Hagai 2

Ku tharirane ku tatupelane tudaane ku daane ki Twaumase

1Sakacaili kwini ka sakapitu ka dramare si 21 ka vai, ku Tamatama peaela pangukai ki yuginsia ka Hagai kawriva. 2Ku Twaumase papeaelaela ki Hagai papia ki siwciu ki swa Yuda ka Zerubabele, si abebeelengenga ki barakalai ka Yesua, si laumawmase, iya kai, 3“Ikai numiane yakaiyana ku umawmase ku pwalringawana ku nadaane ki Twaumase kunadruma ku tharirane? Kaiasasane la ka ngitwatumanenga? Lu drelane yai kaika kadruanga ku paluludane? 4Lakamani, kwaku ka Tamatama numi lri apapelaelaku pakipapaulringau numiane, kusu ka Zerubabele kakecenga! Abebeelengenga ki barakalai ka Yesua mialrisu kakecenga! Si swakai kikai ka laumawmase mialria kakecenga! La kisamula kaungu, asi lwiyane kunaku ka Tamatama ki abebeelengenga ki sanaka kwapingi tapalraku ikai numiane. 5Sa twalai Izipiti ku cucungulane numi kainganai, nakiaketeketaku liniane, si palraingi ka tatapalraane ikai liniane. Kaiasasane ku Rili laka thadaalraneana ikai tapalra numiane, la madha mukulukuludru.

6“Lri kai tarathainunga, kunaku ka Tamatama ka abebeelengenga ki sanaka kwapingi, lai lri velevelaku belenge si kai kawmasane, la velevele ki laveke si kadaengane. 7Lri pakamudaku sanaka kuni, la malra ku zaisange lini si mailuku mwa kai, lani kathariri kai daane ki Twaumase. Kikai taiyaneli ka Tamatama ka abebeelengenga ki sanaka kwapingi. 8Kai kawmasane patuelre kai kingi gingi nakwane demedeme, kikai vaga ki Tamatama ka abebeelengenga ki sanaka kwapingi. 9Kai nitubavanane tudaane kai daane ki Twaumase lrika mathaithariri ki supilri; lri pikaiyaku kwini ki laumawmaseli pangiradhekane pasutelrai ku tacekecekelane lini.” Kwaku ka Tamatama ka abebeelengenga ki sanaka kwapingi amiaku kikai pelaela.

Ku yuginsia papia ki labarakalai kibulru

10Sa taradrusanga ka caili ki sakabangate ka dramare si 24 ka vai ku taatinuhikane ki Dariuse, ku Tamatama ka abebeelengenga ki sanaka kwapingi peaeelanga kawriva ki yuginsia ka Hagai. 11Amia kai, “Lu patubalrea ki labarakalai kikai vaeva ka mendai: 12Alaiyasi ikai ku umawmase ku patwalai kai ki apatarumarane ka waudriwdripi malra ku nipatukudhane ku saniange ka sapatarumarane ku beate, si arakai ku sapakabelengane ku laimaini cabu, sakabilrilinga kikai laimai la pakielre ki pange, sawngulane, bava, abera ka ulrive, si drumane sanaka maneemane ka akaneane, kilakikai akaneane lri paasipi madu tusaniange ka lawbubulu?”

Ku labarakalai la tubalre iya kai, “Kai lri paasipi.”

13Ku Hagai la peela kivaga, “Alaiyasi ikai ku umawmase ku ngwalai ku takielreane ki kinawmasane ki wapacai si kakudrulru, sakabilrilinga kwi lasu la sulrape kai ki laakaneane, ki kikai laakaneane lri kai mialri kisaela kakudrulru?”

Ku barakalai la iya kai tubalre, “Unu.”

14Ku Hagai ala kirimu iya kai, “Ku Tamatama amia kai, kikai miyaiya kai, adulrwane madu arakai ikai ki laumawmase kai ki kuni si makaelaeela ka taleke; kai lalasu ku patarumara lini pikai belenge ki tapatarumaramarane patueelre ku lamanemane makudrulrunga.”

Ku Tamatama pwakawnu ku apulebeane ku akaesadhane

15Ku Tamatama amia kai, “Bekace numi kai drele ku tangimiane? Sakaiyana pathagili tupela tudaane ku daane ki Twaumase, 16yakai ku umawmase ku kaiyanganai mucucubungu ki nirubwane ka taleke, si apimalra ku 200 ka kukingi, ai 100 ka kukingi ku malraini; la ikai ku umawmase ku kiasanu patwalai ki kalrudrai malra ku 100 ka kunsenge ku bava, ai wamalra ku 40 ka kunsenge. 17Lu arakaiyaku ku maculu ka valrigi si kananu kabebetethe ku lredreke numi ku lamanemane, kai numi maka mwabangalreana ngitatupela. 18Kaikameane yai sakabangate ki dramare si 24 ka vai, ka tatulrepengane karwalai ki daane ki Tamatama ka vai. Lu drele numi twalainga kai manemane ku lrika angimiane. 19Adravane ka kadrwa ku taleke ki drawsulu, ku labudu, ku laicizike ka angatu, ku nginanavate ka angatu, ku ulrive kaiyana pwamadru patuelre, ai twalainga kikai, lri subulrubulruaku numiane.”

Ku palraingi ki Tamatama ki Zerubabele

20Ikai ki vaivaai ka bangate ki dramare si 24 ka vai, ku Tamatama saka kingipusale kawriva ki Hagai, 21Papeaelaela iniane papia ki Zerubabele ka siwciu ki swa Yuda, iya kai, “Lri velevelaku belenge si kadaengane, 22si pakamudu sanaka kuni, la palikainga ku puku lini. Lri pangibalreaku patubakebake ki ngwapalridilridingi; ku larigi lri pacai patuelre, ku tarangurigirigi lai lri mapapacapacai. 23Sasiakawluli ka Zerubabele, ikai kwini ki vai, kwaku ka Tamatama ka abebeelengenga ki sanaka kwapingi lri pilriaku si dawlu muswane. Lri sikawlaku muswane, ka maru hangengali si rathudu liniane, asi lwiyane amaniaku ka wapilri muswane.” Kwaku ka Tamatama ka abebeelengenga ki sanaka kwapingi amiaku kikai pelaela.

Currently Selected:

Hagai 2: NDV

Highlight

Copy