Mákò 3

Yèésù bɔ àkɔ̃̀rɔ̃̀-kã̀ nɔ́dzɔ́-ìmíra

(Màtéwò 12:9-14; Lúkà 6:6-11)

1Náànyì-bɛ́ɛ̀ ró#ɛ́, Yèésù sɛ̃̀ lɔ ńlé-ìkpàɖé-ɔma-Ìyúɖà ŋa†-kã̀. Tsí ɔ̀nyà-kã̀ wà bɛ̀, tsí akpá‐ɛ̀-kã̀ kú. 2Ɔma-ɛgbɛ́-Fàrísì† kã̀ŋa gbo wà bɛ̀, tsí à wà wo Yèésù kokoko, tsí ká rí káyí ní nákó bɔ àkɔ̃̀rɔ̃̀#ɛ́ nɔ́dzɔ́-ìmíraà. Àtsùgbée ká nyáa kpɛdzɔ́ múu ní à wà wòó bɛ́ɛ̀#ɛ́.

3Ńbɛ̀ɛ́, Yèésù wà wí fú ɛnɛ yèé akpá‐ɛ̀-kã̀ kú#ɛ́ ní: Kó ǹɖe, tsí kó lɔ káà ɖóro ńwádzú-ɔ̀nyà kpó.

4Tsí ó wà bèrè ŋá ní: Kí ɛkpa-Ɔ̀ɖáyé† fúnɛ nɔ́ɔ̀nà ní ká tse nɔ́dzɔ́-ìmíra†? Ká tse ore nàmí ká tse íbàɖí? Ká gba ɔ̀nyà là nàmí ká kpa ɔ̀nyà nóòkú? Yèésí ó fúnɛ nɔ́ɔ̀nà ní ká tse ni?

Ńbɛ̀ɛ́, à tsikó kpó. 5Tsí inɔ́ bíi, tsí ó wà wo odzú-ŋa kã̀kã̀, tsí ara gbo kúu, iŋɛ́ yèé tse#ɛ́, à náa gbódzú tó bɛ́ɛ̀, tsí inɔ́-ɔ̀nyà kà nyɔ́ ŋa. Tsí ó wà fɔ̀ fú ɛnɛ yèé akpá‐ɛ̀-kã̀ kú#ɛ́ ní: Kó na akpá#á wá.

Tsí ó nàá, tsí akpá‐ɛ̀ sɛ̃̀ ɖi rere si ńǹɖì‐ɛ̀.

6Kíbí ɔma-ɛgbɛ́-Fàrísì ŋa#á fùɖá#á, à lɔ káà bá ɔma-ɛgbɛ́-Èróɖì† ŋa, tsí à kpàɖé gbòkã́, tsí tse ètò-bí ká tse fáà, tsí kpa Yèésù nóòkú#ɛ́.

Ɔ̀nyà ŋa tsɛ́ kì, tsí wà tɛ̀ náànyì-Yèésù

7Báàyí#ɛ́, Yèésù òŋu ɔmatsɛ́‐ɛ̀ ŋa, à ǹɖe bɛ̀, tsí sɔ́ lɔ nétíɖò tsítsédzú tɛ̀ŋgɛ̀lɛ̀ɛ̀#ɛ́. Tsí ɔ̀nyà ŋa tsɛ́ kì, tsí ròó bá. À ti wérí wérí kpó. À ti nérè-Gàlìlé òŋu nérè-Yùɖéyà. 8À ti ńǹlú-Yèrúsàlɛ́mì, tsí ti ńlɛ̀-Ìɖùmé gbo. Tsí ɔ̀nyà kã̀ŋa gbo ti náàtàkè-oɖò-Yòɖánì. Tsí ɔ̀nyà kã̀ŋa gbo ti nérè-ìlú-Tíre òŋu Sìɖɔ̃́nì. À tsɛ́ kì, tsí wá ńɖi-Yèésù, iŋɛ́ yèé tse#ɛ́, à gbɔ́ ìdzã̀mà-iŋɛ́ yèé ó tse ŋa kpó#ɛ́. 9Kíbí ɔ̀nyà ŋa kpɔ̀ tó#ɛ́, ó wí fú ɔmatsɛ́‐ɛ̀ ŋa ní: Ká sɔ́ ɔkɔ̃̀-odzómi-kã̀ sɔ́má-òŋu, tsí bí ɔ̀nyà ŋa bòkó wáa tɛ òŋu má ni òŋu kó sá wɔ̀ ńnɛ̀.

10Ìɖéǹɖè#ɛ́, kíbí ó bɔ àkɔ̃̀rɔ̃̀ ŋa kpíkpɔ̀ tó#ɛ́, ɛnɛ yèé ŋa kpó wà tsàkɔ̃̀rɔ̃̀#ɛ́, à wà ɖu ìɖì, tsí ká mɔ́wɔ́ kã̀ã́. 11Ɔ̀nyà kã̀ŋa gbo wà bɛ̀, tsí edzò† kã̀ŋa wà ɖɔ́kpɔ fú ŋa. Kíbí à rí Yèésù#ɛ́, à káà kálɛ̀ nábɛ́‐ɛ̀, tsí edzò ŋa#á wà ɖúgbe ní: Ɔma bíbí-Ɔ̀ɖáyé ní ò dzɛ́#ɛ́!

12Tsí ó rã́ã̀rã̀ bá edzò ŋa#á, tsí kɔ̀ fú ŋa rere ní ká máa tse tsí ɔ̀nyà ŋa kó ma ɔ̀nyà-ìrɔ́ yèé òŋu dzɛ́#ɛ́.

Yèésù tsã ɔmatsɛ́‐ɛ̀ máàméèdzì ŋa#á

(Màtéwò 10:1-4; Lúkà 6:12-16)

13Náànyì-bɛ́ɛ̀#ɛ́, Yèésù lɔ ńǹtá-òkè-kã̀. Tsí ó kpe ɛnɛ yèé ó wà wò ní ká tɛ̀ náànyì-òŋu ŋa#á, tsí à lɔ ńɖɔ̀‐ɛ̀. 14Tsí ó tsã ɔ̀nyà máàméèdzì náàŋírĩ-ŋa, [tsí ó kpè ŋá ní adzítsɛ́-òŋu ŋa.] Ó tsã̀ ŋá ní ká gbé bá òŋu, 15tsí kó wà bɛ̀ ŋá wérí, tsí ká lɔ káà dzíkɔ̀‐ɛ̀. Tsí ó fú ŋa ńkpá ní edzò† yèé ŋa wà ɖɔ́kpɔ fú ɔ̀nyà ŋa#á, ká wà lé ŋa sɛ̃̀ náànyì-ŋa. 16Ɛ́kɔ-adzítsɛ́‐ɛ̀ máàméèdzì yèé ó tsã̀ ŋa#á ní:

Sìmɔ́nì yèé náa ɖáakì ní Òkúta#á fòò,

17Yàkúbù òŋu ɔmàná‐ɛ̀ Yòhánà† gbo,

à dzɛ́ ɔma-Sèbèɖé ŋa, tsí náa ɖá ŋa kì ní Bòwànɛ̀gɛ́sì ŋa. Òkpì‐ɛ̀ ní dzɛ́ ní ɔma-àyèrá ŋa.

18Ànɖérè gbo, Fìlíkpò gbo,

Bàtòlòméwò gbo, Màtéwò gbo,

Tòmá gbo, Yàkúbù ɔma-Àfáyò gbo,

Tàɖéwò gbo, Sìmɔ́nì ɔma-ɛgbɛ́-Sèlɔ́tì ŋa gbo.

19Yúɖà Sìkàrìyɔ́tì gbo. Òŋu gìɖì ní wáa ta Yèésù#ɛ́.

Ɔ̀nyà-Yèésù ŋa ní àŋa kó gbɛ̃́ Yèésù lɔ

20Ńbɛ̀ɛ́, Yèésù òŋu ɔmatsɛ́‐ɛ̀ ŋa, à sɛ̃̀ bɔ̀ wá ńlé. Tsí ɔ̀nyà ŋa sɛ̃̀ kpérí wá ńɖɔ̀‐ɛ̀ ró, títí à kò nyáa rí ìwèrè gìɖì, tsí ká dzɛŋɛ́. 21Kíbí tɛ̀ɛ̀ ŋa gbɔ́ afɔ̀ nyɛ̀ŋɛ̀#ɛ́, à ǹɖe dzì nɔ́ɔ̀nà ní àŋa kó káà gbɛ̃́ɛ̃ lɔ, iŋɛ́ yèé tse#ɛ́, à wà fɔ̀ ní: Éwo wà gboná fúu.

Ɔ̀nyà ŋa wà fɔ̀ ní Yèésù wà lo ikpá-Ètsù

(Màtéwò 12:22-30; Lúkà 11:14-23; 12:10)

22Ńbɛ̀ɛ́, akɔ́nɛ nɛ́kpa-Ɔ̀ɖáyé† kã̀ŋa gbo ti ńǹlú-Yèrúsàlɛ́mì wá, tsí à wà fɔ̀ ní: Bɛ̀yɛ̀sɛ̀búlù ní wɔ̀ ńǹtá‐Yèésù si#ɛ́. Ɛ̃ɛ̃, Ètsù†, òŋu yèé dzɛ́ ɔ̀gã́-edzò† ŋa#á ní fúu ńkpá ní kó wà ń lé edzò yèé ŋa wà ɖɔ́kpɔ fú ɔ̀nyà ŋa#á gbo sɛ̃̀ náànyì-ŋa#á.

23Tsí Yèésù kpè ŋá, tsí wà wíìnyɛ̀ fú ŋa nóòwe nóòwe, tsí ń ɖíre fú ŋa ní Ètsù kàkó nyáa lé ara‐ɛ̀. 24Ó fɔ̀ ní: Bí ìlú-kã̀ wà, tsí ɛnɛ-ìlú ŋa#á wà dzogu bá ara-ŋa, ìlú#ɛ́ kàkó nyáa gbé. 25Nàmí, bí kpáfɛ-kã̀ wà, tsí ɔ̀nyà‐ɛ̀ ŋa wà dzogu bá ara-ŋa, kpáfɛ#ɛ́ kàkó nyáa gbé. 26Bɛ́ɛ̀ ké ní, bí Ètsù wà dzà bá tɛ̀ɛ̀ ŋa, ɖíɖɔ̃̀ kàkó wà náàŋírĩ-ŋa#á, tsí kàkó nyáa nɛ́kpá ró#ɛ́. Ikpá‐ɛ̀ nákó tã́.

27Ó ɖi fee, ɔ̀nyà-kã̀ kpókpó kàkó nyáa ǹɖe gé, tsí wɔ̀ ńkpáfɛ-ɔ̀nyà líle-kã̀ lɔ gé, tsí káà kó iŋɛ́‐ɛ̀ ŋa. Ɛnɛ nyɛ̀ŋɛ̀ nákó tsɛ̃̀tsɛ̃̀ mú ɔ̀nyà líle#ɛ́, tsí ɖèé tã́ná ni. Bí ó múu, tsí ɖèé bɛ́ɛ̀, nákó nyáa kó iŋɛ́‐ɛ̀ ŋa kpó ńkpáfɛ#ɛ́ lɔ ńǹkɛ̀ɛ́.

28Báàyí#ɛ́, òŋu wà wí òtítɔ́ fú ŋa ní fee, àbi yèé ŋa ɔ̀nyà ŋa wà dzɛ#ɛ́ òŋu èkpè yèé ŋa ɔ̀nyà ŋa wà bú Ɔ̀ɖáyé#ɛ́, bí à kpɔ̀ nɔ́ɔ̀kã̀lɔ́ɔ̀kã̀, Ɔ̀ɖáyé nákó ń tɔrɛ fú ŋa. 29Ó ɖi, bí ɔ̀nyà-kã̀ bú Mímí-Ɔ̀ɖáyé†, Ɔ̀ɖáyé kàkó ń tɔrɛ fú ɛnɛ nyɛ̀ŋɛ̀ láyé. Àbi yèé ó dzɛ nyɛ̀ŋɛ̀#ɛ́, nákó kí fúu títí lɔ ńǹtã̀ntã́ ni.

30Iŋɛ́ yèé tse tsí Yèésù fɔ̀ fú ŋa bɛ́ɛ̀#ɛ́, à wà fɔ̀ ní: Ètsù ní wà bɛ̀ɛ́ ńtsɛ́#ɛ́.

Ìnà-Yèésù òŋu ìnàbí-Yèésù ŋa wà wòó

(Màtéwò 12:46-50; Lúkà 8:19-21)

31Náàsòkò nyɛ̀ŋɛ̀#ɛ́, ìnà-Yèésù òŋu ìnàbí‐ɛ̀ ŋa wáa tó. Tsí à ɖóro nóòɖe si, tsí bɛ ɔ̀nyà-kã̀ ní kó lɔ káà kpèé wá. 32Ɔ̀nyà kpíkpɔ̀ dzokó wérí‐ɛ̀ si, tsí à wí fúu ní: Kó rí gé! Ìná‐ɛ̀ òŋu ìnàbí‐ɛ̀ ŋa wà nóòɖe si, tsí wà wòó.

33Tsí ó wí fú ŋa ní: Nɛ̀ɛ́ dzɛ́ ìnà-òŋu òŋu ìnàbí-òŋu ŋa?

34Tsí ó kɛ́ odzú, tsí wà wo ɛnɛ yèé dzokó wérí‐ɛ̀ si ŋa#á ɔ̀kã̀kã̀, tsí wà fɔ̀ ní: Ká rí gé! Ìnà-òŋu òŋu ìnàbí-òŋu ŋa gìɖì gìɖì ní. 35Ó ɖi, ɛnɛ yèé ŋa wà tse awù-Ɔ̀ɖáyé gé#ɛ́, àŋa ní dzɛ́ ìnà-òŋu òŋu ìnàbí-òŋu ŋa#á.

Currently Selected:

Mákò 3: ngl

Highlight

Copy