San Lucas 11

Sañaꞌa Jesús ndia itaꞌan xiꞌin ra ña kaꞌan ndia xiꞌin Ndioxi

1Saa kuu iin kii ke̱e Jesús kuaꞌan ra kaꞌan ra xiꞌin Ndioxi. Ra ta ndiꞌi ndikaꞌan ra xiꞌin Ndioxi, ra saa ndikaꞌan iin ra itaꞌan xiꞌin ra kachi ra saa xiꞌin ra:

―Tata, sa ña mani sañaꞌa kun nduꞌu kaꞌan ndi xiꞌin Ndioxi, ta xa ra Juan, ra sakuchi yuvi, ña sañaꞌa ra ndia xitaꞌan xiꞌin ra ña kaꞌan ndia xiꞌin Ndioxi ―kachi ra xiꞌin Jesús.

2Saa ndakuiin Jesús, kachi ra saa xiꞌin ndia:

―Ta kaꞌan ndo xiꞌin Ndioxi, ra suꞌva ke na kachi ndo xiꞌin ra:

Tata ndi, ra iyoo ndivi, yii ni na koo kivi kun.

Ra na kixi kun kaꞌndia kun chiñu nuu ña yuuvi yoꞌo.

Ra ta xa kun ndivi ke na sa kun nuu ñuꞌu yoꞌo va.

3Ra iin takundiꞌi kii na taxi kun

ña xiniñuꞌu nuu ndi kuxi ndi;

ra na kumäni ña.

4Ra na sakaꞌnu ini kun xaꞌa kuachi ndi,

ta kuꞌva ^xa mii ndi ña ^xa kaꞌnu ini ndi

xaꞌa kuachi yuvi na ^xa ña väꞌa xiꞌin ndi.

Ra täxi kun koyo ndi ndaꞌa ña väꞌa;

chi na ndakiꞌin va kun nduꞌu ndaꞌa ña,

kachi ndo xiꞌin Ndioxi ―kachi Jesús xiꞌin ndia.

5Ra saa ndikaꞌan ka ra xiꞌin ndia kachi ra saa:

―Tu ndia iin ndo ra iyoo iin ra itaꞌan xiꞌin ndo, na kachi yo. Ra na kee ndo kuꞌun ndo veꞌe ra iin sava ñuu. Ra kaꞌan ndo xiꞌin ra, kachi ndo saa: “Ñani, na chindiee kun loꞌo uni xita yuꞌu. 6Saa chi iin ra itaꞌan xiꞌin yu sakan xaa veꞌe yu, ra köo ña taxi yu kuxi ra”, kachi ndo. 7Ra saa ndakuiin ra itaꞌan xiꞌin ndo kan, kachi ra saa: “Sandïꞌi kun yuꞌu ñani, chi xa ndasi tuun va yu yeꞌe. Ra xa ra kixi va kuvi yu xiꞌin seꞌe vali yu, ra küvi ndakoo yu taxi yu ña ndaꞌa kun”, na kachi ra xiꞌin ndo. 8Ra tu na ndakoo ra, ra süvi xaꞌa ña itaꞌan ra xiꞌin ndo ke ndakoo ra taxi ra ña ndaꞌa ndo. Chi xaꞌa ña ndiee ni sandiꞌi ndo ini ra, ña kani ndaꞌa ndo yeꞌe va ra ke, ndakoo ra taxi ra ña xiniñuꞌu nuu ndo ndaꞌa ndo. 9Ña kan ke kaꞌan yu xiꞌin ndo vichin: Ra na nduku ndo ña kumani nuu ndo nuu Ndioxi, ra taxi va ra ña ndaꞌa ndo; ra na nanduku ndo ña xiniñuꞌu nuu ndo, ra chindiee taꞌan va ra xiꞌin ndo ña ndaniꞌi ndo ña; ra na kani ndaꞌa ndo yeꞌe, ra ndakuiña va ra yeꞌe nuu ndo. 10Chi na nduku ñaꞌa ña kumani nuu na nuu Ndioxi, ra niꞌi va na ña; ra na nanduku ña, ra ndaniꞌi va na ña. Ra na kaꞌan xiꞌin ra, ra ndakuiña va ra yeꞌe nuu na.

11’Ra tu ndia ndoꞌo na iyoo seꞌe, ra na nduku na xita nuu ndo kuxi na, ¿ra ama taxi ndo yuu ndaꞌa na kaxi na? Ra tu nduku tu na tiaka nuu ndo kaxi na, ¿ra ama taxi tu ndo koo ndaꞌa na kaxi na? 12Ra tu ndivi tu na nduku na nuu ndo kaxi na, ¿ra ama taxi tu ndo tisuꞌma ndaꞌa na kaxi na, su täxi ndo ri? 13Saa chi ndoꞌo, ra vaꞌa ni yuvi kuachi kuvi va ndo, ndi su xini va ndo taxi ndo ña vaꞌa ndaꞌa seꞌe ndo. ¡Ra ña kuu Tata yo Ndioxi, ra vaꞌa, ra köo ndia nii kuachi, ña kan ke kundaa kaxi va ini yo ña taxi va ra ña vaꞌa ni ña kuu Tachi Yii ra ndaꞌa takundiꞌi yuvi na nduku ña nuu ra! ―kachi Jesús xiꞌin ndia itaꞌan xiꞌin ra.

Chikaa na kuachi siki Jesús ña kuu mii ra ndie̱e̱ kiti ndivaꞌa

14Ra saa tava Jesús tachi ndivaꞌa ini iin tiaa ra miꞌmi. Ra ta kita suꞌva ña ndivaꞌa kan, saa ra ndikun ndakaꞌan va ra, ra ndakanda ka vi ini yuvi na xini ña nduvaꞌa ra. 15Ra saa ndikaꞌan sava na kachi na saa:

―Ndie̱e̱ ri Beelzebú, mii ri kuchee vaꞌa nuu takundiꞌi ña ndivaꞌa va ke iyoo xiꞌin ra, ña kan ke vaꞌa tava ra tachi ndivaꞌa. ―^kachi na xaꞌa Jesús.

16Ra sava tu na kaꞌan xiꞌin Jesús, ña na sa ra iin ña ndichi nuu ndivi va kuni na, ña ixtondoso na ra, ra a ndixa xiꞌin ndie̱e̱ Ndioxi ke tava ra tachi ndivaꞌa káꞌán na, chi ndikandïxa na ra. 17Ra xa kundaa kuaꞌa va ini Jesús ña ndakani ini na. Ra saa ndikaꞌan ra xiꞌin na kachi ra saa:

―Iin ñuu nuu kataꞌan xiꞌin taꞌan mii yuvi, ra kuchüun vi na ña koo na, chi ndiꞌi va xaꞌa na. Ra saa tu iin veꞌe nuu kataꞌan xiꞌin taꞌan mii va yuvi, chi kuchüun na koo vi na, chi ndiꞌi va xaꞌa na. 18Ra kuꞌva saa ke iyoo tu ri ndivaꞌa va, saa chi tu na ndukuiin ri, ra kanitaꞌan ri xiꞌin taꞌan mii ri. ¿Ra a kuchuun ri koo ri, tuvi ndo? Ra suꞌva ke kachi yu xiꞌin ndo, saa chi kaꞌan ndo ña tava yu tachi ndivaꞌa xiꞌin ndiee ri ndivaꞌa. 19Ra tu ndixa xiꞌin ndie̱e̱ kiti ñaꞌa ke tava yu tachi ndivaꞌa, na kachi yo, saa ra, ¿yoo ndiee ke tava tu na itaꞌan xiꞌin ndoꞌo tachi ndivaꞌa, tuvi ndo? Ra na kundaa ini ndo chi süvi saa iyoo ña. Ra mii na ñaa na sayukun kuachi xiꞌin va ndo, saa chi na yaꞌa xini va kuvi ndo. 20Saa chi yuꞌu, ra xiꞌin ndie̱e̱ Ndioxi va ke tava yu tachi ndivaꞌa. Ra na kundaa ini ndo chi xa xaa va Ndioxi ña kaꞌndia ra chiñu nuu ndo ―kachi Jesús xiꞌin na.

21Ra saa ndikaꞌan ka ra xiꞌin na kachi ra saa:

―Kiti ñaꞌa, ra ta iyoo iin tiaa ra ndaku ni, saa va ke iyoo ri. Saa chi tiaa ra ndaku ni, ra iin suꞌva va iyoo ra xiꞌin ichi ña täxi ra kiꞌvi ra kuiꞌna sakuiꞌna ra veꞌe ra. 22Ndi su tu na kixi inka ra ndaku vaꞌa ka nuu ra, ra ra ndaku kan kuvi ra sa tiaa va, ra kindiaa ndiꞌi va ra ñaꞌa ra. Ra ndataꞌvi ra ña xiꞌin na itaꞌan xiꞌin va ra ―kachi Jesús xiꞌin na.

23Ra saa ndikaꞌan ka Jesús kachi ra saa:

―Na xïin kuꞌun ndie̱e̱ yu, ra kuachi va ke iyoo na xiꞌin yu. Ra na xïin sakee xiꞌin yu, ra na kan kuvi na sandiꞌi xaꞌa chiñu va yu ―kachi ra.

^Nandiko tuku va tachi ndivaꞌa nuu ^kee ña

24Ra saa ndikaꞌan ka Jesús kachi ra saa:

―Ta xa kee tachi ndivaꞌa ini iin yuvi ra suꞌva va ke xa ña: ^kee ña ra ndakiꞌin ña kuaꞌan ña iinii kuvi iku yuu, chi nuu köo ndia nii ñaꞌa, nuu ichi ni, ña xika nduku ña nuu koo ña ndakindiee ña, ndi su ndanïꞌi ka ña nuu koo ña. 25Saa ra kaꞌan ña xiꞌin mii ña kachi ña saa: “Vaꞌa ka va na nandiko yo veꞌe chi nuu kee yo”, kachi ña. Ra saa te nandiko ña ndaxaa ña nuu ndixiyo ña, ra ndia nii ka ñaꞌa köo veꞌe kan, ra vaꞌa ka vi ndatiꞌvi na, ra vii ka vi nduu veꞌe kan xa na. 26Ra saa ^ndakiꞌin tuku tachi ndivaꞌa kan kuaꞌan ña, ra ^nanduku ña inka uxa nuu tachi ndivaꞌa, ña kini ni ka nuu mii ña ^xaa xiꞌin ña, ra saa ^nandee takundiꞌi ña ini veꞌe kan, ña koo ña. Saa ra yuvi na ndoꞌo saa ña xindikaa tachi ndivaꞌa ini na, ra na ndiee ka ndasa va kuvi na, nuu ña ndixiyo na ta yachi ―kachi Jesús xiꞌin na.

Yuvi na vaꞌa ni ka kee

27Ra ta sakan sandiꞌi Jesús ndikaꞌan ra xiꞌin na, saa ra tuꞌva ndikaꞌan va iin ñaꞌa ña ndikaa tiañu yuvi kan kachi ña saa xiꞌin ra:

―Vaꞌa ni kee ñaꞌa ña sakaku yoꞌo, ra sakuaꞌnu ña yoꞌo ―kachi ña xiꞌin ra.

28Ra saa ndakuiin Jesús kachi ra saa:

―Vaꞌa ni ka va kee yuvi na xini soꞌo tuꞌun Ndioxi, ra kandixa na ña kaꞌan ra xiꞌin na ―kachi ra.

Nduku yuvi na xïin kandixa ña xituꞌun nuu Jesús

29Ra saa kuu ra kuaꞌa ka vi yuvi xaꞌa ^ndakutaꞌan nuu iin Jesús, ra saa ndikaꞌan ra xiꞌin na kachi ra saa:

―¡Ndivaꞌa ni ini yuvi na ndee tiempo vichin! Chi nduku na seña nuu yu, ña kuni na kotondoso na yuꞌu. Ndi su ndia nii ka seña sä yu kuni na. Chi ña kuni na kuvi taꞌan ña ndoꞌo ra Jonás xinaꞌa va. 30Chi ta kuꞌva ndoꞌo ra Jonás, ra ndikaꞌan tuꞌun yuꞌu Ndioxi xinaꞌa, ña ndixikuu ra iin seña nuu yuvi väꞌa, na ñuu Nínive, ra saa ke ndoꞌo tu yuꞌu, ra xaa yoꞌo va, kuni yuvi na ndee tiempo vichin. 31Ra kii ña sandaku Ndioxi kuachi na yuuvi yoꞌo, saa ke ndakundichi tu ña reina ña kee chi nínu̱ nuu kaꞌan na kuu sur, ña taxi ña kuachi xaꞌa ndo. Chi xïin ndo kandixa ndo ña kaꞌan yu. Saa chi ña reina kan, ra kani ni va ke̱e ña kixi ña xini soꞌo ña tuꞌun ndichi ña sakuaꞌa ra rey Salomón na xinaꞌa. Ra na kundaa ini ndo, chi kaꞌnu ni ka va ra iin yoꞌo vichin nuu ra rey Salomón, ra xïin ndo kuni soꞌo ndo ña kaꞌan ra. 32Ra saa ke sa tu na ñuu Nínive va, chi taxi tu na kan va kuachi xaꞌa ndoꞌo na ndee tiempo vichin, te xa na xaa kii ña sandaku Ndioxi kuachi na yuuvi yoꞌo. Chi na ñuu Nínive, ra nandiko va ini na nuu Ndioxi ta xini soꞌo na, ña ndikaꞌan ndoso ra Jonás, ra na kundaa ini ndo, chi kaꞌnu ni ka va ra iin yoꞌo vichin nuu ra Jonás, ra xïin ndo nandiko ini ndo ―kachi Jesús xiꞌin na.

Ta iyoo ñuꞌu kàà saa iyoo nduchi nuu yo

33Ra saa ndikaꞌan ka ra xiꞌin na kachi ra saa:

―Yuvi na ndatuun ñuꞌu, ra chikäa seꞌe na ña, ra nii kuëe chindiee tu na iin xikoꞌo va nuu ña. Chi nuu sukun va chinduꞌu na ña, ra saa ke vaꞌa yeꞌe nuu takundiꞌi na kuaꞌan kiꞌvi veꞌe. 34Ra saa ke iyoo tu nduchi nuu va yo, saa chi ta iyoo ñuꞌu ña tuun, va ke iyoo ña. Ra tu ña vaꞌa kuvi ña, saa ra yeꞌe ndiꞌi tu iki kuñu va yo, ra tu ña väꞌa va kuvi tu nduchi nuu yo, saa ra nuu ñaa va iyoo iki kuñu yo. 35Ña kan ke na kiꞌin ni ndo kuenda xiꞌin mii ndo xiꞌin ñuꞌu ña yeꞌe nuu ndo; chi koto ndaꞌva ña, ra kuñaa ndiꞌi nuu iki kuñu ndo. 36Saa chi tu iinii saa iki kuñu ndo ke yeꞌe, ra ndia nii loꞌo ka ña ñaa köo xiꞌin ña, ra saa ke vaꞌa kuni kaxi ndo takundiꞌi va ñaꞌa, ra ta kuꞌva iyoo ñuꞌu ña tuun veꞌe, saa ke na koo ndo ―kachi Jesús xiꞌin na.

Kaꞌan Jesús xiꞌin ndia fariseo xaꞌa chiñu kiꞌvi ña xa ndia

37Ra saa te sandiꞌi Jesús ndikaꞌan ra, ra saa ndikaꞌan iin ra fariseo xiꞌin ra ña na kuꞌun ra kuxi ra xiꞌin ra veꞌe ra. Ra saa ndixaa Jesús ndikiꞌvi ra veꞌe ra, ra ndakunduꞌu ra nuu mesa xiꞌin ra. 38Ra nindäꞌa vi Jesús ra ndakunduꞌu ra. Saa ra ndakanda ka vi ini ra fariseo kan xini ra ra ña nindäꞌa ra, chi ña yunaꞌa ndia fariseo kan, ra xiꞌna ka va ndaꞌa ndia a saa xixi ndia. 39Saa ra kundaa va ini Jesús ña ^ndakani ini ra fariseo kan, ra saa ndikaꞌan ra xiꞌin ra, kachi ra saa:

―Ndoꞌo, ndia fariseo, ra ta iyoo koꞌo xiꞌin vaso ña ndakatia na sata, ra chi ini tu ña yakua va, saa iyoo ndo. Saa chi sata va ndo ke savi ni ñaꞌa, ndi su nima ndo, ra iin chitu ndaa va ña kuiꞌna, xiꞌin ña kini. 40¡Ra Kiꞌvi ni ndo!, saa chi, ¿a kundäa ini ndo Ndioxi va kuvi ra xavaꞌa iki kuñu ndo, ra xavaꞌa tu ra nima va ndo? 41Ña kan ke tu ndinuni ni nima ndo na taxi ndo ñaꞌa ndaꞌa na ndaꞌvi, ra saa ke kindoo vaꞌa ndo nuu Ndioxi.

42’Ndi su, ¡Ndaꞌvi ni ndoꞌo, ndia fariseo!, chi xuꞌun loꞌo ña kiꞌin ndo xaꞌa iku menta, xiꞌin takuu ruda, xiꞌin ndia ndia ka iku, va ke chaꞌvi ndo nuu. Ndi su ndïꞌi vi ini ndo ña sa ndo ña ndaku xiꞌin yuvi taꞌan ndo; ra ni küꞌvi tu ini ndo xini ndo Ndioxi va. Ra ña xiniñuꞌu sa ndo ke na kuꞌvi ini ndo kuni ndo Ndioxi, ra nii na näa tu ini ndo ña chaꞌvi ndo nuu ñaꞌa ña kuu mii va ndo.

43’¡Ra ndaꞌvi ni ndoꞌo, ndia fariseo!, saa chi ta kuaꞌan ndo veꞌe ñuꞌu ra kuni ni ndo kundee ndo tiayu na kunaꞌnu; ra saa tu ta xika ndo nuu yaꞌvi va, saa chi kuni ni ndo ña na satoꞌo yuvi ndoꞌo.

44’¡Ra ndaꞌvi ni ndoꞌo, ndia fariseo!, saa chi ta iyoo yavi nuu ñuꞌu ndii ña kuëe ñaꞌa tuni ka, ra yaꞌa yuvi xañu na ña kuaꞌan va na, chi kundäa ini na, ndi su xa kuyakua va na, ra saa va ke iyoo ndo ―kachi Jesús.

45Ra saa ndakuiin iin ra maestro sañaꞌa ndiayu Ndioxi, kachi ra saa:

―Tata Maestro, ña kachi kun saa, ra ndia nduꞌu va kuvi ndi yaꞌa yuꞌu kun xiꞌin ―kachi ra.

46Saa ndakuiin Jesús, kachi ra saa xiꞌin ra:

―¡Saa iin tu ndoꞌo, ndia sañaꞌa ndiayu Ndioxi va! Saa chi sakuiso ndo yuvi iin ñaꞌa ña kundiëe na xiꞌin; ra mii tu ndo, ra ndia nii loꞌo ndïꞌi ini ndo kuiso ndo ña.

47’¡Ra ndaꞌvi ni ndo! Saa chi ndasavaꞌa ndo kaka na ndikaꞌan tuꞌun yuꞌu Ndioxi xinaꞌa, ra mii va tu na xii xikua ndo kuvi na xaꞌni ñaꞌa. 48Ra ña ndasavaꞌa ndo kaka na vichin, ra kuni kachi ña saa, ña iin yuꞌu kuvi va ndo xiꞌin na xii xikua ndo; chi na kan kuvi na xaꞌni ñaꞌa, ra ndoꞌo tu ndasavaꞌa kaka va na.

49’Ña kan ke ndichi ni ndikaꞌan Ndioxi kachi ra saa: “Tiꞌvi yu na kuꞌun na kaꞌan ndoso na tuꞌun yu, ra tiꞌvi tu yu na xika chiñu nuu va yu kuꞌun na nuu na ñuu Israel, ra sava na kaꞌni na; ra sava tu na taxi va na”, kachi ra xaꞌa ndo. 50Ra ndoꞌo, na ndee vichin kuvi na nduku Ndioxi kuenda nuu xaꞌa nii tu ndia ndikaꞌan tuꞌun yuꞌu Ndioxi te yachi, te sakan ndixkunduꞌu ña yuuvi, iin saa ndia vichin va. 51Ra ndia xaꞌa nii ra Abel, iin saa ndia xaꞌa nii ra Zacarías ra ndikaꞌan tuꞌun yuꞌu Ndioxi xinaꞌa, ra xaꞌni na nuu altar yii ini veꞌe ñuꞌu kaꞌnu, xiꞌin nuu xaꞌni na kiti ri soko na nuu Ndioxi. Ra xaꞌa ndia yoꞌo ke kaꞌan Ndioxi kuachi nuu ndoꞌo, na ndee tiempo vichin ―kachi Jesús.

52Ra saa ndikaꞌan ka Jesús xiꞌin ndia kachi ra saa:

―¡Ndaꞌvi ni ndoꞌo ndia sañaꞌa ndiayu Ndioxi! Saa chi xa iyoo va ña xiña ña ndichi nuu ndo, ña vaꞌa na kiꞌvi ndo yeꞌe Ndioxi, ndi su xïin ndo kiꞌvi ndo, ra nii täxi tu ndo kiꞌvi inka yuvi, na kuni kiꞌvi va ―kachi ra.

53Ra te sandiꞌi Jesús ndikaꞌan ra tuꞌun yoꞌo, saa ra ndisaa ka vi ini ndia fariseo xiꞌin ndia maestro ndia sañaꞌa ndiayu Ndioxi xini ndia ra. Ra saa xaꞌa ndia keꞌe taꞌan ndia xiꞌin ra, ña ndindakatuꞌun ni ndia ra. 54Saa chi kuni ndia ña na kaꞌan ra iin tuꞌun kiꞌvi te ndatuꞌun ra. Ra saa ke kuchuun ndia taxi ndia kuachi xaꞌa ra nuu na chiñu.

Currently Selected:

San Lucas 11: mxvNT

Highlight

Copy