LUUKI 10

1Dinŋɔ nyaaŋŋa ka ti Dugma Yisa daa yiisi ninvugpisiyɔpɔi ni ayi m‑paasi ka puri ba niriba ayiyi n‑tum ba ni ba daŋŋi u tooni n‑kyaŋŋi tinseesi zaa u mammaŋŋa gba ŋɔn ya kyaŋŋi. 2Ka yɛli ba, ni, “Ya kyi ŋmaabu tuma wa zoaaya pam, amaa ka ya tuntumniba maa mun bu zoaai; dizugu ya susim ti Dugma ŋɔn nyɛ puu wa daana, ka u tum niriba na m‑paasi ba ŋma. 3N tumni ya ni ya yim soori n‑kyaŋŋi, amaa ya baŋŋma, ni, ya nyɛ la kaman pɛbiseeba ban bɛ kunduna sunsukkuni. 4Yan di mari baagyi bee booriga bee namna n‑kyaŋŋi; ya mun di puusiri sɔ soori ni. 5Ka ya yi ti paai n‑kpɛ yiri seaa zaa ya yɛlima, ni, Naawunni nin taasi u sufudoaa n‑niŋi yiri wa ni na: 6ka sufudoaa daana yi siri bɛ bɛni, dinŋɔna ya gba sufudoaa nin bɛ u saani. Amaa di yi pa lala, di nin labi ya saani na. 7Ya kpalimma yiri maa ni n‑diri ka nyuuri bunseelli kam zaa ba yi ti nyaŋŋi n‑ti ya, dama di sumsi ni tuntumna deaari u yoori. Yan di laa n‑yiiri yiri seaa n‑lɔŋŋni yiri seaa. 8Ya mun yi paai tinseelli kam ka ba sakki n‑deaai ya, ya dim bundiriseelli zaa ban nin zaŋŋi n‑ti ya, 9ka tibi baariseeba ban bɛ tiŋŋa maa ni ka ba kpaŋŋi, ka yɛli daadam maa, ni, Naawunni naam paari ba na. 10Amaa ya yi ti kpɛ tinseaa ka ba bu sakki ni ba deaai ya, ya dɔli lala tiŋŋa maa sɔya n‑yɛtta, 11‘Halli ya tiŋŋa wa tankpɔseesi an pirigi ti nɔba wa gba ti nin pisigi m‑basi ya zugu, amaa see ka ya laa m‑baŋŋi, ni, Naawunni naam paari ya na.’ 12Ka n yɛli ya, ni, Zaadaari yi ti paai, di nin tɔ n‑tiri lala tiŋŋa dima n‑gaari din ti ya n‑tɔ n‑tiri ninvugbɛseeba ban daa bɛ Sɔdoom tiŋŋa ni seem la gba.” 13Ka Yisa daa laa n‑yɛli, “Zugubeoo ka ya nin nya, yarima Kɔreezini dima ni Bɛtsaida dima wa! Dama ba di yi daa tum tunkara Taaya ni Saidoon tinsi ni hoo man tumni seesi ya tinsi maa ni la, ban tumbeeri dima wa daa naa n‑yɛ tankyɛra n‑zinni m‑bugi tampɛ'alim n‑wulisiri ba sufusa'aŋŋu ŋɔn nyɛ seem, ka takki ba halibeoo beebu la: m‑pun niŋi lala ka di daa naa n‑yuui. 14Amaa Zaadaari halli Taaya ni Saidoon ninvugbeeri wahala gba ku paai ya dinni. 15Yarima muna, ya Kapirinyum dima wa, ya bu duusiri la ya mansi m‑paai arizana ni? Amaa ba nin sigsi ya kpiimma tiŋŋa ni sa. 16M biisi, ŋɔnkam sakki n‑wum ya noori wumni la mani, ka ŋɔnkam za'asi ya noori wumpu za'asiri la mani; ka ŋɔnkam mun za'asi ma za'asiri la Ŋɔn tum ma na la.”

17Ka Yisa ŋɔn daa tum ninvugpisiyɔpɔi ni ayi seeba la n daa ti kyaŋŋi ka labi u saani na ni sufupeelli, nti yɛli u, ni, “Ti Dugma, halli arizimbeeri gba ka ti nyaŋŋi i yuuri zugu!” 18Ka u yɛli ba, “N gɔsi n‑nya ka Sintaani mammaŋŋa yi saazugu n‑lu na kaman saa ŋɔn yi nyakki seem la!”, ni, 19“Ya nyama, n ti ya soori ni ya nin toaai n‑nɔ wugi ni nansi yɔriyɔri, ka nyaŋŋi ti Dindaana maa kpeeŋŋu zaa, ka bunseelli kam ku toaai n‑niŋi ya seela. 20Amaa dinŋɔ zaa yɔri, yan di kyɛ ka ya sufu pɛligi ni yan nyaŋŋi arizimbeeri maa zugu, amaa ya kyɛ ka ya sufu pɛligi ban pun sɔbi ya yuya arizana ni maa zugu.”

21Di saha maa ka Naawunni Sii Kasi daa kyɛ ka Yisa sufu pɛligi pam, ka u yɛli, “M Ba Naawunni, nyin ŋɔn su arizana ni duniya wa, m pɛ'ari i ni, dama nyin zaŋŋi yɛla wa zaa n‑sɔ'ai ka kyɛ yɛm dima ni baŋŋniba ka laa n‑kasigi a n‑wulisi bileesi. Ii, m Ba, yɛlimaŋni lala veela i saani. 22Bunseelli kam zaa ka m pun deaai m Ba nuu ni. Sɔ ka ni m‑mi Bii maa ŋɔn nyɛ sɔ, na'ala u Ba maa m mi u; ka sɔ mun gba ka ni m‑mi m Ba maa ŋɔn nyɛ sɔ, na'ala mani u Bii maa m mi u; m‑paasi sɔkam man, u Bii maa, n nin sakki ni n kasigi m Ba maa yɛla n‑wulisi u.” 23Di nyaaŋŋa u daa ŋmaligi kpaŋŋa n‑tɔ'asi n‑ti u nyaandɔliba kɔkɔ n‑yɛli ba, ni, “Ninvugseeba ban nya yan nyari bunseesi wa mari la zugsuŋŋu! 24Dama n yɛtti ya, ni, sahaseaa din gaari, anabidima ni nadima pam daa boori la ba da nya yan nyari bunseesi wa ka mun bu nya a; ka daa laa m‑boori la ba wum yan wumni seelli wa ka daa bu wum.”

25Tɔ; ka Naawunni zaaligu baŋŋnisɔ daa ti boori ni u zamsi Yisa yɛm, ka doaai n‑zaani m‑boosi u, ni, “N Karimba, wula ka n ya n‑niŋi n‑nya nyɔvuri kan ka naari?” 26Ka Yisa yɛli u, “Wula ka di sɔbi Naawunni zaaligu ni? I Litaafi kariŋŋu wulisiri i la wula?” 27Ka u daa labsi n‑yɛli, “Ni, ‘I zaŋŋma i sufu zaa n‑wuri i Dugma Naawunni, ni i siiya zaa, ni i kpeeŋŋu ni i teesa zaa.’, ni, ‘Wuri i taraana hoo nyin wuri i mammaŋŋa seem la.’ ” 28Ka Yisa yɛli u, “Mboo! I labsi suŋŋa pam: dizugu niŋma lala ka i nin nya nyɔvuri maa.” 29Ka u mun daa bu boori ba galim u u boosigu maa zugu, ka dizugu u daa laa m‑boosi, ni, “Ka ŋɔni n nyɛ n lala ‘taraana’?” 30Ka Yisa daa labsi n‑yɛli u, ni, “Dɔsɔ n daa bɛ ni, ka u daa yi Gyɛrusalɛm n‑kyɛnni ni u ti paai Gyɛrikoo tiŋŋa. Ka u na kyɛnni n‑sigri zoori, ka sɔguriba daa luri u soori maa zugu m‑pirigi u sutura zaa, ka bu u halli ka u ti gyɛa, ka kyɛ u n‑dooli sɔkpaŋŋa ka u daa pɔtti la kum. 31Ka di daa bu yuui ka maalimaannisɔ ti dɔli soori maa na nti nya u, ka lɔkki n‑gaari ka kyɛ u. 32Lala gba ka Liivai za'anɔri dɔsɔ gba daa ti dɔli soori maa na nti nya u, ka ŋɔn gba daa lɔkki n‑gaari ka kyɛ u. 33Amaa ka Samɛrii dɔsɔ gba daa ti dɔli soori maa na nti paai bɛni n‑nya doo maa, ka di daa niŋi u namboo pam. 34Ka u daa kyaŋŋi m‑paai doo maa saani n‑zaŋŋi daam m‑peaai u dansi maa, ka boaai kpaam n‑niŋi, ka zaŋŋi tana n‑lɔ u yuuma maa. U daa zaŋŋi u n‑ziili u mammaŋŋa bumbaarigu zugu n‑kyaŋŋi nti kpɛ saamma kpeebu yiri m‑mari u suŋŋa. 35Tɔ, ka beoo ŋɔn daa ti neaai ka Samɛrii doo wa yi ya kyaŋŋi u kyɛnni la, u daa yiisi ligri n‑ti u yikpɛdaana maa ka yɛli u, ni, u gɔsim u baara wa suŋŋa halli ka u ti labi na. Ni, ligri maa yi ti pɔsigi ka u labi na, u nin yɔ ka samni maa an kpalim n‑ti u dirindaari maa. 36Tɔ: ba niriba ata maa sunsukkuni, ba ŋɔni n zaŋŋi doo maa n‑leebi u taraana?” Ka u labsi n‑yɛli u, ni, “Dɔsɔ ŋɔn daa zɔ u namboo la.” 37Ka Yisa yɛli u, “Gba kyɛma nti niŋi lala!”

38Tɔ; ka Yisa ni u nyaandɔliba daa ti paai tinkpanseaa, ka pɔ'asɔ ŋɔn yuuri daa boonni Maata zaŋŋi u nti kpeesi u yiri. 39Ka Maata tinzɔ, ŋɔn yuuri daa boonni Mariama la, daa kyaŋŋi nti zinni Yisa tooni n‑wumni u yɛttɔ'a, 40amaa Maata ŋɔn daa kur bɛ la bundirigu dugbu ni. Ka Maata daa kyɛ Yisa saani na nti boosi u, ni, “N Daana, i ba'a na'a ka ni n tinzɔ wa yɛla ni? - dama u kyɛ tuma maa zaa n‑gyeeli ma. Yɛlim u, ni, u suŋŋma ma!” 41Ka Yisa yɛli u, “Ɛɛh, Maata! I zaŋŋi la yɛla pam m‑mugsi i mammaŋŋa nimmoosi, 42amaa bunyinni kɔkɔ n kpa talasi, dizugu Mariama n yiisi bunsuŋŋu, sɔ mun ku toaai n‑deaai di u saani.”

Currently Selected:

LUUKI 10: maw

Highlight

Copy