Kɔlɔɔsɛ 3

1Á tó Kristə ne á bwìrhì. Rə̀myɛ́ ce, pyâna kɔn dɛ̀bɛ́ rə̀ ŋwɛ́nɛ́ dɛ̃̌, ń gə́ jě Yi jə̀jĩ́ ni mə̀gã̌ mɔ́. 2Cenə dɛ̀bɛ́ rə̀ ŋwɛ́nɛ́ dɛ̃̌ mɔ́ pyâ yò zù ába, sʼá bə̀kʼá yẽ̌ dɛ̀bɛ́ rə̀ ŋwɛ́nɛ́ cɛ yó mó pyâ yò zù ába yé, 3bʼâ cùwə̀, sə á nyǔ mú tó Kristə ne mə shèè Yi wẽ́. 4Wɔ́ Kristə ń wɔ́ á nyǔ mú. Sə ń gə ká ń túwə́, rə̀myɛ́ yó, ámyɛ bʼâ tó mo á zù ń zùwə́ y wẽ́.

5Rə̀myɛ́ ce, vǔrnə lũ w nyə̀ná nɛ́ á wẽ́: fwə̂l, ǹdə́ tùntùm-bəywààlɛ̀, ǹdə́ bùlə̀ námməlwâlsɛ, ǹdə́ shilə námməlwâlsɛ, ǹdə́ nə̀cɛ̀ndɛ̀ pyâ kɔn lyɛ̃ cɛ nɛ, bə̀ nə̀cɛ̀ndɛ́ pyâ kɔn lyɛ̃ cɛ nɛ mɔ́ nʼê twí è jǐrh ǹdə yi ta numbyíní yilə. 6Wɔ́ rə̀myɛ́ rə̀ nʼê zɛ̃̀ Yi lyim ni ǹdə́ byɛ̀bɛ́ bə̀ tʼâ zwẽ rə̀ nyí ni mú. 7Shãã ga, ámyɛ gə́ yʼâ gwẽ̌ ŋwɛ́nɛ́ wẽ̀ dé rə̀myɛ́ mɔ́ wẽ́ yi ní, wɔ́ èta á yʼâ nʼá wɛ̀rhɛ́ nɛ́.

8Sə èlâsɛ̃´, yẽ̌nə wẽ̀ dé tɛ̀bɛ́ èta mɔ́ nɛ: lyim, ǹdə́ jàn tumə, ǹdə́ wu-bárhɛ́. Dwã tùùrhì ǹdə́ zɔ̀m-bəywààlɛ̀ bə mə̂ sə nə du á nyú w yé. 9Á bə̀kʼá gõ kɔma á pə dwã nɛ yé, bʼâ vùr á shãã ga tùntwə̃̀ə̃̀ né ǹdə kàmə̀-zù-dwã́ ta. 10Sə èlâsɛ̃´, kɔn nyɛ̌ ǹdə wɔ́ kàmə̀-zù-dwə̃̀ á kʼá zù ta. Á jǐrh lyì-dùlə̀, byɛ̀bɛ́ bə̀ jʼâ wɔ́ nándùlə̀ twéé twéé, bə̀ nyɛrhɛ bə̀ Wârhna mɔ́, mùnì ga bə lwar ń pár náàcɛ̀nɛ́. 11Èta, Zhwifubá ǹdə́ byɛ̀bɛ́ bə̀ də̀ Zhwifubá mó ga jǐrh kɔn rə̀dù; byɛ̀bɛ́ bə̀ gòm mó ǹdə́ byɛ̀bɛ́ bə̀ yə̀ gòm mó ga jǐrh kɔn rə̀dù; zhələ ǹdə́ gɔ-má ǹdə́ yómə́ ǹdə́ byɛ̀bɛ́ bə̀ cǐ bə̀ cìn mú ga jǐrh kɔn rə̀dù. Sə Kristə wɔ́ kɔn gakó, ń ŋwɛ́nɛ́ á gakó wẽ́.

12Yi só ába, rə̀ cír ába, mùnì ga á yə̀ rə̀myɛ́ lyì. Rə̀myɛ́ ce, cenə jàn nɛ́ á yə̀ nɔ̀nɔ̀-dǔr cìnə́, á swéné dwã. Yálna cìn-lwəl cìnə́ ǹdə́ lyì-nyɛ̀mɛ̀, ǹdə́ wu-bɔ̀nɔ̀ cìnə́, ǹdə́ cìn-pyɔ́nɔ́ cìnə́. 13Zəna cìn-pyɔ́nɔ́ ǹdə́ dwã. Lò mə̀dù gə tú ń zhe zɔ̀mɛ̀ ǹdə́ ń dõ, sʼá pə dwã sǔbri. Cinu pɔ ába sǔbri; ámyɛ mə̂ sʼá pə dwã sǔbri. 14Sə kɔn du, swénénə dwã, bə̀ wɔ́ sónó w ò nʼô ce nyì-dwìì námpúm yàl nɛ́.

15Cenə yə̀-zùlə́ né nyɛ̀bɛ́ Kristə nə́ ń pɛ mɔ́ yə̀ á wẽ́. Wɔ́ yə̀-zùlə́ né nə̀myɛ́ yil Yi byẽ̀ ába rə ce á ŋwɛ́nɛ́ dwã yó, mùnì ga á jǐrh kɔn rə̀dù. Cenə rə̀ nə̀bán twéé twéé. 16Yẽ̌nə Kristə zɔ̀mɛ̀ rɛ́ jòm á wẽ́ námpúm. Byilinə dwã nɛ, sʼá cící dwã ǹdə́ surhə nyɛ̀bɛ́ nə̀ càn. Núnnə núrh shɛ̀bɛ́ sə̀ nʼê shí Eshirhə náàcɛ̀nɛ́ sõ, ǹdə́ núrh dwí gakó á mʼá ce Yi nə̀bán ǹdʼá wun gakó. 17Kɔn dɛ̀bɛ́ gakó á nʼá zɔ̀mà, ǹdə́ dɛ̀bɛ́ gakó á nʼá wɛ̀rhɛ́, wɛ̀rhɛ́na rə̀ gakó Cinu Yezu yil lé yilə, á tó ńmyɛ̌ dɛnnɛ á ce nə́ Da Yi nə̀báná.

Kristə-lyì kɛ̀lɛ́ jòmə́

18Ámyɛ̌ kana bɛ́, shɛ̀nɛ́na á byə́nə́ bé nyí ni, bə̀ wɔ́ rə̀myɛ́ rə̀ wɔ́ Cinu pùbùlə̀. 19Ámyɛ̌ bala bɛ́, swénénə á kana bɛ́, sʼá bə̀kʼá gwirhi á yə́rh ǹdə́ bɛ yé. 20Ámyɛ̌ bə̀sɔ́ná bɛ́, cilinə á dabá ǹdʼá nábá zɔ̀mà kɔn gakó wẽ́, bə̀ wɔ́ rə̀myɛ́ Cinu nə́ ń yàlá. 21Ámyɛ̌ dabá, á bə̀kʼá kwè lyim twéé twéé ǹdʼá bə̀sɔ́ná bɛ́ yé, mùnì ga bə̀ wun bə̀kʼa gə yé.

22Ámyɛ̌ tùntùnnə̀ bé, shɛ̀nɛ́na á yó-cìnə́ bé cɛ yó mó nyí ni kɔn gakó wẽ́. Shɛ̀nɛ́na bə̀ nyí ni ǹdʼá pùbùlə̀, á gə́ nʼá nyàm Cinu mú yilə. Sə è bə̀kʼa yə̀ bə̀ yírh dǔr dúdú yil á nʼá shɛ̀nɛ́ bə̀ nyí ni, e jǐrh ǹdə wɔ́ numbyínsi nyí ni shɔ̀nɔ́ ta yé. 23Kɔn dɛ̀bɛ́ gakó á nʼá wɛ̀rhɛ́ mɔ́, wɛ̀rhɛ́na rɛ ǹdʼá wun gakó. Á yě bə̀ wɔ́ Cinu yil á nʼá wɛ̀rhɛ́ rɛ, sə è də̀ numbyíní dúdú yil yé. 24Á yě bʼâ mʼâ nə cəl kwândɛ nə̀cɛ̀ndɛ́ tɛ̀bɛ́ Yi cĩ́ rə̀ lyì bí ni mú wẽ́, bə̀ wɔ́ Kristə ń wɔ́ á yó-cə́bal mɔ́ cìcì mú; wɔ́ ńmyɛ̌ nyí ni á nʼá shɛ̀nɛ́ nɛ́. 25Lò mɔ̀bɔ́ ǹ wɛ̀rhɛ́ lwɛlɛ, ǹ bʼâ nə còrhò-tum rə̀ yilə; bə̀ lyì bí gakó wɔ́ kɔn rə̀dù Yi sono.

Currently Selected:

Kɔlɔɔsɛ 3: lee

Highlight

Copy