Lucas 23

Jasus ye antregue a Pilatos

(Mateus 27,1–2.11–14; Marcos 15,1–5; Juan 18,28–38)

1Toda la giente se alhebantou i lhebórun-lo a Pilatos. 2Ampeçórun, anton, a acusá-lo dezindo: «Achemos este a albrotar l nuosso pobo, a nun deixar que se pagasse la décima a César i dezindo que ye Cristo, l rei.» 3Pilatos anterrogou-lo, preguntando-le: «Tu sós l rei de ls Judius?» El respundiu-le: «Sós tu que l dizes.» 4Anton, Pilatos dixo-le als príncepes de ls saçardotes i al juntouro de pessonas: «Nun acho culpa neste home.» 5Mas eilhes zirrában, dezindo: «El albrota l pobo ansinando por toda la Judeia, a ampeçar na Galileia até eiqui.»

Harodes faç caçuada de Jasus

6Quando oubiu estas cousas, Pilatos preguntou se l home era Galileu 7i, al ber que pertencie al poder de Harodes, mandou-se-lo a Harodes, que nesses dies tamien staba an Jarusalen. 8Quando biu a Jasus, Harodes quedou mui cuntento, puis yá quantá que l querie ber, por bias de l que oubira dezir del i speraba que fazira algun milagre delantre del. 9Anterrogaba-lo cun muita pregunta, mas el nun le respundie nada. 10Ls príncepes de ls saçardotes i ls scribas que stában alhá acusában-lo sien parar. 11Harodes, culs sous suldados, tratou-lo cun çprézio i, por caçuada, mandou-le bestir ũa capa branca i mandou-se-lo a Pilatos. 12Nesse mesmo die, Harodes i Pilatos quedórun amigos, puis antes éran einemigos un de l outro.

Ne l tribunal de Pilatos

(Mateus 27,15–26; Marcos 15,6–15; Juan 18,39—19,16)

13Pilatos mandou chamar ls príncepes de ls saçardotes, ls xefes i l pobo 14i dixo-le: «Traístes-me este home cumo andando a albrotar l pobo, anterroguei-lo delantre de bós, mas nun achei nel ningun de ls crimes de que lo acusais, 15l mesmo se passando cun Harodes, puis mos lo mandou outra beç. Anton, nun beio nel nada que mereça la muorte. 16Bou-le a dar un castigo i apuis bou-lo a mandar ambora.» 17Pula fiesta de la Páscoa, Pilatos tenie siempre de le sultar un preso. 18Mas toda la giente se puso a boziar: «Agarra este i solta-mos a Barrabás!» 19Este staba preso por bias dun albrote que armórun na cidade, adonde matórun un home. 20Mas Pilatos tornou outra beç a falar cun eilhes, querendo lhibartar a Jasus, 21mas eilhes boziában, dezindo: «Curcefica-lo, curcefica-lo!» 22Aquel, pula treceira beç, dixo-le: «Mas que mal fizo el? Nun achei nel nada que mereça la muorte; por essa rezon, bou-lo a castigar i apuis mando-lo ambora.» 23Mas eilhes boziában pedindo que fura curceficado i ls sous bózios crecien cada beç mais. 24Anton, Pilatos achou que debie de fazer l que eilhes le pedien: 25Lhibartou l que fura preso por albrote i por muorte, tal i qual cumo eilhes pedien, i antregou-le a Jasus a la buntade deilhes.

Curceficion

(Mateus 27,32–44; Marcos 15,21–32; Juan 19,17–27)

26Quando lo lhebában, agarrórun un cierto Simon de Cirene que benie de l campo i ponírun-le la cruç a las cuostas pa que la lhebara atrás de Jasus. 27Iba atrás del un grande juntouro de pobo i ũas mulhieres que batien ne l peito i chorában por el. 28Jasus bolbiu-se para eilhas i dixo-le: «Filhas de Jarusalen, nun chóredes por mi, chorai mas ye por bós i puls buossos filhos, 29porque bénen ende dies an que deziran: “Felizes las que nun puoden tener filhos, ls bientres que nun girórun i ls peitos que nun dórun lheite!” 30Nessa altura ampeçaran-le a dezir als montes: “Caí-bos anriba de nós!”, i als cabeços: “Acubri-mos!”, 31porque se trátan assi la madeira berde, l que le passará a la seca?»

32Lhebában tamien outros dous, para séren muortos cun el. 33Quando chegórun a un sítio, que le cháman Calbairo, curceficórun-lo ende i als lhadrones, un a la mano dreita i outro a la mano squierda. 34Jasus dezie: «Á Pai, perdona-le porque nun sáben l que fázen.» Apuis botórun suortes para debedir ls bestidos del. 35L pobo staba eilhi a mirar. Ls xefes fazien caçuada del i dezien: «Salbou ls outros; que se salbe a el mesmo, se ye l Cristo de Dius, l scolhido.» 36Tamien ls suldados fazien caçuada del, achegando-se a la borda pa le dar binagre 37i dezindo: «Se sós l rei de ls Judius, salba-te a ti mesmo.» 38Porriba del habie uns dezires: «Este ye l rei de ls Judius.»

39Un de ls lhadrones que habien sido curceficados cun el trataba-lo mal, dezindo: «Nun sós tu l Cristo? Salba-te a ti i a nós tamien!» 40Mas l outro renhiu cun el, dezindo-le: «Nien sequiera tu temes a Dius, tu que tubiste la mesma cundanaçon? 41Al menos cun nós fizo-se justícia, puis recebimos la paga que mereciemos! Mas este nun fizo nada de mal.» 42I pedie: «Jasus, lhembra-te de mi quando antrares ne l tou reino.» 43El respundiu-le: «Queda bien cierto de l que te digo: Hoije starás cumigo ne l paraíso.»

Muorte de Jasus

(Mateus 27,45–56; Marcos 15,33–41; Juan 19,28–30)

44Yá mui acerca de meidie, toda la tierra quedou a las scuras até las trés de la tarde, 45porque l sol habie quedado scuro i l béu de l templo rachou-se al meio. 46Apuis, Jasus dou un grande bózio, dezindo: «Pai, nas tues manos antrego l miu sprito.» Mal apenas acabou de dezir estas palabras, morriu-se. 47Al ber l que se habie passado, l centurion daba grácias a Dius, dezindo: «Rialmente, este home era un justo!» 48Todo l juntouro de pessonas que habie assestido a aquel spetaclo, al ber l que se passara, iba-se ambora batendo ne l peito. 49Todos ls coincidos del i las mulhieres, que habien ido atrás del zde la Galileia, stában al loinge a ber estas cousas.

Sepultura

(Mateus 27,57–61; Marcos 15,42–47; Juan 19,38–42)

50Habie un home, que le chamában Jesé i era justo i buono i pertencie al cunceilho, 51mas nun habie cuncordado cul cunceilho nien culs feitos deilhes. Era de Arimateia, cidade de ls Judius, i asperaba l reino de Dius. 52Fui-se a tener cun Pilatos i pediu-le l cuorpo de Jasus. 53Apuis de lo abaixar, ambrulhou-lo nun lhençol i puso-lo nũa sepultura scabada nũa peinha i adonde naide inda habie sido puosto. 54Era l die de la Purparaçon i staba a rumper l die de sábado.

55Las mulhieres, que habien benido cun el zde la Galileia, fúrun tamien i bírun la sepultura i cumo fui puosto l cuorpo del. 56Quando bolbírun, purparórun oulores i unguientos, mas ne l sábado çcansórun cunsante manda la lei.

Currently Selected:

Lucas 23: EM14

Highlight

Copy