Luk 22

Uvaʼs itxhokt Juudas txumbʼal tiʼ toksal quBʼaal Jesuus tiqʼabʼ inqʼa iqʼesal

Tio 26.1-5, 14-16; Kuxh 14.1-2, 10-11; Xhun 11.45-53

1Toqnaʼqichetz uloq vet viqʼiil u nimla qʼij tetz inqʼa tij imam Israeel, U Txʼaʼbʼal Tetz Inqʼa Paan uvaʼ yeʼl aqʼbʼal jaʼ tuul atoʼk s-xoʼl uvaʼ Ipal Aanxel ibʼij, u bʼaxa qʼij uvaʼ nik ixeʼt u nimla qʼij nimaloq. 2Tul sebʼtichaq vet inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel tiʼ titzʼaleʼ kam laʼich motx tulbʼe iyatzʼax el Jesuus. Tan nikich motx titzʼa uvaʼ jit ech ivatz xaol laʼich motx itxey Jesuus. Tan nikich motx ixoʼveʼ, tan avoqe laʼich imol tibʼ tenam s-tiʼ. 3Poro oketz vet Satanaas t-taanima Juudas, u aj Karioote, uvaʼ atich ok s-tatxhul kabʼlaval inqʼa nikich itxhus tibʼ kʼatz Jesuus. 4Yaʼne bʼen vet Juudas tiʼ tilix inqʼa iqʼesal oksan yol vatz Tiuxh, atz tiʼ tilix inqʼa iqʼesal, inqʼa xeenich tetz u nimla atibʼal tuulbʼal u tostiuxh. Tul ex inukʼ vet Juudas kam laʼich tulbʼe Juudas toksal Jesuus tiqʼabʼ inqʼa iqʼesal.

5Tul yekichxh motx chiibʼ vet inqʼa iqʼesal tiʼ u yol uvaʼ ex tal Juudas. Tul motx iyolaq veteʼ jankʼal puaq laʼich taqʼ te Juudas tiʼ toksal Jesuus tiqʼabʼ inqʼa iqʼesal.

6Yaʼne itzaqʼbʼe vet Juudas toksal Jesuus tiqʼabʼ inqʼa iqʼesal. Tul ikʼul vet Juudas u puaq. Aʼichetz isaʼ Juudas uvaʼ yeʼich laʼ til inqʼa xaol vitxeyp Jesuus.

Uvaʼs inimat quBʼaal Jesuus u nimla qʼij Ipal Aanxel tuchʼ viyaʼtebʼal txʼaʼoʼm sedeer ibʼan tuchʼ inqʼa nikich itxhus tibʼ s-kʼatza

Tio 26.17-29; Kuxh 14.12-25; Xhun 13.21-30; 1 Koriintios 11.23-26

7Aʼetzxh topoon vet u nimla qʼij, uvaʼ nikich itxʼaʼp inqʼa paan uvaʼ yeʼl aqʼbʼal jaʼ tuul atoʼk tu bʼaxa qʼij uvaʼ nikich iyatzʼax inqʼa chelem karneʼl tiʼ itzʼeʼsal ok vatz quBʼaal Tiuxh tiʼ inimal u nimla qʼij Ipal Aanxel. 8Itxhaqetz vet bʼen Jesuus Luʼ tuchʼ Xhun, tul ech tal Jesuus s-eche: —Bʼenoq ex. Tul bʼenoq ebʼan tutxh u txʼix uvaʼ toq qetxhbʼu tiʼ inimal u nimla qʼij Ipal Aanxel, —xeʼt Jesuus.

9Yaʼne ech tal Luʼ tuchʼ Xhun te Jesuus s-eche: —¿Taletz bʼen qubʼanvat tutxh u txʼix nik aaleʼ? —xeʼtaq te Jesuus.

10Tul ech tal Jesuus s-eche: —Bʼenoq ex tu tenam Jerusaleen. Tul bʼen ekʼul etibʼ tuchʼ val u vinaq uvaʼ iqʼomal vaʼl txeʼn aʼ taʼn. Echetz txhʼuyeʼv vet bʼen ex s-tiʼ. Jabʼisteetz u otzotz uvaʼ laʼ palkoʼk u vinaq, tul tzitzietz laʼ palkoʼk ex. 11Tul ech laʼ etal te u aj otzotz s-eche: «Ech nik tal u Txhusul qetz s-eche: –¿Jabʼiste invaʼq tuul otzotz s-te laʼ inkʼama tal uvaʼ toq txʼaʼonk in tuchʼ inqʼa nik itxhus tibʼ sinkʼatza tiʼ inimal u nimla qʼij Ipal Aanxel? –chich u Txhusul qetz,» chaq ex.

12Yaʼne bʼen ikʼutxh vet u aj otzotz vaʼl u nimla otzotz tikaʼviq uvaʼ bʼanel vet tutxheʼ. Tul aʼetz laʼ ebʼanvat tutxh qetxhbʼubʼal tzitzi, —xeʼt Jesuus te kaʼvaʼl inqʼa nikich itxhus tibʼ s-kʼatza.

13Bʼenetz vet Luʼ tuchʼ Xhun, tul echxh elkaʼpune kam uvaʼ tal bʼen Jesuus s-tiʼ. Tul motx ibʼan vet tutxh inqʼa etxhbʼubʼal uvaʼ bʼanbʼel tiʼ u nimla qʼij Ipal Aanxel.

14Aʼxhetz topoon vet ioorail vitxʼaʼp inqʼa txʼix tetz Ipal Aanxel, tul ok vet Jesuus viʼ meexha tuchʼ inqʼa iapoostol. 15Tul ech tal Jesuus s-eche: —¡Oqxh inchibʼ tiʼ innimat u nimla qʼij Ipal Aanxel setuchʼ tuulbʼal uvaʼs yeʼnaq paloq in tu mam kʼaxkʼo! 16Tul toq val sete uvaʼ yeʼl inpaqt laʼ txʼaʼon in tiʼ inimal u nimla qʼij uvaʼa. Pet laʼ nal bʼen te inqʼa niman vetz kam talax vibʼant quBʼaal Tiuxh iqʼesalil xoʼl inqʼa tenam s-kaqaayil, yaʼne laʼ utxh intxʼaʼon inpaqte setuchʼ, —xeʼt Jesuus.

17Yaʼne itxey Jesuus u koopa, tul taqʼ Jesuus taʼntiuxh te quBʼaal Tiuxh s-tiʼ. Tul ech tal Jesuus s-eche: —Kʼulvaq u koopa uvaʼa. Tul qʼexsavaq sevatzaq. Tul ukʼavaq u aʼ at s-tuul. 18Tul nik val sete uvaʼ: Yeʼl inpaqt laʼ vukʼa taʼl uuva setuchʼ. Pet laʼ nal inbʼan iqʼesalil xoʼl inqʼa tenam s-kaqaayil, yaʼne laʼ vukʼa setuchʼ inpaqte, —xeʼt Jesuus.

19Yaʼne itxey Jesuus u paan. Tul taqʼ Jesuus taʼntiuxh te quBʼaal Tiuxh s-tiʼ. Tul ipixh Jesuus u paan. Atz taqʼ Jesuus te inqʼa nikich itxhus tibʼ s-kʼatza tiʼ tetxhbʼutaʼ. Tul ech tal Jesuus s-eche: —Aʼetz vintxhiʼoʼle uvaʼa, uvaʼ toq vaqʼ kʼaxbʼisaloq setiʼ. Tul bʼenamen laʼ etetxhbʼutaʼ tiʼ etulsat in sekʼuul uvaʼs laʼ enimataʼ, —xeʼt Jesuus te inqʼa nikich itxhus tibʼ s-kʼatza.

20Yaʼetz vet itxʼaʼon Jesuus tuchʼ inqʼa nikich itxhus tibʼ s-kʼatza, tul itxey Jesuus u koopa. Tul ech tal Jesuus s-eche: —Aʼetz nik elkaʼpun u taʼl uuva uvaʼ tu koopa, vinkaqal uvaʼ toq eloq setiʼ uvaʼs toq inkameʼ tiʼ intxhojt vepaʼv. Echetz aʼ, quBʼaal Tiuxh toq jeqon ka vaʼt u yol sexoʼl.{*}#22.20 ¿Kam nik elkaʼpun u yol uvaʼ ech nik tal quBʼaal Jesuus s-eche?: —Aʼetz nik elkaʼpun u taʼl uuva tu koopa, vinkaqal uvaʼ toq eloq setiʼ uvaʼs toq inkameʼ tiʼ intxojt vepaʼv. Echetz aʼ, quBʼaal Tiuxh toq jeqon ka vaʼt u yol sexoʼl, —chiche. Aʼ nik elkaʼpun uvaʼ laʼ iyaʼsa vet quBʼaal Tiuxh inimal u bʼaxa iyol uvaʼ ijeqbʼa ka te inqʼa tij imam Israeel s-naʼya tu vitz Sinaii, eche uvaʼ nik tal tu Eeksodo 19.8 tuchʼ Tio 5.17. Tul aʼe jankʼal inqʼa bʼekʼbʼal tal ka quBʼaal Tiuxh te Moisees. Aʼ u bʼaxa tokebʼal u tel vikaqal inqʼa chelem karneʼl tiʼ ikolt tibʼ inqʼa tij imam Israeel uvaʼs ipal u aanxel tiʼ iyatzʼax inqʼa bʼaxa kʼaola, eche uvaʼ nik tal tu Eeksodo 12.1-13. Tul xamtel ijeqbʼa vet quBʼaal Tiuxh vaʼt viyol, eche uvaʼ nik tal t-Jeremiias 31.31-34. Aʼetz u yol ijeqbʼa quBʼaal Tiuxh tiʼ u tulebʼal quBʼaal Jesuus vatz txʼavaʼ, atz tuchʼ u tel vikaqal tiʼ itxhojp vipaʼv inqʼa xaol. Aʼetz vaʼt nik elkaʼpun u taʼl uuva tal quBʼaal Jesuus; aʼe u tel vikaqal quBʼaal Jesuus tiʼ itxhoox inqʼa paʼv. Aʼetz vet quBʼaal Jesuus ul jeqbʼan vet vaʼt viyol quBʼaal Tiuxh tuchʼ inqʼa niman tetz, inqʼa nik ikuy ibʼant quBʼaal Tiuxh iqʼesalil t-taanima. Tul jit vet tuchʼ inqʼa tij imam Israeel ijeqbʼavat quBʼaal Tiuxh u kaʼv iyol uvaʼ nik tal tzitza, pet tuchʼ vet inqʼa niman tetz quBʼaal Jesuus.

21Pet toq val sete uvaʼ: Antxh invaʼl ex, uvaʼ eela nik txʼaʼonk in setuchʼ viʼ u meexha, toq oksan in tiqʼabʼ inqʼa iqʼesal u tenam. 22Poro tetxhalxh toq yatzʼaxoq el in, tan aʼ uvaʼe, kʼaqel s-viʼ taʼn quBʼaal Tiuxh, in, u Kʼaola uvaʼ qat bʼen in s-alam aanima. Pet txumlebʼalxh ivatz naq u vinaq uvaʼ toq oksan in tiqʼabʼ inqʼa nik itxhiʼan s-viʼ. Tan tul u mam kʼaxkʼo tiibʼa naq, —xeʼt Jesuus.

23Echetz motx ixeʼt vete inqʼa nikich itxhus tibʼ kʼatz Jesuus tiʼ iyolox s-vatzaq. Tul ech motx tal vet s-eche: —¿Jabʼiletz oʼe nik tal Jesuus tuchʼ u yol uvaʼ nik taleʼ? —xeʼtaq veteʼ.

Uvaʼs itxhusun Jesuus tiʼ kam u tiqleʼm vaʼl u kʼuulanal

24Yaʼne motx iyoj vet tibʼ inqʼa nikich itxhus tibʼ kʼatz Jesuus s-vatzaq, tiʼ uvaʼ jaʼl laʼich bʼen siqʼesalil s-xoʼl uvaʼs laʼich ibʼant Jesuus mam iqʼesal.

25Tul ech tal Jesuus s-eche: —Eche inqʼa mam iqʼesal tuulbʼal inqʼa mam tenam, inqʼa jit tij imam Israeel, tan aʼ, inqʼa mam iqʼesal, nik motx ibʼekʼon tiibʼa u tenam. Tul juntxh nik motx toksa txha iqʼij u tiqleʼm tiʼ ibʼekʼon tiibʼa u tenam. Tul: «Bʼaʼn uvaʼ nik qubʼaneʼ, tan oʼ lotxhol tetz inqʼa xaol,» chichaq txhan kuxhtuʼ, tul kʼuxh yeʼbʼaʼn uvaʼ nik motx ibʼaneʼ.

26Jitetz ech ex laʼ ebʼane. Tan jabʼiste ex, uvaʼ laʼ saʼon ebʼen siqʼesal xoʼl inqʼa emol, tul aʼetz exe, uvaʼ laʼ etaqʼ bʼen etibʼ s-txhʼoj xoʼl inqʼa emol. Atz kʼuxh ex iqʼon iviʼ xoʼl inqʼa emol, tan aʼ, ex laʼ etaqʼ bʼen etibʼ s-lotxhol tetz emol. 27Poro ¿jabʼisteetz u xaol iqʼesal s-te nik enatxheʼ? Aʼ inqʼa kʼuqlel ok viʼ meexha abʼa. Pet jit aʼ inqʼa nik kʼuulan inqʼa xaol, inqʼa atoʼk viʼ meexha. Sevatz, tan aʼ iqʼesal uvaʼ kʼuqlel ok viʼ meexha. Pet sinvatz, tan aʼ, uvaʼ nik ikʼuulaneʼ. Tan eche in, tan ech vatin sexoʼl, eche invaʼq kʼuulanal.{*}#22.27 Aʼ nik tal quBʼaal Jesuus uvaʼ kantxhaq uvaʼ laʼ kuxh motx tetxha tibʼ inqʼa apoostol s-vatzaq tiʼ ibʼenaq siqʼesalil, tiʼ ibʼekʼon tiibʼa inqʼa imol. Pet aʼ nik tal quBʼaal Jesuus uvaʼ, aʼ laʼ ibʼan inqʼa iqʼesal xoʼl inqʼa niman tetz Jesuus uvaʼ, aʼ laʼ motx kʼuulan inqʼa imol, eche uvaʼ ibʼan quBʼaal Jesuus s-xoʼl. Xhun 13.15-17

28Echetze ex, inqʼa qat ekotxʼl evatz t-inqʼa itzaʼlal tuulbʼal jankʼax inqʼa qʼij txhʼuyeʼv ex s-viʼ. 29Tan kamxh uvaʼ qat toksat in vinBʼaal s-mam iqʼesalil, tul echatxh toq voksat exe s-mam iqʼesal. 30Antetz vet ex laʼ chiibʼ ex sinkʼatza uvaʼs laʼ inbʼant iqʼesalil. Tul laʼ kʼuqeʼv ex t-inqʼa kʼuqeʼvbʼal tetz aqʼol kuʼ yol tinuqul. Tul laʼ motx etaqʼ kuʼ yol tinuqul tiʼ kabʼlaval inqʼa tenam, inqʼa atoʼk ibʼij inqʼa ikʼaol Israeel s-tiʼ. Tul laʼ chiibʼ ex tiʼ etatin sinkʼatza, eche laʼ tutxh chiibʼichil tiʼ ibʼanax invaʼq bʼaʼnla txʼix t-invaʼq nimla qʼij, —xeʼt Jesuus te inqʼa nikich itxhus tibʼ s-kʼatza.

Uvaʼs ibʼaxabʼsat quBʼaal Jesuus talaxeʼ uvaʼ toq naʼqich itzʼeq vet Luʼ tzij

Tio 26.31-35; Kuxh 14.27-31; Xhun 13.36-38

31Yaʼne ech vaʼt u yol tal Jesuus s-eche: —Simoon, Simoon, toq val sete uvaʼ, il ex, nik tabʼi ex Satanaas te quBʼaal Tiuxh tiʼ epalsal tu mam kʼaxkʼo. Tan ech toq tulbʼe ex, eche icheʼul el tiʼ triigo nik taleʼ. 32Pet aloq il quBʼaal Tiuxh nik innatxh seʼe Luʼ, tiʼ uvaʼ yeʼ laʼ atzʼeq u kʼuqlebʼal akʼuul s-viʼ. Tan ile nik vabʼi te quBʼaal Tiuxh uvaʼ maʼt akʼuqbʼat vet akʼuul s-viʼ inpaqte, tul antxh axh toq lotxhon inqʼa amol, inqʼa niman vetz. Tul aaletz laʼ ikʼuqeʼv tel ikʼuul s-viʼ inpaqte, —xeʼt Jesuus te Simoon.

33Yaʼne ech tal Simoon s-eche: —InBʼaal, ayaʼlxh inkʼuul txhʼuyel in seʼe. Kʼuxh laʼ bʼen axh t-tzeʼ, atz kʼuxh laʼ kam axh, tan yeʼ laʼ vaqʼ ka axh, kʼuxh laʼ yatzʼax el in seʼe, —xeʼt Simoon te Jesuus.

34Tul ech tal Jesuus te Simoon s-eche: —Luʼ, toq val see uvaʼ: Oxpaqul toq aaleʼ: «Yeʼ vootzaq Jesuus,» toq aal s-viʼ. Maʼtetz aalt oxpaqul u yol s-viʼ uvaʼe, yaʼne laʼ oqʼ val u mam kaxhan, —xeʼt Jesuus.

Uvaʼs talt quBʼaal Jesuus uvaʼ tetxhal kuxh laʼ pal inqʼa nikich itxhus tibʼ kʼatz quBʼaal Jesuus t-inqʼa itzaʼlal tiʼ inimal quBʼaal Jesuus

35Yaʼne ech tal Jesuus te inqʼa nikich itxhus tibʼ s-kʼatza s-eche: —Toq vabʼi sete: ¿Maq kam invaʼq eyaʼta uvaʼs intxhaqt bʼen ex tiʼ ipaxsal viyolbʼal quBʼaal Tiuxh? Tan yeʼl invaʼq etxʼuʼy, atz jitoq invaʼq esam etiqʼo. Atz jitoq tzumtoʼq echichʼ xaʼp etiqʼo, —xeʼt Jesuus.

Tul ech motx tal s-eche: —Yeʼxhkam invaʼq quyaʼta, —xeʼtaqe.

36Yaʼne ech tal Jesuus s-eche: —Pet uvaʼ s-txheel, tan jaʼl ex, at invaʼq etxʼuʼy, atzoq at invaʼq esam, tul iqʼovaq. Pet oqetz yeʼl e-espaada, tul aʼl ekʼayi vexiʼ, echetz laʼ itxhej e-espaadae. 37Pet nik val sete uvaʼ: Tetxhalxh toq elaʼpoq inqʼa yol, inqʼa tzʼibʼamal ka s-viʼ, uvaʼ ech nik tal s-eche: «Tan ant u vinaq alax s-aj paʼvom xoʼl inqʼa xaol, inqʼa palsan yol,» chich inqʼa yol.#Isaiias 53.12 Tul jankʼalxh inqʼa yol uvaʼ tzʼibʼamal ka t-viyolbʼal quBʼaal Tiuxh s-viʼ, tan il vete nik telaʼpun, —xeʼt Jesuus.

38Tul ech tal inqʼa nikich itxhus tibʼ kʼatz Jesuus s-eche: —¡QuBʼaal, il kaʼvaʼl inqʼa espaada ila! —xeʼtaq te Jesuus.

Tul ech tal Jesuus s-eche: —Yeʼ kuxh kam etala. Yaʼ vet tzi, —xeʼt Jesuus.

Uvaʼs inatxht Jesuus Tiuxh tu xhoraal Jetzemanii

Tio 26.36-46; Kuxh 14.32-42

39Yaʼne el vet bʼen Jesuus tu tenam Jerusaleen. Tul aʼ kʼaqich vet taʼn Jesuus u vitz Inqʼa Oliivo. Tan jun kuʼebʼal qʼij nikich tex Jesuus vatoq tzitzi. Tul ant inqʼa nikich itxhus tibʼ kʼatz Jesuus txhʼuyich s-tiʼ.

40Aqʼbʼetz vet Jesuus tu xhoraal Jetzemanii, tul ech tal Jesuus te inqʼa nikich itxhus tibʼ s-kʼatza s-eche: —Natxhvaqxh Tiuxh, echetz yeʼ laʼ ekuʼe t-paʼv uvaʼs laʼ tetxhbʼut Satanaas ekuʼeʼ, —xeʼt Jesuus.

41Yaʼne ijetxheʼl tibʼ Jesuus kʼatz inqʼa nikich itxhus tibʼ s-kʼatza. Poro kamal kaʼvaʼl kuxh kʼaʼa eleʼl Jesuus s-kʼatza. Tul qajeʼv vet Jesuus tiʼ inatxhax Tiuxh. 42Tul ech tal Jesuus s-eche: —InBʼaal Tiuxh, oq axh laʼ saʼon, tul yeʼl in laʼ pal in tuul u mam kʼaxkʼo. Poro jit aʼ abʼan kam uvaʼ nik valeʼ. Pet aʼ abʼan kam uvaʼ nik eetzʼa s-viʼ, —xeʼt Jesuus.

43[Yaʼne ul val viaanxel quBʼaal Tiuxh t-amlikaʼ tiʼ taqʼax itial Jesuus vatz u txumuʼm. 44Poro tuulbʼaletz uvaʼ mam kʼayunchil atich t-taanima Jesuus, tul aʼl tel taqʼt Jesuus yakʼil tiʼ inatxhax Tiuxh. Tul mam itzʼaʼ Jesuus nikich itxhʼanpeʼl. Tul nimla txhʼan nikich tel tivatz Jesuus. Poro echiche kaq vitzʼaʼ Jesuus uvaʼ nikich itxhʼanpeʼl.]

45Yaʼetz vet Jesuus tiʼ inatxhax Tiuxh, tul txakeʼv vet Jesuus. Atz qʼaʼv vet Jesuus kʼatz inqʼa nikich itxhus tibʼ s-kʼatza. Tul vatyaqiche s-tul Jesuus, tan koʼlinaʼqichaqxh vet taʼn mam txumuʼm.

46Yaʼne ech tal Jesuus s-eche: —¡Keʼch nik evateʼ! Uloq evatz. Tul natxhvaqxh Tiuxh, echetz yeʼ laʼ ekuʼe t-paʼv uvaʼs laʼ tetxhbʼut Satanaas ekuʼeʼ, —xeʼt Jesuus.

Uvaʼs itxeyp vet quBʼaal Jesuus

Tio 26.47-56; Kuxh 14.43-50; Xhun 18.2-11

47Sebʼt telichetz iyolon Jesuus te inqʼa nikich itxhus tibʼ s-kʼatza, tul mamala xaol vavalkabʼyichxh vet tul vatz Jesuus. Poro aʼich Juudas, uvaʼ atich ok s-tatxhul kabʼlaval inqʼa nikich itxhus tibʼ kʼatz Jesuus, iqʼonich bʼey vatz inqʼa xaol. Yaʼne ijetxh vet ok tibʼ Juudas kʼatz Jesuus tiʼ itzʼubʼux txala itziʼ Jesuus.

48Tul ech tal Jesuus s-eche: —Txa Juudas, tira chʼixvebʼal uvaʼ nik abʼaneʼ. Tan ¡aʼ bʼak kʼaqel aaʼn voksal tiqʼabʼ inqʼa iqʼesal uqʼeʼybʼal, in, u Kʼaola uvaʼ qat bʼen s-alam aanima! —xeʼt Jesuus.

49Tiletz vet inqʼa nikich itxhus tibʼ kʼatz Jesuus uvaʼ saʼich txeyp vet Jesuus, tul ech motx tal vet s-eche: —¡QuBʼaal, toq qutzokʼ txhaqnaq s-espaada! —xeʼtaqe.

50Tul aʼ vet vaʼl, inqʼa nikich itxhus tibʼ kʼatz Jesuus, tzokʼon el ixichin val u taqʼonvil viqʼesal oksan yol vatz Tiuxh. Tul aʼ itzokʼeʼl vixichin, uvaʼ tisebʼal.

51Yaʼne ech tal Jesuus s-eche: —¡Jit aʼe, uvaʼ nik ebʼaneʼ! Pet ¡yaʼoq sevatz! —xeʼt Jesuus. Tul ikan kuxh Jesuus vixichin u aqʼonvil. Tul yekich ibʼan bʼaʼn.

52Tul yolon Jesuus te inqʼa molmotxhich tul tiʼ itxeyp Jesuus. Aʼe, inqʼa iqʼesal oksan yol vatz Tiuxh tuchʼ inqʼa iqʼesal inqʼa xeen tetz u tostiuxh, atz tuchʼ inqʼa iqʼesal u tenam. Tul ech tal Jesuus s-xoʼl s-eche: —Echxh vete in vaʼq elqʼom sevatz, tan iqʼomal vet espaada etaʼn tuchʼ etzeʼ tiʼ intxeypeʼ. 53Tul jun qʼij nikich motx etilt intxhusun sexoʼl tu nimla atibʼal tuulbʼal u tostiuxh. Tul yeʼl in nikich etxey in. Pet s-txheel, tan oky vet in teqʼabʼ, tiʼ uvaʼ tan, opoony vet viqʼiil taʼn vinBʼaal Tiuxh uvaʼ laʼ ibʼan vet Satanaas kam uvaʼ itzʼamal taʼn, viqʼesal u tokto, —xeʼt Jesuus.

Uvaʼs telaʼp vet u yol tiʼ yeʼ talt tibʼ Luʼ simol quBʼaal Jesuus

Tio 26.57-58, 69-75; Kuxh 14.53-54, 66-72; Xhun 18.12-18, 25-27

54Yaʼne txeyp vet Jesuus. Tul iqʼol vet Jesuus tu totzotz viqʼesal oksan yol vatz Tiuxh. Tul niim kuxh txhʼuyich vet tzaan Luʼ tiʼ Jesuus. 55Atichetz vet ok val u xamal tinikʼa viqʼanalil u totzotz viqʼesal inqʼa oksan yol vatz Tiuxh. Tul kʼuqeʼvaq vet inqʼa xaol tiʼ ilejt tibʼ vatz u xamal. Tul ant Luʼ kʼuqeʼv ok s-xoʼl. 56Poro nikichetz itxiqul ivatz Luʼ taʼn u taqʼ xamal. Tul tiila saqil vet Luʼ taʼn val u ixoq uvaʼ nikich taqʼonv xeʼ viqʼesal inqʼa oksan yol vatz Tiuxh. Tul ech tal u ixoq s-eche: —Imol tibʼe u vinaq uvaʼe tuchʼ u vinaq uvaʼ qat txeypi, —xeʼte.

57Tul itzʼeq Luʼ tzij. Tul ech tal Luʼ s-eche: —Ixoq, yeʼ vootzaqle jaʼlebʼ kuxh uvaʼ nik aaleʼ, —xeʼt Luʼ.

58Echichetz kuxh inbʼiite, tul bʼen kʼuulal txhan Luʼ taʼn vaʼt u xaol. Tul ech tal te Luʼ s-eche: —¡Ant axhe vaʼl vimol u vinaq uvaʼ qat txeypiya! —xeʼt te Luʼ.

Yaʼne ech tal Luʼ s-eche: —¡Yeʼle, txa! ¡Yeʼl in ant in! —xeʼt Luʼ.

59Kamaletz aʼxh tel vet vaʼl oora, tul ech tal vaʼt u xaol tiʼ Luʼ s-eche: —¡Nuqxhtuʼ uvaʼ ant naq uvaʼe imol tibʼ tuchʼ naq u vinaq uvaʼ qat txeypiya, tan iyolon aj Galileea viyolon naq! —xeʼte.

60Yaʼne ech tal Luʼ s-eche: —¡Txa, yeʼ vootzaqle! ¿Kamebʼ kuxh talax uvaʼ nik aaleʼ? —xeʼt Luʼ.

Yaʼnaqichetzxh u yol nikich tal Luʼ, tul oqʼ vet val u mam kaxhan.

61Yaʼne sutxhqʼ Jesuus. Tul saqil Luʼ taʼn Jesuus. Tul ul vet inqʼa iyol Jesuus s-kʼuul Luʼ uvaʼ ech tal Jesuus s-eche: —Maʼtetz aalt oxpaqul uvaʼ: «Yeʼ vootzaq Jesuus,» toq aal s-viʼ, yaʼne laʼ oqʼ val u mam kaxhan, —xeʼt tul s-kʼuul Luʼ.

62Yaʼne bʼen vet el Luʼ. Tul mam oqʼel ibʼan vet Luʼ t-kʼayunchil.

Uvaʼs itzeʼlel, atz iqʼosox quBʼaal Jesuus taʼn inqʼa sol

Tio 26.67-68; Kuxh 14.65

63Atichetz vet ok Jesuus tiqʼabʼ inqʼa xeenal, tul xeʼtaq vet tiʼ itzeʼlel, atz tiʼ iqʼosox Jesuus. 64Tul iqitzaq vet ivatz Jesuus tuchʼ bʼuʼq. Tul xeʼtaq tiʼ ipoqox ivatz Jesuus s-qʼabʼ. Tul ech motx tal s-eche: —Oqetz axh qʼexsan tetz viyol Tiuxh nik aaleʼ, aletz s-qe ¿jaʼletz oʼe, uvaʼ qat qʼoson axh? —chichichaq te Jesuus. 65Tul kam tel kuxh joltaq yol motx tal tiʼ iyoqʼox Jesuus.

Uvaʼs tiqʼol vet quBʼaal Jesuus vatz inqʼa iqʼesal tiʼ ijotxhʼil itziʼ quBʼaal Jesuus

Tio 26.59-66; Kuxh 14.55-64; Xhun 18.19-24

66Saqbʼetz vet ech eqal, tul motx ikʼul vet tibʼ jankʼal inqʼa iqʼesal inqʼa tij imam Israeel. Aʼe inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel. Tul oksal vet ok Jesuus s-xoʼl tiʼ taqʼax kuʼ yol tinuqul tiʼ Jesuus. Atichetz vet ok Jesuus vatz inqʼa iqʼesal, tul ech motx tal te Jesuus s-eche: 67—Al s-qe, ¿aʼ axhe, u Kriisto, uvaʼ alel ka u tulebʼal? —xeʼtaqe.

Tul ech tal Jesuus s-eche: —Kʼuxh laʼxh val sete uvaʼ, ine u Kriisto, poro laʼ koq eqea. 68Atz kʼuxh laʼxh vabʼi invaʼtoʼq yol sete tiʼ u Kriisto, tan bʼane saʼ koq etxhabʼa intzaqʼbʼeleʼ. 69Pet s-txheel sinvatz bʼen, tan toq etil inkʼuqeʼv siqʼesalil tuchʼ u mam viqleʼm t-visebʼal vinBʼaal Tiuxh, in, u Kʼaola uvaʼ qat bʼen s-alam aanima, —xeʼt Jesuus xoʼl jankʼal inqʼa iqʼesal.#Vibʼanoʼm inqʼa Apoostol 5.30-32

70Yaʼne ech motx tal vet inqʼa iqʼesal s-kaqaayil s-eche: —¿Aʼetz kol axhe viKʼaol quBʼaal Tiuxh nik aaleʼ? —xeʼtaq te Jesuus.

Tul ech tal Jesuus s-eche: —Antxhte uvaʼ nik etaleʼ uvaʼ, aʼ ine, u Kriisto, —xeʼt Jesuus.

71Yaʼne ech tal vet inqʼa iqʼesal s-vatzaq s-eche: —¡Kam teletz koq vet qusaʼ tiʼ tabʼil tel inuqul invaʼtoʼq yol tiʼ naq! Tan qat qabʼil vet teluʼl u yol titziʼ naq tiʼ talt tibʼ s-Tiuxh, —xeʼtaq veteʼ.{*}#22.71 Tan aʼ vatz inqʼa iqʼesal uvaʼ, aʼ laʼ nimal u bʼekʼbʼal. Tan jaʼl uvaʼ laʼ tal tibʼ s-Tiuxh, tul: —Yatzʼel laʼ telaʼ, —chich u bʼekʼbʼal. Aʼ atich ok tiviʼ inqʼa iqʼesal uvaʼ tiqatzaqich tilixeʼ jaʼle u Kriisto laʼich uli. Tul aʼichaq s-vatz uvaʼ yek laʼich motx tootzaqi u Kriisto. Tan xeenaq tetz tul u Kriisto s-vatz. Pet ech koqe, tan yeʼ motx bʼen s-te uvaʼ aʼich quBʼaal Jesuus u Kriisto. Tan aʼl teesal iqʼij quBʼaal Jesuus taʼn. Atz aʼl motx taqʼt kuʼ yol tinuqul tiʼ iyatzʼax el quBʼaal Jesuus.

Currently Selected:

Luk 22: ixlC

Highlight

Copy