LUUKI 7

1Yisa ŋɔn daa tɔ'asi niriba maa yɛttɔ'a wa zaa nti naai, u daa kyaŋŋi la Kapirinyum. 2Ka soogyadima toondaansɔ n daa bɛ bɛni ka u daabwuttigu daa beera, halli ka dooru maa ti wum u halli ka u ti pɔri kum. 3Di saha maa ka toondaana wa daa wum Yisa yɛla ka daa tum Izraɛli dima kpamseeba ni ba ti susi u ka u kyɛ na nti tibi u baara maa n‑ti u. 4Ka ba daa paai u saani na nti bɛlim u n‑yɛtta, “Soogyadima toondaana maa sum ni i suŋŋi u, 5dama u wuri ti zuliya wa halli, ka u mɛ la'aŋŋu duu n‑ti ti ni ti kpeeri m‑puusiri Naawunni gba.” 6Ban daa ti ya labi n‑kunni na ka Yisa daa dɔli ba n‑kyaŋŋi. Ŋɔn daa ti kyaŋŋi m‑pɔri toondaana maa yiri, ŋɔnwa daa laa n‑tum u zɔdima Yisa saani na, ni, u di mugsi u maŋŋa; ni, ŋɔn toondaana maa poora ni Yisa kyɛ u yiri ni na; 7ni, ka mun bu laa n‑sum ni u gba kyɛ Yisa saani na. Amaa u kur yɛlim yɛttɔ'aseesi ŋɔn ya yɛli, ka u baara maa kpaŋŋi. 8Ni, dama ŋɔn gba nyɛ la ban su ninvugsɔa, ka u mun gba su soogyaseeba fukumsi ka nin toaai n‑yɛli ba yinni, ni, u kyɛm luginseaa ka u kyaŋŋi, bee n‑yɛli sɔ, ni, u kyɛm na ka u kyɛ na, ka nin toaai n‑yɛli u daabri, ni, u tumma nŋɔ ka u tum di. 9Tɔ; ka Yisa ŋɔn daa wum soogyadima toondaana maa ŋɔn daa yɛli seem maa, di daa gyɛri u pam: ka u ŋmaligi n‑yɛli daadam ban daa dɔli u maa, ni, “Yɛlimaŋni ka n ya n‑yɛli ya, halli Izraɛli dima ni gba n na zi n‑nya sɔsɔ ŋɔn niŋi yɛdda hoo doo wa ŋɔn niŋi seem!” 10Ka toondaana maa ŋɔn daa tum ninvugseeba maa daa labi yiri maa ni na nti nya ka daabri maa pun kpaŋŋi zaa.

11Di nyaaŋŋa ka Yisa daa kyaŋŋi tinseaa kan yuuri boonni Neeni la, ka u nyaandɔliba ni zama pam daa dɔli u. 12Ŋɔn daa ti pɔri tiŋŋa maa kpeebu, tiŋŋa maa ni na'akyimbilisɔ kpi ka ba ziiri u n‑yiiri na, ka tiŋŋa maa niriba kabri n‑dɔla. Ŋɔn daa kpi maa ma daa nyɛ la pukoori, ka daa ka bisɔ m‑paasi ŋɔn kpi maa. 13Ka ti Dugma daa nya pukoori maa ka di niŋi u namboo, ka u yɛli u, “Di kumna!” 14Ka Yisa daa kyaŋŋi nti siisi ban daa mari bunseaa n‑ziiri kum maa, ka ban daa ziiri u maa kpalim n‑zaani, ka u tasi m‑booli kum maa, ni, “Na'akyimbila, n ya yɛtti i ni, ni, i doaama!” 15Ka kum maa daa siri neaai u kum ni n‑doaai n‑zini m‑piili yɛttɔ'a, ka Yisa daa zaŋŋi u n‑ti u ma maa. 16Ka dabeem daa gbaai sɔkam ka ba pɛ'ari Naawunni n‑yɛtti, ni, “Anabititaari kyɛ duniya wa ni na, ni u ti bɛ ti saani!”, ka laa n‑yɛli, ni “Naawunni gɔsi u niriba yɛla maa.” 17Ka Yisa ŋɔn daa niŋi seem maa zugu, lahabaari maa daa mooli n‑gyili Gyuudii tingbaŋŋu ni tinseesi an gyiligi bɛni maa zaa.

18Tɔ. Ka Gyɔni nyaandɔliba daa kyɛ u saani na nti yɛli u Yisa ŋɔn daa niŋni seelli kam zaa maa yɛla. 19Ka u daa yiisi ba niriba ayi n‑tum ba ti Dugma Yisa saani ni ba ti boosi u, ni, “Nyin n nyɛ ŋɔn ya kyɛ na la, bee ti na gɔsim di daama soori?” 20Ka tuumudima babayi maa daa ti paai Yisa saani na nti yɛli u, “Gyɔni ŋɔn suuri niriba Naawunni koom la n tum ti i saani na ni ti boosi i, ni, nyini n nyɛ ŋɔn ya kyɛ na la, bee, ti na gɔsim di daama soori?” 21Di saha ka Yisa daa tibri baaridima pam, ni ninvugseeba dooribeeri ŋɔn daa mari zaa, ka katti arizimbeeri niriba zugu m‑basira, ka neaari zoomma pam nini n‑tiri ba. 22Ka Yisa daa labsi n‑yɛli Gyɔni niriba, ni, “Ya labma nti yɛli Gyɔni yan nyari ka wumni seela: ni, zoomma nini neaara, ka wɔbsi kyɛnna, ka ban mari kɔmni nyari alaafɛa, ka tubkpiradima wumna, halli ka ban kpi gba neaari kum ni; ni, ka lahabasuŋŋu maa moonni n‑tiri fara dima.” 23Ka laa n‑yɛli ba, “Ŋɔnkam bu birisiri n yɛla zugu mari la zugsuŋŋu!” 24Tɔ; ka dinŋɔna Gyɔni tuumudima daa doaai n‑kuli, ka Yisa mun daa piili n‑tɔ'asiri n‑tiri daadam maa zaŋŋi n‑kyaŋŋi Gyɔni yɛla, ka boosiri ba, ni, “Bɔ ka ya daa kyaŋŋi mooni ni ya ti nya? Kyimnigu pɛbsigu ŋɔn zeera, bee? 25Bee bɔ ka ya daa lee n‑kyaŋŋi ni ya ti nya? Ninvugsɔ ŋɔn bɔbi neensuma? Ay! - ya bu nya? - ninvugseeba ban yeeri bunveela ka diri bunnya'asa n kur bɛ nadima yiya ni.”; 26ka laa m‑boosi ba n‑yɛli, “Ka bɔ ka ya daa lee n‑kyaŋŋi ni ya ti nya? Ya ya n‑nya la anabisɔ, bee? Yɛlimaŋni ka n ya n‑yɛli ya, ni, halli u gaari anabi gba. 27Ŋɔna n nyɛ ban daa sɔbi sɔ yɛla, ni, Naawunni yɛliya:

‘Ya nyama! - N tuumu nŋɔa;

N tumni u ni u ti daŋŋi i tooni:

Ŋɔna nin maali i kyɛnni maa soori n‑ti i.’

28Amaa n ya n‑yɛli ya, ni, Gyɔni gaari pɔ'aba ŋɔn pun dɔ'ai bidibseeba zaa; amaa ka n ya yɛli ya yaasa, ni, halli ŋɔn poora zaa m‑bɛ Naawunni naam ni gba yi gaari ŋɔna.” 29Tɔ; ka zama kam ban daa bɛ bɛni n‑wumni Yisa ŋɔn yɛli seem maa - halli lampodeaariba gba - ba zaa daa pɛ'ari Naawunni, ni, u soori n nyɛ yɛlimaŋni soori, dama ba zaa daa pun deaai Naawunni kɔsuubu Gyɔni saani. 30Amaa Farisii dima ni karimbadima mun daa bu deaai kɔsuubu maa, ka dizugu ba daa za'asi Naawunni ŋɔn zaali ba seem. 31Ka Yisa daa laa n‑yɛli, ni, “Ka bumbɔ ka n ya n‑zaŋŋi n‑ŋmansi zuna niriba wa? Ba lee n‑ŋmanni la bɔa? 32Ba ŋmani la hoo biisi ban zi daa ni m‑boonni taaba n‑yɛtti, ni, ‘Ti peebi yiiya n‑ti ya ka ya za'asi waa, ka ti laa m‑maanni kuuri n‑ti ya ka ya bu sakki n‑kumna!’ 33Dama Gyɔni Kɔsuura la daa kyɛ na ka u ba'a ka bundira diibu, bee bunnyuura nyuubu, yɛla ni, ka ya yɛli, ni, arizimbeoo n zi u zugu ni. 34Ka man mun Ninsaala Bii ti kyɛ na ka man ni niriba la'amni n‑dira ka nyuura, ka ya yɛli, ni, ‘Ya bu nya doo wa ŋɔn nyɛ beem daana ni danyuura seem? - ka u laa n‑dɔli zoori ni lampodeaariba ni ala'akyi dima.’ 35Amaa Naawunni yɛm wulisi kamaŋŋa la ban deaai ka zaa saani.”

36Tɔ. Ka Farisii dima dɔsɔ daa booli Yisa ni u kyɛ u yiri na ka ba la'am n‑zini bundirigu zii ni ba di. 37Ka Yisa ŋɔn daa kpɛ na n‑zini sahaseaa la, tiŋŋa maa ni pɔ'a tumbeeri daansɔ daa ti wum, ni, Yisa bɛ la Farisii maa yiri n‑diri bundirigu. Pɔ'a maa daa zaŋŋi kɔlɔbaveelli kan paali turaali kpaam 38n‑kyaŋŋi n‑kpɛ n‑zɛ Yisa nyaaŋŋa ka gbaai kunkuma, ka u nintam tɔ'ari n‑luri Yisa nɔba ni m‑peaari a, ka u mari u zɔbwɔ'ala n‑nyeesiri a, ka bɔbli a, ka zaŋŋi turaali maa n‑soosi Yisa nɔba. 39Ka Farisisɔ ŋɔn daa booli Yisa na maa daa nya lala; ka yɛli u sufu ni, ni, doo wa yi da siri nyɛ la anabi, u naa m‑baŋŋi pɔ'asɔ ŋɔn siisiri u wa ŋɔn bɛ seem, ka mi, ni, tumbeeri daana n nyɛ u. 40Ka Yisa daa labsi n‑yɛli u “Saimoon! M mari yɛttɔ'aseaa ni n yɛli i.”; ka Saimoon labsi n‑yɛli u, “Ndana, yɛlim ma.” 41Ka Yisa yɛli u, “Dɔppa ayi n daa bɛ ni, n‑daa pɛŋŋi dɔsɔ ligri. Ka ba yinni maa samni daa gaari u taraana samni maa kaman napɔŋŋu piiya. 42Ka babayi maa zaa daa ka ligri n‑nin yɔ n‑labsi sandaana wa, ka u daa kyɛ u sama maa n‑ti niriba ayi maa zaa. Tɔ, ka dinŋɔna niriba ayi wa sunsukkuni, ba ŋɔni nin lee n‑wuri ligri maa daana n‑gaari u kpeaa?” 43Ka Saimoon yɛli, ni, “N teesiya, ni, ŋɔn samni daa galisi pam la.” Ka Yisa daa yɛli u, “I siri baŋŋiya!”, 44ka ŋmaligi n‑gɔsi pɔ'a maa ka yɛli Saimoon “I nya pɔ'a wa? Man da kpɛ i yiri wa ni na, i da bu ti ma koom ka m peaai n nɔba: pɔ'a wa mun zaŋŋi u nintam m‑peaari n nɔba ka zaŋŋi u zɔbri n‑nyeesi a. 45Ka nyin da bu puusi ma ka mɔ'asi n kparima.” - ba tiŋŋa puusigu kaari nla - “Amaa man kpɛ i yiri wa na halli wayoo ka pɔ'a wa na bu kyɛ n nɔba bɔbligu. 46Din paasi yaasa, i bu niŋi kpaam n‑soosi n zugu, amaa pɔ'a wa ŋɔn zaŋŋi turaali kpaam n‑soosi n nɔba. 47Dizugu n ya yɛli i, ni, ba kyɛ pɔ'a wa taalli din galisi pam m‑pɛŋŋi u, u wurilim ŋɔn galisi pam zugu; amaa ninvugsɔ taalli din bu galisi ka ba kyɛ di m‑pɛŋŋi u, di daama wurilim gba bu ya galisi.” 48Ka ŋmaligi n‑yɛli pɔ'a maa, “N kyɛ i taalli maa m‑pɛŋŋi i.” 49Ka ninvugseeba ban daa la'amni ni Yisa n‑diri maa daa nyurimni ba kparima ni n‑yɛtti taaba, ni, “Ŋɔni mun n lee nŋɔa? - halli nti kyɛri niriba taalli m‑pɛŋŋni ba!”, 50Di saha la ka Yisa laa n‑yɛli pɔ'a maa “Kyɛma ni sufudoaa; i yɛdda niŋbu n tuligi i.”

Currently Selected:

LUUKI 7: maw

Highlight

Copy