Zakaria 8
8
Ku Twaumase palraingi tupela Yerusalrime
1Kikai bilrilane kai vaga Tamatama ka abebeelengenga ki sanaka kwapingi ka wabaai ki Zakaria. Amia kai, 2“Apia paraalubaku ki Yerusalrime, asi lwiyane kialibakaku si taulra turamuru ki umawmase ki swakai kwini, lakamani ku kalisili ki labadhaini. 3Lri siwlriaku mwa Yerusalrime, amani ku saniange ka cekeleli; lri ikaiyaku kwini. Ku palrapalra ‘Kapatengatenganane ka cekele’ lri iya Yerusalrime, si usakene tusaniange ku lregelrege ki Tamatama ka abebeelengenga ki sanaka kwapingi#8.3 “lregelrege ... Tamatama” amani ki lregelrege Ziyungu.. 4Kudra latarudrawdrange si siwkukudrunga ka sawvalai ka ababai, lri dulrwana nene ikai ki rarubwane ki cekele. 5Ku lakadalranane ki cekele lri sueteane ku kiavavavange ku sawvalai si ababai ka lavavalake.”
6Ku Tamatama ka abebeelengenga ki sanaka kwapingi amia kai, “Kikai laasurwana ka laumawmase lri kai dulru ngimia kikai alau lri iya, ai pangukai nakwane, kikai kaika adulrwane kaika aiyaiyane.”
7Ku Tamatama ka abebeelengenga ki sanaka kwapingi amia kai, “Lri patwaladhaku ki takiravasane ki lakawkawluli palribulu liniane, 8patwalai tali talrawane tali talriwgane ki vai alra ililuku liniane pasiwlri, la paikai liniane ka Yerusalrime. Kwi lalasu lri kamani ku kawkawluli; lai lri a Twaumasaku liniane, si arakai ku kapatengatenganane, si aparamaramavane rathudu liniane.”
9Ku Tamatama ka abebeelengenga ki sanaka kwapingi amia kai, “Kagaranga! Kikai kilalra numi kai vaga kaiasasane, amani kudra lavaga ka taiyane ki layuginsia saka tatupelane tudaane ku daane ki Tamatama, si saka tacegecegane ku karwalai. 10Ku paswalala kadrwa ku maka siarapale ki umawmase si nilapulapwane ka waudriwdripi, ikai kudra ki talelelepengane dredrele ki badha, kadrwa ku maswalrealreke ku umawmase; asi lwiyane lri apakababadhaku ki laumawmase. 11Ai kaiasasane, kainaku pangiamianga ku tapianeli ku paswalala kai ki waudripiana ka laumawmase. 12Kwi lalasu lri sabulu ku sulivatane; ku cebe ki labudu lri pumadru ku budu, ku kadaengane lai lri cebe ku lataleke; lri makakelrekeelrete ku udale. Kikai laakaesadhane lri badhaku kai ki waudripiana ka laumawmase. 13Kunumi ka swa Yuda si swa Iseraylri ka laumawmase, ku maelane ka zuku saka siaswalane namapusupusupusu iya kai, ‘Ku takimwane ki swa Yuda si swa Iseraylri ku matikurwane ani mwa muswane!’ Ai lri palribulaku numiane; lukamaninga kwidra, ku maelane ka zuku lri maiyaiyanga kai, ‘Asu malra ku malra ki swa Yuda si swa Iseraylri ku akaesadhane!’ Lakamani, kunumi kagaranga, madha kakiwcu.”
14Ku Tamatama ka abebeelengenga ki sanaka kwapingi amia kai, “Ku cucungulane numi sa pakagirimucu nakwane, malrithethenga naku ku apulebeane ku apamatikurwane liniane, la singikaiyaku ku takikakaneli pangimia, kai akabalrithi ku takidremedremane. 15Ai kaiasasane malrithethenga naku ku asubulrubulrwane ki laumawmase Yerusalrime si swa Yuda. Lakamani, kunumi madha mukuludru. 16Ku lrika adradrelane numi miyaiya kikai: Lu kawrivane twakapatengatengane madu; la apawbarabarate madu ki maececebe, si papia ki amakathaitharirane. 17Nau tulisi ki palrapalra madha iyaiya kidremedreme; madha kawrivariva ku kaika patengane siwmi. Kilakikai kavalracevaceli patuelre.”
18Ku Tamatama ka abebeelengenga ki sanaka kwapingi la baaiyana ki Zakaria kikai bilrilane kai vaga. Kwi lasu amia kai, 19“Ku talaisane ikai ki mwasakasupate ka dramare, mwasakalrima ka dramare, mwasakapitu ka dramare, mwasaka mangeale ka dramare, lrika amaninga ku takirararagadhane ki laumawmase ki swa Yuda ka kalalrilrisiane. Kunumi kadalama ki patengane ka sabulrwane si rathudane.”
20Ku Tamatama ka abebeelengenga ki sanaka kwapingi amia kai, “Lri padaalrunga si kela ku vai, lukamaninga kwidra ku laumawmase lri twalai ki cacekeceekele#8.20 “cacekeceekele” ku wahunyake madu iya kai “maadrau ka cekele” kainganai mwa Yerusalrime. 21Ku laumawmase kai ki cekele lri papia kavai ki cekele ki laumawmase iya kai, ‘Ila takirarimu sukubu ki Tamatama ka abebeelengenga ki sanaka kwapingi, si kitubi iniane ku asubulrubulrwane. Kunumi tupalra naiane takarededele!’ 22Lri takaalra ku minzuku si madrau sapukwane ka lakuni kulri makitu kainganai kela Yerusalrime makanaelre si sukubu ki Tamatama ka abebeelengenga ki sanaka kwapingi, si lri kitubi iniane ku asubulrubulrwane.”
23Ku Tamatama ka abebeelengenga ki sanaka kwapingi amia kai, “Ikai kwini ki vai, ku tamangeale ka umawmase ka maelane ka zuku lri mwa kwini ki tangea ka swa Yuda, si iya kai, ‘Ala nai tupapalra karedele numiane, asi lwiyane kialalra nai ku kiatapalra ki Twaumase amia numiane.’ ”
Currently Selected:
Zakaria 8: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
