GYƆNI 2

1Ka di daa niŋi daba ata ka ba daa ti ya puusi amriya kyuu Galilii tingbaŋŋu tinkpanseaa kan yuuri boonni Kanna la. Yisa ma gba daa bɛ la amriya maa ni. 2Tɔ; ka ba daa booli Yisa ni u nyaandɔliba gba ni ba bɛ amriya maa ni. 3Ka amriya yiri dima bunnyuuriseelli ban daa nyuuri maa daa ti pɔsigi. Ka Yisa ma daa yɛli u, ni, ba laa n‑ka daam. 4Ka Yisa daa labsi n‑yɛli u, ni, “M ma, n nuu bɛ la i yɛttɔ'a wa ni? Ay! - n saha na bu paai.” 5U ma mun daa yɛli yiri maa biisi, ni, “U yi ti yɛli ya, ni, ya niŋi seem, ya niŋma lala.” 6Tɔ, ka Yɛhudiya dima zaaligu daa wulisi, ni, ba mari koom n‑zaali ba wungyeeŋŋu kaari ningbimpeaari zugu; ka lala zugu kɔsinsi ayoobu daa zɛ bɛni, bunkara. 7Di saha ka Yisa daa ti yɛli yiri maa biisi, ni, ba gbeaama koom na m‑paali sinsi maa. Ka ba daa gbeaai na m‑paali a zaa. 8Ka u yɛli ba, ni, “Tɔ, pampaŋŋɔ ya gbeaam m‑mari n‑kyaŋŋi n‑ti ŋɔn su kyuu yɛla maa.” Ka ba daa niŋi lala. 9Ka kyuu maa daana daa deaai n‑nyu beela, ka di daa pun labgi daam; doo maa daa bu baŋŋi daam maa ŋɔn yi seelli na, amaa biseeba ban daa gbeaai bu na la daa mi. Di saha ka kyudaana maa daa booli pɔ'apaalli sira maa na 10nti yɛli u, ni, “I niŋi la wula? Dama niriba yi daŋŋi n‑yiisiri daseebu bun nya'asa n‑tisiri zama maa pɔi, ka naayi yiisi bumpɛtti n‑ti ba, ban pun nyu n‑tigi sahanseaa la. Nyin mun na bu yiisi bunsuŋŋu wa na halli ni pampaŋŋɔa.” 11Dinŋɔ n nyɛ alahazibu tunseelli Yisa ŋɔn daa daŋŋi n‑tum n‑wulisi u yiiko ŋɔn daa nyɛ seem la. Galilii tingbaŋŋu tinkpanseelli kan boonni Kanna ka u daa tum alahazibu tumni maa. Ka u nyaandɔliba daa ti niŋi u yɛdda di zugu.

12Di nyaaŋŋa ka Yisa daa doaai n‑kyaŋŋi Kapirinyum, ŋɔn ni u ma, ni u sunzɔppa, ni u nyaandɔliba. Ka ba daa paai nti niŋi dabsa ayi bɛni.

13Sahanseaa ka di daa ti pɔtti Yɛhudiyadima maa Yakki-n‑Gaari Kyuu puusigu la saha, ka Yisa daa kyɛ Gyɛrusalɛm na 14nti kpɛ Gyeeŋŋu Yiri maa ni n‑nya ban daa diri daa bɛni. Baseeba daa koosiri nigi ni peesi ni ŋmana, maaligu zugu, ka seeba mun daa zintiri n‑takkri ligri, lampoo maa zugu. 15Di saha ka u daa zaŋŋi miisi m‑mili a taaba ka mari n‑feebri ba zaa n‑katti n‑yiisiri Gyeeŋŋu Yiri maa ni. Ka laa n‑kari ba bunkɔbri, ka daai la'atakkriba teebulidima ka kyɛ ka ba ligri maa zaa kpaai m‑basi. 16Ka daa yɛli ŋmankoosiriba, ni, ba mari anŋɔ zaa n‑kyaŋŋi, ni, “Ya di kyɛ ka m Ba Naawunni Yiri leebi daa!” 17Ka u nyaandɔliba daa teaaya din daa sɔbi n‑dooli seem, ni, “Nimbirimoaa i Yiri maa zugu mari ma n‑daamna.” 18Di saha maa ka Yɛhudiya dima maa daa yɛli u, ni, “Alahazibu tumni bɔ ka i nin tum n‑wulisiri ti, ni, soori bɛ ni, ni i niŋni anŋɔ zaa?” 19Ka Yisa daa labsi n‑yɛli ba, ni, “Tɔ, ya wurimma Yiri wa m‑basi, ka n nin laa n‑labi m‑mɛ ka n‑zaali, daba ata saha.” 20Ka ba daa yɛli, ni, “Yuuma pisinaasi ni ayoobu ka ba daa zaŋŋi m‑mɛ Gyeeŋŋu Yiri wa, ka nyin ti yɛli, ni, i nin mɛ ka dabsa ata saha, fa?” 21Amaa u ningbina yɛla ka u daa yɛtti maa, n‑ŋmansi hoo Naawunni Gyeeŋŋu Yiri la. 22Ŋɔn daa ti neaai kum ni la nyaaŋŋa sahanseelli la ka u nyaandɔliba daa naayi teaai, ni, u daa pun yɛli ba yɛlli wa n‑zaali. Ka dizugu ba daa ti niŋi yɛdda zaŋŋi n‑kyaŋŋi din daa sɔbi n‑dooli, ni ŋɔn Yisa ŋɔn daa yɛli seem la.

23Yisa ŋɔn daa bɛ Gyɛrusalɛm timpuuni, Yakki-n‑Gaari Kyuu puusigu saha la, niriba pam daa niŋi u yɛdda, ban daa nya alahazibu tunseesi ŋɔn daa wulisiri la zugu. 24Yisa mun daa bu niŋi ba yɛdda, dama u daa baŋŋi ba zaa yɛla. 25U daa bu sakki m‑basi u maŋŋa n‑ti ba, dama u daa pun mi din bɛ ninsaala kam sufu ni, ka pa ni sɔ yɛli u.

Currently Selected:

GYƆNI 2: maw

Highlight

Copy