Kuxh 6

Uvaʼs taqʼbʼ quBʼaal Jesuus solin inpaqte tu tenam Nasareet

Tio 13.53-58; Luk 4.16-30

1Eletz vet bʼen Jesuus tu totzotz Jaairo tu tenam Kapernauum, tul yekich vet Jesuus tu tenam Nasareet, tal uvaʼ alalik Jesuus. Tul ant txhʼuyichaq tiʼ Jesuus inqʼa nikich itxhus tibʼ s-kʼatza. 2Opoonetz vet iqʼiil u xeem qʼij saavado, tul xeʼt vet Jesuus tiʼ itxhusux inqʼa xaol tuul u kʼulbʼal ibʼ. Tul mamala xaol kaayaqichxh vet taanima tiʼ tabʼil inqʼa yol uvaʼ nikich tal Jesuus.

Pet atetz vet jolt xaol uvaʼ ech motx tal tiʼ Jesuus s-eche: —¿Taletzxh qat txhejk txhan vet tiqleʼm naq uvaʼe tiʼ ibʼanax inqʼa kam? Atz ¿tal qat tzajk itxumbʼal naq uvaʼe tiʼ ibʼanax inqʼa kaebʼal aanima? 3Tan naq kuxhte u seol tzeʼ, u tal ixoq u Mal. Atz naq kuxhte u tatzik Jakoovo, atz u tatzik Xhuʼl, atz u tatzik Juudas, atz u tatzik Simoon. Atz naq kuxhte vixibʼen inqʼa ixoq, inqʼa ile at s-quxoʼl, —chichich inqʼa xaol tiʼ Jesuus. Tul yeʼ nikich iqej inqʼa xaol oq uvaʼ, aʼich Jesuus u Kriisto. Tul tira nikich teesal iqʼij Jesuus taʼn jolol inqʼa xaol.{*}#6.3 ¿Kam s-tiʼil nikich isotz ikʼuul jolol inqʼa xaol tiʼ vibʼant quBʼaal Jesuus inqʼa mam kaebʼal aanima? Tiʼ uvaʼ tan, alam aanimaich kuxh quBʼaal Jesuus vatz inqʼa xaol. Tul bʼane vatz txʼavaʼil kam koq uvaʼ nikich ibʼan quBʼaal Jesuus, pet tetz quBʼaal Tiuxhich uvaʼ nikich ibʼan quBʼaal Jesuus. Xaʼtetze kaayichxh taanima inqʼa xaol s-tiʼ. Tul nikich kuxh teloʼkin vet titzʼabʼal inqʼa xaol tiʼ quBʼaal Jesuus. Tul aʼ nikich tal vet inqʼa xaol uvaʼ jitich Kriisto quBʼaal Jesuus.

4Yaʼne ech tal Jesuus te inqʼa xaol s-eche: —Jatvaʼlxh oʼ, inqʼa qʼexsan tetz viyolbʼal quBʼaal Tiuxh, tan jankʼal inqʼa tenam, nik oksan quqʼij. Pet taʼn kuxh u qutenam yeʼ nik oksan quqʼij. Tul kʼuxh inqʼa tu qotzotz, inqʼa antxh qitzʼin qatzik, tan yeʼ nik toksa oʼ s-tuul, —xeʼt Jesuus.

5Tul yeʼ utxh ibʼant Jesuus invaʼq kaebʼal aanima t-vitenam. Tan juunil kuxh inqʼa yaabʼ ibʼan Jesuus bʼaʼn. Tan yeʼ nikich iqej inqʼa xaol oq uvaʼ, aʼich Jesuus u Kriisto. Tul taqʼ jaʼ Jesuus iqʼabʼ tiviʼ inqʼa xaol. Tul motx ibʼan vet bʼaʼn. 6Tul tira txumun Jesuus tiʼ yeʼ viqejt inqʼa xaol uvaʼ, aʼich Jesuus u Kriisto.

Uvaʼs itxhaqt bʼen quBʼaal Jesuus kabʼlaval inqʼa nikich itxhus tibʼ s-kʼatza

Tio 10.5-15; Luk 9.1-6

Yaʼne junun ipal vet Jesuus t-inqʼa talaq tenam uvaʼ naqlich kuxh kʼatz u tenam Nasareet. Tul nikich pal itxhus ka Jesuus inqʼa xaol. 7Yaʼne isaʼ tzaan Jesuus kabʼlaval inqʼa nikich itxhus tibʼ s-kʼatza. Tul kaʼkabʼil laʼich motx itxhaqt vet bʼen Jesuus. Tul taqʼ Jesuus tiqleʼm tiʼ itukil el inqʼa demoonio t-taanima inqʼa xaol. 8Tul ibʼekʼ bʼen Jesuus, s-tiʼ uvaʼ yeʼxhkam invaʼq laʼich motx tiqʼo tiʼ bʼey. Pet taʼn kuxh ibʼaara laʼich motx tiqʼo. Tul yeʼl invaʼq itxʼuʼy, atz jitoq itxʼix, atz jitoq ipuaq laʼich tiqʼo vatz ikʼalubʼal. 9Tul yeʼl intzumtoʼq toksaʼm laʼich tiqʼo. Pet taʼn kuxh ichichʼ xaʼp laʼich tiqʼo.

10Tul ech tal Jesuus te inqʼa nikich itxhus tibʼ s-kʼatza s-eche: —Jabʼiste vaʼq otzotz laʼ aqʼbʼik ex, tul aʼ laʼ atink ex tzitzi. Pet yaʼn laʼ etel vet tzaan tu otzotz uvaʼs laʼ itzʼeq jatvaʼl qʼij vetatin tu tenam. 11Oqetz at invaʼq u tenam uvaʼ yeʼ laʼ kʼulun ex, atzoq yeʼ laʼ saʼax tabʼil u yol uvaʼ iqʼomal etaʼn, tul yek laʼ qʼaʼv ex. Tul laʼ etichu ka inqʼa poqoq tetoq vatz inqʼa xaol, s-kʼutxhbʼal tetz uvaʼ, aʼ inqʼa xaol yeʼ laʼ saʼon vikolt tibʼ vatz u kʼaxbʼichil uvaʼ laʼ taqʼ quBʼaal Tiuxh. [Poro toq val sete uvaʼ palnaʼql u kʼaxbʼichil laʼ til inqʼa xaol, atz inqʼa tenam uvaʼ yeʼ laʼ kʼulun ex, viʼ u kʼaxbʼichil uvaʼ laʼ ul tiibʼa u tenam Sodooma tuchʼ u tenam Gomoora, tu qʼij uvaʼs laʼ taqʼt vet quBʼaal Tiuxh u kʼaxkʼo tiibʼa inqʼa yeʼ nik kʼulviin viyolbʼal,] —xeʼt Jesuus.

12Yaʼne kaʼkabʼil motx itxhaqt bʼen Jesuus kabʼlaval inqʼa nikich itxhus tibʼ s-kʼatza. Bʼenaqetz veteʼ, tul exaq ipaxsa vet inqʼa yol tiʼ u titzʼat tibʼ inqʼa xaol t-inqʼa ipaʼv vatz quBʼaal Tiuxh. 13Tul mamala demoonio nikich motx ituki vet el t-taanima inqʼa xaol. Atz nikich toksa aseeite tiʼ mamala yaabʼ. Tul nikich ibʼan vet inqʼa yaabʼ bʼaʼn.

Uvaʼs iyatzʼax el Xhun, u aqʼol kuʼ xaol xeʼ aʼ

Tio 14.1-12; Luk 9.7-9

14Tabʼi vet Eroodes Antiipas, u mam iqʼesal tuulbʼal Galileea, itziulal inqʼa yol uvaʼ nikich ibʼan Jesuus. Tan maʼtich ipaxin vet itziulal Jesuus tuulaq inqʼa tenam. Tul ech nikich tal jolol inqʼa xaol s-eche: —¡Qatetzebʼ itzʼeʼvy naq u Xhun inpaqte, uvaʼ kamnaʼq veteʼ; naq uvaʼ nikich aqʼon kuʼ inqʼa xaol xeʼ aʼ! Xaʼtetze at tiqleʼm naq tiʼ ibʼanax inqʼa kaebʼal aanima, —chichich jolol inqʼa xaol.

15Tul ech nikich tal jolt xaol s-eche: —Naqe u Eliias, u qʼexsanich tetz viyolbʼal quBʼaal Tiuxh, qat itzʼeʼvy inpaqte, —chichiche.

Tul ech nikich tal jolt xaol s-eche: —Vaʼtoqebʼ qʼexsan tetz viyolbʼal quBʼaal Tiuxh naq uvaʼe. Atz maq antxh vaʼq naq inqʼa qʼexsanich tetz viyolbʼal quBʼaal Tiuxh s-naʼya, —chichich jolt inqʼa xaol tiʼ Jesuus.

16Tabʼietz vet Eroodes inqʼa yol uvaʼ nikich tal inqʼa xaol, tul ech tal vet Eroodes s-eche: —¡Yeʼle! Pet ¡naqe u Xhun qat itzʼeʼvy inpaqte, uvaʼ inbʼekʼ itzokʼpeʼl iviʼ! —xeʼt Eroodes.{*}#6.16 Taletz Eroodes Antiipas u yol uvaʼe, tan aʼ titzʼa Eroodes uvaʼ Xhun itzʼeʼv inpaqte. Tul aʼ nikich titzʼa Eroodes uvaʼ tetxhal kuxh laʼich taqʼ Xhun ichʼexel tiʼ Eroodes. Tan antxh Eroodes nikich natxh bʼen tibʼ uvaʼ kantxhaq u txumbʼal ibʼan tiʼ itzokʼox el iviʼ Xhun, u jikla vinaq.

17Taletz Eroodes u yol s-eche, tan antxh Eroodes bʼekʼon iqitzix jaʼ Xhun t-tzeʼ tuchʼ kadeena, iqʼaqʼalich kuxh ixoq u Erodiias, u tixqelich Piʼl, u titzʼin Eroodes. Tan antxh Eroodes iqʼon Erodiias s-tixqel.

18Tan ech nikich tal Xhun te Eroodes s-eche: —Quqʼesal Eroodes, yeʼ nik ikuy u qubʼekʼbʼal ibʼanax u yeʼbʼaʼn, eche uvaʼ nik abʼaneʼ. Tan antxh tixqel naq u eetzʼin Piʼl iqʼomal aaʼn, —chichich Xhun.

19Echetz txhiʼanyichxh ixoq u Erodiias tiʼ Xhun. Tul txʼebʼoʼmyich kuxh ixoq tiʼ topoon vaʼq qʼij uvaʼ tetxhal laʼich yatzʼax el Xhun. Poro yeʼl ixoq nikich toleʼveʼ.

20Tul nikich ixoʼva Eroodes iyatzʼax el Xhun, tan tootzaqich Eroodes uvaʼ jikla vinaqich Xhun. Tul chʼexichla vinaqich Xhun vatz quBʼaal Tiuxh. Echetz nikich ikolox Xhune taʼn Eroodes. Kʼuxhetz bʼaʼnxh inqʼa yol nikich tabʼi Eroodes uvaʼ nikich tal Xhun, poro nikich kuxh isotz ikʼuul Eroodes te Xhun. Kʼuxhetz eche, aloq tira ayaʼl ikʼuul Eroodes nikich tabʼi viyol Xhun.

21Opoonetz vet viqʼiil u nimabʼ tetz vitzʼeq iyaʼbʼ Eroodes, tul taqʼ vet Eroodes vaʼl bʼaʼnla txʼix te inqʼa atich ok siqʼesalil s-kʼatza, atz te inqʼa iqʼesal sol, atz te inqʼa iqʼesalich tuulbʼal Galileea. Tul tzitzi topoon vet u qʼij vatz Erodiias tiʼ iyatzʼax el Xhun.

22Echetz ipal vet ok u ixvaake, u tal Erodiias, tal uvaʼ nikich utxhk u nimla qʼij. Tul bʼix vet u ixvaak vatz inqʼa iqʼesal. Josqʼilichetzxh ibʼix u ixvaak til Eroodes, atz tilat jolt inqʼa iqʼesal uvaʼ atich ok viʼ u meexha kʼatz Eroodes. Tul ech tal vet Eroodes, u mam iqʼesal, te u ixvaak s-eche: —Ixvaak, abʼi s-ve kamxh invaʼq nik asaʼeʼ, tul toq vaqʼ see. 23Poro ech ivatz Tiuxh nik valeʼ, uvaʼ ikʼaxbʼisan in oq yeʼ laʼ innima vinyol see tiʼ jankʼalxh uvaʼ laʼ aabʼi s-ve. Tan kʼuxh nikʼaʼmoq te jankʼal uvaʼ nik inbʼan iqʼesalil s-tiibʼa, tan toq vaqʼ see, —xeʼt Eroodes.

24Yaʼne eluʼl u ixvaak. Tul ech tal te vitxutx s-eche: —Txutx, ¿kametz invaʼq toq vabʼi te Eroodes? —xeʼte.

Tul ech tal Erodiias s-eche: —Aʼ aabʼi viviʼ Xhun, u aqʼol kuʼ xaol xeʼ aʼ, —xeʼt Erodiias.

25Yaʼne nalxh ipaloʼk u ixvaak vatz Eroodes, u mam iqʼesal, inpaqte. Tul ech tal u ixvaak s-eche: —Aʼ nik insaʼeʼ uvaʼ, aʼ laʼ aaqʼ viviʼ Xhun s-ve s-txheel tuul invaʼq puraato, Xhun, u aqʼol kuʼ xaol xeʼ aʼ, —xeʼt u ixvaak.

26Tul yekich txumun vet Eroodes, tiʼ uvaʼ tabʼi u tal Erodiias. Pet yeʼ itxʼol vet Eroodes iyaʼsal vatz u ixvaak. Tul tetxhal kuxh inima vet Eroodes viyol uvaʼ maʼtich talt vatz Tiuxh, atz vatz inqʼa xaol uvaʼ atich ok viʼ u meexha s-kʼatza. 27Echetz nal kuxh ibʼekʼ vet Eroodes, u mam iqʼesal, ibʼen val visol tiʼ itzokʼox tzaan viviʼ Xhun. 28Yaʼne ex itzokʼ vet tzaan u sol viviʼ Xhun tu tzeʼ. Tul ex taqʼ vet te u ixvaak tuul val u puraato. Atz ex taqʼ vet u ixvaak te vitxutx.

29Tabʼietz vet inqʼa nikich itxhus tibʼ kʼatz Xhun uvaʼ tzokʼox el iviʼ Xhun, tul ex tiqʼoaq vet vitxhiʼoʼl Xhun. Tul exaq imuq vet t-val u muqbʼal kamnaʼq vatz val u pejoʼn.

Uvaʼs iqʼaʼv vet kabʼlaval inqʼa ex paxsan inqʼa bʼaʼnla txhaq yol tuchʼ uvaʼs inaʼsat quBʼaal Jesuus oʼvaʼl paan tuchʼ kaʼvat txay tiʼ itzuqbʼel mamala xaol

Tio 14.13-21; Luk 9.10-17; Xhun 6.1-14

30Yaʼne qʼaʼv vet kabʼlaval inqʼa apoostol, inqʼa itxhaq Jesuus. Tul motx tal vet ok te Jesuus kam inqʼa ex ibʼaneʼ, atz kam inqʼa ex itxhuseʼ. 31Tul ech tal Jesuus s-eche: —Koʼvaq, tul bʼen bʼeeq oʼ ilan t-vaʼq txʼavaʼ uvaʼ yeʼl xaol s-tuul, —xeʼt Jesuus. Tan mam xaol nikich taqʼbʼ kʼatz Jesuus; atz mam xaol nikich itzajeʼ. Echetz yeʼ nikich tutxh vet itxʼaʼon Jesuuse tuchʼ inqʼa nikich itxhus tibʼ s-kʼatza.

32Tul bʼen vet Jesuus tuul val u vaarko tuchʼ inqʼa nikich itxhus tibʼ s-kʼatza t-val u txʼavaʼ uvaʼ yeʼl xaol s-tuul. 33Tul mamala xaol ilon ibʼen Jesuus. Atz bʼenaq s-te tal uvaʼ kʼaqich taʼn Jesuus. Tul mamala vet xaol elaq tzaan t-toq tuulbʼal inqʼa tenam tiʼ tilix Jesuus. Tul bʼaxich vet taqʼbʼ inqʼa xaol vatz Jesuus. Atz molmotxh vet taqʼbʼ tiʼ ikʼult tibʼ tiʼ Jesuus.

34Aʼetz vet teluʼl Jesuus tuul u vaarko, tul til Jesuus uvaʼ mam tenam txʼebʼoʼmyich vet s-tiʼ. Tul itxum Jesuus ivatz inqʼa xaol. Tan til Jesuus uvaʼ echich kuxh tatin inqʼa xaol, eche tatin joloq karneʼl uvaʼ yeʼl xeen tetz ati. Tan yeʼich tootzaql inqʼa xaol kam laʼich motx ibʼan tiʼ tootzaqil inimal quBʼaal Tiuxh. Echetz ixeʼt vet Jesuuse tiʼ itxhusux mamala bʼaʼnla txhaq txumbʼal xoʼl inqʼa xaol.#1 Reeyes 22.17

35Bʼiitichetz kuxh vet iqʼeqxeʼ, tul molmotxh tok vet inqʼa kʼatz Jesuus, inqʼa nikich itxhus tibʼ s-kʼatza. Tul ech tal te Jesuus s-eche: —Kuʼyetz vet qʼij, tul yeʼl invaʼq xaol jeqlel tzitza. 36Pet txhaq vet bʼen inqʼa xaol. Tul bʼen iloqʼ itxʼix te inqʼa xaol, inqʼa jeqlel t-inqʼa tal tenam uvaʼ naql ala. Tan kam koq laʼ motx tetxhbʼu, —xeʼtaq te Jesuus.

37Yaʼne ech tal Jesuus s-eche: —Yeʼle. Pet antxh ex toq aqʼon itxʼix inqʼa xaol, —xeʼt Jesuus.

Tul ech motx tal inqʼa nikich itxhus tibʼ kʼatz Jesuus s-eche: —Poro kʼuxh laj kʼaloq (200) puaq ijaʼmil quqʼij, tan saʼ koq tzʼeqi. Atz kʼuxhetz laʼxh bʼen quloqʼ itxʼix inqʼa xaol, atz laʼ tetxhbʼu, tan aʼxh yeʼ laʼ tzʼeqi, —xeʼtaqe.

38Tul ech tal Jesuus s-eche: —Bʼenoq etileʼ jatvoʼq paan laʼ txhej sexeʼ, —xeʼt Jesuus.

Exetz til vet inqʼa nikich itxhus tibʼ kʼatz Jesuus, tul ech motx tal s-eche: —Oʼvaʼl kuxh vatz paan tuchʼ kaʼvaʼt vatz votzʼim txay ati, —xeʼtaqe.

39Yaʼne ibʼekʼ Jesuus inqʼa nikich itxhus tibʼ s-kʼatza, tiʼ ikuʼ txhaq qʼuʼtzul inqʼa xaol viʼ inqʼa txhaʼxla kʼoatxh. 40Tul nima qʼuʼtzlen elk inqʼa xaol ibʼan inqʼa nikich itxhus tibʼ kʼatz Jesuus. Atich txhaq qʼuʼtzul uvaʼ oʼ txhaq kʼalal (100) tatxhul ex ibʼaneʼ. Atz atich txhaq qʼuʼtzul, uvaʼ laalavil toxkʼal (50) tatxhul ex ibʼaneʼ.

41Yaʼne ikʼul vet Jesuus oʼvaʼl inqʼa paan tuchʼ kaʼvaʼt inqʼa txay. Tul saqin jaʼ Jesuus t-amlikaʼ; atz tal Jesuus bʼaʼnla yol s-tiibʼa. Yaʼne ipixh Jesuus inqʼa paan s-tuul. Tul taqʼ Jesuus te inqʼa nikich itxhus tibʼ s-kʼatza. Tul ijatxaq vet el xoʼl inqʼa xaol s-kaqaayil. Atz talat Jesuus ijatxpeʼl kaʼvaʼl inqʼa txay xoʼl inqʼa xaol. 42Tul motx txʼaʼon jankʼalxh inqʼa xaol. Atz tetxhal motx inoj inqʼa xaol s-kaqaayil. 43Tul aʼl tel imolt inqʼa nikich itxhus tibʼ kʼatz Jesuus iyal inqʼa paan tuchʼ iyal inqʼa txay. Tul kabʼlavatel xuʼk motx imola uvaʼ bʼeenoxh inojeʼ. 44Poro oʼvaʼlen mil (5,000) vinaq ok s-atxh. (Pet inqʼa ixoq tuchʼ inqʼa nitxaʼ, tan yeʼ motx ok s-atxh.)

Uvaʼs ixaon quBʼaal Jesuus viʼ u mam aʼ Galileea

Tio 14.22-27; Xhun 6.15-21

45Tul yekich ibʼekʼ vet Jesuus ipaloʼk inqʼa nikich itxhus tibʼ s-kʼatza tuul u vaarko. Tan aʼich isaʼ Jesuus ibʼaxabʼaq bʼen s-vatz jala el u mam aʼ tu tenam Vetsaaida, ayaʼl s-tuul nikich tal vet Jesuus ibʼen inqʼa xaol.

46Itxhaqetz kuxh vet bʼen Jesuus inqʼa xaol, tul bʼen vet jaʼ Jesuus viʼ val u vitz tiʼ inatxhax Tiuxh. 47Aalemalichetz vet iqʼeqxeʼ, tul ijunal kuxh Jesuus atich vet tzitzi. Tul eenich vet inqʼa nikich itxhus tibʼ kʼatz Jesuus tuul okaʼp u mam aʼ tuchʼ u vaarko. 48Tiletz vet Jesuus uvaʼ mam yakʼil nikich ibʼan vet inqʼa nikich itxhus tibʼ s-kʼatza tiʼ ixaonsal bʼen u vaarko. Poro jitoq nikich tutxh vet ixaon bʼen u vaarko, tan aʼl nikich tul vet u mam kaqiqʼ s-vatz.

Bʼiitichetz kuxh vet isaqbʼeʼ, tul sebʼtich ixaon opoon Jesuus viʼ u mam aʼ kʼatz inqʼa nikich itxhus tibʼ s-kʼatza. Tul kʼaqich kuxh ok tibʼ Jesuus viʼ u mam aʼ, eche saʼich pal taqʼ ka Jesuus u vaarko tilixeʼ. 49Tiletz vet inqʼa nikich itxhus tibʼ kʼatz Jesuus ixaon tzaan val uvaʼ viʼ u mam aʼ, tul titzʼaaq veteʼ uvaʼ txhitxh uvaʼ nikich ixaon viʼ u mam aʼ. Tul qʼeqʼunyichaqxh vet t-xoʼval, 50tan aalatxh motx tiltaʼ. Echetz mam xoʼval tzajaq vet s-tiʼ.

Yaʼne nal kuxh iyolon tzaan Jesuus, tul ech tal s-eche: —¡Yeʼvaq xoʼv ex! ¡Tij ex ebʼana, tan ine! —xeʼt Jesuus.

51Yaʼne pal vet jaʼ Jesuus tuul u vaarko kʼatz inqʼa nikich itxhus tibʼ s-kʼatza. Tul yekich yaʼ vet u mam kaqiqʼ. Tul tira motx samunaq veteʼ; atz tira motx kaj taanima. 52Tan yeʼnaqich motx bʼenoq s-te u mam tiqleʼm Jesuus. Tan kʼuxh motx til itxhej inqʼa mamala paan taʼn Jesuus, poro yeʼ nikich motx iqejeʼ oq uvaʼ atich tiqleʼm Jesuus tiʼ iyaʼsal u mam kaqiqʼ jabʼal.

Uvaʼs ibʼant quBʼaal Jesuus bʼaʼn inqʼa yaabʼ tu txʼavaʼ Jenesareet

Tio 14.34-36

53Elaʼpetz vet Jesuus tuchʼ inqʼa nikich itxhus tibʼ s-kʼatza jala el u mam aʼ tu tenam Jenesareet, tul iqitzaq vet ka u vaarko tziʼ u mam aʼ. 54Taʼnetzxh eluʼl Jesuus tuchʼ inqʼa nikich itxhus tibʼ s-kʼatza tuul u vaarko, tul yekichxh ilix Jesuus taʼn inqʼa xaol. 55Tul nal kuxh ibʼen inqʼa xaol tiʼ ipaxsal el u yol t-junun tenam tiʼ Jesuus. Yaʼne talaq kuxh motx iqʼolik tzaan inqʼa yaabʼ viʼ txʼatxh tzeʼ tuulbʼal inqʼa tenam s-kaqaayil. Tul ul aqʼaxoq inqʼa yaabʼ tal uvaʼ atich Jesuus. 56Taletz uvaʼ nikich palk Jesuus t-inqʼa talaq tenam, tal uvaʼ jeqlelich inqʼa xaol, atz t-inqʼa tenam, atz t-inqʼa vitz, tul nikich itxhelel eluʼl inqʼa yaabʼ tziʼaq bʼey vatz Jesuus. Tul nikich ijaq inqʼa yaabʼ bʼaʼnil te Jesuus, tiʼ uvaʼ kʼuxh taʼn kuxh vixojbʼal viqinkin oksaʼm Jesuus uvaʼ txhasich ok taʼn, laʼich ikana. Tul jankʼalxh inqʼa yaabʼ uvaʼ nikich motx kanon vixojbʼal viqinkin oksaʼm Jesuus, tul yek nikich motx ibʼan vet bʼaʼn.

Currently Selected:

Kuxh 6: ixlC

Highlight

Copy