Mákò 11

Yèésù wɔ̀ ńǹlú-Yèrúsàlɛ́mì kíbí ólú bɛ́

(Màtéwò 21:1-11; Lúkà 19:28-40; Yòhánà 12:12-19)

1Yèésù òŋu ɔmatsɛ́‐ɛ̀ ŋa sɔ́má-Yèrúsàlɛ́mì làkóò, tsí tó sɔ́má-ìlú-oko méèdzì kã̀ŋa. À náa kpe ɔ̀kã̀ ní Bètìfàgé, tsí à náa kpe èkéèdzì‐ɛ̀ ní Bètàní. À wà nára-òkè-Òlífì†. Tsí Yèésù tsã ɔmatsɛ́‐ɛ̀ méèdzì, tsí bɛ̀ ŋá, 2tsí ó wí fú ŋa ní: Ká ǹɖe, tsí ká lɔ ńǹlú-oko yèé à wà rí ńǹwádzú-ŋa#á, tsí bí à tó ńǹlú#ɛ́, à nákó rí kɛ́tɛ́kɛ́tɛ́-ɛɖã-kã̀, tsí à soó si, tsí ɔ̀nyà-kã̀ kpókpó gbo kò dzì ńǹtá‐ɛ̀ wòrí. Ká túu, tsí ká fàá wá fú òŋu. 3Ó ɖi, bí ɔ̀nyà-kã̀ wà bèrè ŋá ní: Kí tse tsí à wà tse bɛ́ɛ̀, ni ká wí fúu ní: Ɔ̀gá ní wà wo kó lòó#ɛ́, nákó sɛ̃̀ɛ̃́ wá fúu ńǹsɛ̃̀ɛ̃́.

4Ńbɛ̀ɛ́, ɔmatsɛ́ ŋa#á lɔ. Kíbí à káà tó#ɛ́, à rí kɛ́tɛ́kɛ́tɛ́-ɛɖã-kã̀ nárũ-kpàtá-kã̀. À soó si nára-èkũ̀-kpàtá#á, tsí ó ɖóro nɔ́ɔ̀nà si. Tsí à káà túu. 5Tsí ɔ̀nyà kã̀ŋa wà bɛ̀, tsí wà bèrè ŋá ní: Kí à wà tse ńnɛ̀ɛ́? Kí tse tsí à wà tú kɛ́tɛ́kɛ́tɛ́#ɛ́?

6Tsí ɔmatsɛ́ ŋa#á dzɔ́ŋù fú ŋa kíbí Yèésù fɔ̀ gbà#á, tsí à dzɔ̀ɔ́ ŋa. 7Tsí à fa kɛ́tɛ́kɛ́tɛ́-ɛɖã#á wá fú Yèésù. Kíbí à tó#ɛ́, à bɔ́ ìwɔ̀ra-ŋà ŋa, tsí ń lé ńǹtá‐ɛ̀, tsí Yèésù dzokó ńǹtá-àwù ŋa#á, tsí à dzì nɔ́ɔ̀nà. 8Tsí ɔ̀nyà kpíkpɔ̀ wà mú ìwɔ̀ra-ŋà ŋa tɛ́ nɔ́ɔ̀nà fúu, tsí ɔ̀nyà kùbɔ̀ ŋa wà tsɛ́wé ńkóko wáa tɛ́ fúu. 9Ɛnɛ-iwádzú ŋa gbo, ɛnɛ-ànyì ŋa gbo, àŋa kpó, à wà ɖúgbe ní: Ényìì! Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́! 10Kùsɛ̀ɛ̀ fú ɛnɛ yèé bàa, tsí kó wáa dzoyè si ńǹtá-wa, kíbí gbágbóǹgbàgbò-wa Ɖàfíɖì† dzoyè wáa lɔ#ɛ́. Ényìì! Kùsɛ̀ɛ̀ fú Ɔ̀ɖáyé nɔ́ɔ̀rɔ̃!#11:10 È káà kã Ìwé-Orĩ ŋa 118:25-26 (Psaumes 118:25-26).

11Tsí à káà tó ńǹlú-Yèrúsàlɛ́mì. Tsí Yèésù lɔ nɔ́gbà-ilé-Ɔ̀ɖáyé†, tsí ó rí iŋɛ́ yèé wà bɛ̀ ŋa kpó#ɛ́. Ńbɛ̀ɛ́, alɛ́lɛ́ lɛ́, tsí òŋu ɔmatsɛ́‐ɛ̀ máàméèdzì ŋa#á sɛ̃̀ lɔ ńǹlú-oko-kã̀, tsí káà sũ̀ bɛ̀. À náa kpe ìlú#ɛ́ ní Bètàní.

Yèésù ré fú egi-òrì-kã̀

(Màtéwò 21:18-19)

12Kíbí ilɛ̀ má#á, à ǹɖe ńBètàní, tsí wáa làkóò ńYèrúsàlɛ́mì#ɛ́, tsí ebi wà kpa Yèésù. 13Ńbɛ̀ɛ́, ó rí egi-òrì-kã̀ nóòtèrè, tsí ó rú si kíbí bí ó so si ni náa rú gbà#á. Tsí ó lɔ nóòkpì‐ɛ̀ ní òŋu nákó rí síso kã̀ŋa ńnɛ̀ɛ̀? Kíbí ó tó nóòkpì‐ɛ̀#ɛ́, ewé sɔ̃́ŋú gé ní ó rí#ɛ́. Kò tsi ìwèrè yèé náa so#ɛ́ ni. 14Ńbɛ̀ɛ́, ó ré fúu ní: Ɔ̀nyà-kã̀ kpókpó kàkó dzɛ èso‐ɛ̀ láyé ró!

Tsí ɔmatsɛ́‐ɛ̀ ŋa gbo gbɔ́.

Yèésù lé àtàdzà ŋa fùɖá nɔ́gbà-ilé-Ɔ̀ɖáyé

(Màtéwò 21:12-17; Lúkà 19:45-48; Yòhánà 2:13-22)

15Tsí à káà tó ńYèrúsàlɛ́mì, tsí Yèésù lɔ nɔ́gbà-ilé-Ɔ̀ɖáyé†, tsí kpé àtàdzà ŋa òŋu àràdzà ŋa lílé fùɖá nɔ́gbà-ilé-Ɔ̀ɖáyé#ɛ́. Akparɔ-owó ŋa gbo wà bɛ̀, tsí ó rí kpɔ̃rɔ̃-ŋà ŋa kpalɛ̀. Tsí ɔ̀nyà kã̀ŋa gbo wà ta àlúǹkùkù, tsí ó rí àntã̀ tiŋà ŋa gbo kpalɛ̀. 16Kò dzɛ́ gìɖì ní ɔ̀nyà-kã̀ kpókpó kó ru iŋɛ́-kã̀ gbà nɔ́gbà#á wáa lɔ. 17Tsí ó tsɛ̀kɔ́ fú ɔ̀nyà ŋa, tsí wà fɔ̀ fú ŋa ní: Ɔ̀ɖáyé fɔ̀ si ńǹwé‐ɛ̀ ní: “Ilé-mi, à nákó kpèé ní ilé-ìre wúwú fú àledzò ŋa kpó náyé gbaŋgba#á ni.”#11:17 Ìwé-Yèsáyà 56:7, Ìwé-Yèrèmíyà 7:11 (Ésaïe 56:7, Jérémie 7:11) Tsí àŋa òŋu, à kɛ́ɛ, tsí ń tse ìɖìgbé-olè ŋa si.

18Ńbɛ̀ɛ́, onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa, à gbɔ́ iŋɛ́ yèé ó tse nyɛ̀ŋɛ̀#ɛ́, tsí wà wo ká ɖɔ́gbɔ̃́-kã̀, tsí kpaá nóòkú. À wà sá fúu ni, iŋɛ́ yèé tse#ɛ́, ɛ̀kɔ́‐ɛ̀ yèé ó wà tse#ɛ́, ó wà dzɔdzú-èrò#ɛ́ tó bɛ́ɛ̀.

19Kíbí alɛ́lɛ́ lɛ́#ɛ́, òŋu ɔmatsɛ́‐ɛ̀ ŋa fùɖá ńnɔ́-ìlú#ɛ́, tsí káà sũ̀ ńbòmírɛ̃̀.

À rí egi-òrì yèé Yèésù ré fúu#ɛ́

(Màtéwò 21:20-22)

20Ńlɛ̀ má‐ɛ̀, náàwúrɔ̀, kíbí à sɛ̃̀ wáa làkóò#ɛ́, à rí egi yèé ó ré fú nɔná#á, tsí ó gbɛ̃ káà kpa nógùgù‐ɛ̀ ŋa kpó. 21Ńbɛ̀ɛ́, Òkúta tédzú iŋɛ́ yèé tse wáa lɔ nɔná#á, tsí ó wà wí fú Yèésù ní: Akɔ́nɛ, ó ɖi, kó rí gé! Egi yèé ó ré fú#ɛ́, egi#ɛ́ gbɛ̃ kpó.

22Tsí Yèésù wà wí fú ŋa ní: Ká karalé si ńǹtá-Ɔ̀ɖáyé! 23Ó ɖi, ìɖéǹɖè, òŋu wà wí fú ŋa ní fee, bí ɔ̀nyà-kã̀ wí fú òkè yèé bɛ́ ní kó wú ǹɖe bɛ̀, tsí kó lɔ káà dzì náàhũ, tsí ó nɛ́ àkaralé ní afɔ̀ yèé ó fɔ̀#ɛ́ nákó tsɛ, tsí kò dzèrèbe ńnɔ́-ara‐ɛ̀#ɛ́, nákó tsɛ fúu bɛ́ɛ̀ ìɖéǹɖè. 24Ńnɛ̀ ní òŋu wà wí fú ŋa ní, iŋɛ́ ɔ̀kã̀lɔ́ɔ̀kã̀ kpó yèé ò wà wúùre, tsí wà bere Ɔ̀ɖáyé#ɛ́, nɛ́ àkaralé ní ó ti tɔwɔ́-ɛ̀ɛ ná, tsí nákó fɛ́ɛ gbo ìɖéǹɖè. 25Tsí bí ò ǹɖe, tsí wà wúùre#ɛ́, bí afɔ̀-kã̀ wà náàŋírĩ-ìwɔ ɔ̀nyà-kã̀, nà ń tɔrɛ fúu, àtóoríi Boba-ɛ̀ɛ yèé wà nɔ́ɔ̀rɔ̃#ɛ́, òŋu gbo kó mú íbàɖí tɛ̀ɛ ŋa gbo tɔrɛ fɛ́ɛ. [ 26Ó ɖi, bí ò kò wa mú tɔrɛ fúnɛ#ɛ́, Boba-ɛ̀ɛ yèé wà nɔ́ɔ̀rɔ̃#ɛ́, òŋu gbo kàkó mú íbàɖí tɛ̀ɛ ŋa gbo tɔrɛ fɛ́ɛ.]

À bere Yèésù ní nɛ̀ɛ́ fúu ńkpá‐ɛ̀?

(Màtéwò 21:23-27; Lúkà 20:1-8)

27Tsí à sɛ̃̀ wáa tó ńYèrúsàlɛ́mì ró. Tsí Yèésù wà lɔ ńlé-Ɔ̀ɖáyé, tsí wà bɔ̀, tsí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa má nára-onùgbó-ìlú ŋa, à wáa báa. 28Tsí à wà bèrèé ní: Ikpá mɛ̀ɛ́ wà fúu, tsí ó wà ń tse iŋɛ́ nyɛ̀ŋɛ̀ ŋa ná? Nɛ̀ɛ́ tútútú fúu ńkpá-ìrɔ́-bɛ́ɛ̀ ná?

29Tsí Yèésù wà wí fú ŋa ní: Òŋu bàkó bèrè ŋá náfɔ̀ ɔ̀kã̀ntso bɛ́ gé, bí à dzɔ́ŋù‐ɛ̀ fú òŋu, òŋu gbo, òŋu nákó ɖíre ɛnɛ yèé fú òŋu ńkpá, tsí òŋu wà ń tse iŋɛ́ nyɛ̀ŋɛ̀ ŋa#á fú ŋa. 30Nɛ̀ɛ́ bɛ Yòhánà† Awɛ̀fúnɛ wá ní kó wáa wɛ̀† fú ɔ̀nyà ŋa? Ɔ̀ɖáyé nàmí ɔ̀nyà ni? Ká fɔ̀ɔ́ káyí.

31Tsí à nyí, tsí wà ɖìkpá fú ara-ŋa ní: Bí à náa fɔ̀ yèé fáà? Bí àŋa dzɛ́ fúu ní Ɔ̀ɖáyé ni, nákó bere àŋa ní, tsí kí tse tsí àŋa kò gba afɔ̀‐ɛ̀ gbɔ́? 32Tsí báàyí fee, àŋa nákó nyáa fɔ̀ ní ɔ̀nyà ŋa ní bɛ̀ɛ́ wá#áà?

À wà sá fú èrò#ɛ́, iŋɛ́ yèé tse#ɛ́, ɔ̀nyà kpó wà fɔ̀ ní Yòhánà ni agbáfɔ̀-Ɔ̀ɖáyé fɔ̀† ìɖéǹɖè ni. 33Ńbɛ̀ɛ́, à tédzú fɔ̀ fú Yèésù ní: Àŋa kò mà.

Tsí Yèésù ní: Ó sã̀! Ó ɖi, òŋu gbo, òŋu kàkó ɖíre ɛnɛ yèé fú òŋu ńkpá, tsí òŋu wà ń tse iŋɛ́ nyɛ̀ŋɛ̀ ŋa#á fú ŋa.

Currently Selected:

Mákò 11: ngl

Highlight

Copy