Mathayo 23

1Go jam ke duut ku kɔckek piocke, 2yook keek, Ye dugɛɛr ku Parithai aaye reer ne thony de Mothe nom. 3Yen ke dɛ ebɛn ke yiki lɛk we, yaka loi ku yaka muk: ku duɔke luɔiden ye loi; ayiki luel, ku cik ye loi. 4Ee yic, aaye duɔt thiek edot duut ku yiki kan ne kɔc keet; ku keek ne gupken acik ye wek ne ciin tok. 5Luɔiden yiki loi ebɛn ayiki loi bii kɔc ya ŋem. Aaye pulaktiriaiken cɔk dhil, ku yiki buuk ke alɛthken thook cɔk dit, 6ku yiki ɣɔn dit tueŋ ke miɛth nhiar, ku thoc dit ke luek ke gueer, 7ku muɔth ne ɣɔn ke ɣɔc, ku bi kɔc ke ya cɔɔl, Yi Rabi. 8Ku ne we cie cɔɔl Rabi: ee tok yenekee dupionyduɔn; ku we wedhia we ye ŋɛk ke manhe. 9Ku cin ran dɛ yaka cɔk ye wuɔrduɔn ne piny nom; ee tok yenekee Wuɔrduɔn, man ye tɔ nhial. 10Ku duɔke ye coot, wuɔ dudok: ee tok yenekee dudoŋduɔn, Kritho. 11Ku ran ye dit ne weyic, yeneka bi ya ya awunduɔn. 12Raan ebɛn ran ye rɔt cɔk dit, abi ya cɔk koor; ku raan ebɛn ran ye rɔt cɔk koor, abi ya cɔk dit.

13We bi naŋ dhieu, we dugɛɛr, ku Parithai, we kɔc ke adhuɔɔm! ne thiek ci we kɔc thiɛɛk wei ne ceŋ de pan nhialic. We cie lɔ thin ne gupkuɔn, ku yaka kɔc ye lɔ thin gel ne lɔ. 14We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we ɣoot ke diarjɔɔk cam yic, ku yaka lɔŋ cɔk baar ne adhuɔɔm. Yen we bi naŋ lukwei gok.

15We bi naŋ dhieu, we dugɛɛr, ku Parithai, we kɔc ke adhuɔɔm! Ne yuil ye we bar yuil ku piny ba perɔthiluto tok yok; ela cak ye yok, ke cakka ye wen de giɛna wɛr week naarou.

16We bi naŋ dhieu, we dudook ye coor, we man ye jam, Wuɔ raan ebɛn ran ye mel kueŋ ne yekalu, ee ciɛn ke dɛ; ku raan ebɛn ran ye mel kueŋ ne jini de yekalu, ee naŋ kɛny. 17We ci bel ku cak cɔɔr; ye keno dit, ye jini ka ye yekalu e ye jini thiei? 18Ku, Raan ebɛn ran ye mel kueŋ ne kan de koc, ee ciɛn ke dɛ; ku raan ebɛn ran ye mel kueŋ ne miɔc ye kan ne yenom, ee naŋ kɛny. 19We ye coor: ye keno dit, ye miɔc ka ye kat e ye miɔc thiei? 20Yen ran ye mel kueŋ ne kan de koc, ee mel kueŋ ne ye ku ne ka yeke kan ne yenom kedhia. 21Ku ran ye mel kueŋ ne yekalu, ee mel kueŋ ne ye ku ne yen yen man ye ceŋ thin. 22Ku ran ye mel kueŋ ne pan nhial, ee mel kueŋ ne thony de Nhialic ku ne yen yen man ye nyuc ne yenom.

23We bi naŋ dhieu, we dugɛɛr, ku Parithai, we kɔc ke adhuɔɔm! ne juɛr ye we mint ku dil ku kumin juar, ku yaka kathiek ke looŋ waan, go ya luk ku kac de piɔu ku gam. Keekake ee te yaka ke dhiil ne luɔi, ku cak kɔk ye waan. 24We ye dudook ye coor, we ye dhiɛr dhiɛɛm wei ku liɛkka thɔrɔt.

25We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we abiny ku thɛn waak kɔth, ku cik yic thiaŋ ne pɛc ku luɔi rac. 26Yin Paritha ye cɔɔr, kɔn abiny ku thɛn waak yic, ku kaabi ɣɛɛr ne kekɔth eya.

27We bi naŋ dhieu, we dugɛɛr, ku Parithai, we kɔc ke adhuɔɔm! ne ke cit we ɣoot ɣeer ke rɛŋ, man ye piath ne ŋem, ku cik yic thiaŋ ne yuɔm de raan ku ka ce piath kedhia. 28Yenekee cɔɔkduɔn, we ye lajik biyic ne kɔc nyin, ku we ci yic thiaŋ ne adhuɔɔm ku rɛɛc.

29We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we rɛŋ ke nebii buth, ku yaka rɛŋ ke kɔc lajik dheeŋ, 30ku yaka jam, Wuɔ ne wɔ tɔ ɣɔn ne akol ke kuarkuɔ, e kee te kenku ya mat wɔne keek ne rim ke nebii. 31Yen we ye roth lɛadd, wuɔ wɔ ye wɛɛt ke keek kek kɔc eke ye nebii nɔk. 32Yen yaka alep ke kuarkuɔn thiɔŋ. 33We ye karoor, ku yaka mith ke karoor, bak luŋ de giɛna deeny wuɔde? 34Yen ŋɛmka, we yake tuɔc nebii, ku kɔc nyic kaŋ, ku dugɛɛr: ku kɔk ke keek aabakke ya dui ne ɣootkuɔn ke gueer yic, ku yaka ke ŋet ne baai ku baai: 35bi riɛm lajik ebɛn ci kuer ne piny nom bi lɔ ne wekɔth, riɛm de Abel lajik agut riɛm de Dhakaria wen de Barakia, man cak nɔk ne kaam de te de luɛŋ de wei ke kan de koc. 36We ya yɔɔk neyic, Ya keekake kedhia aabi yekuane lɔny.

37Agai ci Jeruthalem, Jeruthalem, man ye nebii nɔk, ku ye kɔc biɔɔk ne kur kɔc ci tuɔɔc enɔŋ en! An ye piɔu dac naŋ ba mithku kuɔɔt yic ci man ye ajith mithke kuɔt ne yewuɔk, ku jaiye. 38Ŋem, ɣondu ee doŋ ne riaakic. 39Yin ya yɔɔk, Ya yin ce ɣa beer ŋem, agut te bin jam, Wu keeyabi athiɛi ya tɔ kene yen, yen man bɔ ne rin ke Bɛnydit.

Currently Selected:

Mathayo 23: LEKJOT

Highlight

Copy