Luk 10

Yésus maá tɔ́ma baákɔ́nɛ́na bé etémbí a masɔ́ma

1E elime cɛ bɛsana eébí, Otéŋí a Waáŋá Yésus ŋá táfáka *baákɔ́nɛ́na bé etémbí etíne átátɔ́ ne imbuke cíɔ́hátá [ne ífendí] ; u ŋé beébe tɔ́mɔ́kɔ́na béfendí béfendí ɔ mɔnɔŋɔ mekime amá ú ŋaá bá waá yáambaka ɔ ɔcɔba. 2Mbá ɔsɛ náábɔ́ : « Bɛyɔyɛ́ bɛ́ ɔbándáka áŋa biéŋí, mbá babánda á bɔ́ŋa betíkítíki. Ánɔ bɛ́cɔ́kɔ́lɔ́kɛ́na aná muútí bɛyɔyɛ́ wá háná tɔ́mɔ́kɔ́na baacɔ ɔ ɔkɔɔ́bánda bíáyɛ́ bɛyɔyɛ́. 3Ánɔ cɔbá, ɛ́ ma mɛ́ banɔ́ tɔ́mɔ́kɔ́na. Nua nɔ́ŋa háyɛ ɛtɔ́mbá haála ahá ɛbála áŋa. 4Nuti hiíte mɔɔnyɛ́, ta ambalá, ta bɛkandɛ́na ; nɔtɛ yaánáka o ohónyí e mutéŋínyi. 5Eé meébe mekime emé nuenú óofine, ánɔ cáŋa téŋíti baacɔ bá hɔ́á anyía mbuumu á bámɔ́kɔ́na ne beébe. 6Mbɔ́kɔ ɔɔcɔ ewú u ŋe léne bɔmbányɛ áŋa hɔ́á, búánɔ́ bɔmbányɛ káá bá nááyá. Mbɔ́kɔ u tɛ á bá, énu hiitútúne búánɔ́ bɔmbányɛ. 7Énu limíne hí eé ciíbe eécí ; ánɔ nyíáka, ánɔ múákɛ́na bɔkɔ bukime abɔ́ bá káá banɔ́ iínjie ; anyía munyiɔnɔ ŋá nyɛmána mu ɔnɔhɔkɛna a búáyɛ́ buólí. Nuti húle óofokine eé meébe eé meébe.

8Ekúlú eyí núénú oofine a bunɔŋɔ a bɔ́mɔtɛ́, mbá bá banɔ́ káha bɔmbányɛ, ánɔ nyíáka bɔkɔ bukime abɔ́ bá banɔ́ iínjie, 9énu eéŋúnyísíki bɔkɔnɔ́kɔ́nɔ bá buátɛ́ bunɔŋɔ ; mbá nu beébe laakɛna anyía : “Bandɔ́mɛsɛ́ a yáaŋa hoóhi ne otéŋínyi náánɔ́.” 10Mbá ekúlú eyí nuenú oofine a bunɔŋɔ a bɔ́mɔtɛ́, mbá bé kíne ɔ banɔ́ káha bɔmbányɛ, ánɔ cɔbá a tɔháatɛ́ tɔ́ bunɔŋɔ eétú, mbá nu kɔɔna anyía : 11“Tú me sú bíkiteke ofunú ú búánɔ́ bunɔŋɔ awɔ́ alábákɛ́na a cáásɔ́ akɔlɔ́, anyía nuánɔ lɔ́kɔ́ma aatɔ́ ɔlama. Ta híáná, énu menyi asana eeye bɔmbányɛ anyía : Bandɔ́mɛsɛ́ a yáaŋa hoóhi ne otéŋínyi baacɔ.” 12Ɛ ŋa mɛ́ banɔ́ laána anyía a buɔ́sɛ́ abɔ́ Bandɔ́mɛsɛ́ kéé kélísíki baacɔ, baacɔ bá bálɛ́ka eébé ká bɔ lɔ́kɔ́máka muuyé ɔ ɔhɔla baacɔ bá bálɛ́ka cɛ *Sɔ́tɔm.

13Nua nɔ́ŋa mahana, banɔ́ baacɔ bá Kolasine ! Nua nɔ́ŋa mahana, banɔ́ baacɔ bá Bɛtɛsɛ́ta ! #10.13 Bífendí bɛ́ bálɛ́ka eécí áŋa hoóhi na Kabɛlnawum. Yááŋa anyía, mbɔ́kɔ bikéki bɛ́ bɛsana abɛ́ Bandɔ́mɛsɛ́ ŋaá kɛ́láka náánɔ́ á bɛ́kɛ́láka ne e Tíil ne e Síton,#10.13 Bálɛ́ka eécí ŋaá bá cíó yóómóko buéŋí e mebeé. keyé baacɔ bá bálɛ́ka eécí na maá bɔ́ bɛ́láŋáka ikute, bó límekine a mɔɔtɔ́ anyía bébú tóŋínyi anyía bá ŋa bɔ́ áamba ɔbɛ́kákálákɛ́na maabɔ́ maabɛ́, mbá bá sɔ́mba ɔkɔlɔ́ eé meéme. 14Yaátɛ́ asana, a buɔ́sɛ́ abɔ́ Bandɔ́mɛsɛ́ kéé kélísíki baacɔ, banɔ́ nu ká nɔ́ lɔ́kɔ́máka muuyé buéŋí ɔ ɔhɔla baacɔ bé ne Tíil ne Síton. 15Mbá banɔ́ baacɔ bá Kabɛlnawum, nu ŋe nú kéti anyía nu ká nɔ́ báátáka, nuɔ́ kɔɔ́háma ɔ Ɔmuaná e ? Eéʼeé, Bandɔ́mɛsɛ́ káá banɔ́ lóosiki, nuɔ́ kɔɔ́háma haála ehé biwéewé áŋa. » 16Mbá ɔsɛ tɔ́na ná bááyɛ́ baákɔ́nɛ́na : « Ɔɔcɔ awɔ́ u ŋaá banɔ́ lɔ́kɔ́mɛ́na ŋaá mɛ lɔ́kɔ́mɛ́na tɔ́na ; ɔɔcɔ ewú é kíne ɔ banɔ́ káha bɔmbányɛ ŋe kíne ɔ mɛ káha bɔmbányɛ tɔ́na. Híáná ɔɔcɔ ewú é kíne ɔ mɛ káha bɔmbányɛ meé kíne tɔ́na ɔkáha bɔmbányɛ Ooci awɔ́ u ŋaá mɛ tɔ́má. »

Nyɛkahálɔ́mɔ́na nyɛ́ baákɔ́nɛ́na

17Ekúlú ayɛ́ *baákɔ́nɛ́na etíne átátɔ́ ne imbuke cíɔ́hátá [ne ífendí] ŋa ka bɔ́ hálɔ́mɔ́ná, bá ŋa bɔ́ bá bébú bílénéké, bá kɔ́ɔnaka báyɛ : « Otéŋí a Waáŋá, ta *bɛɛbɛ́ bí bililé tɔ́na ŋaá bá bɛ́ a basɔ́ lɔ́kɔ́mákɛ́na ekúlú ayɛ́ tuasɔ́ bá tuésu biíbi témbúsíki ɔ nyiɔ́wɔ nyiínyi. » 18Mbá Yésus ɔsɛ : « Ɛ ŋa mɛ́ lɛcáka *Sátan maá ka hátɔna ɔ ɔmuaná u ŋgá kúá hú ndúum. 19Ɛ́náʼo, ɛ ŋa mɛ́ banɔ́ iínjíé na makɛ́nda ma ɔnɔsɔkɛna na mɔɔ́hɔ na ɛŋɛŋɛ́, na makɛ́nda ma ɔyákáka Sátan i ihényí ikime ; ta bɔkɔ a bɔɔbɛ́ tɛ káá banɔ́ kɛ́la. 20Ta híáná, nuti bílénéke anyía nu ŋe nú témbúsi bɛɛbɛ́ bí bililé, mbá énu bílénéke anyía cáánɔ́ eénye áŋa cɔɔ́ŋɔ́kɔ́nɔ́ a Bunɔŋɔ bɔ́ Bandɔ́mɛsɛ́. »

21Hí ekúlú etéeyé, Yésus eé bílénéke a makɛ́nda me *Efúúménénú yí Elilé,#10.21 Cɛ́mɔtɛ́ Ciɔɔ́ŋɛ́ cɛ́ buáyá áŋa na « … e úúyé ɔtɛ́má noómi ». mbá ɔsɛ : « Ééʼ, Taatá, kuɔŋɔ́ o ŋoó téŋínyi na ɔmuaná na ɔmɛsɛ́. I ŋe mí o wiínjíé bitéŋíti anyía ɔ ŋɔ́ɔ nambɛ́na ne bemenyi bɛsana ne benjiŋénjíŋe bɛsana eebi, wó biíbi tóŋgínyi né iŋéné. Ɛ́ɛ, Taatá, aáná bú ŋo yóo bílénékíne. 22Ciamɛ́ Síkíne ŋeé mi iínjíékíne bɛnyɛ́ma bikime. Ta ɔɔcɔ ti ŋée ményi aányɛ́ wáŋa Ɔɔ́nɔ́, ɛ́ tɛ ŋáa bá Síkíne ; ta ɔɔcɔ ti ŋée ményi aányɛ́ wáŋa Síkíne, ɛ́ tɛ ŋáa bá na Ɔɔ́nɔ́ na baacɔ ebé u ŋeé léne o beébe tóŋínyi cíáyɛ́ Síkíne. » 23Ekúlú ayɛ́ u ŋaá bá bímuócí na bááyɛ́ baákɔ́nɛ́na, u ŋé beébe laána ɔsɛ : « Nua nɔ́ŋa bambányɛ, anyía nu ŋa nɔ́ lɛca bɛsana eebi. 24Ɛ ŋa mɛ́ banɔ́ láana anyíaʼo : Ne *behémúnyi bɛsana bá Bandɔ́mɛsɛ́ beéŋí ne betéŋí bá buáyá ŋa bɔ́ bá na ɛcaná ciéŋí ɔ ɔlɛca aátɛ́ nu ŋa nɔ́ lɛca, mbá beébe ta ɔlɛca. Bá ŋa bɔ́ bá na ɛcaná ciéŋí ɔ ɔlɔ́kɔ́máka aátɛ́ nu ŋa nɔ́ lɔ́kɔ́ma mbá beébe ta ɔlɔ́kɔ́ma. »

Ɛnjaba ci ebíényi yɛ́ Samalí a yɛ́ ŋaá bɛ́cáma ɔɔcɔ mahana

25Ekúlú eéyé, *muékúnyi bikotí a mumɔtɛ́ ŋa hátɔ́na ɛndánáka ; u ŋá batá Yésus o o wuúci kúfítínyi, ɔsɛ : « Muékúnyi, aátɛ́ yámɛ nyɛmána wu ɔkɛla ɔ ɔbɔ́ŋɔ yɔɔ́sɔɔ́sɔ yí olíhe yí ekúlú ekime e ? » 26Yésus ŋé wuúci bɛ́káma ɔsɛ : « A bíásɔ́ *bikotí, aátɛ́ yááŋa yɔɔ́ŋɔ́kɔ́nɔ́ e ? Anyána ɔ́ ŋɔɔ́ lɔ́kɔ́ma, ekúlú eyí ó ŋoó biíbi fana e ? » 27Mbá ɔɔcɔ ɔsɛ : « Yááŋa yɔɔ́ŋɔ́kɔ́nɔ́ anyía : “Lénéke uuwu Otéŋí a Waáŋá Bandɔ́mɛsɛ́ ne úúwu ɔtɛ́má okime, ne hííwu hɛtányɛ́ hikime, na mɔɔwɔ makɛ́nda mekime, na ciɔwɔ injiŋé ikime ;#Tet 6.5 mbá e lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá.”#Lef 19.18 » 28Mbá Yésus ɔsɛ nááyá : « Ɔ́ mɔɔ́ kɔɔna taaká ; mbɔ́kɔ ɔ́ɔ kɛlaka aáná, ɔ kɔ́ɔ́ bɔ́ŋɔ taaká ci olíhe ú ekúlú ekime. »

29Mbá muékúnyi bikotí eémú ŋaá bá máa yáambaka otóŋínyi anyía muáŋa atálɛ́mánánɔ́ yɛ́ ɔɔcɔ ; aáná mu ŋá batá Yésus mɔsɛ : « Aányɛ́ wáŋa sɔ́ɔ́kɔ́ e ? » 30Yésus ɔsɛ : « Yɛ́ ŋaá bá anyía ɔɔcɔ a wɔmɔtɛ́ ŋaá bá weé húlúkúne eé Yelúsalɛm, u cɔ́cɔbaka eé Yéliko. Aáná u ŋaá kuána bicónjólóŋó o ohónyí. Bí ŋé wuúci hatɛ́na, bí ŋé wuúci sɔ́mɔ́kɔ bɛlaŋa, bí ŋé wuúci súbéke na tɔŋɛndá bɔmbányɛ bɔmbányɛ, bí ŋé wuúci nyɛána aáhá ɔsakɔ́núánɔ́. 31Mululi nyiínjie a mɔmɔtɛ́ ŋaá bá mu á hɔ́láka bɔ hɔlaka o otóocí ohónyí, u ŋá lɛcá waáta ɔɔcɔ, u ŋá bɛ́nandɔna, u ŋá hɔlaka. 32Híáná tɔ́na, ɔɔcɔ u *bɔnyɛ Léfi ŋa kɛ́laka : U ŋgá háma a haátɛ́ haála, u ŋá lɛcá waáta ɔɔcɔ, u ŋá bɛ́nandɔna, u ŋá hɔlaka. 33Mbá ebíényi yɛ́ Samalí a yɛ́mɔtɛ́ ŋaá bá yé húlúkúne ɔ ɔkanda. Ɛ́makɛ́la yáa kaáháma hɔ́á, yɛ́ ŋá lɛcá ɔɔcɔ oócí, nyi wuúci bɛ́cáma mahana eényí. 34Yɛ́ ŋaá tálɛmɛna, yí ŋé bíkositi nááyá, yí ŋé ootókíne meluku i imbéŋé, yí ŋé ciíci feefíki ɔsɔŋɔ,#10.34 Bá ŋaá bá bá bɛ́kɛ́lákɛ́na ɔsɔŋɔ ɔ ɔwaándɛ́na imbéŋé, meluku ɔ ɔsua imbéŋé anyía cí ti bíhísíne. yɛ́ ŋɔ́ ɔɔtɔkɔkɔ. Yí ŋé wuúci bɛ́túáhɛ́na a yááyɛ́ abaŋabɛbɛa, yí ŋé wuúci cɔbána eé ciíbe ci bekenyí o o wuúci sókóbi.

35Ɔ ɔyá ɔyá, yɛ́ ŋɔ́ sɔmɔ́ biléŋú bɛ́ mɔɔnyɛ́ bífendí, yí ŋé iínjie né muútí ciíbe ci bekenyí, mbá ɔsɛ nááyá : “Mi sókóbíkínyi ɔɔcɔ ooci ; ekúlú ayɛ́ ɛ ká háná mɛ hɔlaka aaha, mbɔ́kɔ mɔɔnyɛ́ ká bɛ́tala, yaŋɔ́ bɛ́muátá, ɛ kɔ́ mɛ ɔ tuana mekime.” » 36Mbá Yésus ɔsɛ né muékúnyi bikotí : « A bɛ́tátɔ́ bɛ́ baacɔ eébí, awɔ́ háányɛ́ o ŋoó bíketi anyía wáŋa sɔ́ɔ́kɔ́ cɛ ɔɔcɔ ewú bicónjólóŋó ŋá hátɛ́na e ? » 37Mbá ɔɔcɔ ɔsɛ : « Sɔ́ɔ́kɔ́ ewú u ŋeé wuúci bɛ́cáma mahana, yó wuúci ɔ́ɔ́lɛ́ta. » Yésus ɔsɛ nááyá : « Cɔbá, búle kɛ́la híáná. »

Na Mááta na Malíi ma bɔ́ káha Yésus

38Ekúlú eyí Yésus ŋaá bá waá kándaka o ohónyí ne wuúci na bááyɛ́ *baákɔ́nɛ́na, bá ŋa ka bɔ́ háma a bunɔŋɔ a búmɔtɛ́. Aáhá oónjú a wɔmɔtɛ́ nyiínyi ɛ́cɛ Mááta ŋeé wuúci káha e uuyé ooki. 39U ŋaá bá ne uuyé onyíinyí ɛ́cɛ Malíi. Malíi ŋe límíne ɔ ɔmɛsɛ́ hoóhi ne Otéŋí a Waáŋá Yésus, u lɔ́kɔ́máka bɛsana ebí ú ŋe yéekunyi. 40Ekúlú eéyé Mááta ŋaá bá weé bíyébíki a masɔ́ma me ciíbe meéŋí. Aáná u ŋaá faáya hoóhi ne Yésus mbá ɔsɛ nááyá : « Otéŋí a Waáŋá, bú tɛ ŋɔ́ yɔ́ɔ kɛla bɔɔbɛ́ anyía uumi onyíinyí é mi cícíne masɔ́ma mekime yaŋɔ́ bímuócí e ? Wuúci laána anyía wá mɛ ɔ́ɔ́lɛ́ta aná. » 41Aáná Otéŋí a Waáŋá ŋeé wuúci bɛ́kámá ɔsɛ : « Mááta, Mááta ! Ɔ ŋɔɔ́ bɛ́ákɛ́na bɛsana biéŋí. 42Menyi anyía bɔkɔ áŋa búmɔtɛ́ abɔ́ baacɔ ábɔ́ nyɛmána bá ɔkɛlaka. Malíi áŋa ɔtáfánɔ́ ambányɛ yɛ́ bɔkɔ ; ta ɔɔcɔ tɛ á bá wu o wuúci aáŋíá bɔkɔ eébú. »

Currently Selected:

Luk 10: lem

Highlight

Copy