該兜識同佢共下對加利利到耶路撒冷去个人看。這兜人目前在民間係佢个見證人。 32-33𠊎等這下報你等好消息：通過耶穌个復活，上帝頭擺對𠊎等个祖先所應許个，這下已經對𠊎等做子孫个實現了。像《詩篇》第二篇所講：
你係𠊎个孻仔；
今晡日開始，𠊎做你个阿爸。
34論到使佢對死復活、永遠毋會再死个事，上帝恁樣講過：
𠊎愛將神聖確實个恩典賜給你等，
就係𠊎所應許愛給大衛个。
35在另外一篇，《詩篇》个作者也講：
你毋會俾你忠心个僕人糜掉。
36 大衛在世間个時，實行上帝个旨意；佢死後，被人埋在祖先个堘頭，已經糜掉。 37總係，上帝使佢對死復活个該一位，就無糜掉。 38所以兄弟啊，你等愛知：這赦罪个福音就係耶穌傳給你等个。 39你等靠摩西个法律在無法度得到稱義个一切事上，每一個信靠耶穌个人全部會得到稱義。 40所以，你等愛細膩，驚怕先知所講个話發生在你等个身上：
41看啊，褻瀆上帝个人啊，
你等會大著驚，會死掉！
因為𠊎在你等个時代所做个事，
雖然有人㧯你等講起，
你等總係毋信！」
42 保羅㧯巴拿巴愛離開會堂个時，大家請佢等下一個安息日再來，對佢等講解這兜事。 43散會後，盡多猶太人㧯入猶太教个外邦人跈等保羅㧯巴拿巴去。佢兩儕就鼓勵佢等愛在生活上繼續倚靠上帝个恩典。
44下一個安息日，差毋多全城个人攏總來到，愛聽主个道理。 45猶太人看到恁大群个人，就盡嫉妒；佢等硬㧯保羅拗，又譭謗佢。 46總係，保羅㧯巴拿巴還較勇敢來宣傳講：「上帝个道先傳給你等係應當个；總係你等毋接受，斷定自家無資格得永生。所以，𠊎等愛離開你等，去外邦人該位； 47因為主識吩咐𠊎等講：
𠊎已經設立你做外邦人个光，
喊你將救恩帶到天涯海角去。」
48外邦人聽了這個話，就盡歡喜，頌讚主个道理；該兜上帝所揀選來接受永生个人，攏總成做信徒。
49主个道理就傳遍該一帶个所在。 50總係，猶太人煽動上流社會中虔誠个婦人家，㧯當地有地位个人士，同心迫保羅㧯巴拿巴，逐佢等離開該位。 51佢兩儕將腳項个泥粉蹬掉來警告佢等，然後就去以哥念。 52在彼西底个安提阿，該兜信徒滿心歡喜，又被聖靈充滿。
Currently Selected:
使徒 13: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
