Malaki 1
1
1Kikai bilrilane tapelaelane ki Tamatama ngukai ki Malaki ka sapelaelane ki swa Iseraylri ka vaga.
Ku thalradhane ki Tamatama ki swa Iseraylri
2Ku Tamatama amia kai ki kawkawluini, “Kialibaliibakaku numiane.”
Kwi lalasu la tubaalrelringa iya kai, “Watumanesu paathingalane ala ka kialibakesu naiane?”
Ku Tamatama la iya kai, “Ku Isau si Yakubu mababitake, ai madalamaku ki Yakubu, 3la kalrasaku ki Isau. Mabebetethaku ku lalregelrege ki Isau, la baai ki tawpungu ubulane ku kadaenganeini.”
4Alaiyasi iya kai ku mwabaibalrithi ki Isau ka swa Idume, “Kiakabebetethe kai cekele nai, ai lri tupela nai paacegecege tudaane”, ku Tamatama ka abebeelengenga ki sanaka kwapingi lri tubalre iya kai, “Patupela paacegecege tudaane liniane, lri pelaku kabebetethe liniane. Ku laumawmase lri tu ‘Cekele ki pasalrivane’ si ‘Akaelaelathane ki Tamatama palralrawthu ka laumawmase’. ”
5Kai laumawmase ki swa Iseraylri lri patakamacamaca drele kilakikai; kwi lalasu lri iya kai, “Kai Tamatama mialri kiusakene ikai latadre ki swa Iseraylri!”
Ku Tamatama pathavungu ki barakalai
6Ku Tamatama ka abebeelengenga ki sanaka kwapingi amia kai ki labarakalai, “Ku lalake mwasakene ki tama; ku sasiakawlu la musakene ki tawki. Kwaku yai tamaku numiane, anu kai musakene nakwane? Laka tawkiaku numiane, anu kai musakene nakwane? Twadrekase numi nakwane, si kivagana iya kai, ‘Watumane nai sidrekase muswane?’ 7Wamalra numi kudra makudrulru ku akaneane si pikai ki tapatarumaramaraneli, si kivagana iya kai, ‘Watumane nai kudrulru muswane?’ Nau pelaela numiane, amani sa tudrekase numi ki tapatarumaramaraneli! 8Wamalra numi kudra mukimukici, pilapilai, macaeme ka waudriwdripi si iluku patarumara nakwane; kikai kaika ngialisiane? Ala palalava malra kikai miyaiya kaika waudriwdripi si baai ki siwciu, la dredrele iniane lulri kadalame, lulri tarumara numiane?” Kikai vaga ki Tamatama ka abebeelengenga ki sanaka kwapingi.
9Kaiasasane, kunumi ka labarakalai, lu katwasa kitubi ki Twaumase ku apakaesadhane numiane! Luka paramia kikai ku patarumara numi iniane ku sapatarumarane, lutuumane kai lri tarumara ku inulri numi; kikai yai pamama numi. 10Ku Tamatama ka abebeelengenga ki sanaka kwapingi amia kai, “Ikai numiane anatumane la ikai ku umawmase ku waelebe ki lrawlrawdru ki daane ki Twaumase amiaku, lanu kai dulrunga ikai ki tapatarumaramarane nakwane padalai ku kadrwa ku vai ka apwi. Kainaku madalame numiane, lai kainaku tarumara ku patarumara numi ku sapatarumarane. 11Ikai kidruanga ku umawmase mwasaakene nakwane makanaelre. Kwi lalasu la ikai kiinunga papiapia nakwane lama ku sangwalreeme, si patarumaramara ku mabula ku lamanemane. Kwi lalasu mwasakene nakwane makanaelre ka Tamatama ka abebeelengenga ki sanaka kwapingi! 12Ai kai numi mwasakene nakwane. Kukudrulrane amia numi ki tapatarumaramaraneli; la baai numi patarumara ku kalrase numi ku akaneane. 13Amia numi kai, ‘Waupungu ki umawmase kilakikai!’ La ulralrakai numi nakwane. Wamalra numi kudra nikupane, pilapilai, macaeme ku waudriwdripi si baai patarumara nakwane. Lri tarumara kikai miyaiya kai ka lamanemane amia numi nakwane? 14Kudra kiaketekete ku amalrane patwalai ki lakiu ku mathariri ka balase ka kiu si baai patarumara nakwane, la baailringa patarumara ku caecaemane, kudra paiya kikai tavuvulrucu nakwane ku umawmase lri kipusu. Asi lwiyane amaniaku ku madraadrawnga ka talialalai, kai kawmasane sanaka kuni ka umawmase lri musaakene ukuludru nakwane makanaelre. Tamatamaku ka abebeelengenga ki sanaka kwapingi ka amia kikai pelaela.”
Currently Selected:
Malaki 1: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
