Kuxh 5

Uvaʼs itukit el quBʼaal Jesuus demoonio t-taanima val u aj Gadaara

Tio 8.28-34; Luk 8.26-39

1Yaʼne elaʼp vet Jesuus tuchʼ inqʼa nikich itxhus tibʼ s-kʼatza jala el u mam aʼ Galileea t-vitxʼavaʼ inqʼa aj tenam Gadaara. 2Iletz kuxh Jesuus nikich teluʼl tu vaarko, tul yekich aqʼbʼ val u vinaq vatz Jesuus, val uvaʼ atich ok demoonio t-taanima. Tul een tzajnaʼqich u vinaq viʼ kampusaanto, tal uvaʼ nikich muqlik kamnaʼq. 3Tan aʼich kuxh tatibʼal u vinaq viʼ kampusaanto. Tul yeʼxhabʼil invaʼq nikich toleʼv tiʼ u vinaq, kʼuxh nikich iqitzix s-kadeena. 4Tan jatpaqul kuxh maʼtich toksal txhʼitxhʼ t-toq uvaʼ tetzxh txeybʼal, atz nikich toksal tiqʼabʼ paqte. Tul maʼtich iqitzix vet tuchʼ kadeena, tul nikich irin u vinaq inqʼa kadeena. Atz tira nikich motx ijuyi inqʼa txhʼitxhʼ tetz txeybʼal. Echetz yeʼxhabʼil invaʼq nikich toleʼv tiʼ iqitzixeʼ. 5Tul nikich kuxh ixaon u vinaq s-qʼiil s-aqʼbʼal t-inqʼa vitz, atz viʼ kampusaanto. Tul nikich kuxh iqʼeqʼuneʼ. Atz nikich kuxh takʼonsa tibʼ s-sivan. 6Tiletz u vinaq itzaj Jesuus s-naatxh, tul qʼex taqʼbʼeʼ. Atz ijoqbʼa kuʼ tibʼ vatz Jesuus.

7-8Tul ech tal Jesuus te u demoonio, uvaʼ atich ok kʼatz u vinaq, s-eche: —Demoonio, ¡elen el t-taanima naq u vinaq! —xeʼt Jesuus.

Poro jit yekich eleʼl u demoonio kʼatz u vinaq. Pet jankʼalxh iyakʼil u vinaq sichʼin taʼn u demoonio. Tul ech tal te Jesuus s-eche: —¡Kam taltxh axh, Jesuus! ¡Kam asaʼ s-ve! ¡Axh, viKʼaol Tiuxh uvaʼ sibʼ at jaʼp t-amlikaʼ! Tul ¡vatz Tiuxh toq vabʼivat bʼaʼnil see uvaʼ yeʼ akʼaxbʼisa in! —xeʼt te Jesuus.

9Yaʼne ech tal Jesuus te u demoonio s-eche: —¿Kam abʼij? —xeʼt Jesuus.

Tul ech tal s-eche: —Yeʼl s-atxhbʼe, inbʼij, tan sibʼalen qatineʼ, —xeʼte. 10Tul mij nikich iyaʼ vet inqʼa demoonio tiʼ ijaqax bʼaʼnil te Jesuus, tiʼ uvaʼ yeʼlich laʼ itilu el Jesuus tuulbʼal vitxʼavaʼ inqʼa aj Gadaara.

11Poro mamala kutxh nikich ikʼoatxhin kʼatz u vitz tal uvaʼ atich Jesuus. 12Yaʼne ijaq inqʼa demoonio bʼaʼnil te Jesuus. Tul echaq tal s-eche: —Bʼan bʼaʼnil s-qe, tul aʼ atxhaqvat bʼen oʼ kʼatz inqʼa kutxh. Tul maʼt qokebʼe, —xeʼtaqe.

13Tul ikuy vet Jesuus ibʼen inqʼa demoonio t-taanima inqʼa kutxh. Eletz vet el inqʼa demoonio t-taanima u vinaq, tul yekich vet okebʼe tetz inqʼa kutxh. Kamaletz kaʼvaʼlenich mil (2,000) kutxh nikich ikʼoatxhin tzij. Tul yeʼxh taqla motx ok vet inqʼa kutxh t-ojqeʼl. Atz motx itʼebʼlu vet bʼen tibʼ xeʼ u mam aʼ. Tul yekich motx jiqʼbʼaq veteʼ.

14Taʼnetzxh til inqʼa xeen kutxh kam uvaʼ utxhi, tul yekich motx itzʼeq vet tibʼ. Tul exaq tal vet itziulal u yol te inqʼa xaol tu tenam, atz te inqʼa xaol, inqʼa een t-vitz.

Yaʼne aqʼbʼ vet inqʼa xaol tiʼ tilix kam uvaʼ motx utxhi. 15Tul aqʼbʼ vet inqʼa xaol tal uvaʼ atich Jesuus. Tul til vet inqʼa xaol u vinaq uvaʼ maʼtich ikʼaxbʼisal taʼn demoonio, atz uvaʼ mamala demoonio atich ok tu taanima. Tul kʼuqlich vet u vinaq kʼatz Jesuus. Tul atich vet ok toksaʼm. Tul tira bʼaʼnich veteʼ; atz jikich vet titzʼabʼal. Tul mam xoʼval tzaj vet tiʼ inqʼa xaol. 16Tul alax vet inuqul u yol te inqʼa xaol taʼn inqʼa motx ilon kamxh uvaʼ ibʼan Jesuus te u vinaq uvaʼ atich ok demoonio t-taanima. Tul alaxat inuqul te inqʼa xaol kam uvaʼ ibʼan inqʼa kutxh. 17Tul xeʼt vet inqʼa xaol tiʼ tabʼil bʼaʼnil te Jesuus, tiʼ uvaʼ laʼich el vet el Jesuus tuulbʼal vitxʼavaʼ inqʼa xaol.

18Yaʼne bʼen vet ok Jesuus tu vaarko. Tul ijaq vet u vinaq bʼaʼnil te Jesuus, tiʼ uvaʼ laʼich bʼen vet tiʼ Jesuus, tan maʼtich tel vet el inqʼa demoonio t-taanima. 19Poro yeʼ ikuy Jesuus ibʼen u vinaq s-tiʼ. Pet ech tal Jesuus s-te s-eche: —Quxh tavotzotz. Tul bʼen aal te inqʼa eetzʼin aatzik u mam bʼaʼnil uvaʼ qat ibʼan quBʼaal Tiuxh see, atz kam uvaʼ qat tulbʼe quBʼaal Tiuxh toybʼal avatz tiʼ abʼen s-bʼaʼn, —xeʼt Jesuus.

20Bʼenetz vet u vinaq, tul yekich vet t-junun inqʼa tenam tuulbʼal Dekaapolis. Tul xeʼt vet tiʼ talax el inuqul u mam bʼaʼnil uvaʼ ibʼan Jesuus s-te. Tul kaayichxh vet taanima inqʼa xaol tiʼ u yol.{*}#5.20 Saqi u Tio 4.2 noota. Tan nik tal kam nik elkaʼpun u yol Dekaapolis.

Uvaʼs ibʼant val u ixoq bʼaʼn uvaʼ kanon viqinkin txhas toksaʼm quBʼaal Jesuus uvaʼs aʼlich ibʼen quBʼaal Jesuus tiʼ titzʼeʼvsal vimeʼal Jaairo

Tio 9.18-26; Luk 8.40-56

21Qʼaʼvetz vet Jesuus inpaqte tuchʼ inqʼa nikich itxhus tibʼ s-kʼatza tinjalit el itziʼ u mam aʼ Galileea tuul val u vaarko. Elaʼpetz vet Jesuus, tul mam tenam imol vet tibʼ tziʼ u mam aʼ tiʼ Jesuus. Atichetz vet Jesuus tziʼ u mam aʼ, 22tul aqʼbʼ val u vinaq vatz Jesuus, uvaʼ iqʼesalich xoʼl inqʼa tij imam Israeel tu kʼulbʼal ibʼ, val u vinaq uvaʼ Jaairoich ibʼij. Taʼnetzxh ilix Jesuus taʼn Jaairo, tul ijoqbʼa kuʼ tibʼ vatz Jesuus. 23Tul ijaq bʼaʼnil te Jesuus. Tul ech tal s-eche: —Il val vinmeʼal toq kamoq vet taʼn yaabʼil. Pet bʼan bʼaʼnil s-ve, tul koʼ s-viʼ t-votzotz. Tul bʼen aaqʼ jaʼ aqʼabʼ s-tiibʼa. Tul laʼ ibʼan bʼaʼn, echetz yeʼ laʼ ikame, —xeʼt Jaairo te Jesuus.

24Yaʼne bʼen vet Jesuus tiʼ Jaairo. Tul mam tenam txhʼuyeʼv bʼen tiʼ Jesuus. Tul oqxhich ipotxhʼox Jesuus taʼn u tenam.

25Poro atich bʼak val u ixoq xoʼl u mam tenam uvaʼ kabʼlavalich vet yaʼbʼ ikʼaxbʼ tzaan taʼn yaabʼil. Tan tira txhaqpinaʼqich vitxaqʼo. 26Tul maʼtich kuxh ikʼaxbʼisat tibʼ u ixoq tiʼ ibʼen xeʼ mamala tzʼakanal. Atz maʼtich kuxh isotzsat vet jankʼal vipuaq. Tul yeʼ nikich tiqʼo tibʼ. Pet aʼl nikich inimxeʼ. 27-28Tabʼietz vet u ixoq itziulal inqʼa mamala bʼaʼnil uvaʼ nikich ibʼan Jesuus, tul txhʼuyeʼv vet tzaan tiʼ iqul Jesuus xoʼl inqʼa tenam. Tan ech nikich titzʼa u ixoq s-eche: —Kʼuxh taʼn kuxh bʼen inkan bʼeeq viqinkin oksaʼm Jesuus, uvaʼ txhasel ok taʼn, tul yek toq inbʼan bʼaʼn, —chichiche.

Tul ex ikan u ixoq viqinkin oksaʼm Jesuus, uvaʼ txhasich ok taʼn. 29Tul yekich yaʼ vet vitxaqʼo ixoq. Atz yekich inatxh vet ixoq tuchʼ vitxhiʼoʼl ibʼant bʼaʼn tu mam kʼaxbʼichil tetz u yaabʼil.

30Tabʼietz vet Jesuus teleʼl u mam bʼaʼnil s-kʼatza, tul sutxhqʼ Jesuus tiʼ iqul. Tul ech tal Jesuus s-eche: —¿Jaʼl qat kanon u voksaʼm? —xeʼt Jesuus.

31Tul ech tal inqʼa nikich itxhus tibʼ kʼatz Jesuus s-eche: —Aʼ inqʼa mamala tename nik potxhʼon axh, tul: «¿Jaʼl qat kanon u voksaʼm?» chich axh, —xeʼtaqe.

32Tul sebʼtich isaqin Jesuus xoʼl inqʼa xaol tiʼ tilix jaʼl uvaʼ kanon u toksaʼm Jesuus.

33Yaʼne xeʼt u ixoq tʼuntʼutxhoq t-xoʼval. Tan bʼen vet s-te uvaʼ maʼtich ibʼant vet bʼaʼn. Tul joqel ikuʼ u ixoq vatz Jesuus. Atz taqʼ vet ootzaqiloq tiʼ vikant u toksaʼm Jesuus.

34Tul ech tal Jesuus te u ixoq s-eche: —Ixoq, tiʼ uvaʼ qat akʼuqbʼa akʼuul s-viʼ, tul bʼaʼn vet axh. Pet quxh vet tibʼaʼnil. Tan qat ey vet el axh tu mam kʼaxbʼichil uvaʼe, —xeʼt Jesuus te u ixoq.

35Sebʼtelichetz iyolon Jesuus, tul aqʼbʼ kaʼl u bʼanol txhaq, uvaʼ tzajnaʼqich t-totzotz Jaairo, viqʼesal inqʼa xaol tu kʼulbʼal ibʼ. Tul echaq tal s-eche: —Yeʼ kuxh kam aal vet te naq u txhusul qetz, tan qat kamy vet vameʼal, —xeʼtaq tul te Jaairo.

36Tabʼietz vet Jesuus u yol uvaʼ nikich talax te Jaairo, viqʼesal inqʼa xaol tu kʼulbʼal ibʼ, tul ech tal Jesuus te Jaairo s-eche: —Yeʼ kuxh txumun axh; atz yeʼ kuxh xoʼv axh. Pet kʼuqbʼa akʼuul s-viʼ. Tan toq uloq taanima vameʼal inpaqte, —xeʼt Jesuus.

37Tul jit jankʼal inqʼa nikich itxhus tibʼ kʼatz Jesuus ikuy ibʼen s-tiʼ. Pet taʼnxh Luʼ tuchʼ Jakoovo, atz tuchʼ Xhun, u titzʼin Jakoovo, bʼenaq tiʼ Jesuus. 38Aqʼbʼetz vet Jesuus t-totzotz Jaairo, viqʼesal inqʼa xaol tu kʼulbʼal ibʼ, tul til Jesuus uvaʼ vavunyichaqxh vet inqʼa xaol. Atz mam oqʼel nikich tutxheʼ. Tul mam txumuʼm nikich ibʼanax tiʼ u ixvaak uvaʼ maʼtich ikameʼ. 39Paletz vet ok Jesuus tuul u otzotz, tul ech tal Jesuus s-eche: —¡Kam s-tiʼil vavalkabʼiny kuxh ex, tul oq kuxh etoqʼe! Tan yeʼl u ixvaak kamnaʼqle, pet aʼ kuxhte vatya, —xeʼt Jesuus te inqʼa xaol.

40Tul aʼl kuxh itzeʼlel Jesuus taʼn inqʼa xaol, tan tootzaqlich inqʼa xaol uvaʼ maʼtich ikam vet u ixvaak.

Yaʼne itxhaq eluʼl Jesuus inqʼa xaol s-kaqaayil tiʼ otzotz. Pet taʼnxh vitxutx, ibʼaal u ixvaak tuchʼ oxvaʼl inqʼa nikich itxhus tibʼ s-kʼatza, tiqʼo ok s-tiʼ tuul vaʼt u otzotz tal uvaʼ atich okaʼp u ixvaak.

41Yaʼne itxey Jesuus iqʼabʼ u ixvaak. Tul ech tal Jesuus t-viyolbʼal te u ixvaak s-eche: —Talita, kumi, —xeʼt Jesuus te u ixvaak. Ech nik elkaʼpun u yol —Talita, kumi, —s-eche: —Ixvaak, toq val see: Lakpen, —chich u yol.

42Tul yekich itzʼeʼv vet u ixvaak. Atz lakp veteʼ. Tul xaon veteʼ, tan kabʼlavalich vet iyaʼbʼ. Tul samunyichaqxh vet inqʼa xaol. 43Yaʼne itiila bʼekʼu ka Jesuus uvaʼ yeʼxhabʼil invaʼq laʼich ootzaqin u yol uvaʼ utxhi. Atz tal vet Jesuus taqʼax itxʼix u ixvaak.

Currently Selected:

Kuxh 5: ixlC

Highlight

Copy