Efɛɛzɛ 6

Pwəə nə́ ń cící bə̀sɔ́ná bɛ́ ǹdə́ bə̀ dabá bɛ́ ga

1Ámyɛ̌ bə̀sɔ́ná bɛ́, zwẽnə á dabá ǹdʼá nábá nyí ni, ǹdə Cinu gə́ nə́ ń yâl nɛ́. Rə̀myɛ́ wɔ́ kɔn dɛ̀bɛ́ rə̀ mâ. 2Yi nyə́ né gakó wẽ́, wɔ́ nyí rí tɛ̀bɛ́ rə̀ nʼê wə̀l bə̀: “Nyám ǹ da ǹdə́ ǹ ná” mɔ́ nɛ rə̀ jɛ̀nɛ̀ rə bwəl nyí rə bʼe súlí. 3Rə̀ wòwə̀: “Ǹ gə nə́ ǹ nyàm ǹ da ǹdə́ ǹ ná, ǹ bʼâ nə wu-nyɔ̃̀, ǹ myə̂l jʼa zə dwɛ̀lɛ̀ cɛ yó.”

4Ámyɛ̌ dabá, bə̀kʼá wɛ̀rhɛ́ á bə̀sɔ́ná bɛ́, á ce bə̀ lyimə zɛ̃̀ yé. Kɔ́nna bɛ, sʼá cící bi, á cèrhè bè, ǹdə́ Cinu cìcì surhə né.

Pwəə nə́ ń cící tùntùnnə̀ bé ǹdə́ bə̀ yó-cìnə́ bé ga

5Ámyɛ̌ tùntùnnə̀ bé, zwẽnə á yó-cìnə́ bé cɛ yó mó nyí ni. Nyámna bɛ ǹdə́ wu-põ, ǹdə á gə́ nʼá zwẽ Kristə nyí ni ní. 6È bə̀kʼa yə̀ bə̀ gə zhǐ bə̀ yírhə́, á zɛ̃̀ á nʼá twĩ̀ á pɛ bɛ ǹdə wɔ́ numbyínsi pùbùlə̀ wɔ̀rhɔ́ á nʼá pyà ta yé. Wɛ̀rhɛ́na kɔn dɛ̀bɛ́ Yi nʼê yàlá, ǹdʼá wun gakó á tumə né wẽ́, ǹdə Kristə tùntùnnə̀ ta. 7Twĩ̌nə á pə á yó-cìnə́ bé ne ǹdə́ wu òdù, ǹdə wɔ́ Kristə ne á nʼá twĩ̀ á pɛ ta, sə è bə̀kʼa yə̀ ǹdə wɔ́ numbyínsi dúdú ni á nʼá twĩ̀ á pɛ ta yé. 8Lwarna bə̀ lò mɔ̀bɔ́ ń nə́ ń wɛ̀rhɛ́ cɛ̀nɛ̀, rə̀-ná-cí gə wɔ́ lò tùntùnnə̀, ráá ń gə cǐ ń cìn myɛ, ń bʼa nə cɛ̀nɛ̀ rɛ́ ń wɛ̀rhɛ́ mɔ́ Cinu sõ.

9Ámyɛ̌ yó-cìnə́ bé, ámyɛ wɛ̀rhɛ́na cɛ̀nɛ̀ ǹdʼá tùntùnnə̀ bé. Á bə̀kʼá bya bɛ yé. Lwarna bʼâmyɛ̌ ǹdə́ bə̀myɛ́ ga zhe yó-cə́bal mə̀dù, ń ŋwɛ́nɛ́ Arəzana w ń cǐ ámyɛ̌ ga. Lyì bí gakó wɔ́ kɔn rə̀dù ń sono.

Nə́ mə̂ sə nə́ kwè búlə́ né wẽ̀ dé Yi nʼê pɛ mɔ́

10À zɔ̀mɛ̀ nánkwɛɛ́rɛ́ à la byilu mú, wɔ́ lwə́l à nʼâ lwə̀l ába, sʼá zhí Cinu ni á bʼá pyà wu-jɔ̀ ń jàn dɛ́ nánfɔ̀lɔ̀ w wẽ́. 11Kwěnə Yi búlə́ wẽ̀ dé gakó á zə á jɔ̃̀ wà, mùnì á ŋwɛ̀nɛ́ á zhì á cẽ Shətana sòlò mó. 12Nə́ tʼá bwí ǹdə́ numbyínsi yé. Nə́ rʼé bwí ǹdə́ jàn cìnə́ námməlwâlsɛ́ shɛ̀bɛ́ dwí gakó sə̀ ŋwɛ́nɛ́ dɛ̃̌, yírhə́ wàr nə̀ nɛ, sə̀ zhe jàn ǹdə́ ŋwɔ̀nɔ́ cə-byín lũ w wẽ́ mó. 13Rə̀myɛ́ ce, kwěnə Yi búlə́ wẽ̀ dé gakó á zə á jɔ̃̀ w èlâsɛ̃´, mùnì dwã nɛ́ nyɛ̀bɛ́ nə̀ bə càn mɔ́ gə tú nə̀ yúwə́, sʼá ŋwɛ̀nɛ́ á zhì á bú búlə́ né kɔn mʼe yí nə̀ zhɔ̌, sʼá zhì á nà y yó kẽkẽ.

14Zɛ̃̀nà á zhì dɛ̃̌ á dɛ̃̀. Cenə zhə̀n dɛ́ á cã̌ nɛ́ ǹdə cã̌-tɔ̀nɔ̀ ta. Zwínə cángá tumə né nə yə̀ ǹdə kàmə̀-zwǐ kɛ̀bɛ́ á mʼá cə̀r á cìn búlə́ jàà w ta. 15Cenə yə̀wâl á nə̀rh né ǹdə nə̀cìlə̀ ta, á mʼá bwə̀l yò-ècɔ̀nɔ̀ nyí rí rə̀ nʼê pɛ yə̀-zùlə́ mó. 16Zəna á Yi-ni-zhú mú mə yə̀ ku á mʼá cə̀r á cìn kɔn gakó wẽ́ twéé gakó. Shətana gə tú è la zə è swé ré ǹdə́ rə̀ myǐn mú e dul ába, sə ku w cə̀r rè. 17Zwẽnə Yi vwârh mɔ́ á pú ǹdə cɔ̀bɔ́ yə́-pú ta, sʼá zwẽ Yi zɔ̀mɛ̀ rɛ́ Eshirhə náàcɛ̀nɛ́ nʼê pɛ ába ǹdə búlə́ shù ta mɔ́.

18Cenə Yi dɛ̃ gakó, á lwə̀l lè ǹdə́ Eshirhə náàcɛ̀nɛ́ jàn, sʼá zhìlì á yala nɛ kɔn gakó wẽ́, á lwə̀l lè dɛ̃ gakó rə̀ lyì bí gakó yilə. 19Lwə̂lnə re àmyɛ yilə, mùnì à gə la zɔ̌m, sə rə sɛ̃ nɛ ǹdə́ zɔ̀mà nyɛ̀bɛ́ nə̀ mʼa ce a byili yò-ècɔ̀nɔ̀ nyí rí rə̀ yʼà shèè mó ǹdə́ wu-jɔ̀. 20À wɔ́ yò-ècɔ̀nɔ̀ nyí rí rə̀myɛ́ bwə̀lnə̀. Wɔ́ rə̀myɛ́ yil bə̀ zɔ nɛ bə ce byə̀nə́-jù wə̀. Lwə̂lnə Yi à yilə, mùnì a zɔ̀m ǹdə à gə́ mə̂ sʼa zɔ̀m nɛ́ ǹdə́ wu-jɔ̀.

Pwəə nə́ ń ce Kristə-lyì bí ń mə́ ń gwi ń sɛ́bɛ́ rɛ́ yó

21Tishiki wɔ́ nə́ da-byǐ nántwə̂. Ń nə́ ń twĩ̀ Cinu tum dí ǹdə kɔn gə́ mə̂ nɛ́. Ń mà n zɔ̀m à yò ǹdʼába, n byili ába kɔn dɛ̀bɛ́ à nʼâ wɛ̀rhɛ́. 22À nʼâ twĩ̀ mù á sõ, mùnì n byili ába kɔn dɛ̀bɛ́ rə̀ ŋwɛ́nɛ́ nə́ sono, sə n súlí n zə á wun ní.

23Nə́ Da Yi ǹdə́ Cinu Yezu Kristə mʼa ce bə̀ yə̀-zùlə́ né ǹdə́ bə̀ sónó w yə̀ nɛ́ ǹdʼámyɛ̌ ǹdə́ nə́ da-byâ bɛ́ gakó, á kwɛrhɛ á zhí bi. 24Yi mʼa cĩ́ bwəl lyì byɛ̀bɛ́ gakó bə̀ só nə́ Cinu Yezu Kristə ǹdə́ sónó páá mɔ́ yó!

Currently Selected:

Efɛɛzɛ 6: lee

Highlight

Copy