San Juan 21

Ndita Jesús nuu uxa ndia xitaꞌan xiꞌin ra

1Ra te ndiꞌi kuu takundiꞌi ña yoꞌo, saa ndita tuku va Jesús nuu ndia xitaꞌan xiꞌin ra, chi nuu ndikaa mini ra nani Tiberias. Ra suꞌva ke xa ra te ndita ra nuu ndia: 2ra saa kuu ra Simón Pedro, nduꞌu ra xiꞌin ra Tomás, ra kaꞌan na kuu kuati, xiꞌin ra Natanael, ra ñuu Caná ña ndikun ndiaa chi Galilea, xiꞌin ndia seꞌe ra Zebedeo, xiꞌin inka uvi ndia xitaꞌan xiꞌin Jesús. 3Ra saa ndikaꞌan ra Simón Pedro, xiꞌin ndia kachi ra saa:

―Na kuꞌun yu kachiꞌi yu ―kachi ra.

Ra saa ndakuiin ndia, kachi ndia saa:

―Kuꞌun va ndi xiꞌin kun ―kachi ndia xiꞌin ra.

Ra saa kee ndia ndixaꞌan ndia nandaa ndia itun xika nuu mini, ndi su ñuú kan, ra iin niñuu ndaa va ndixika ndia, ndi su ndia nii tiaka ndinïꞌi ndia. 4Ra te xa kuaꞌan tuvi, saa ndixaa Jesús yuꞌu tiakuii kan, ra ndia xitaꞌan xiꞌin ra, ra nindäkuni vi ndia ra ña kuu ra Jesús. 5Ra saa ndikaꞌan ra xiꞌin ndia, kachi ra saa:

―Ndia kuachi, ¿a täan tiin ndo loꞌo tiaka kaxi yo? ―*kachi ra.

Ra saa ndakuiin ndia, kachi ndia saa:

―Köo vaꞌa vi ri ―*kachi ndia.

6Saa ndikaꞌan ra xiꞌin ndia, kachi ra saa:

―Sakoꞌni ndo inu ndo, chi xiin kuaꞌa itun ñaa, ra niꞌi va ndo ri ―*kachi ra.

Ra saa sakoꞌni ndixa va ndia inu ndia, ra tiaa ni va kuaꞌa tiaka sakakuꞌun ña, ra nii ndikundiëe ndia tava ndia ña, ini tiakuii kan. 7Saa ra ndikaꞌan va iin ra xitaꞌan xiꞌin Jesús, ra kuꞌvi ni ra xini ra, kachi ra saa xiꞌin ra Pedro:

―¡Tata yo Jesús va kuvi ra! ―*kachi ra.

Ra ta xini soꞌo ra Simón Pedro tuꞌun kan, saa ra ndikun ndakundixi va ra tikoto ra, ra ndava niꞌni ra ini tiakuii kan kuaꞌan ra ndakitaꞌan ra xiꞌin Jesús va. 8Ra ndia sava kan nindoo vaxi xiꞌin itun kan va, ra ndia kañuꞌu va ndia inu ndia vaxi ndia, saa chi iin chitu ndaa va ña xiꞌin tiaka; ra kuꞌva iin ciento metro ka vi ke kumani, ra saa ndakoyo ndia yuꞌu mini kan. 9Ra te nuu suꞌva ndia itun kan, ra saa xini ndia ña vaꞌa ka vi ninduꞌva tikayu ñùꞌù, ra xa nduꞌu va iin tiaka yatan ri nuu ña, ra saa tu xita va. 10Saa ndikaꞌan Jesús xiꞌin ndia, kachi ra saa:

―Kuaꞌan kiꞌin ndo, tiaka ri sakan tava ndo ―*kachi ra.

11Ra saa nandaa ra Pedro ini itun kan, ra saa kañuꞌu ra inu kan; ra kita ra xiꞌin ña ndia chi nuu ichi. Ra iin chitu ndaa ña xiꞌin tiaka kan, ra naꞌnu ka vi ri, ra saa ndakaꞌvi ndia ri, ra iin ciento uvi xiko uxi uni vi kuvi ri, ra vaꞌa ni vee ni va ri, ndi su nindäta vi inu kan xiꞌin ri. 12Ra saa ndikaꞌan Jesús xiꞌin ndia, kachi ra saa:

―Naꞌa ndo, ra kasini ndo ―*kachi ra.

Ra ndia nii ndia xitaꞌan xiꞌin Jesús, ndixändiee ini ña ndakatuꞌun ndia yoo kuvi ra, saa chi xa kundaa va ini ndia, ña kuu ra Jesús. 13Ra saa kiꞌin Jesús xita, ra taxi ra ña ndaꞌa ndia, ra saa tu tiaka va.

14Ra xa ichi uni va ke ^ndita Jesús nuu ndia xitaꞌan xiꞌin ra, ña ndatiaku ra vichin.

Ndakatuꞌun Jesús ra Simón Pedro uni ichi

15Ra te ndiꞌi sasini ndia, ra saa nindakatuꞌun Jesús ra Simón Pedro, kachi ra saa:

―Simón, seꞌe ra Jonás, ¿a kuꞌvi ni ka ini kun xini kun yuꞌu, nuu ndia sava yoꞌo? ―*kachi ra.

Ra saa ndakuiin ra Pedro, kachi ra saa:

―Tata, xa kundaa ini mii va kun, ña kuꞌvi ni va ini yu, xini yu yoꞌo ―*kachi ra.

Ra saa ndikaꞌan Jesús, kachi ra saa xiꞌin ra:

―Saa ra kondiaa ndikachi vali sana yu ―*kachi ra.

16Ra saa nindakatuꞌun tuku va Jesús ra Pedro, ichi ña uvi, kachi ra saa xiꞌin ra:

―Simón, seꞌe ra Jonás, ¿a kuꞌvi ni ini kun xini kun yuꞌu? ―*kachi ra.

Ra saa ndakuiin ra Pedro, kachi ra saa:

―Kuꞌvi va ini yu xini yu yoꞌo, Tata, ra xa kundaa tu ini mii va kun, ña kuꞌvi ni ini yu xini yu yoꞌo ―*kachi ra.

Ra saa ndikaꞌan Jesús xiꞌin ra, kachi ra saa:

―Saa ra na kondiaa va kun ndikachi vali sana yu ―*kachi ra.

17Saa ra nindakatuꞌun tuku va Jesús ra Pedro, ichi ña uni, kachi ra saa xiꞌin ra:

―Simón, seꞌe ra Jonás, ¿a kuꞌvi ni ini kun xini kun yuꞌu? ―*kachi ra.

Saa ra kusuchi va ini ra Pedro, ña xa ndixinu uni ichi ndakatuꞌun Jesús ra, xaꞌa ña, a kuꞌvi ini ra xini ra ra. Ra saa ndakuiin ra, kachi ra saa:

―Tata, mii kun kuvi ra kundaa ini xaꞌa takundiꞌi va ña, ra kundaa va ini kun, ña kuꞌvi ni va ini yu xini yu yoꞌo ―*kachi ra xiꞌin Jesús.

Ra saa ndikaꞌan Jesús xiꞌin ra, kachi ra saa:

―Saa ra kondiaa ndikachi vali sana yu ―*kachi ra.

18Saa ndikaꞌan ka Jesús xiꞌin ra Pedro, kachi ra saa:

―Ña ndixa ke kaꞌan yu xiꞌin kun: chi te ndixiyo itia kun, ra vaꞌa ndakundixi mii va kun tikoto kun, ra ndixika kun chi nuu kuni mii va kun, ndi su te xa na kutoꞌo kun, ra ndia ndaꞌa va kun sandakaa kun, ra inka va na sandakundixi tikoto yoꞌo, ra kundiaka na yoꞌo, kuꞌun kun nuu küni kun kuꞌun va kun ―*kachi ra.

19Ña yoꞌo ke ndikaꞌan Jesús xiꞌin ra Pedro, ña vaꞌa na kundaa ini ra, ndia kuꞌva ke kaꞌni na ra, ra xiꞌin ña kuvi ra ke ndasakaꞌnu ni ka va ra Ndioxi.

Ra te ndiꞌi ndikaꞌan Jesús tuꞌun yoꞌo, ra saa ndikaꞌan ka ra xiꞌin ra Pedro, kachi ra saa:

―Kundikun yuꞌu ―*kachi ra.

Kaꞌan Jesús xaꞌa ra xitaꞌan xiꞌin ra ra kuꞌvi ni ini ra xini ra xiꞌin ra Pedro

20Ra te ndikokuiin ra Pedro ndakutoꞌni ra, ra saa xini ra ndikun ra xitaꞌan xiꞌin Jesús, ra kuꞌvi ni ini ra xini ra, kuaꞌan ra sata ndia. Ra ra yoꞌo kuvi tu ra nindakatuꞌun Jesús, te xindee ndia xixini va ndia, ta kachi ra suꞌva: “¿Yoo ku na ndataxi yoꞌo, ndaꞌa na saa ini, Tata?” ―*kachi ra. 21Ra saa ndikaꞌan ra Pedro kachi ra saa, xiꞌin Jesús:

―Tata, ¿ni ke ndoꞌo tu ra yoꞌo? ―*kachi ra.

22Saa ndakuiin Jesús, kachi ra saa xiꞌin ra:

―Tu kuni yu kutiaku ra, ra kutiaku va ra, ndia kii te na ndiko yu kixi tuku yu ña yuuvi yoꞌo va, ¿ra ni ke ndoꞌo yoꞌo ndiꞌi ini kun? Na kundikun yuꞌu va ―*kachi ra.

23Ra xaꞌa ña kan ke, ndindutia ndoso tuꞌun nuu takundiꞌi na ndikun sata Jesús, ña küvi ra xitaꞌan xiꞌin Jesús yoꞌo. Ndi su ndikäꞌan Jesús ña küvi ra, chi suꞌva va ke kachi Jesús: “Tu kuni yu kutiaku ra, ra kutiaku va ra, ndia te na ndiko tuku yu kixi yu ña yuuvi yoꞌo va, ¿ra ni ke ndoꞌo yoꞌo, ndiꞌi ini kun?”, kachi ra.

24Ra mii ra xitaꞌan xiꞌin Jesús yoꞌo, kuvi ra ndakuiin va xaꞌa ña yoꞌo, ra suvi mii ra kuvi tu ra tiaa va ña. Ra kundaa va ini ndi, chi mii ña ndaa va ke kaꞌan ra.

25Ra iyoo kuaꞌa ni ka va ña xa Jesús, ra tu ta iin, ta iin ña nditiaa na, saa ra kïta vi nuu iinii saa ña yuuvi yoꞌo, kundee tutu ña tiaa na. Saa iyoo va ña.

Currently Selected:

San Juan 21: mxvNT

Highlight

Copy