LUUKI 9

1Tɔ. Sahanseaa Yisa ŋɔn daa ti booli u nyaandɔliba piiya ni ayi la n‑la'am taaba, u daa ti ba soori ni ba mari yiiko ni fukumsi zaŋŋi n‑kyaŋŋi arizimbeeri yɛla, ka tibri dooru balibu kam. 2U daa tum ba ni ba yi nti mooli Naawunni naam lahabaari, ka tibi baaridima. 3Ka u daa yɛli ba, ni, “Ya di zaŋŋi bunseelli ya sɔkyɛnni maa ni: yan di zaŋŋi zangbeaa bee booriga, bee bundirigu, bee ligri, bee bunyeera ayiyi. 4Ya yi kur ti paai yiri seaa, ya kpeema ka bɛ bɛni halli nti yi tiŋŋa maa ni. 5Niriba yi bu deaai ya, yan yiiri tiŋŋa maa sahanseaa la, ya kpaasim ya napɔntam m‑basi, ka di leebi din wulisiri ban bɛ seem n‑gyanni ba.”

6Ka dizugu ba daa yi soori n‑kyaŋŋi n‑gyili tinkpansi ni, m‑moonni lahabasuŋŋu maa ka tibri dooru balibu kam, lugri kam zaa. 7-9Ka dizugu niriba daa yɛtti, ni, Gyɔni Kɔsuura n neaai kum ni, ka seeba yɛtti, ni, Ilaygya n labi na, halli seeba gba daa yɛtti, ni, kurimbuni sa anabisɔ n labi u nyɔvuri ni na. Ka NaaHɛroodi Tɛtirakyi la ŋɔn daa baŋŋi lala, ka wum dinkam zaa niŋni maa, di daa gyɛri u pam ka u daa yɛli, “Man daa fikki Gyɔni zugu, ka ŋɔni yɛla ka n laa n‑wumni wa?”, ka u daa kur kpaŋŋni u maŋŋa ni u ti nya u.

10Tuumudima maa ŋɔn daa ti labi na, ba daa yɛli Yisa ban daa niŋi seem zaa. Ka u daa zaŋŋi ba ka ba foaai ba mammansi n‑kyaŋŋi tinseaa ban boonni Bɛtsaida la. 11Amaa zama maa daa baŋŋi ŋɔn bɛ luginseaa ka dɔlisi u nɔba. Ka Yisa daa deaai ba ka tɔ'asi n‑ti ba zaŋŋi n‑kyaŋŋi Naawunni naam maa yɛla. U daa laa n‑tibi bankam zaa daa boori tippu.

12Tɔ; ka wuntaŋŋa ŋɔn daa ti kabgi u nyaandɔliba piiya ni ayi maa daa kyɛ u saani na n‑yɛli u, “Tim niriba maa soori ka kyɛ ka ba wurim n‑kpɛ tinkpanseesi an gyiligi kpa maa ni, ni tiŋŋa maa zaa ni, nti bɔ bundirigu n‑di, ka nya goom ziiya, dama moo ni ka ti bɛ ni maa.” 13Ka Yisa daa labsi n‑yɛli ba, ni, “Ya tim ba bunseelli ka ba di.”; ka ba labsi n‑yɛli u, “Ti ka diibu m‑paasi paanukpila anu, ni zaasim ayi kɔkɔa. See ka ti kyaŋŋi nti da bundirigu na n‑ti niriba pam wa zaa.” Zama maa ni dɔppa mun daa paai niriba tusa anu. 14Ka Yisa daa yɛli u nyaandɔliba maa, ni, “Kyɛ ka niriba maa zinni ninvugu pisinunu.” 15Ka ba daa niŋi lala, ka sɔkam zaa zinni tiŋŋa. 16Ka u zaŋŋi paanu anu ni zaasim ayi maa n‑gɔsi saazugu ka puusi Naawunni ka purigi bundirigu maa. Ka yi zaŋŋni di n‑tiri u nyaandɔliba maa ni ba tɔtti niriba maa. 17Di saha maa ba zaa daa diya n‑tigi, ka nyaandɔliba maa daa la'asi dikyɛba an kpalim la m‑paali peeri piiya ni ayi.

18Tɔ. Dindahinseaa Yisa daa ti bɛ ni, ŋɔn ni u nyaandɔliba maa, ka u daa susiri la Naawunni u kɔkɔa; ka u daa boosi u nyaandɔliba maa, ni, “Ba yɛtti, ni, man nyɛ la ŋɔni?” 19Ka ba labsi n‑yɛli u, ni, “Ninvugseeba yɛliya, ni, i nyɛ la Gyɔni Kɔsuura; ka baseeba mun yɛliya, ni, i nyɛ la Ilaygya, halli ka seeba mun yɛli, ni, i nyɛ la kurimbuni sa anabisɔ ŋɔn labi u nyɔvuri ni na.” 20Ka Yisa labsi m‑boosi ba yaasa, ni, “Ka yarima mun teesiya, ni, n nyɛ la ŋɔni?”; ka Piita gyɛrigi n‑yɛli, “I nyɛ la Masiiya - sɔ Naawunni ŋɔn tum na la.” 21Ka Yisa daa kpamsi ba pam ni ba di yɛli sɔ, ni, u nyɛ la Masiiya maa. 22U daa laa n‑yɛli ba m‑paasi, ni, “See ka man Ninsaala Biiya di wahala pam. Tiŋŋa wa kpamma maa nin za'asi ma, ban ni gyeeŋŋu toondaandima ni karimbadima gba. Ba nin ku ma, ka daba ata daari n nin neaai kum ni n‑labi n nyɔvuri ni.” 23Ka Yisa daa yɛli ba m‑paasi, ni, “Ŋɔnkam boori ni u dɔli ma, see ka u za'asi u maŋŋa ka zaŋŋi u kum dɔpulli n‑ziiri beoo kam n‑dɔli ma. 24Dama ŋɔnkam zaa yi boori u nyɔvuri maa nin kɔŋŋi ka; ŋɔn mun yi sakki ni u kɔŋŋi u nyɔvuri, mani zugu, ŋɔna n nyɛ sɔ ŋɔn nin nya nyɔvuri. 25Nira yi di duniya zaa ka kɔŋŋi u nyɔvuri, bee sa'amni ka, di suŋŋi u la wula? 26Ninvugsɔ yi zɔri vi man ni n yɛligu maa zugu, ŋɔna zugu Ninsaala Bii maa nin ti zɔ vi, sahanseaa u yi mari u gyirima n‑kyɛ na, ni u Ba gyirima, ni malaakadima zaa m‑paasi u zugu. 27Yɛlimaŋni ka n yɛliya, ni, ninvugseeba bɛ yarima ban zɛya wa ni ka ku kpi pɔi, ka naayi nya Naawunni naam.”

28Tɔ. Yisa ŋɔn daa tɔ'asi lala nyaaŋŋa, di daa niŋi kaman daba anii ka u daa zaŋŋi Piita, ni Gyɔni, ni Gyeemsi m‑paasi u zugu, ka ba daa du zoori maa zugu ni ba ti susi Naawunni. 29Ka Yisa ŋɔn daa ti susiri maa, u nindaa daa takkiya, ka u sutura neaai, nyain, kaman saa nya'asigu. 30Ka ba daa nya ka dɔppa ayi daa yi na n‑la'am n‑tɔ'asiri ni Yisa - Musa ni Ilaygya n daa nyɛ ba. 31Ba daa neaari ni veelim ni gyirima pam, ka ba yɛttɔ'a daa nyɛ la zaŋŋi n‑kyaŋŋi Yisa ŋɔn nin paai Gyɛrusalɛm nti ka ni seem yɛla. 32Di saha maa ka goom daa gbaai Piita ni u taaba maa: amaa ban daa ti neaai, ba daa nya Yisa gyirima veelim; ka nya dɔppa ayi maa, ka ba kpalim n‑zɛ u luga ni. 33Ka niriba ayi maa ŋɔn daa ti ya n‑ŋmaligi n‑kyaŋŋi ka kyɛ Yisa sahaseaa maa, Piita daa yɛli u, “N Daana, ti kpa wa beesigu veela! Kyɛ ka ti ti suga ata - i dinni yinni, ni Musa dinni, ni Ilaygya mun dinni yinni.” (Piita daa bu mi ŋɔn yɛtti seem maa gbinni). 34Ka Piita ŋɔn daa kur kpalim n‑tɔ'asiri lala maa sangbana di sigi na n‑lim ba, ka dabeem daa gbaai ba pam ban daa kpeeri sangbana maa ni zugu. 35Ka kukɔri daa yi sangbana puuni na n‑yɛtti, ni, “M bii nŋɔ, ŋɔna ka n gaŋŋi: ya wumma u noori!” 36Ka kukɔri maa ŋɔn daa ti tɔ'asi n‑naai, ba nya ka Yisa kɔkɔ n kpalim n‑zɛya. Ka ba daa zaŋŋi yɛlli maa n‑sina, ka daa bu yɛli ban daa nya seelli maa yɛla n‑ti sɔa.

37N‑neaai beoo ka ba daa sigi zoori maa zugu na, ka daa paai zama pam ziiya. 38Ka niriba maa ni doo yinni daa kaasi m‑booli, ni, “N Karimba! N susiri i ni, ni, i gɔsi m bii wa n‑ti ma, dama n ka bisɔ m‑paasi u zugu. 39I bu nya arizimbeoo ŋɔn zi u zugu n‑yisigri u seem? U yi ti bɛ m‑bɛ n‑kaasi pam, ka arizinni maa darigi u halli ka nantoori fufukku ti yiiri u noori ni na, n‑kur mugsiri u ka ku sakki ni u basi u. 40Ka m pun susi i nyaandɔliba wa, ni, ba karima arizimbeoo maa m‑basi, ka ba bu nyaŋŋi.” 41Ka Yisa gyɛrigi n‑yɛli, “Ah! Ya zuna niriba wa n kur nyɛ bungɔlima, ka ku sakki yɛdda niŋbu! Daba ala ka mani ni yarima nin la'am m‑bɛ ni, bee daba ala ka n ya toaai n‑di ya sugru? Mari i bii maa n‑kyɛ kpa na!” 42Ka ŋɔn daa mari bii maa n‑kyɛnni Yisa saani na, arizimbeoo maa daa lusi u tiŋŋa ka darigi u. Ka Yisa daa tasi arizinni maa zugu ka kyɛ ka bii maa kpaŋŋi, ka u zaŋŋi u n‑labsi n‑ti u ba maa. 43Ka di daa niŋi niriba maa alahazibu zaŋŋi n‑kyaŋŋi Naawunni ŋɔn galisi seem.

44Tɔ; ka zama maa ŋɔn daa kur teesiri Yisa ŋɔn daa tumni alahazibu tunseelikam zaa yɛla maa, u daa yɛli u nyaandɔliba maa, ni, “Ya kyɛ ka yɛttɔ'aseaa man ya tɔ'asi wa kpɛ ya tuba ni suŋŋa: ba nin zaŋŋi man Ninsaala Biiya n‑niŋi ninsaalidima nuu ni.” 45Amaa ba daa bu baŋŋi Yisa ŋɔn daa yɛli seem maa gbinni, ka di daa sɔ'ai ni ba saani, ka ba daa kɔŋŋi di baŋŋni zaa. Ka ba mun daa bu boosi u m‑baŋŋi, dabeem ŋɔn daa mari ba maa zugu.

46Yisa nyaandɔliba maa daa ti ŋmeeri la taaba nangbankpeemni ni ba baŋŋi ŋɔn gaari u kpeaa ba puuni. 47Ka Yisa daa baŋŋi ba sufu ni teesa, ka u booli bibila na n‑zaŋŋi u n‑zaali n‑tabli u mammaŋŋa, ka yɛli ba, ni, 48“Ŋɔnkam deaari bibila wa tataabu man yuuri zugu deaari la mani, ka ŋɔnkam mun deaari ma deaari la Ŋɔn tum ma na maa. Dinŋɔna ŋɔn poora ya zaasa ni, di daama gaari ya zaa.” 49Ka Gyɔni daa yɛli Yisa, “N Daana, ti da nya sɔ ka u mari i yuuri n‑katti arizimbeeri, ka ti bu sakki ni u tum lala, ŋɔn bu tabli ti la'aŋŋu n‑dɔla zugu.” 50Amaa ka Yisa yɛli u, ni, “Di za'asiri u, dama ŋɔnkam bu zabri ya n nyɛ ŋɔn zɛ ya nyaaŋŋa.”

51Tɔ. Yisa saazugu lappu saha ŋɔn daa ti paai na, u daa gbaai la Gyɛrusalɛm kyɛnni ni nimbiri moaa. 52Ka u daa tum tuumudima ni ba daŋŋma u tooni. Ka dizugu u tuumudima maa daa paai Samɛrii tinkpanseaa puuni nti maali siri zaa n‑guri u. 53Ka tinkpaŋŋa maa dima daa ti za'asi, ni, ba ku deaai u, ŋɔn bɛ soori n‑kyɛnni Gyɛrusalɛm maa zugu. 54Ka u nyaandɔliba wa, ban yuya boonni Gyeemsi ni Gyɔni la, ŋɔn daa wum lala maa, ba daa boosi Yisa, ni, “Ti Dugma, i boori ni ti kyɛ ka bugum yi saazugu na nti di ba, bee?” 55Ka Yisa daa ŋmaligi n‑tasi ba zugu; 56ka ba daa doaai n‑gaari m‑paai tinkpanseaa nti gbɛ bɛni.

57Yaasa, Yisa ni u nyaandɔliba maa ŋɔn daa ti bɛ soori zugu n‑kyɛnna, dɔsɔ kyɛ na nti yɛli u, “N nin dɔli i n‑kyɛnni luginseelli kam zaa.” 58Ka Yisa yɛli u, “Yɔbaasi mari la vɔya n‑kpeera, ka niinsi mun mari la teeri n‑tɔmna, amaa man Ninsaala Biiya ka luginseaa man nin zaŋŋi n zugu n‑dooli gba.” 59Ka Yisa daa laa n‑yɛli dɔsɔ, ni, “Dɔli ma!”, ka di daama yɛli u, ni, “Kur kyɛ ka n kuli ka m ba yi ti kpi ka n sɔ'ai u pɔi ka naayi kyɛ na n dɔli i.” 60Amaa ka Yisa daa yɛli u, “Kyɛ ka kpiimma sɔ'ari ba kpiintaaba: nyin muna - kyɛma nti moonni Naawunni naam mooligu.” 61Ka sɔ mun daa ti laa n‑kyɛ na nti yɛli Yisa, ni, “N Daana, n nin dɔli i, amaa kyɛ ka n kuli n‑kyeoosi n yiri dima pɔi, ka naayi kyɛ na n‑dɔli i.” 62ka Yisa yɛli u, ni, “Ninvugsɔ ŋɔn zaŋŋi u nuu n‑gbaai kuuri ka laa n‑gɔsiri u nyaaŋŋa bu sumni Naawunni naam beebu ni.”

Currently Selected:

LUUKI 9: maw

Highlight

Copy