Malaki 3
3
1Ku Tamatama ka abebeelengenga ki sanaka kwapingi twabalre, “Lri sikawlaku ki sasiakawluli ku apasikaiyane nakwane padulru ku kadalranane. Kudra silasilape numi ki Tamatamali lri pangitutuluku mwa ki daaneini; ku sidramadrama numi apidrele kudra nisikawlane lri kela si pelaela ku sakiketeketaneli.”
2Ai, ku akelaneini ku vai, aneane ku lri maka tumane? Kwi lasu lu adrelane, aneane ku lri maka acegecege? Asi lwiyane kwi lasu mia ki titimwane ka sapukwane ka sikingi, mia ki wathalethale ki kingi ka apwi. 3Ku kelaini lri saibange, mia ki wathalethale ki gingi ka umawmase. Kwi lasu lri bula ki labarakalai, mia ki taradarepe ki kingi ka umawmase ka wathalethale ki kingi si gingi. Lukamiyaiya kai, ku labarakalai ala lri thingale papia ki Tamatama patarumara ku mamamwa ku sapatarumarane ku lamanemane. 4Lukamiyaiya kai, ala lri kitarumara ki Tamatama ku sapatarumarane ku lamanemane ki laumawmase ki swa Yuda si swa Yerusalrime, mia kudra sakavai kunadruma.
5Amia kai ku Tamatama ka abebeelengenga ki sanaka kwapingi, “Lri ikaiyaku numiane utaluvaivai, si saibange. Lri makakaaiyaku siwmi kukusu kudra ki la twalrisilrisi, manganganga ki sawvalai si ababai, ku kawarivariva ku kaika patengane, ku kiavala ku nikaungane ku lapaisu, ku pangwa drepete malra ku lawbubulu ki lawalibakane si lapakulrulrulu, si twasinalreme ki la wakela iziu ka umawmase. Lri hukukaku sanaka kai mwasakene nakwane ka umawmase.”
Apatarumarane ku ziwbunuici
6“Tamatamaku, kainaku lri akabalrithi. Ngwalai kikai, kunumi ka lamwabaibalrithi ki Yakubu kaiyana ka kiasalru amuli. 7Mararamau numi ki cucungulane numi, takiwvagadhane numi katwase ki hulriceli, si kai palululudu. Amiaku kai ka Tamatama ka abebeelengenga ki sanaka kwapingi: Kunumi yai ngibangula papia nakwane, la nau ngibangulu papia numiane. Ai amia numi kai kivaga, ‘Lri tumane nai ala ka ngiabangulu nai papia muswane?’ 8Nau kivaga numiane: Kai umawmase lri dulru tavuvulrucu ki Twaumase? Lri kai maka dulru! Ai watavuvulrucu numi nakwane. La kivaga numi iya kai, ‘Watumane nai tavuvulrucu muswane?’ La iyaku kai, watavuvulrucu numi ikai ki apatarumarane ku ziwbunuici si sapatarumarane ka lamanemane. 9Ku sapuswane lri mulebe mwa ki sanaka umawmase, asi lwiyane kai kinauacekelane watavuvulrucu nakwane makanaelre. 10Kudra ziwbunuici patuelreea satedre pwa ki daane ki Twaumase. Lani kakalra ku akaneane ikai ki daane ki Twaumase. Tamatamaku ka abebeelengenga ki sanaka kwapingi; palalavaili, lanu drele lu muelebaku ka lribange subelebelenge, la malra ku la makaelaela ku mathariri ku la lamanemane si pakakaalra gugu baai numiane. 11Kwaku ka Tamatama ka abebeelengenga ki sanaka kwapingi kainaku lri pakabebetethe ki lalubalubai ki lataleke ki takauawngane numi; ku lacebe ki budu numi lai lri pumadru suete ku budu. 12Lukamaninga kwidra, ku laumawmase ki lakuni amani numi ku ngiaesadhane ka umawmase lri iya numiane, asi lwiyane kwi kadaengane numi lrika adulrwane sutelrai ikai si ngiradhekane.” Kikai yai vaga ki Tamatama ka abebeelengenga ki sanaka kwapingi.
Ku Twaumase pwakawnu ku akakalithane
13Amia kai ku Tamatama, “Twalilisi numi nakwane; la kivaga numi iya kai, ‘Watumane nai tulilisi muswane?’ 14Amia numi kai ‘Kadrwa ku akatharirane lu pasikaiyane ki Twaumase. Lu paluludane ku drekaseini, si lu papiane ki Tamatama ka abebeelengenga ki sanaka kwapingi pathingalane ku tangitatupelaneta manemane ku vai? 15Singikai ku tadrelaneta, kiararagai ku ngiakalrilrigu ka umawmase; la ngiradhekane ku manganga ka umawmase, kwi lalasu kiatuthiathingale ki Twaumase la dulru mubere ki sapathavungane.’ ”
16Lukamaninga kwidra, ku mwasakene mukuludru ki Tamatama ku umawmase lri mapelaelaela; ku Tamatama kiararakete kilalra ku vaga lini. Ikai cucubungu iniane, yakai ku vaeva ku nibalrulane ku sangulringavane ka pacase la pacase ku ngwakai ki mwasakene mukuludru ki Tamatama ku umawmase. 17Amia kai ku Tamatama ka abebeelengenga ki sanaka kwapingi, “Kwi lalasu lri kamaninga kwidra tinukucingalrane ka kawkawluli. Kudra lrika apianeli kudra vai kwini, kwi lalasu lrika swakainga nakwane. Lri kakalithaku liniane, mia ki tama lu kakalithi kudra ki pasiakaikai iniane ku lalake. 18Lukamaninga kwidra, ku kawkawluli lri peelana drele ku la takipadradresengane ki madringelrese ka umawmase si manganga ka umawmase luka manemane ku tamakakaelane, si luka manemane ku tamakakaelane ki la pasiakaikai nakwane kaungu si kai pasiakaikai nakwane kaungu ku umawmase.”
Currently Selected:
Malaki 3: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
