GYƆNI 3

1Yɛhudiya dima toondaansɔ n daa bɛ ni, ka u yuuri boonni Nikɔdiimusi; u daa dɔli la Farisidima maa soori la. 2Tɔ, ka ŋɔnwa daa kyɛ Yisa saani na yuŋŋu, nti yɛli u, “M Ba Rabbi, ti mi, ni, i nyɛ la karimba, ka Naawunni tum i na; dama sɔsɔ ku toaai n‑niŋi alahazibu tunseesi nyin niŋni maa, di yi pa la Naawunni m bɛ u saani.” 3Ka Yisa daa labsi n‑yɛli u, ni, “Yɛlimaŋni ka n yɛtti i wa, ni, sɔ ku toaai n‑nya Naawunni naam maa, di yi pa la ba maali n‑dɔ'ai u yaasa.” 4Ka Nikɔdiimusi daa yɛli, “Ba laa n‑ya n‑niŋi la wula n‑nyaŋŋi n‑dɔ'ai bunkurigu yaasa? U ku toaai n‑labi n‑kpɛ u ma puu ni ka ba maali n‑dɔ'ai u!” 5Ka Yisa daa labsi n‑yɛli, ni, “Yɛlimaŋni ka n yɛtti i ni, ni, sɔ ku toaai n‑kpɛ Naawunni naam ni, ba yi bu dɔli koom suubu soori n‑dɔ'ai u, ni Naawunni Sii Vuusim soori gba. 6Ninsaala ningbiŋŋu ŋɔn dɔ'ai seelli nyɛ la ninsaala, ka Naawunni Siiya mun ŋɔn dɔ'ai seelli nyɛ la siiya. 7Dizugu di kyɛ ka di niŋi i alahazibu, man ŋɔn yɛli i seem, ni, see ka ba maali n‑dɔ'ai sɔ yaasa. 8I bu nya? - Pɛsigu maa yi zeeri n‑zeera, i mun wumni ka vuuri maa, amaa i ku baŋŋi kan yiiri ya'aseaa na, bee, kan kyɛnni ya'aseaa. Tɔ, ka Naawunni Vuusim ŋɔn dɔ'ai seeba saani di bɛ la lala.”

9Ka Nikɔdiimusi daa labsi m‑boosi u, ni, “Wula ka anŋɔ zaa nin toaai n‑niŋi?” 10Ka Yisa daa yɛli u, “Nyini n nyɛ karimba n‑tiri Izraɛli dima, ka i na zi anŋɔa, fa? 11Yɛlimaŋni ka n yɛtti i wa, ni, tirima n tɔ'asiri tin mi seelli, ka tisiri lahabaari zaŋŋi n‑kyaŋŋi tin na mi n‑nya; ka di zaa yɔri yarima sɔsɔ ku sakki n‑deaai ti lahabaari maa. 12N yɛtti ya duniya wa yɛla ka ya ku sakki n‑niŋi ma yɛdda; ka dinŋɔna ya ya niŋi la wula n‑niŋi ma yɛdda, man yi ti yɛli arizana yɛla n‑ti ya?”

13Ni, “Ka sɔ mun na zi n‑du m‑paai arizana ni, na'ala ninvugsɔ ŋɔn pun yi arizana ni n‑sigi na - Ninsaala Bii maa nla. 14Kaman hoo Musa ŋɔn daa zaŋŋi tasiri kutti m‑maali waafu maa n‑kpaasi n‑tabli doo zugu seem maa, ka zaŋŋi ka n‑sa yoo puuni la, lala ka di niŋi talasi ni ba zaŋŋi Ninsaala Bii maa gba n‑sa saazugu, 15ka sɔkam ŋɔn niŋi u yɛdda la, di daama nin mari la nyɔvuri kan ka tariga. 16Naawunni wurilim daa bɛ la duniya wa dima maa pam, halli nti zaŋŋi u bigaŋŋa n‑tisi, ni sɔkam yi niŋi u yɛdda u ku baasi yɔri amaa u nin mari nyɔvuri kan ka tariga. 17Dama Naawunni daa bu tum u Bii maa ni u kyɛ duniya wa ni na nti kari duniya wa dima sariya, amaa u tum u na ni duniya dima maa ti nya tiliginsim u zugu.”

18Sɔ ŋɔn niŋi Naawunni Bii maa yɛdda zaa, u ku mari sariya; ŋɔn mun bu niŋi yɛdda zaa ka ba pun kari u sariya n‑lusi u, ŋɔn bu niŋi Naawunni Bigaŋŋa maa yɛdda zugu. 19Sariya karibu gbinni nŋɔa: neesim maa daa pun kyɛ duniya wa ni na, amaa ninsaalidima maa daa boori zibsim maa ka kyɛ neesim, ba tuma ŋɔn bɛ pam zugu. 20Dama sɔ yi niŋni tumbeeri, u nin gyɛ neesim maa ka ku sakki ni u kyɛ neesim maa saani na, dama u tumbeeri nin yi paalu na. 21Amaa sɔ ŋɔn niŋni yɛlimaŋni tuma, ŋɔna nin kyɛ neesim maa saani na, ni u tuma ti yi paalu na ka ba baŋŋi, ni, Naawunni zugu ka u daa niŋi a.

22Dinŋɔ nyaaŋŋa ka Yisa ni u nyaandɔliba daa kyaŋŋi Gyuudii tingbaŋŋu la ni, ka bɛni ka ŋɔn ni ban daa yuui beela n‑suuri niriba Naawunni koom. 23Di saha ka Gyɔni gba daa suuri niriba: u daa bɛ la Aynɔn ziiya, ka di bu wɔ'a ni Saalim tiŋŋa. Koom daa zoaai bɛni, ka niriba daa kyɛnni u saani na ka u tiri ba kɔsuubu. 24(Di saha maa ka ba daa na bu gbaai Gyɔni n‑kpari duu.)

25Ka Gyɔni nyaandɔliba daa piili n‑ŋmeeri nangbankpeemni ni Yɛhudiya ninvugsɔ zaŋŋi n‑gbaai suubu ni peaari kaari yɛla. 26Ka ba daa kyɛ Gyɔni saani na nti yɛli u, ni, “Ti Ba Rabbi, ti ya boosi i zaŋŋi n‑kyaŋŋi dɔsɔ ŋɔn daa bɛ i saani Gyɔdin mɔ'ari zii la - nyin daa tɔ'asi sɔ lahabaari n‑ti ti la. Tɔ, ŋɔna n suuri niriba Naawunni koom, ka sɔkam zaa kyɛnni u saani.” 27Ka Gyɔni daa labsi, ni, “Sɔ ku toaai m‑mari seelli, di yi pa la Naawunni ŋɔn zaŋŋi bunseelli maa n‑ti u. 28Ya mammansi daa pun wum man daa yɛli seem la, ni, man pa Masiiya maa, amaa Naawunni n tum ma ni n ti daŋŋi Masiiya maa tooni na. 29Ya bu nya? - Ba yi maali amriya kyuu sahanseaa la, dɔsɔ ŋɔn mari pɔ'apaalli maa nyɛ la amriya doo maa; u zɔ ŋɔn zɛ u saani n‑wumni muna, ŋɔna n nyɛ sɔ ŋɔn sufu yi maai amriya doo maa kukɔri wumpu zugu. Lala ka man gba sufu maai pam maa. 30Di sumni, ni, ŋɔna m paasira, ka man mun fiilimna.”

31Ŋɔn yi saazugu ni na gaari sɔkam zaa. Ŋɔn mun yi duniya wa ni na nyɛ la duniya wa nira, ka tɔ'asiri la duniya wa yɛla; amaa ŋɔn yi arizana ni na gaari sɔkam zaa. 32Ŋɔnwa wulisiri ŋɔn pun nya ka wum yɛla maa lahabaari; amaa di zaa yɔri, sɔ ku sakki n‑deaari u yɛligu maa. 33Amaa ŋɔnkam yi sakki n‑deaai u yɛligu maa, di daama nin diisi n‑tabli, ni, Naawunni nyɛ la yɛlimaŋni daana. 34Naawunni ŋɔn tum dɔsɔ maa tɔ'asiri la Naawunni yɛligu, dama Naawunni bu ma'asiri u Sii maa beelabeela n‑tiri u. 35Naawunni Bii maa muna - u Ba siri wuri u, ka zaŋŋi bunseelikam n‑niŋi u nuu ni. 36Ŋɔnkam yi niŋni Naawunni Bii maa yɛdda nin nya nyɔvuri kan ka tariga. Ŋɔnkam mun bu sakki n‑niŋi u yɛdda ku nya nyɔvuri, halli Naawunni sufugyeaa kpalim m‑bɛ u zugu.

Currently Selected:

GYƆNI 3: maw

Highlight

Copy