Tabekacane 19

Pasalrivane ki swa Sudume

1Sakamaungu kwini ki vai, kwini tadrusa ka sasiakawlu belenge la kela Sudume; ku Lute la nene ikai taelelebane ki cekele. Sa drele liniane la acegecege, kidredresenge liniane, pidruru guruthungane icucubungu liniane, 2la iya kai, “Latamatamali ila tamwa naiyanane, la nau pasudalru numiane. Anu tawdrapale, si sulai kai maungu, luiya ki mialrealre la sara ngidrakaale, pacungulu ku kadalranane numi.”

Ai kwini lalasu twabalre, “Ini! Lri ikai nai kadalranane cekele sulai.”

3Ai ku Lute malritheethe iluku liniane, kwini lalasu la katwase mwa linianane. Ku Lute la paakame ku kaika nipawsemakane ka pange ki sasiakawluini, padulru ku akaneane si pasudalru. Sa maka padulrunga, la kane kwini lalasu.

4Kwini badhabadha sakaiyana mutapeapecane, kudra lasawvalai ku tarudrawdrange lavavalake ki swa Sudume, la kela ngithalringulu ki daane ki Lute. 5La tawtau ki Lute, kivavaga iniane, “Kai maungu kudra yakai numianane kwini laumawmase yakai inu? Ta pulatadra liniane! Lanai taelre liniane apece.”

6Ku Lute la mulatadre, si elebe ku lrawlrawdru, 7la iya kai liniane, “Lawsai, kai numi lri maka pia kikai ngialisiane! 8Drela, tadrusa kai lalakeli tara tawvailekete, nau baai numiane, la ngisasingikaiya ku tatumane iya numi liniane. Ai maadha pakwalrialri kai ki tadrusa; kai kela lini naiyanane, badhabadhali, lri tara palakebaku liniane.”

9Ai kwi lalasu twabalre, “Kusu ka maelane ka kuni ka umawmase, katwasa! Aneanesu, si nau kamani ka wadrekase thethengete naiane! Katwasa! Lu kaisu kilalra, lri kiecebe nai muswane, ka parawramuru ku takiecebane nai liniane.” Kwini lalasu la pwa lrudrulu ki Lute, drikisi aru cucubungu, lri lrudrulu ki lrawlrawdru si mudaane. 10Ai kwini tadrusa wataale ku alrima, malra ki Lute pudaane, si elebe ku lrawlrawdru. 11Kwini ki yalatadre ku lasawvalai, kai wasusu ku tarudrawdrange ku lavavalake, mamukici makanaelre, la kai maka kidringai ku lrawlrawdru.

Ku Lute matwase Sudume

12Kwini tadrusa la iya kai ki Lute, “Ikai kai ki cekele yakaiyana ku laretesanesu? Yakaiyana ku lalakesu, ku taelrelre ki lalalakesu, ku drumane ku laretesanesu ku yakai kai? Pakatwasa liniane, 13asi lwiyane lri amudu nai kai ki cekele. Ku nisidrurwane pangukai kai ki laumawmase, ku Tamatama kialalranga, lakamani ku pakainganai naiane kela amudu kai ki cekele.”

14Ku Lute la katwase silape ki siasilangane ki lalakeini ka ababai, pelaela liniane iya kai, “Kirarimwa katwase, ku Tamatama lri amudu kai ki cekele.” Ai kwini lalasu parwarwaruthale amiamia iniane.

15Sakaliare, ku sasiakawlu belenge warututu ki Lute iya kai, “Kirimwa mailuku ki taelrelresu si tadrusa ka lalakesu ka ababai katwase kai! Amani lu kipaelre numi kai ki cekele kamudu.” 16Ku Lute la kalrikilriki, ai ku Tamatama makalithi iniane, kwini tadrusa la malra bilibili iniane, ki taelrelreini si alrima ki tadrusa ka lalakeini ka ababai, iluku liniane katwase kwini ki cekele. 17Sa mulatadrenga ki cekele, kudra tangea ka sasiakawlu belenge amia kai, “Katwasa mubere! Madha paswalrikulrikudru drele, la madha idrengedrengere ikai valrwalru. Lailadha mwa ka lregelrege anu kai pacai.”

18-19Ai ku Lute amia kai, “Tamatamali, madha piapia kai! Kikai kialibakesu si paralubunga nakwane, si palribulu kai niakeli, madha palailainga naiane mwadaili, kavai lregelrege adaailinga, alau lri kainaku darurwana kavai lai lri kelanga ku sapapacai, la lri kainaku udripinga. 20Wadrelesu kavai ki tikiyane ka cekele? Kai adaili twalai kai, ala nau mwa kavai. Drela, kavai vaeva yai tikiyane ka cekele, ala nau ikai kavai kipalakebe!”

21Kwini lasu la tubalre, “Mathariri, palraingaku muswane, kainaku lri amudu kavai ki tikiyane ka cekele. 22Kirarimwa lailai! Lu kaisu darurwana kavai kainaku lri pwalrimana!” La kamani ku pasi Zuare#19.22 “Zuare” ku pacugane “tikiane” amia. ki Lute kikwini cekele.

Takaamudane ki swa Sudume si swa Gumura

23Sa lrawlrau ku vai, ku Lute wadaruru ka Zuare. 24La pangitutuluku, ku Tamatama la arakai ku kwadaladalai ku balaru patwalai belenge gugu pwa ki cekele Sudume si Gumura. 25Ku Twaumase waamudunga kwini ki drusa ka cekele, palraelre kwini ki drataane, sanaka umawmase, si sanaka wacebeceebe ikai ki kadaengane. 26Ku taelrelre ki Lute la paswalrikudru drele, la aulrudru ka timu.

27Sakakaiyane ki mialrealre, ku Aberahame la kirariimu mwa kudra nataacegeceganeini icucubungu ki Tamatama. 28Kwini lasu la drele paswalebe Sudume si Gumura si palraelre kwini drataane, la drele kwini ki kadaengane twaebebebelre, mia ki ebelre ki talamalamane lu tudilrungu kaingananganai tuebebelre. 29Ai, ku Twaumase sa amudu kwini ki drataane si drusa ka cekele, ngwalringau ki Aberahame, lakamani ku palraingi paubere ki Lute.

Tatwaladhane ki swa Muabe si Amune

30Ku Lute mwakuludru ikai Zuare. La karedele ki tadrusa ka lalakeini taluela mulregelrege, ikai kai kwini ki barungulu. 31Kwini takataka la pelaela ki agini iya kai, “Tarudrawdrangenga ka tamaita; kai kawmasane la kakadrwa ku sawvalai ku lri mwa mitane karudrange, si lri tulalaketa. 32Abwala! Tamalra kai bava si pawngulu ki tamaita, la tamwa iniane apece, si patwalai iniane tulalake.” 33Kwini sakamaungu, la pawngulu ku bava ki tama lini, kwini takataka la mwa iniane tadrusa apece. Ku Lute mabusuku turamuru, ku tapiane kikai kadrwa ku tathingalane.

34Sakakaiyane, kwini takataka la pelaela ki agini iya kai, “Ku maungu tadrusaku ki tamaita apece; kaimaungu tamaalrana ku bava si pawngulu iniane, lasu mwa tadrusa iniane apece. Lu mia kikai, kusu si kwaku lri patwalaita ki tamaita tulalake.” 35Lakamani, kwini sakamaungu la pawngulunga ki Lute, kwini agiagi la mwa tadrusa apece iniane. Kwini lasu mabusukunga paramuru, ku tapiane kikai kadrwa ku tathingalane. 36Miyaiya kai, kikai tadrusa ka lalake ki Lute la tara twalai ki tama lini katawbaliri. 37Kwini takataka la tulalake ku vaeva ku sawvalai, la sunagane pasi Muabe#19.37 “Muabe” ku pacugane “twalai ki ama” amia.; amani ku cucungulane ki swa Muabe ka umawmase kaikameane. 38Kwini agiagi la mialri tulalake ku vaeva ku sawvalai, la sunagane pasi Benami#19.38 “Benami” ku pacugane “lalake ki retesaneli” amia, ku lingau nau ngimia amia ki “Amune” ka vaga ki Hiburu.; amani ku cucungulane ki laumawmase ki swa Amune kaikameane.

Currently Selected:

Tabekacane 19: NDV

Highlight

Copy