San Juan 20

Kii ña ndatiaku Jesús

1Ra ñaꞌa ni domingo, kii ña kiꞌin xaꞌa semana te kumani ka kana kuaꞌa xaꞌa ndivi, ke kee ña María, ña kee ñuu Magdala ndixaꞌan ña xitoꞌni ña, yuꞌu yavi nuu chikaa na iki kuñu Jesús. Ra te ndixaa ña, ra xa ndixikutiaꞌa va yuu chee ña ndasi yuꞌu yavi kan xini ña. 2Ra saa nandiko ña, ra xinu ña ndixaꞌan ña ndatuꞌun ña xiꞌin ra Simón Pedro ra xitaꞌan xiꞌin Jesús, ra saa tu xiꞌin inka ra xitaꞌan xiꞌin Jesús ra kuꞌvi ni ini ra xini va ra, ra kachi ña saa xiꞌin ndia:

―Ndixaꞌan va na ndatava na iki kuñu Tata yo ini yavi kan, ra kundäa ini yo, ndia mii ndixaꞌan na ndiaka na ña ―*kachi ña.

3Ra saa ndakiꞌin ra Pedro xiꞌin inka ra xitaꞌan xiꞌin Jesús kan kuaꞌan ndia kutoꞌni ndia ini yavi kan. 4Ra xinu uvi saa va ndia kuaꞌan ndia; ndi su ndiee ni ka va xinu inka ra xitaꞌan xiꞌin Jesús kan, nuu ra Pedro, ra ra kan kuvi ra, kama ka ndixaa va yuꞌu yavi kan. 5Ra saa ndakandiee ra xitoꞌni ra ini yavi kan, ra ndia tikoto ña xisukun va Jesús ke ndee xini ra, ndi su ndikïꞌvi vi ra ini yavi kan. 6Ra saa ndikun tu ra Simón Pedro va ndixaa ra yuꞌu yavi kan, saa ra ndikun ndikiꞌvi ra ini yavi kan kuaꞌan va ra, ra ndia tikoto va ke ndee xini tu ra kan va; 7ra xini tu ra tikoto ña xisuvi xini Jesús va ndee ña, ndi su xa vivii va ndataꞌnu ña, ra xa ndee siin va ña. 8Saa ra ndikiꞌvi tu ra xitaꞌan xiꞌin Jesús, ra inuu ndixaa yuꞌu yavi kan va, ra xini ra ña kuu kan, saa ra kandixa va ra ña ndatiaku Jesús. 9Ra ta kumani ka kuꞌun ndia nuu iin yavi kan, ra täan kundaa kaxi vi ini ndia xiꞌin tuꞌun Ndioxi, ña kaꞌan xaꞌa Jesús, ña xiniñuꞌu ndatiaku ra. 10Ndia saa ra nandiko ndia xitaꞌan xiꞌin Jesús, kuanuꞌu ndia veꞌe va ndia.

Ndita Jesús nuu ña Maria ña kee ñuu Magdala

11Ra ña María nindoo yuꞌu yavi chi keꞌe, xaku va ña, ra nani saa kuu ña xaku ña, ra saa ndakandiee ña xitoꞌni ña ini yavi kan. 12Saa ra xini va ña uvi ndia tatun Ndioxi, ndia ndixi tikoto yaa, ra iin ra nduꞌu chi nuu xikanduꞌu xini Jesús, ra inka tu ra nduꞌu chi nuu ndixiyo xaꞌa va ra. 13Ra saa nindakatuꞌun ndia ña, kachi ndia saa:

―¿Nichuun xaku kun, Nana? ―kachi ndia xiꞌin ña.

Ra saa ndakuiin ña, kachi ña saa:

―Tata va yu kuvi ra ndakiꞌin na kuaꞌan xiꞌin na, ra kundäa ini yu, ndia mii ku nuu chikaa na ra ―*kachi ña.

14Ra sakan saa kuu ña kaꞌan ña, ra saa ndikokuiin ña ndakutoꞌni ña, ra xini ña íin Jesús ikan, ndi su nindäkuni ña ra. 15Ra saa nindakatuꞌun Jesús ña kachi ra saa:

―¿Nichuun xaku kun, Nana? ¿Ra yoo kuvi na nanduku kun? ―*kachi ra xiꞌin ña.

Ra vaꞌa ra ndiaa itun kuiꞌi kan va kuvi ra ndikaꞌan xiꞌin ña káꞌán ña, ra saa ndikaꞌan ña kachi ña saa xiꞌin ra:

―Tata, tu yoꞌo va kuvi ra kuaꞌan ra xiꞌin, ra na ndatuꞌun va kun xiꞌin yu ndia mii ku nuu chikaa kun ra, ra vaꞌa kuꞌun yu ndakiꞌin yu ra kuꞌun ra xiꞌin yu ―*kachi ña.

16Saa ra ndikaꞌan va Jesús xiꞌin ña, kachi ra saa:

―¡María! ―*kachi ra.

Ra saa ndikokuiin ña ndakutoꞌni ña nuu ra, ra ndikaꞌan ña tuꞌun hebreo xiꞌin ra, kachi ña saa:

―¡Raboni! ―ra Maestro ke kachi tuꞌun yoꞌo.

17Ra saa ndikaꞌan Jesús xiꞌin ña kachi ra saa:

―Saña yuꞌu, ra ndïꞌi ini kun chi íin ka va yu xiꞌin ndo, saa chi kuni ka va kunuꞌu yu nu Tata yu. Ra ña xiniñuꞌu sa kun ke, na kuꞌun kun ndatuꞌun kun xiꞌin ndia ñani yu, saa chi kuꞌun va yu nuu Tata yu, ra Tata tu ndoꞌo va kuvi ra, ra kuu ra Ndioxi yu, ra Ndioxi tu ndoꞌo va kuvi ra ―*kachi ra.

18Ra saa ndixaꞌan ña María, ña ñuu Magdala ndatuꞌun ña xiꞌin ndia xitaꞌan xiꞌin Jesús, ña xa xini va ña ra, ra ndikaꞌan ra tuꞌun kan xiꞌin ña, kachi ña xiꞌin ndia.

Ndita Jesús nuu ndia xitaꞌan xiꞌin ra

19Ra te xa kuñuu suvi mii kii, ña kiꞌin xaꞌa semana kan ke, ndakutaꞌan takundiꞌi ndia xitaꞌan xiꞌin Jesús ndee ndia, ra ndasi tuun va yeꞌe veꞌe nuu ndee ndia, xaꞌa ña iyuꞌvi ndia nuu na judío taꞌan ndia. Ra saa xaa Jesús veꞌe nu ndee ndia, ra xikundichi ra mañu ndia, ra ndikaꞌan ra xiꞌin ndia kachi ra saa:

―Ña vaꞌa, na koo xiꞌin ndo ―*kachi ra.

20Ra te ndiꞌi ndikaꞌan ra tuꞌun yoꞌo xiꞌin ndia xitaꞌan xiꞌin ra, ra saa ndiñaꞌa ra ndaꞌa ra xiꞌin kindika ra nuu ndia. Ra kusii ka vi ini ndia, te xini ndia ra. 21Ra saa ndikaꞌan tuku Jesús xiꞌin ndia, kachi ra saa:

―Ña vaꞌa na koo xiꞌin ndo. Ra ta kuꞌva xa Tata yu Ndioxi ña tiꞌvi ra yuꞌu xaa yu yoꞌo, ra saa ke ^xa tu yuꞌu va, ña tiꞌvi yu ndoꞌo kuꞌun ndo vichin ―*kachi ra xiꞌin ndia.

22Ra te ndiꞌi ndikaꞌan Jesús tuꞌun yoꞌo, ra saa tivi ra tachi yuꞌu ra, chi nuu ndita ndia ra ndikaꞌan ra xiꞌin ndia, kachi ra saa:

―Ndakiꞌin ndo Tachi Yii Ndioxi. 23Ra yuvi na sakaꞌnu ini ndo xaꞌa kuachi, ra sakaꞌnu tu ini Ndioxi va xaꞌa kuachi na; ra tu na köo kaꞌnu ini ndo xaꞌa kuachi na, saa ra köo kaꞌnu tu ini Ndioxi va xaꞌa kuachi na ―*kachi ra xiꞌin ndia.

Ndiakua xini ra Tomás nuu takueꞌe Jesús saa vi ndixinu ini ra

24Ndi su ra Tomás, ra kaꞌan na kuu kuati, ra xitaꞌan xiꞌin ndia xitaꞌan xiꞌin Jesús, ña xikuu ndia uxi uvi, ra köo ra ndixiyo xiꞌin ndia te ndixaa Jesús nuu ndia. 25Ra saa ndikaꞌan ndia sava, ndia xitaꞌan xiꞌin Jesús xiꞌin ra, kachi ndia saa:

―*Xini va ndi, tata yo Jesús ―*kachi ndia.

Ra saa ndakuiin ra kachi ra saa, xiꞌin ndia:

―Tu na küni yu, ndaꞌa ra nuu ñaꞌa ndiñani clavo, ra tüvi yu, nduku ndaꞌa yu yavi nuu xindoꞌni ña, ra tüvi tu yu ndaꞌa yu, kindika ra nuu kaan na yavi, saa ra kandïxa vi yu ―*kachi ra.

26Ra saa kuu ndiyaꞌa una kii, ra ndakutaꞌan tuku va ndia xitaꞌan xiꞌin Jesús ndee ndia iin veꞌe, ra xa nduꞌu va ra Tomás xiꞌin ndia. Ra kutu ka vi ndasi yeꞌe veꞌe kan ndee ndia, ndi su ndikiꞌvi va Jesús, ra xikundichi ra maꞌñu ndia, ra ndikaꞌan ra xiꞌin ndia, kachi ra saa:

―Ña vaꞌa, na koo xiꞌin ndo ―*kachi ra.

27Ra saa ndikaꞌan ra xiꞌin ra Tomás, kachi ra saa:

―Kuyachin, ra tuvi kun nduku ndaꞌa kun, yavi nu xindoꞌni clavo ndaꞌa yu, ra kuni kun, ra na tuvi tu kun, ndaꞌa kun kindika yu nuu kaan va na; ra na küu kun tiaa ra xïin kandixa, chi vaꞌa ka va na kuu kun iin tiaa ra kandixa ―*kachi ra.

28Saa ndikaꞌan ra Tomás, kachi ra saa:

―¡Tata mii yu, Ndioxi mii yu kuvi yoꞌo! ―kachi ra xiꞌin Jesús.

29Saa ndikaꞌan Jesús xiꞌin ra, kachi ra saa:

―Tomás, ña xini kun yuꞌu va ke ^kandixa kun. Ndi su vaꞌa ni ka va kee yuvi na küni yuꞌu, ra kandixa na yuꞌu ―kachi ra xiꞌin ra.

Tuꞌun yoꞌo ke kaꞌan nichuun ke tiaa ra Juan tutu yoꞌo

30Ra kuaꞌa ni ka va ña xituꞌun xa Jesús, xini ndia xitaꞌan xiꞌin ra, ra ndikäꞌyu ndiꞌi vi ña nuu tutu yoꞌo. 31Ndi su ndikaꞌyu va tu sava ña xituꞌun ña xa ra, nuu tutu yoꞌo, ña kan ke vaꞌa na kandixa ndo Jesús, ña kuu ra, ra ndikaxin Ndioxi sakaku na yuuvi yoꞌo, ra ra yoꞌo kuvi seꞌe Ndioxi va, ra na ^kandixa ñaꞌa, ra niꞌi va na ña kutiaku xiꞌin ra, ndia ndikaa ndikuꞌun.

Currently Selected:

San Juan 20: mxvNT

Highlight

Copy