Yuhani 21

Adrelane ku Yesu papia ki tapitu ka situ

1Sangilribatenga kilakikai, ku Yesu peaeelanga ikai thili ki Baiyu Tibiria adrelane ki lasitu. Ngimiyaiya kikai ku tangimiane ku taadrelananeini: 2Sakamani kwidra, ku Simune Pitiru, si kiasunagane pasi Tukapiane ka Tumase, si Kana ikai Galrilri ka sia Nathanaile, tadrusa ka lalake ki Zibidi, si drumane ka tadrusa ka situ, taelre ikai makanaelre. 3Ku Simune Pitiru la iya kai liniane, “Lri katwasaku tukange.”

La iya kai makanaelre, “Lri tupalra nai muswane”. Ala katwase kai lalasu, si ubelenge ki varukuru; ai wataleare ka kadrwa ku malra lini ku manemane. 4Sa tawlrawlrau ku vai, ku Yesu acegecege ikai babiabila ki acilai, ai ku lasitu kai wathingale iniane ala ka Yesu. 5Ku Yesu la iya kai liniane, “Lamalalala, yakai ku alra numi ku kange?”

Kwi lalasu la tubalre iya kai, “Kadrwa.”

6La iya kai ku Yesu, “Aradha papia ki tali vanale ki varukuru, yakai kwini kwi kange.” Kwi lalasu la pwa arai, ai kai maka wabilibili pubelenge, asi lwiyane makalra turamuru ku kiapuaradhane ku kange.

7Kudra kadalame ki Yesu ka situ la iya kai ki Pitiru, “Tamatama!” Ku Simune Pitiru sakilalra Tamatama iya, la makakaai malra si elrai ku sapakabelengane ka laimai (kudra yacengecenge ka ulaimaimai), si ituku mutaburu ki acilai. 8Ku drumane ku lasitu la kadrakadrau kwini ki tikiane ka varukuru pubabiabila, si alra pubelenge kwini yaaradhane ka kange patuelre. Sakamani kwidra wadeethe kameamealane, lri ikaai ku takwa idai ka mituru ku adailane. 9Kwi lalasu sa tabelengenga mukameamealane, la drele ku nirutungane ka lrangele kudaladalai, ikai belenge yakai ku kange si pange. 10Ku Yesu la iya kai liniane, “Alra ngupiya kudra tukange numi kwasane.”

11Ku Simune Pitiru la ubelenge ki varukuru, si malra pubabiabila kwini arai; kwini yaaradhane yadreepele ka tadradrau ka kange, elrelrenga 153. Makalra turamuru ku kange, ai kai mapurici ku arai. 12Ku Yesu la iya kai liniane, “Bwala tukwalrea.” Kadrwa ku natangeanga ku situ ku maka kiavaga iniane iya kai, “Aneanesu”, asi lwiyane wathingale makanaelre iniane ala ka Tamatama. 13Ku Yesu la katwase lribate, si malra ku pange apavalavala liniane, la tuthadaalrane apavalavala ku kange.

14Kikai yai ku tasielane ki Yesu, saka kingitulrulu papia ki lasitu adrelane.

Yesu si Pitiru

15Kwi lalasu sa maka kanenga, ku Yesu kiavaga ki Simune Pitiru, “Lalake ki Yuhani ka Simune, madalamesu nakwane ka silrialribate kilakikai?”

La iya tubalre kai lasu, “Unu, Tamatama, wathingalesu ala ka madalamaku muswane.”

Ku Yesu la iya kai, “Lapwa ki latatiitiki ka kiuli.” 16Sa saka kingipusale ku Yesu la kivaga, “Lalake ki Yuhani ka Simune, madalamesu nakwane?”

La iya tubalre kai lasu, “Unu, Tamatama, wathingalesu ala ka madalamaku muswane.”

Ku Yesu la iya kai iniane, “Lapwa ki kiuli.” 17Sa saka kingitulrulu la peelanga ku Yesu kivaga, “Lalake ki Yuhani ka Simune, madalamesu nakwane?”

Ku Pitiru amani sa edeede kingitulrulu kivaga iniane ku Yesu, “Madalamesu nakwane?” Iya, la kwalri kidremedreme, si iya kai ki Yesu, “Tamatama, kadrwa ku kaika thingalesu, wathingalesu ala ka madalamaku muswane.”

Ku Yesu la iya kai, “Lapwa ki kiuli. 18Lri pudriadringadhaku pelaela muswane, sa icengecengeanasu, ngiapapasilaketesu, si ngilralraingi ku apapinwane; ai lu pasuludrungasu, lri segesu ku alrimasu, ku palrapalra lai kerenge muswane, si ililuku muswane mwa ku kaika palraingisu mwa.” 19(Ku taiyane kai ki Yesu papiapia ku lrika angimiane ki Pitiru pacai, si lrigu ki Twaumase.) La pacungulu, iyanga kai ku Yesu iniane, “Tupapalraili!”

Yesu si drumane ka lasituini

20Ku Pitiru la ngibangulu, si drele kwidra ki situ ka kadalame ki Yesu yakai lrilrikudru kabibibilrili (kwini situ nawamwa deethe ki Yesu sa tukwauawbu kudra sakamaungu, si kivaga iniane, “Tamatama, ku lri kilangai muswane aneane”). 21Ku Pitiru sadrele iniane, la kivaga ki Yesu, “Tamatama, kikai umawmase lubibilrili lri ngitumane?”

22Ku Yesu la tubalre iniane, “Alaiyasi ani panianiake iyaku iniane pakela ku akelaneli, kadrwa ku capilanesu. Kainganadha tupapalra nakwane sikakathane!”

23Lakamani, kikai vaga la kimatikaikainga ikai ki twapapapalra ki Yesu ka laumawmase, kwini situ kai lri pacai iyaiya. Ai ku patengatengane, ku Yesu kai lri pacai kwini lasu kai amia, “Alaiyasi ani panianiake iyaku iniane pakela ku akelaneli, kadrwa ku capilanesu” amia la kathane.

24Kikai umawmase amani kudra situ ku pasiakai kilakikai pelaelaela, wamalra kilakikai si pacase. Wathingaleta ku pelaelaelaini tengatengane patuelre.

Saturingaringavane ka vaga

25Ku Yesu makaalrana turamuru ku piaini, alaiyasi nguvavaeva pudriadringai pacase, lu kidremedremaku ku kalrane, ku kalrane ki hungu kadrwa ku lrika taikaiyane kai kawmasane.

Currently Selected:

Yuhani 21: NDV

Highlight

Copy