Tio 27

Uvaʼs tiqʼol vet quBʼaal Jesuus vatz Poonsio Pilaato, u aj Rooma, uvaʼ atich ok s-nimla iqʼesal

Kuxh 15.1; Luk 23.1-2; Xhun 18.28-32

1Saqbʼetz vet ech eqal, tul jankʼalxh inqʼa iqʼesal oksan yol vatz Tiuxh tuchʼ jolt inqʼa iqʼesal u tenam, motx ibʼan vet eela iyol tiʼ iyatzʼax el Jesuus. 2Yaʼne qitzich ibʼen vet Jesuus. Tul ex oksaloq vet Jesuus tiqʼabʼ Poonsio Pilaato, uvaʼ atich ok s-nimla iqʼesal t-Jerusaleen.{*}#27.2 ¿Kam s-tiʼil iqʼol bʼen quBʼaal Jesuus vatz Pilaato taʼn inqʼa iqʼesal u tenam? Echetz s-tiʼil s-eche: Tan jankʼalxh inqʼa iqʼesal xoʼl inqʼa tij imam Israeel atich ok jaqʼ ibʼekʼbʼal Pilaato, u aj Rooma. Yeʼ nikich ikuy vibʼekʼbʼal inqʼa aj Rooma uvaʼ laʼ iyatzʼ eʼl inqʼa tij imam Israeel invaʼq xaol oq uvaʼ yeʼnaq ul taleʼt te Pilaato. Tan atich tiqʼabʼ Pilaato jaʼl tijaq imam Israeel laʼich tal Pilaato iyatzʼax el. Xaʼtetze aʼ iqʼolik quBʼaal Jesuus tzitzi taʼn inqʼa iqʼesal tijaq imam Israeel tiʼ talax ikam eʼl quBʼaal Jesuus.

Uvaʼs iyatzʼt eʼl tibʼ Juudas

3Yaʼne bʼen vet te Juudas uvaʼ sibʼ ex elkaʼp vet inqʼa yol tiʼ Jesuus. Tan aqʼax vet kuʼ yol tiʼ ikameʼl Jesuus. Tul txhoʼn vet te Juudas, tiʼ uvaʼ toksa Juudas Jesuus tiqʼabʼ inqʼa iqʼesal. Tul ex iqʼaʼvisa vet ka Juudas vinaq laval u puaq, uvaʼ plaataxhtuʼ, te inqʼa iqʼesal oksan yol vatz Tiuxh tuchʼ jolt inqʼa iqʼesal u tenam.

4Tul ech tal Juudas s-eche: —Poro mam paʼv qat kuʼk in, tan yeʼl ipaʼv naq u vinaq uvaʼ qat voksa teqʼabʼ, —xeʼt Juudas.

Yaʼne ech tal inqʼa iqʼesal s-eche: —Yeʼxhkam vet qokebʼal s-tiʼ. Pet toqebʼ eeleʼ kam toq abʼaneʼ, —xeʼtaqe.

5Tul imakʼ kuxh vet ka Juudas u puaq vatz inqʼa iqʼesal, tu nimla atibʼal tuulbʼal u tostiuxh. Tul bʼen vet Juudas. Atz junt kuxh ex iyatzʼ vet el tibʼ Juudas.

6Yaʼne isikʼ vet inqʼa iqʼesal oksan yol vatz Tiuxh u puaq. Tul ech motx tal vet s-eche: —U puaq uvaʼa, tan yeʼ laʼ ikuy u qubʼekʼbʼal uvaʼ laʼ qaqʼ kuʼ xeʼ u kaaxha u tatibʼal inqʼa puaq, inqʼa nik toyal te quBʼaal Tiuxh. Tan ijaʼmil invaʼl vinaq uvaʼ toq kamoq el, —xeʼt inqʼa iqʼesal.

7Yaʼne motx ibʼan eela iyol tiʼ u puaq. Tul aʼ itxakunsavat vet u puaq tiʼ iloqʼox u txʼavaʼ uvaʼ nik bʼitlik inqʼa txʼavaʼ xhaalo. Tul tzitzi laʼich muqlik inqʼa xaol, inqʼa jitich tij imam Israeel. 8Echetz tok vet ibʼije u txʼavaʼ ‹Ijaʼmil ikaqal invaʼl vinaq.› Tul ant kuxh nik talax tel s-tiʼ s-txheel.#Vibʼanoʼm inqʼa Apoostol 1.18-19 9Echetz telaʼpune u yol uvaʼ tzʼibʼamal ka taʼn Jeremiias, u qʼexsanich tetz viyol quBʼaal Tiuxh, uvaʼ ech nik tal s-eche: —Tul ibʼan inqʼa tij imam Israeel eela iyol tiʼ jatvaʼl puaq laʼich taqʼa. Tul kʼulux vet vinaq laval u puaq, tiʼ ijaʼmil val u bʼaʼnla vinaq. 10Tul motx taqʼ u puaq tiʼ iloqʼox u txʼavaʼ uvaʼ nik bʼitlik inqʼa txʼavaʼ xhaalo. Tan ech uvaʼe ibʼekʼ quBʼaal Tiuxh s-ve, —xeʼt Jeremiias.#Sakariias 11.12-13

Uvaʼs ijotxhʼit Poonsio Pilaato itziʼ quBʼaal Jesuus

Kuxh 15.2-5; Luk 23.3-5; Xhun 18.33-38

11Txaklichetz vet Jesuus vatz Poonsio Pilaato, u nimla iqʼesal, tul ech tal te Jesuus s-eche: —¿Aʼetz kol axhe u mam iqʼesal inqʼa tij imam Israeel? —xeʼt te Jesuus.

Tul ech tal Jesuus s-eche: —Echxhte uvaʼ nik aaleʼ, —xeʼt itzaqʼbʼ Jesuus.

12Tul mamalaxh ipaʼv Jesuus nikich tal inqʼa iqʼesal oksan yol vatz Tiuxh. Atz mamalaxh ipaʼv Jesuus nikich tal jolt inqʼa iqʼesal u tenam. Poro tira yeʼl Jesuus nikich itzaqʼbʼ s-tiʼ.

13Yaʼne ech tal Pilaato te Jesuus s-eche: —¿Yeʼetz kol toq aal invaʼq yol tiʼ inqʼa yol uvaʼ nik talax seʼe? —xeʼt Pilaato.

14Poro tira yeʼl vaʼq yol tal Jesuus. Tul sotz kuxh vet ikʼuul Pilaato te Jesuus.

Uvaʼs talt u tenam iyatzʼax el quBʼaal Jesuus

Kuxh 15.6-20; Luk 23.13-25; Xhun 18.38—19.16

15Tuulbʼaletz u nimla qʼij Ipal Aanxel jun yaʼbʼ, tul nikich itxhaqpu el u nimla iqʼesal vaʼl pereexho uvaʼ atich kuʼ t-tzeʼ, jabʼiste uvaʼ, aʼ u tenam laʼich alon itxhaqpeʼl. 16Atichetz kuʼ val u vinaq t-tzeʼ uvaʼ varAvaasich ibʼij.{*}#27.16 U bʼij ‹varAvaas,› tan kaʼvalen nik elkaʼpun. Tan ‹ikʼaol,› chich telaʼp u yol ‹var.› Pet ‹Avaas,› tan ibʼij u bʼaala. Tiraetz kuxh vet aqʼel ikʼul tibʼ u yol ikʼaol tuchʼ vibʼij u bʼaala. Xaʼtetze nimla tzʼibʼ u ‹A› itzʼibʼaleʼ. Pet txhʼojla tzʼibʼ u ‹v› qat ok tixeʼtebʼal, tan een bʼij u Avaas tiyaʼtebʼal. Tan ech uvaʼe chianaʼqich vet tzaan te inqʼa tij imam Israeel tiʼ talt ibʼij inqʼa xaol. Tan txhʼuy kuxh vet ibʼij u bʼaala tiʼ inqʼa kʼaola. Tul ootzaqimalich taʼn inqʼa xaol uvaʼs yatzʼol aanimaiche. 17Imoletz vet tibʼ mamala xaol, tul ech tal Pilaato s-xoʼl s-eche: —¿Jabʼiste naq nik esaʼeʼ laʼ intxhaqpu el? ¿Maq aʼ naq u varAvaas? Pet ¿maq aʼ naq u Jesuus uvaʼ nik talax s-Kriisto? —xeʼt Pilaato.

18Tan tootzaqich Pilaato uvaʼ txhiʼal kʼuul kuxh nikich ibʼan inqʼa iqʼesal oksan yol vatz Tiuxh tiʼ toksal ok Jesuus tiqʼabʼ Pilaato.

19Tuulbʼaletz uvaʼs kʼuqlich Pilaato tu tabʼibʼal, tul itxhaq u tixqel Pilaato val u bʼanol itxhaq. Tul ech ex tal te Pilaato s-eche: —«Yeʼ kuxh atxhok apaʼv tiʼ u jikla vinaq uvaʼe. Tan bʼeeno kuxh qat ibʼutxht in val u vatzikʼ s-txheel tiʼ u vinaq uvaʼe, uvaʼ s-qat isaqbʼ jaʼul,» chich u eexqel, —xeʼt u bʼanol txhaq te Pilaato.

20Tul motx xeʼt vet inqʼa iqʼesal oksan yol vatz Tiuxh tiʼ itxhaqtziil inqʼa xaol uvaʼ, aʼ varAvaas laʼich tal itxhaqpeʼl; tul aʼ Jesuus laʼich kameʼl.

21Yaʼne ech tal Pilaato s-eche: —¿Jabʼiste naq s-te nik esaʼeʼ laʼ intxhaqpu el? —xeʼt Pilaato, u nimla iqʼesal.

Tul ech motx tal inqʼa xaol s-eche: —¡Aʼ naq u varAvaas atxhaqpu el! —xeʼtaq isichʼineʼ.

22Yaʼne ech tal Pilaato s-eche: —¿Kametz toq vulbʼe naq bʼa u Jesuus, uvaʼ nik talax s-Kriisto? —xeʼt Pilaato.

Tul ech motx tal jankʼal inqʼa xaol s-eche: —¡Jaʼoq Jesuus vatz kurus! —xeʼtaqe.

23Yaʼne ech tal Pilaato s-eche: —¡Ape! ¿Kametz ipaʼv naq bʼa sevatz? —xeʼt Pilaato, [u nimla iqʼesal].

Tul aalxh isichʼin inqʼa xaol. Tul ech motx tal s-eche: —¡Jaʼoq vatz kurus! —chichich inqʼa xaol.

24Tiletz vet Pilaato uvaʼ aalxh nikich ilakp vet iviʼ inqʼa xaol, tul yeʼxh tal laʼich itxey vet Pilaato s-te. Yaʼne ibʼekʼ vet Pilaato tiqʼol inbʼiil aʼ. Tul ech ivatz inqʼa xaol itxʼaj Pilaato iqʼabʼ s-tetxhlal uvaʼ yeʼl ipaʼv Pilaato tiʼ vikamebʼal Jesuus. Tul ech tal Pilaato s-eche: —Yeʼl inpaʼv tiʼ naq, u jikla vinaq uvaʼe, oq laʼ kam naq. Toqebʼ etileʼ oq laʼ eyatzʼ naq, —xeʼt Pilaato.#Deuteronoomio 21.6-9

25Tul ech motx tal inqʼa xaol s-eche: —¡Uloqn txhan u yeʼbʼaʼn s-qiibʼa! Atz ¡uloqn txhan u yeʼbʼaʼn tiibʼa qunitxaʼa tiʼ iyatzʼax el Jesuus! —xeʼt itzaqʼbʼ inqʼa xaol s-kaqaayil.

26Txhaqpuletz vet varAvaas, tul aʼ vet Jesuus ibʼekʼ Pilaato itzʼuʼmaleʼ. Atz ibʼekʼ vet Pilaato inqʼa sol tiʼ tiqʼol Jesuus, atz tiʼ taqʼax jaʼ Jesuus vatz kurus.

Uvaʼs imaxubʼel quBʼaal Jesuus taʼn inqʼa sol

27Yaʼne iqʼol vet Jesuus taʼn inqʼa isol Pilaato, u nimla iqʼesal. Tul yekich vet Jesuus tu tatibʼal inqʼa sol. Tul molox vet jankʼal inqʼa sol. Tul sutil vet tiʼ Jesuus taʼn. 28Tul teesa vet el inqʼa sol u toksaʼm Jesuus s-tiʼ. Tul aʼ toksa vet tiʼ Jesuus val u qinkin oksaʼm tetz txhasbʼal uvaʼ kaqkoich ikaʼyeʼ, tetz mam iqʼesal. 29Yaʼne motx ibʼit vet inqʼa sol val u kokos, uvaʼ chʼiʼxunyichxh tiʼ. Tul motx taqʼ jaʼ tiviʼ Jesuus s-vatzil ikoroona. Atz motx toksa val u aj tiqʼabʼ Jesuus s-vatzil ibʼaara Jesuus tetz mam iqʼesal. Tul eenaq toksavat tisebʼal Jesuus. Tul nikich kuxh motx itzeʼlel Jesuus taʼn. Atz nikich kuxh motx iqajeʼv vatz Jesuus. Tul ech nikich motx tal te Jesuus s-eche: —¡Chiibʼebʼalxh avilixeʼ, axh u mam iqʼesal inqʼa tij imam Israeel! —chichich imaxubʼel Jesuus taʼn inqʼa sol.

30Tul nikich itzubʼal Jesuus taʼn inqʼa sol. Atz nikich teesa inqʼa sol u aj tiqʼabʼ Jesuus. Tul antxh nikich taqʼvat kuʼ tiviʼ Jesuus. 31Yaʼaqetz kuxh vet inqʼa sol tiʼ itzeʼlel Jesuus, atz tiʼ imaxubʼel Jesuus, tul teesaaq vet el u oksaʼm tiʼ Jesuus, uvaʼ kaqkoich ikaʼyeʼ. Tul antxh toksa vet u toksaʼm Jesuus s-tiʼ inpaqte. Tul iqʼol vet Jesuus taʼn inqʼa sol tiʼ taqʼax jaʼ vatz kurus.

Uvaʼs ikam vet quBʼaal Jesuus vatz kurus

Kuxh 15.21-41; Luk 23.26-49; Xhun 19.17-30

32Bʼiilichetz kuxh ibʼen inqʼa sol tuchʼ Jesuus, tul motx ikʼul val u vinaq uvaʼ Simoonich ibʼij, val u aj tenam Sireene. Tul yaʼlul ok Simoon taʼn inqʼa sol tiʼ tiqal u kurus. 33Aqʼbʼaqetz vet t-val u vitz uvaʼ ‹Goolgota› ibʼij, uvaʼ ech nik tal s-eche: ‹Bʼaqil Viʼ,› chich u yol Goolgota.

34Yaʼne aqʼax vet inbʼiil u vinaagre te Jesuus uvaʼ yuich tibʼ tuchʼ invaʼt u kʼayla vatz aʼ. Inatxhetz vet Jesuus, tul tira yeʼ tukʼa Jesuus. 35Maʼtichetz taqʼax vet jaʼ Jesuus vatz u kurus taʼn inqʼa sol, tul motx iyol veteʼ jabʼil laʼich txʼoloni. Tul jabʼiste u toksaʼm Jesuus laʼich tiqʼo. [Echetz telaʼpune u yol uvaʼ itzʼibʼa ka val u qʼexsanich tetz viyol quBʼaal Tiuxh uvaʼ ech nik tal s-eche: —Tul motx iyol veteʼ jabʼil laʼich txʼoloni. Atz jabʼiste u voksaʼm laʼich tiqʼo, —chich u yol.]#Saalmo 22.18

36Tul motx kʼuqeʼv vet inqʼa sol tiʼ ixeel Jesuus.

37Yaʼne ex aqʼaxoq jaʼ val u tzʼibʼ tiviʼ u kurus uvaʼ, aʼ nikich tal vipaʼv Jesuus. Tul ech nikich tal s-eche: —aʼ jesuuse uvaʼa, u mam iqʼesal inqʼa tij imam israeel, —chichich u tzʼibʼ.

38Yaʼne aqʼax jaʼ kaʼvaʼt u elqʼom vatz kurus kʼatz Jesuus. Vaʼl, jaʼ tisebʼal Jesuus; tul vaʼt, jaʼ timax Jesuus. 39Jatvaʼletzxh inqʼa xaol uvaʼ nikich ipal paʼl vatz Jesuus, tul nikich kuxh isuti iviʼ tiʼ iyoqʼox Jesuus.#Saalmo 22.7; 109.25 40Tul ech nikich motx tal s-eche: —Aʼ axhe uvaʼ nik alon itilul el u nimla atibʼal tuulbʼal u tostiuxh. Tul oxvaʼl kuxh qʼij laʼ alakvat nik aaleʼ. ¡Oqetz axhxh iKʼaol quBʼaal Tiuxh, tul juntetz kuxh eeqʼo kuʼl eebʼ vatz u kurus! Tul ¡eesa el eebʼ tiqʼabʼ u kamchil! —chichich inqʼa xaol te Jesuus.#Tio 26.61; Xhun 2.19

41Tul echat kuxh nikich motx itzeʼlel Jesuuse taʼn inqʼa iqʼesal oksan yol vatz Tiuxh, atz taʼn inqʼa nikich txhusun ibʼekʼbʼal inqʼa tij imam Israeel, atz taʼn inqʼa fariseeo, atz taʼn jolt inqʼa iqʼesal. Tul ech nikich motx tal tiʼ teesal iqʼij Jesuus s-eche: 42—Nikichetz toleʼv naq tiʼ teesal el inqʼa xaol tiqʼabʼ u kamchil, pet yeʼetz nik toleʼv vet naq tiʼ teesat el tibʼ tiqʼabʼ u kamchil. Oqetz naqe u mam quqʼesal, oʼ inqʼa tij imam Israeel, tul tiqʼoetz kuʼl tibʼ naq bʼa vatz u kurus. Tul echetz toq quqejt naqe. 43Tan kʼuqlelxh ikʼuul naq tiʼ quBʼaal Tiuxh nik taleʼ. Tul: «In iKʼaol quBʼaal Tiuxh,» chich naq. Ibʼanetz Tiuxh bʼaʼnil bʼa te naq s-txheel, oqetz atxh taanima Tiuxh tiʼ naq, —chichich inqʼa iqʼesal.#Saalmo 22.8

44Tul echat kuxh nikich iyoqʼox Jesuuse taʼn kaʼvaʼl inqʼa elqʼom, inqʼa tzum taqʼax jaʼ Jesuus vatz kurus s-tuchʼ.

Uvaʼs tel vet ikʼuul quBʼaal Jesuus vatz kurus

45Aʼetzxh itxhaqʼaan vet qʼij, tul tira tokbʼix ivatz u txʼavaʼ s-kaqaayil, tetxhal topoon s-oxvaʼl oora s-kuʼebʼal qʼij. 46Aʼetz ibʼant oxvaʼl oora s-kuʼebʼal qʼij, tul jankʼalxh iyakʼil Jesuus sichʼini. Tul ech tal Jesuus s-eche: —¡Elii, Elii! ¿Laama savaktaani? —xeʼt Jesuus.

Ech nik tal u yol s-eche: —¡InBʼaal Tiuxh, inBʼaal Tiuxh! ¿Kam s-tiʼil nik aaqʼ ka in sinjunal? —chich telaʼpun u yol t-viyolbʼal inqʼa evreeo.#Saalmo 22.1

47Atichetz jolol inqʼa xaol tzitzi uvaʼ abʼin u yol, tul echaq kuxh motx tal vet s-eche: —Naqe u qʼes Eliias nik isikʼle naq, —xeʼt inqʼa xaol.{*}#27.47 ¿Kam s-tiʼil tal inqʼa xaol uvaʼ: —Naqe u qʼes Eliias nik isikʼle naq, —xeʼt inqʼa xaol? Tiʼ uvaʼ tan yeʼich tootzaql jolol inqʼa xaol u yolbʼal evreeo uvaʼ tal quBʼaal Jesuus, inqʼa xaol uvaʼ atich tzitzi. Tan kamal latiinich viyolbʼal inqʼa xaol. Echetz s-tiʼile ajt tabʼi inqʼa xaol u yol —Elii, Elii, —tul aʼ motx tal veteʼ uvaʼ ‹Eliias, Eliias,› xeʼt tabʼitaq veteʼ. Pet jit eche, tan ‹inTiuxh, inTiuxh,› chich telaʼpun tu yolbʼal evreeo.

48Yaʼne qʼex ibʼen vaʼl inqʼa atich tzitzi. Tul ex takʼsa tzaan bʼiil uvaʼ eche qʼos xeʼ vinaagre. Tul toksa bʼen u qʼos tijuʼ val u aj tzeʼ. Tul taqʼ jaʼp titziʼ Jesuus.#Saalmo 69.21

49Poro ech tal jolt inqʼa xaol s-eche: —Til naq tzi. Qiletza oqetz toqxh uloq Eliias tiʼ ikolox naq, —xeʼtaqe.

50Paqtetz kuxh nimla sichʼiʼm ibʼan Jesuus, tul el vet ikʼuul Jesuus. 51Iletz kuxh Jesuus nikich tel ikʼuul, tul litxʼm u chelkin tʼebʼkin bʼuʼq s-tuul uvaʼ atich jaʼ s-qʼanbʼal tetz tuul u Tatibʼal QuBʼaal Tiuxh. Tul litxʼm tzaan tiviʼ tetxhal ikoʼp tixeʼ.#Eeksodo 26.31-33{*}#27.51 Eeksodo 26.31-33. ¿Kam nik elkaʼpun vilitxʼm u chelkin tʼebʼkin bʼuʼq s-tuul uvaʼ atich jaʼ s-qʼanbʼal tetz tuul u Tatibʼal QuBʼaal Tiuxh? Kajvaʼlen nik elkaʼpun. U bʼaxa, aʼe, uvaʼ yeʼ vet quBʼaal Tiuxh at tu kaʼv okaʼp tuul u qʼanbʼal tuul u tostiuxh. Aʼ uvaʼ ‹Tatibʼal QuBʼaal Tiuxh› chichich eʼli. Echetz vet s-tiʼile uvaʼ jit tetxhal laʼ bʼen inqʼa natxhkʼuulan tetz quBʼaal Tiuxh natxhkʼuulan tu tostiuxh t-Jerusaleen. Tan een atink vet kaj viTiuxhil Tiuxh t-taanima junun inqʼa xaol uvaʼ saʼon ikʼulux tinuqul uvaʼs tul viTiuxhil Tiuxh. Atz vikaʼv nik elkaʼpun viqʼixm u bʼuʼq u qʼanbʼal tuul u tostiuxh, tan oleʼv quBʼaal Jesuus tiʼ ikʼult tiqleʼm te quBʼaal Tiuxh, tul tira ok vet siqʼesal oksan yol vatz quBʼaal Tiuxh. Echetz vet s-tiʼile el vet el inqʼa qʼesal oksan yol titxakunbʼal vatz txʼavaʼ. Tan txhabʼamal vet ikaj quBʼaal Jesuus tiʼ toksal iyol, inqʼa niman tetz. Aʼ vitoxv telaʼpun uvaʼ jit vet tetxhal laʼ bʼen inqʼa natxhkʼuulan tetz Tiuxh natxhkʼuulan tu tenam Jerusaleen, tan yeʼ vet quBʼaal Tiuxh at s-tuul. Tan aʼ vet quBʼaal Jesuus ex iyaʼtebʼe inqʼa oya. Tul paqul kuxh itxhoj quBʼaal Jesuus jankaʼl inqʼa paʼv s-kaqaayil. Echetz aʼ vet quBʼaal Jesuus bʼanon ivatzil inqʼa oya uvaʼ nikich tiqʼo bʼen inqʼa xaol, inqʼa aj paʼvom tiʼ ikuyux inqʼa ipaʼv. Pet jununil vet inqʼa xaol laʼ natxhkʼuulan Tiuxh tuchʼ itziʼ tiʼ ibʼitzletaʼ, atz tuchʼ ichiibʼ s-tiʼ tuchʼxh taanima. Tul jununil vet inqʼa niman tetz Jesuus tiʼ toksal vet iyol tiʼ kam inqʼa ipaʼv. Aʼ vikajv telaʼpun viqʼixm u bʼuʼq uvaʼ atich jaʼ s-qʼanbʼal tuul u tostiuxh uvaʼ yaʼy vet ibʼant quBʼaal Tiuxh iqʼesalil xoʼl inqʼa tij imam Israeel, eche uvaʼ tal te inqʼa tij imam Israeel viʼ u vitz Sinaii. Tul echatxh tal quBʼaal Jesuus paqte uvaʼ, aʼ ul itzoqpisa quBʼaal Jesuus inqʼa bʼekʼbʼal uvaʼ tal quBʼaal Tiuxh te Moisees, ech uvaʼe nik tal t-Tio 5.17-20. Pet tikʼ ijeqbʼa u quBʼaal Tiuxh vaʼt iyol tiʼ ibʼant iqʼesalil xoʼl inqʼa niman tetz Jesuus.

Atz xeʼt vet val u mam kabʼnaano. Tul yekich pax vet inqʼa mamaʼ sivan. 52Tul motx jaqp vet inqʼa jul tetz kamnaʼq. Tul itzʼeʼv jolol xaol, inqʼa maʼtich ikameʼ, inqʼa motx qeon quBʼaal Tiuxh. 53Atz itzʼeʼv jolt xaol inpaqte uvaʼs titzʼeʼv Jesuus. Tul yekichaq vet ok tu tenam Jerusaleen, uvaʼ ichʼex quBʼaal Tiuxh sitenam. Tul mamala xaol motx ilon vet inqʼa xaol, inqʼa itzʼeʼvi.

54Tul mam xoʼval ibʼan vet u qʼesal sol tuchʼ inqʼa isol, inqʼa nikich xeen Jesuus uvaʼs ipal u mam kabʼnaano. Tul mamat xoʼval tzaaq vet s-tiʼ, tiʼ tabʼit kam inqʼa motx utxhi. Tul echaq tal vet s-eche. —¡Nuq bʼakxhtuʼ! ¡IKʼaol bʼakxh quBʼaal Tiuxh naq u vinaq uvaʼe! —xeʼtaq veteʼ.

55Tul mamala ixoq nikich kuxh isaqin vet tzaan s-naatxh, inqʼa een txhʼuyeʼvik tzaan tuulbʼal Galileea tiʼ ikʼuulal Jesuus.#Luk 8.2-3 56Atichetz Mal s-xoʼl, Mal u aj tenam Magdaala, tuchʼ Mal, vitxutxich Jakoovo, atz vitxutxich Xhuʼl, atz tuchʼich u tixqel Sevedeeo, uvaʼ kaʼvaʼl ikʼaol atiche.

Uvaʼs imuqtxʼ vet quBʼaal Jesuus

Kuxh 15.42-47; Luk 23.50-56; Xhun 19.38-42

57Atichetz val u niman tetz Jesuus, uvaʼ Xhuʼlich ibʼij, uvaʼ een jeqlich tu tenam Arimateea; txʼiolich iqʼij. Aʼetz iqʼeqx veteʼ, 58tul ex tabʼi vet vitxhiʼoʼl Jesuus te Pilaato. Tul ibʼekʼ vet Pilaato taqʼax tzaan vitxhiʼoʼl Jesuus s-tiʼ. 59Itxʼutetz vet tzaan Xhuʼl vitxhiʼoʼl Jesuus tuchʼ val u bʼuʼq uvaʼ oqxhich isaqale. Tul tiqʼo vet tzaan Xhuʼl. 60Tul een ex taqʼvat Xhuʼl vitxhiʼoʼl Jesuus t-val u muqbʼal kamnaʼq val uvaʼ kʼotich taʼn vatz val u pejoʼn. Yaʼne ibʼalqʼu ok Xhuʼl val u mamaʼ sivan titziʼ u muqbʼal kamnaʼq. Tul bʼen vet Xhuʼl. 61Tul kʼuqlich Mal, u aj tenam Magdaala, vatz u muqbʼal kamnaʼq, tuchʼ vaʼt u Mal.

Uvaʼs ex ixeet inqʼa sol u muqbʼal kamnaʼq uvaʼ muqtxʼik quBʼaal Jesuus

62Echetz vet eqal tuulbʼal u xeem qʼij saavado, tul ex ikʼul tibʼ inqʼa iqʼesal oksan yol vatz Tiuxh vatz Pilaato, tul antich inqʼa iqʼesal inqʼa fariseeo. 63Tul ech motx tal s-eche: —Quqʼesal, nik qunatxheʼ uvaʼ ech val u yol tal naq u tzʼeqol tzij s-eche, uvaʼs yeʼnaqich kamoq naq: «Titoxv qʼij, tul laʼ itzʼeʼv in inpaqte,» xeʼt naq.#Tio 16.21; 17.23; 20.19 64Pet bʼan bʼaʼnil s-qe, tul oxvaʼl koq qʼij laʼ abʼekʼ ixeel tal uvaʼ qat muqtxʼik naq. Tan avoqe aqʼbʼ txhaqnaq s-aqʼbʼal, inqʼa nikich itxhus tibʼ kʼatz naq, tiʼ tiqʼol el vitxhiʼoʼl naq. Tul echichetz kuxh tal txhaqnaq te u tenam s-eche: «Il naq qat itzʼeʼvy inpaqte,» chitunich kuxh vet txhaqnaq. Tul aaletz toq ipal iviʼ u tzʼeqo tzij s-qiibʼa taʼn txhaqnaq, —xeʼtaqe.

65Tul ech tal Pilaato s-eche: —Il jolol sol ile. Tul bʼenoq ixee tal uvaʼ qat muqtxʼik naq, —xeʼt Pilaato.

66Bʼenetz vet inqʼa iqʼesal oksan yol vatz Tiuxh tuchʼ inqʼa fariseeo, tul exaq itxhabʼa vet ijupux ka u muqbʼal kamnaʼq. Tul toksaaq vet ka seeyo tiʼ u sivan uvaʼ atich ok titziʼ u muqbʼal kamnaʼq. Tul motx taqʼaq vet ka inqʼa sol tiʼ ixeeleʼ.

Currently Selected:

Tio 27: ixlC

Highlight

Copy