LUUKI 6
6
1Ka Vuusim dindahinseaa ka Yisa daa dɔli puri ni n‑gatta, ka u nyaandɔliba daa piili n‑kabri kasana n‑ŋmeemni ba nuusi ni n‑ŋɔbri kabeelim maa. 2Ka Farisiseeba n daa boosi ba, ni, “Wula ka ya tumni puri tuma wa? Ya galimni zaaligu maa zaŋŋi n‑kyaŋŋi Vuusim Dabsiri wa!” 3Ka Yisa daa labsi n‑yɛli ba, “Ya na zi n‑karim NaaDauda yɛla wa? Ni, ŋɔn ni u taaba n daa bɛ ni ka kɔm daa gbaai ba, 4ka u daa kpɛ Naawunni gyeeŋŋu zii maa n‑zaŋŋi boroboro n‑ŋɔbi ka laa n‑tisi u taaba maa, ka ba gba daa ŋɔbi. Pa boroboro anŋɔ taabu ka ba zaŋŋi n‑doontiri la Naawunni tooni? - ka a kyisiri ni, di yi pa la maalimaanniba kɔkɔ ŋɔbri a?” 5Ka Yisa daa laa n‑yɛli ba, “Man Ninsaala Bii n su Vuusim Dabsiri fukumsi gba.”
6Ka Vuusim dahinseaa yaasa ka Yisa daa laa n‑kpɛ la'aŋŋu duu ni n‑wulisiri ba; ka dɔsɔ n daa bɛ bɛni ka u nudirigu daa pun kpi ni. 7Ka Farisii dima ni karimbadima maa daa boori sɔseaa ni ba galim u; dizugu ba daa gɔsiri u ni, ni ba nya u nin tibi sɔ Vuusim Dabsiri, bee? 8Amaa Yisa daa mi ba sufu ni teesa ŋɔn bɛ seem, ka u daa yɛli nukpiiŋŋu daana maa, ni, “Doaama n‑zaani sunsukkuni!”, ka u doaai n‑zaani. 9Ka Yisa yɛli ba, “M boosiri ya ni: Vuusim Dabsiri muna, soori bɛ ni ni nira tum tunsuma di dabsiri maa, bee tumbeeri? M‑paasi yaasa, u tuligma sɔ nyɔvuri, bee u sa'am ka?” 10Ka u daa gɔsi n‑gyiligi ba zaa na, ka yɛli doo maa, “Teaam i nuu maa!”, ka ŋɔn daa niŋi lala, u nuu maa daa nya tippu. 11Amaa ba sufu daa yisigi pam ka ba tɔ'asiri ni taaba ba nin niŋi Yisa seem.
12Tɔ. Ka di saha maa ka Yisa daa yi n‑kyaŋŋi n‑du zoori zugu ni u ti susi Naawunni, ka daa kur kpalim m‑bɛ ni yuŋŋu maa zaa n‑susiri Naawunni. 13Beoo ŋɔn daa ti neaai, u daa booli u nyaandɔliba zaa ni ba la'am na, ka u daa gaŋŋi ba puuni ninvugpiiya ni bayi, ka daa laa m‑booli ba, ni, ‘Tumudima’ la. 14Ba yuya nŋɔa#:- Saimoon (ŋɔn muna ka Yisa daa pa u yupaa ni, ‘Piita’), ni u tinzɔ Anduru; Gyeemsi, Gyɔni, Filipi, Baatɔlɔmiyu, 15Matiyu, Tɔmaasi, Alifiisi Gyeemsi, ni Saimoon sɔ (ŋɔna ka ba daa boonni ‘Zɛlɔti’), 16ni Gyeemsi Gyuudasi, ni Gyuudasi Isikariyɔti (ŋɔn mun daa ti leebi ŋɔn figsi Yisa n‑niŋi u dindaandima nuu ni la).
17Ka ŋɔn ni u tuumudima wa n daa yi zoori maa zugu n‑sigi na, ka u nyaandɔliseeba pam daa la'am na, ka daadam daa zoaai m‑paasi ba zugu; baseeba ban daa yi Gyuudiiya na, ni Gyɛrusalɛm, ni tinseesi an bɛ teeku duuri ziiya hoo Taaya ni Saidoon. Ba zaa daa kyɛ na ni ba ti wum u yɛttɔ'a maa ka tibi ba dooru balibu kam la. 18Ka arizimbeeri ŋɔn daa mugsi seeba maa zaa daa nya tippu, 19ka niriba maa zaa daa kpaŋŋi ba mansi ni ba paai Yisa saani n‑siisi u, dama yiiko n daa yiiri u ni na n‑tibri ba zaa. 20Ka u daa ŋmaligi n‑gɔsi u nyaandɔliba maa ka yɛli#:-
“Zugsuŋŋu bɛ ni n‑ti yaseeba ban nyɛ faradima,
dama Naawunni naam nyɛ la ya dinni.
21Zugsuŋŋu bɛ ni n‑ti yaseeba kɔm ŋɔn mari pampaŋŋɔa,
dama ya nin ti di n‑tigi.
Zugsuŋŋu bɛ ni n‑ti yaseeba ban kumni pampaŋŋɔa,
dama ya nin ti laara.
22Zugsuŋŋu bɛ ni n‑ti ya, sahanseaa niriba yi yaai ya, ka kari ya m‑basi, ka tuuri ya ka za'asiri ya yuya, ni, a nyɛ la yubeeri, ka ba niŋi lala man Ninsaala Bii zugu. 23Di nin wulisi, ni, ya laara zoaaya pam arizana ni; ka dizugu ya kyɛ ka ya sufu pɛligi dindaari maa, ka ya waam sufumaasim waa. Ya bu nya? - lala ka ba badima n daa niŋi anabidima la.” 24Ka laa n‑yɛli, ni, “Amaa#:-
Zugbeoo bɛ ni n‑ti yaseeba ban nyɛ bundaandima,
dama ya pun deaai ya nya'asim la.
25Zugbeoo bɛ ni n‑ti yaseeba ban diri ya yuubu pampaŋŋɔa,
dama kɔm nin ti gbaai ya.
Zugbeoo bɛ ni n‑ti yaseeba ban laari pampaŋŋɔa,
dama ya nin ti kaasiri ka kumna.
26Zugbeoo bɛ ni n‑ti ya, sahanseaa niriba zaasa yi tiri ya yusuma; ba badima daa pun niŋi lala n‑ti ziri anabidima la - Bee, m ma'ai ni?”
27Ni, “Amaa n yɛtti ya ban wumni n yɛligu maa, ni: Ya wura ya dindaandima; ya tumma din veela n‑tiri ban namsiri ya. 28Ya susim bunsuma n‑niŋi ban yɛtti ya zulima, ka laa n‑susi Naawunni n‑tiri ban tuuri ya gba. 29Sɔ yi lɔbi i tampɛkka, nyin ŋmaligma kanla gba m‑paasi u. Sɔ mun yi fa i bunyeerigu ka boori i kyinkyinni m‑paasi, nyin di mɔŋŋi u. 30Ŋɔnkam susi i bunseelli, nyin zaŋŋma n‑ti u, ka sɔ mun yi kpikki i neema, nyin di laa m‑boosi u a yɛla. 31Dinŋɔna ya yi boori ni niriba niŋi seelli n‑ti ya, ya niŋma lala n‑ti ba gba.” 32Ka u daa laa n‑yɛli ba, “Ya yi wuri seeba ban wuri ya, ba nin pɛ'ai ya di zugu? Ay! Halli ala'akyi dima gba niŋni lala. 33Ka ya yi niŋni din veela n‑tiri ban niŋi ya suŋŋa maa, ba nin pɛ'ai ya di zugu? Ay! Halli ala'akyi dima gba niŋni lala. 34Ya yi mari ya buna m‑pɛŋŋni n‑tiri ninvugseeba yan yɛnni, ni, ba siri nin yɔ n‑labsi n‑ti ya, ba nin pɛ'ai ya di zugu? Ay! Halli ala'akyi dima gba pɛŋŋni n‑tiri ba ala'akyi daantaaba ni ba nin ti labsi n‑ti ba bummunni yaasa. 35Amaa see ka ya wuri ya dindaandima ka tumni tunsuma ka pɛŋŋni ya buna n‑tiri niriba kam, ka bu teesiri, ni, ya ti laa n‑deaai a yaasa. Din saha maa ka ya laara nin zoaai pam, ka ya nin leebi Naawunni Ŋɔn Gaari Zaa la biisi. Pa ŋɔn Naawunni n kur niŋni nirilim n‑ti halli ban bu puusiri u, ni tumbeeri dima maa, gba? 36Dinzugu ya zɔm taaba namboo, hoo ya Ba Naawunni ŋɔn zɔri namboo seem la.”
37Yisa daa laa n‑yɛli ba, “Ya di teesiri taaba yɛla, ka Naawunni ku ti teesi ya gba yɛlibeeri; yan di zaŋŋni taaba taalli, ka Naawunni ku ti zaŋŋi ya gba taalli. Ya kyɛri ya taaba taalli m‑pɛŋŋi ba, Ka Naawunni nin ti kyɛ ya taalli m‑pɛŋŋi ya gba. 38Ya zaŋŋma piini n‑ti niriba, ka Naawunni ti ti ya gba, ka yan ti ya deaai seelli maa nin ti paali ya nuusi halli nti yaamna; dama yan ma'asiri n‑tiri ya taaba seem la, lala ka Naawunni nin ti ma'asi n‑ti ya gba.” 39Ka u daa laa n‑nyɛsi ba nyɛsiri wa, ni: “Zooma nin toaai n‑dari u zoontaraana, bee? Ba bayi maa zaa ku lu bɔ'ari ni? 40Karimbiiya bu gatti u karimba, amaa karimbii ŋɔn nya wulisigu suŋŋa, u bamsim ni u karimba bamsim nin ti sa'ai taaba.” 41U daa laa m‑boosi ba, ni, “Ni wula ka i nya muŋŋa i mabii nimbiri ni, ka zaantɔliga deen sa i maŋtoori dinni ni ka i bu nya ka? 42Wula ka i nin toaai n‑yɛli i mabiiya, ni, u kyɛ ka i yiisi munseaa kan bɛ u nimbiri ni, ka deen bu nyara zaantɔliseaa kan bɛ i maŋtoori dinni ni? Nyin birikɔnsi daana wa! Daŋŋma n‑voaai i nimbiri ni zaantɔliga maa m‑basi ka yi nyari suŋŋa pɔi, ka naayi yiisi munseaa kan bɛ i mabii nimbiri ni!”
43Yisa daa naa n‑yɛli ba, “Tisuŋŋu bu wanni walibeeri, ka tibeoo mun bu wanni walisuma. 44Ba gɔsiri tikam zaa maŋtoori wala maa nti baŋŋi bumbɔ tii n nyɛ ka. Dama nira zi n‑tɔsi kinkama goaa zugu, ka sɔ mun zi n‑tɔsi sisibi purinkpaŋŋu zugu. 45Bunsuma yi bɛ ninvugsuŋŋu sufu ni m‑paali ka, u nin yiisiri bunsuma u sufu maa ni na; ka ninvugbeoo ŋɔn mun sufu paali ni bumbeeri yiisiri la bumbeeri na, dama dinkam bɛ ninsaala sufu ni m‑paali ka, dina ka u yiisiri u noori ni na.”
46Ka Yisa daa laa m‑boosi ba, ni, “Wula ka ya boonni ma, ni, ‘N Daana, N Daana’ ka lee m‑bu tumni tunseesi man yɛtti ya, ni, ya tumma maa? 47Ŋɔnkam zaa kyɛ n saani na nti wum n yɛligu, ka dɔli di, n nin wulisi ya lala nira ŋɔn ŋmani sɔa: 48u ŋmani la hoo tammeerisɔ ŋɔn daa gbi tiŋŋa n‑nyeebi u yiri n‑tɔm tampii zugu; ka koom daa ti kpɛ n‑gyiligi yiri maa ka bu nyaŋŋi n‑dam ka, dama ka daa mɛ suŋŋasuŋŋa. 49Amaa ŋɔnkam mun wumni n yɛligu maa ka bu dɔli di, di nira ŋmani la hoo tammeerisɔ ŋɔn daa bu gbi tiŋŋa n‑nyeebi, amaa u kur mɛ n‑tɔm la tambisigu zugu, ka koom daa ti kpɛ n‑gyiligi yiri maa, ka ka daa di lu zaa, ka ka luubu maa daa bɛ pam!”
Currently Selected:
LUUKI 6: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
