Mathayo 13

1Yekole aci Yecu lɔ biyic ɣot, ku nyuuc ne bar yɔu. 2Go dun dit guɛɛr, go lɔ ne riaiic, ku nyuuc; ku kaac duut ebɛn wath thok. 3Go ke jaam ne kajuec ne parabool, jiɛm, Ye ŋɛmka, ŋadi ee lɔ pok, 4ana ye puk, ke kɔth kɔk loony ne dhol kec, go diɛt bɛn ku kuanyeke: 5ku loony kɔk te nɔŋ kur, koor e tiɔp: goki dac kul ne ke cin en tiɔp; 6ana ye akɔl ye ruer, e ke biɔl, yomki ne ke cin kek mei. 7Ku loony kɔk ne kuɔth yic; go kuɔth cil, ku nhiɛceke. 8Ku loony kɔk ne tiɔm piathic, goki luɔk, ye kɔk ya thiɛrnyiɛny, ku ye kɔk thiɛrdhetem, ku ye kake thiɛrdiak. 9Ran nɔŋ yith, ke neke piŋ keek.

10Go kɔcpiocke bɛn ku yookki, Yi yeŋo yin jam we keek ne parabool? 11Go dhuk yook keek, Ye we eka ci yiɛn kacikum ke ceŋ de pan nhial bak ke nyic, ku kakene yiɛn keek. 12Raan ebɛn ran ye naŋ kaŋ, aake yineke ye, ku kabi ya naŋ kajuec kɔk. Raan ebɛn ran ye ciɛn kaŋ, e kabi nyaai enɔŋ en, agut ke tɔ ke ye. 13Yenekee jaam an wɔ keek ne parabool, ne ke yee kek ye ŋem, ku cik ŋem, ku ne ke yee kek ye piŋ, ku cik piŋ, ku cik ye muk. 14Ku ke cii Yithaya lɛk keek ee ya yic, jiɛm,

Ye na ye piŋ, e kabak ya piŋ, ku kacak kɔn muk;

Na ye ŋem, e kabak ya ŋem, ku cakka kɔn dot.

15Ne ke ci keekɔcke piɔth cuai,

Yithken aa lɔ tac ne piŋ,

Aa kenyiin niɛn,

Kɛlke bik ya ŋem ne kenyiin,

Ku yiki piŋ ne keyith,

Ku yiki dot ne kepiɔth,

Ku beerki dhuk,

Ku ba ke cɔk dem.

16Nyiinkuɔn aa thiei, ne ke ye kek yin; ku yithkuɔn, ne ke ye kek piŋ. 17We ya yɔɔk neyic, Ya nebii juec ku kɔc lajik aake ye piɔth naŋ bik ka yakake ŋem ya ŋem, ku cik ke ye ŋem; ku yiki ka yakake piŋ kɔɔr bik ke piŋ, ku cik ke ye piŋ. 18Yen piɛŋka parabol de dupuk. 19Ya na ye raan ye wɛt de ceŋ piŋ, ku cii ye dot, ke kerac ee bɛn, ku yee ke ci puɔk ne yepiɔu nyaai. Yenekee ke ci puɔk ne dhol kec. 20Ku ke ci puɔk te nɔŋ kur, yenekee yen man ye wɛt piŋ, ku yee dac piŋ ne piɔn lɔyum; 21ku ye ciɛn mei, yee yuul emaath; na ye kerac ye bii, ka ŋet ne wɛt, ke dɔc ya kɔth. 22Ku ke ci puɔk ne kuɔth yic ee yen man ye wɛt piŋ; ke ŋueny de kapiiny, ku dhuɔm de naŋ kaŋ aaye wɛt nhiac, ku ci ye luɔk. 23Ku ke ci puɔk ne tiɔm piathice ee yen man ye wɛt piŋ, ku ye dot; yenekee luɔk ye kɔk ya thiɛrnyiɛny, ku ye kɔk thiɛrdhetem, ku ye kake thiɛrdiak.

24Go ke ciɛr parabol dɛ, jiɛm, Ye ceŋ de pan nhial acit ran ci kɔth piath pok domde. 25Ana ye kɔc yi ninki, ke ran nɔŋ ater kene yen bɔ, ku pok wɛl roor ne kɛm ke rap eya, ku jiɛl. 26Ana yi kulki, ku yi loki, ke wɛl roor tul eya. 27Go awuutke bɛn, yen ran de baai, ku yookki, Yi bɛny, kɛne kɔth piath puɔk domdu? cik ben ya wɛl roor teno? 28Go ke yɔɔk, Ye kee ran de ater yene loi en. Go awuut yɔɔk, Yi nɔŋ piɔu buk ke lɔ nyuɛth wei? 29Go jam, Ye aa; na nyuɛthka wɛl roor wei, ke we miit mei ke rap bei. 30Ne ke cil netok agut luɔk. Ku na ye kol e tem, ke an bi duteem yɔɔk, Ya kanke wɛl roor wuɔth bei, ku duɔtka ke bi ke nyop: ku tɛmka rap guŋdie.

31Go ke ciɛr parabol dɛ, jiɛm, Ye ceŋ de pan nhial acit nyin toŋ de muthada, cii raan loom, ku com domde. 32Ke ye ke koor ne nyin kedhia; ela ciil, ke ye ke gok wɛr wal, ku jɔl ya tim, aye diɛt nhial bɛn nyucki ne kerke.

33Go ke lɛk ne parabol dɛ, Ye ceŋ de pan nhial acit awuro, ci tiik loom, ku liɛp ne akuɔp ke cuinic keediak, agut te bik kek ya awuro kedhia.

34Keekake kedhia aaci Yecu ke duut jaam ne parabool; ku kacin ke ci lɛk keek te cin parabol: 35bi ke ci luel ne nebi bi ya yic, jiɛm,

Ye ɣan bi athok ya kuek ne parabol;

An bi kaŋ ya luel ka ci thian ɣɔn gɔɔce piny.

36Go duut waan ku leer ɣot. Go kɔcpiocke bɛn enɔŋ en, ku jamki, Yi nyuɔthe wɔɔk parabol de wɛl roor ke dom. 37Go dhuk jiɛm, Ye ran ye kɔth piath pok ee Wen de raan; 38ku dom ee piny; ku kɔth piath aaye ya wɛɛt ke ceŋ; ku wɛl roor aaye ya wɛɛt ke rɛɛc; 39ku ran de ater ci ke pok ee durieth; ku luɔkden ee kol ciɛn de piny; ku duteem aaye malaikai. 40Acit man yene wɛl roor kuany, ku nyop keek; yeneka bi ya cɔɔk de kol ciɛn. 41Wen de raan abi malaikaike tuɔc, ku bik ke kuɛny bei ne ceŋdeic kedhia kek ka ye kɔc cɔk kɔth, ku kɔc ye awac loi, 42ku bik ke cuat many dit: te bi ya te de dhieu ku nyii de lec. 43Ku kɔc lajik aabi ɣɛɛr ci akɔl ne ceŋ de Wuɔndenic. Nɛke piŋ ran nɔŋ yith.

44Ceŋ de pan nhial acit wenh ci thian domic; cii raan yok ku thiɛn; ku ɣɛɛc ka tɔ kene yen kedhia, ku jɔl dom ɣɔɔc.

45Ceŋ de pan nhial abeer ciɛt thujar ye margariti piath kɔɔr: 46te cen margariti toŋ de weu juec yok, ke lɔ ku ɣɛɛc kaŋ kedhia ka tɔ kene ye, ku ɣɔɔc.

47Ceŋ de pan nhial abeer ciɛt alau, alan ci cuat bɛɛr, go keriɛc wai. 48Ana ci thiaŋ, ke miite wath thok. Ku nyuucki kuɛnyki kapiath toony, ku cuɛtki karac wei. 49Yeneka bi ya cɔɔkde ne kol ciɛn. Malaikai aabi bɛn, ku tekki kɔc rac wei ne kɔc lajik yic, 50ku kaabike cuat many dit: te bi ya te de dhieu ku nyii de lec.

51Go Yecu ke thiec, Ye cak keekake piŋ kedhia? Goki yɔɔk, Yi ee, Bɛny. 52Go ke yɔɔk, Ye yen dugɛɛr kedhia, cike cɔk ye kɔcpiɔcke ke ceŋ de pan nhial, aacit man de ran de baai, man ye loom ne weuke, kathɛɛr ku kajot.

53Na ci Yecu keeparaboolke thol, ke jiɛl etɛɛn. 54Ku bii panden, ku weet keek luaŋden de gueer, agut te gɛi kek, jamki, Yi ne yerane yok nyiny de kaŋ teno, ku kadit yeeke loi? 55Ci ye wen de aten de tiim yekene? ci man ye cɔɔl Mari? ku watmɛthken, yi Jakob, ku Jothep, ku Thimon, ku Judath? 56Ku nyirakɛcke, cik tɔ kene wɔ kedhia? ne yerane yok keekake kedhia teno? 57Ku cik kɔth ne yen. Go Yecu ke yɔɔk, Ye nebi acie ciɛn dheeŋ, ee pinyden ku panden kepɛc. 58Ee ken kadit juec loi eeti ne ke ken kek ye gam.

Currently Selected:

Mathayo 13: LEKJOT

Highlight

Copy