Mathayo 18

1Yekole aci kɔcpiocke lɔ enɔŋ Yecu, ku thiecki, Yi yeŋa dit ne ceŋ de pan nhialic? 2Go mɛnhthi cɔɔl, ku tɛɛu ne keciɛl yic. 3Ku jiɛm, Ye we ya yɔɔk neyic, ya na cak roth beer wel, ku bak ya ciɛt miththii, ke we ci kɔn lɔ ne ceŋ de pan nhialic. 4Yen raan ebɛn ran bi rɔt cɔk ye kuur ci man de yemɛnhthine, yenekee dit de ceŋ de pan nhial. 5Ku ran ye mɛnhthin cit yekene loor ne rincie, e kee ɣa loor. 6Ku ran bi toŋ de keekathii ye ɣa gamke cɔk ye kɔth, e kee ŋuɛɛn ete cene kuur diit de guɛr duɔt e eyeth, bi diir ne bar kolic. 7Piny abi naŋ riaak ne ka yeneke kɔth! ka ke kɔth aabi roth aa dhiɛɛl; ku ran ye ke bɛi abi naŋ riaak! 8Na cɔk ciindu ka cok yi kɔth, ke tɛɛme wei ku cuate wei: aŋuan te leer yin ne piiric wene ɣɔn ci tɛm ka cike ŋoot, ne cuɛt cuɛte yin many ye dhiac wene ciɛn rou ku cok rou. 9Na cɔk nyindu yi kɔth, ke tuk bei, ku cuate wei: aŋuan te leer yin ne piiric wene nyin tok, ne cuɛt cuɛte yin ne giɛna de macic wene nyiin keerou. 10Ŋɛmka roth, kɛlke we bi ya tak arac ne toŋ de keekathiike. We ya yɔɔk, Ya malaikaiken tɔ pan nhial aaye Awa man tɔ nhial ɣoi nyin ne nyindhia. 11Wen de raan ee bɔ bi ke ci maar luɔk. 12Yaka tak wuɔde? te nɔŋe raan amɛl keethiɛrnyiɛny, ku mɛr tok, ke ce thiɛrdheŋuan ku dheŋuan wan, ku leer ne kuur nom, le ke ci maar kɔɔr? 13Na ci ye yok, we ya yɔɔk neyic, e kee piɔu lɔ yum ne yen awɛr thiɛrdheŋuan ku dheŋuan ken maar. 14Yenekee cɔɔkde acie piɔn de Wuɔrduɔn tɔ nhial bi toŋ de keekathiike maar bi liu.

15Na ye wanmuuth kerac luɔi yin, ke yin lɔ nyuɔthe awanyde ne gupkuɔn wepɛc: na ci yi piŋ, ke yin ci naŋ wanmuuth. 16Na cii yi piŋ, ke yin lɔ we ran tok ka rou, bi wɛt ebɛn bi kɔɔc ne thook ke duleek keerou ka diak. 17Ku te reec en keek, ke lɛke kanitha; ku na reec kanitha, ke ne tɔ ke yin ci ran de Juurkɔk ku mejueer. 18We ya yɔɔk neyic, Ya ke dɛ ebɛn ke bak ya deer piiny, abi ya deer pan nhial: ku ke dɛ ebɛn ke bak ya lony piiny, abi ya lony pan nhial. 19We bɛɛrke yɔɔk, Ya na mɛt ren de week piiny ne ke dɛ ebɛn ke bak ya thiec, e kabi luɔi keek ne Awa tɔ pan nhial. 20Te ye kɔc mat keerou ka keediak ne rincie, ke ɣan ye tɔ ne keciɛl yic.

21Ɣɔn ke Petero bɔ, ku thiec, Ye Bɛnydit, bi wanmaath ɣa luɔi kerac ku ba pal en naade? yee agut naadherou? 22Go Yecu yɔɔk, Ye yin caa yook, Ya kacie agut naadherou: ee, naa agut dherou naathiɛrdherou. 23Yen ceŋ de pan nhial ee cit meleŋti, ee nɔŋ piɔu kuɛn de kany kene aluɛkke. 24Ɣɔn ye gɔl kuɛn, ke ran tok cuut en, ran ne ci ye yuɛt ne bianabur thiɛr de talantɔɔn. 25Ku te cin en ke cut en, go bɛnyde jam ye bi ɣaac, ke tiŋde, ku mithke, ku ka tɔ kene yen kedhia, ku bi cuut loi. 26Go aluak piny ciim, ku lɛŋ, ku jiɛm, Ye duk leeth, aabake cuɔl yin kedhia. 27Go bɛny de yealuaŋe go piɔu kac, ku lony, ku pɛl kɛny. 28Ela ke yealuaŋe lɔ biyic, ku le aluaŋ toŋ ye kek lui ke ye yok, ne ci e yuɛt denariɔɔn keethiɛrnyiɛny: ku kuɛk piny, ku dɔm ror, jiɛm, Ye col ka ca yuit. 29Go yealuaŋe go piny ciim, ku lɛŋ, jiɛm, Ye duk leeth aabake cuɔl yin. 30Go ciɛk gam, ela ke le taau ɣon de dom, agut te ben ke ci yuit cool. 31Na ci aluɛk tɔ kene yen yeluɔine ŋem, e ke dhiau piɔth areet, ku lek bɛnyden lɛk ke ci loi ebɛn. 32Go bɛnyde cɔɔl, ku yook, Ye yin ye aluaŋ rac, yin ca pal kɛny wen ebɛn, ne lɔŋ cin ɣa lɔŋ: 33ku yin eya, cii piath ba piɔu kac ne aluaŋ tɔ ke yi, ci man can piɔu kac enɔŋ yin? 34Ku ɣok bɛnyde, ku yin duluuc, agut te ben ke ci yuit cool ebɛn. 35Yenekee cɔɔk bii Awa tɔ nhial ye ya luɔi week eya, te ci ŋɛk ne week manhe ye puɔl ne yepiɔu.

Currently Selected:

Mathayo 18: LEKJOT

Highlight

Copy