GYƆNI 8

1Amaa Yisa ŋɔn daa kyaŋŋi nti paai Ɔlivii Zoori luga ni.

2Asuba bɛkyikyeoo ka Yisa daa laa n‑labi n‑kyaŋŋi Gyeeŋŋu Yiri maa ni. Ka niriba maa zaa daa la'asi n‑gyiligi u na, ka u daa zinni tiŋŋa m‑piili n‑wulisiri ba. 3Di saha ka zaaligu karimbadima ni Farisii dima daa pun gbaai pɔ'asɔ ka u bɛ zina tumpu ni. Ka ba daa mari pɔ'a maa n‑kyɛ na, ka zaali u ba zaasa tooni. 4Ka ba daa yɛli Yisa, ni, “Ti Karimba, nyama! Pɔ'a wa ka ba gbaai ka u bɛ zina tumpu ni. 5Ti zaaligu la puuni, Musa yɛliya lala taabu pɔ'a yɛla, ni, ba zaŋŋma kuga n‑lɔbi u nti ku u. Ka nyin mun yɛli la wula?” 6Ba daa yɛli lala ni ba zamsi Yisa n‑nya yɛttɔ'aseaa din nin kyɛ ka ba galim u. Amaa ka Yisa daa sunni u zugu ka mari u nubila n‑sɔbri n‑niŋni tiŋŋa. 7Ban daa zɛ bɛni ka boosiri u boosa maa, u daa wukki u zugu ka yɛli ba, ni, “Ya ninvugsɔ ŋɔn na zi n‑tum ala'akyi zaa, di daama ŋɔn daŋŋma tooni n‑zaŋŋi kugri n‑lɔbi u.” 8Tɔ, ka u daa laa n‑sunni u zugu yaasa ka sɔbri n‑niŋni tiŋŋa. 9Ban daa ti wum dinŋɔa, ba zaa daa bakkiya n‑kyaŋŋi kpaŋŋa, halli ka ba kpamma maa n daa daŋŋi bakkri. Di daa kpalim la Yisa kɔkɔa, ka pɔ'a maa na kur kpalim n‑zɛ bɛni. 10Ka u daa wukki u zugu ka boosi pɔ'a maa, ni, “Ba lee? Sɔsɔ bu laa n‑kpalim ni u galim i?” 11Ka pɔ'a maa yɛli, ni, “M Ba, sɔ bu kpalim.” Ka Yisa yɛli u, ni, “Man gba bu ya n‑galim i. Kyɛma, amaa di laa n‑tumni tumbeeri yaasa.”]]

12Yisa daa laa n‑tɔ'asi n‑ti niriba maa yaasa, ni, “Mani n nyɛ duniya wa neesim. Ŋɔn kam zaa dɔli ma nin ti nya nyɔvuri neesim, ka ku laa m‑bɛ zibsim puuni n‑kyɛnna.” 13Farisii dima maa daa yɛli u, ni, “Ay! Nyin mammantoori sɛhara ka i dira; nyin ŋɔn tɔ'asi seem wa ka gbinni.” 14Ka Yisa yɛli ba, ni, “Ay! Halli man yi pun diri m mammantoori sɛhara maa zaa yɔri, man yɛtti seem maa nyɛ la yɛlimaŋni, dama m mi man yi ya'aseelli na, ni man wa ya'aseela. Yarima mun bu mi man yi seelli na, bee, man wa seela. 15Ya katti la sariya n‑dɔli la ya ninsaala soori; man mun bu katti sɔ sariya. 16Amaa n yi da ya n‑kari sariya, n sariya karibu maa da yɛ nyɛ la yɛlimaŋni, dama pa la n kɔkɔ m‑bɛ kpa wa; m Ba daa tum ma na, ka ŋɔna n bɛ n saani. 17Di mun pun sɔbi ya zaalikpana la ni, ni, niriba ayi yi di sɛhara ka ba yɛla dɔli la taaba deede, dinŋɔna ban yɛli seem la nyɛ la yɛlimaŋni. 18Tɔ: ka mani mammaŋŋa n nyɛ n sɛhara daana, ka M Ba sɔ ŋɔn tum ma na maa gba nyɛ n sɛhara daana yinni.” 19Ka ba boosi u, ni, “I ba maa lee?” Ka Yisa labsi n‑yɛli ba, ni, “Ya bu mi ma, ya mun bu mi m Ba maa. Ya yi da mi ma, ya da naa m‑baŋŋi m Ba maa gba.” 20Yisa daa tɔ'asi dinŋɔ maa zaa Gyeeŋŋu Yiri puuni, duseaa piini adakka la ŋɔn daa zɛya la ni. Sɔsɔ mun daa bu gbaai u, dama u saha maa daa na bu paai.

21Yisa daa laa n‑yɛli ba yaasa, ni, “N nin ti bakki kpaŋŋa ka kyɛ ya; ya nin boori n ziiya, amaa ya nin ti kpi ya mammantoori tumbeeri tumpu puuni. Ya ku nyaŋŋi n‑kyaŋŋi man wa ya'aseaa maa.” 22Tɔ, ka Yɛhudiya dima maa daa yɛli, ni, “Ni, ti ku toaai n‑kyaŋŋi ŋɔn wa ya'aseelli maa. Dinŋɔ wulisiya, ni, u yɛ n‑ku la u mammaŋŋa, bee?” 23Ka Yisa daa laa n‑yɛli ba, ni, “Ya nyɛ la tiŋni wa dima, amaa man yi la saazugu sa na. Yarima yi la duniya wa ni na, amaa man mun bu yi duniya wa ni na. 24Lala zugu ka n pun yɛli ya, ni, ya ti ya n‑kpi la ya tumbeeri tumpu puuni. Ya yi bu ti niŋi yɛdda, ni, ‘Mani n nyɛ Man Ŋɔn m Bɛ Ni maa’, ya siri nin ti kpi ya tumbeeri puuni.” 25Ka ba daa boosi u, ni, “Nyini n nyɛ ŋɔni?” Ka Yisa yɛli ba, ni, “Man n daa yɛli ya seem maa n‑yi piiligu la ni na. 26Ya zugu m mari yɛla pampam n ya n‑tɔ'asi, m mari la yɛla pam ni n galim ya. Ŋɔn tum ma na maa nyɛ la yɛlimaŋni daana, ka n yɛtti la man wum seem u saani maa n‑tiri duniya wa dima.” 27Ba daa bu baŋŋi, ni, Yisa yɛtti la u Ba yɛla. 28Dinzugu u daa yɛli ba, ni, “Ya yi zaŋŋi man Ninsaala Bii maa n‑duusi saazugu, ya nin baŋŋi, ni, n nyɛ la ‘Mani n nyɛ Man Ŋɔn m Bɛ Ni maa’; di saha maa ka ya nin ti baŋŋi, ni, n bu niŋni bunsɛseela m mammantoori yiiko ni, amaa n yɛtti la yɛttɔ'aseesi m Ba maa ŋɔn wulisi ma ni n yɛlim seem maa. 29Ŋɔn tum ma na la bɛ la n saani; u bu kyɛ ma m‑basi n kɔkɔa, dama n tumni n‑tigri la u nini saha kam zaa.” 30Niriba pam ban daa wum Yisa ŋɔn daa yɛli seem wa daa niŋi u yɛdda.

31Yisa daa tɔ'asi n‑ti ban daa niŋi u yɛdda maa n‑yɛli, ni, “Ya yi sakki n‑deaai n wulisigu maa, ya siri nyɛ la n nyaandɔliba. 32Ya nin baŋŋi yɛlimaŋni maa, ka yɛlimaŋni maa nin ti kyɛ ka ya ti su ya mansi.” 33Ka ba daa yɛli, ni, “Ti nyɛ la Ibrahim butiri dima; ti na zi n‑niŋi daaba n‑ti sɔsɔa. I wulisi la bɔa? - nyin ŋɔn yɛtti, ni, ‘Ya nin ti su ya mammansi.’ ” 34Yisa daa yɛli ba, ni, “N yɛtti ya la yɛlimaŋni: ŋɔn kam zaa tumni tumbeeri nyɛ la daabri n‑ti tumbeeri maa. Ala'akyi n su u. 35Daabri pa la ŋɔn ya n‑kpalim n‑kur bɛ yiri maa ni, amaa yiri biiya mun nyɛ la ŋɔn ya n‑kpalim n‑kur bɛ yiri maa ni halli sahakam. 36Ka Bii maa yi ti ti ya mansuulinsi, dinŋɔna ya siri kur nyɛ la ban su ba mansi ni yɛlimaŋni. 37M mi halli, ni, ya nyɛ la Ibrahim butiri ni dima. Amaa di zaa yɔri ya boori la ya ku ma, dama ya bu boori ya sakki n‑deaai n yɛligu. 38N tɔ'asiri la man daa nya m Ba saani yɛliseesi maa, ni ŋɔn wulisi ma seem; amaa ya mun tumni la yan ŋɔn daa wum seem ya toori ba la saani.” 39Ka ba daa labsi n‑yɛli u, ni, “Ti ba n nyɛ Ibrahim.” Ka Yisa daa yɛli ba, ni, “Ya yi da siri nyɛ Ibrahim biisi, ya naa n‑niŋi ŋɔn daa niŋni seem maa. 40Man yɛtti ya seem la zaa kur nyɛ la yɛlimanseaa man wum Naawunni saani la, amaa di zaa yɔri, ya boori la ya ku ma. Ibrahim daa bu niŋi nŋɔ taabu! 41Ay! - Ya niŋni la ya ba ŋɔn niŋni seem la.” Ka ba daa yɛli, ni, “Naawunni mammaŋŋa kɔkɔ n nyɛ ti Ba, ka ti gba siri nyɛ u biisi - ti pa la ban ka daandima!” 42Yisa daa yɛli ba, ni, “Naawunni yi da siri nyɛ ya Ba, ya naa n‑wuri ma, dama n yi la Naawunni saani na, ka yi bɛ kpa wa pampaŋŋɔ maa. N daa bu kyɛ na la m mammantoori yiiko puuni, amaa ŋɔna n daa tum ma na. 43Bɔ n taasi ka ya bu baŋŋi man yɛtti seem maa gbinni? Di nyɛ la yan bu boori ni ya wum n lahabaari maa zugu. 44Ya nyɛ la ya ba Sintaani biisi, ka ya dɔli la ya ba maa sufu yuubu ŋɔn boori seem zaasa. Piiligu ni sa u daa pun nyɛ la ninvugkuura, ka daa na zi n‑labi yɛlimaŋni ya'ari na, dama yɛlimaŋni ka u ni. U naaŋŋu pun nyɛ u ma'ai ziri, dama ŋɔna n‑nyɛ ziridima zaa ba. 45Amaa man tɔ'asiri la yɛlimaŋa, dinzugu ka ya bu niŋi ma yɛdda maa. 46Ya ŋɔni n nin toaai n‑wulisi n ala'akyi galinsi ŋɔn nyɛ seem? Ka n yi tɔ'asi yɛlimaŋni, wula zugu ka ya bu niŋni ma yɛdda? 47Ninvugsɔ ŋɔn yi Naawunni saani na la - di daama n wumni Naawunni yɛla. Amaa yarima mun bu yi u saani na, ka lala maa zugu kyɛ ka ya za'asi wumpu.”

48Ka ba daa boosi Yisa, ni, “Kala di daa bu dɔli soori tin daa yɛli, ni, i nyɛ la Samɛrii nira ka arizimbeoo bɛ i ni la?” 49Ka Yisa daa labsi n‑yɛli ba, ni, “Arizimbeoo ka ma ni. N tibgri la m Ba maa, amaa yarima n bu tibgri ma. 50Man bu boori la m mammantoori tibsim. Amaa ninvugsɔ n bɛ ni m‑boori n tibsim, ka ŋɔna n nyɛ sarikatta maa. 51Yɛlimaŋni ka n yɛtti ya wa, ni, ŋɔn kam zaa sakki n‑deaai n wulisigu maa ku kpi halli saha kan ka naari.” 52Ka ba daa yɛli u, ni, “Pampaŋŋɔ ti yi baŋŋiya, ni, i mari la arizimbeoo i ni! Ibrahim daa kpiya, ka anabidima gba daa kpi; ka nyin yɛtti, ni, ŋɔn kam zaa sakki n‑deaai i wulisigu maa kur ku kpi halli saha kan ka naari, fa! 53Ti ba Ibrahim daa kpiya, ka anabidima gba daa kpi. Ni, nyini n gaari Ibrahim, bee? Nyin teesiya, ni, i nyɛ la ŋɔni?” 54Ka Yisa daa yɛli ba, ni, “N yi da yɛ tibgi m maŋŋa, lala tibsim maa da yɛ nyɛ la yɔri. Ŋɔn kur tiri ma tibsim nyɛ la m Ba maa, ninvugsɔ yan yɛli, ni, u nyɛ ya Naawunni la. 55Ya na zi m‑baŋŋi u, amaa man ŋɔn mi u. N yi yɛli, ni, n zi u, dinŋɔna n leebi la ziri daana kaman ya taabu. Amaa m mi u, ka sakkri n‑deaari u yɛla. 56Ya ba Ibrahim sufu daa maaya pam, ni, ŋɔn ya nya n saha maa; u siri daa nya di ka daa mari sufupeelli pam.” 57Ka ba daa yɛli u, ni, “Halli i na bu paai yuumpisinu gba, ka yɛli, ni, i daa nya Ibrahim?” 58Ka Yisa daa yɛli ba, ni, “N siri yɛtti ya la yɛlimaŋni, ni, pɔi ka ba daa dɔ'ai Ibrahim, ni, ‘Mani n nyɛ Man Ŋɔn m Bɛ Ni maa.’ ” 59Tɔ, ka ba daa di piisi kuga ni ba lɔbi Yisa, amaa ka Yisa daa sɔ'ai u mammaŋŋa m‑bakki n‑yi Gyeeŋŋu Yiri maa ni.

Currently Selected:

GYƆNI 8: maw

Highlight

Copy