Lúkà 9

Yèésù bɛ ɔmatsɛ́‐ɛ̀ máàméèdzì ŋa#á lɔ ńǹlú ŋa wérí

(Màtéwò 10:5-15; Mákò 6:6-13)

1Ó ɖi nɔ́dzɔ́-kã̀, tsí Yèésù kpe ɔmatsɛ́‐ɛ̀ máàméèdzì ŋa#á kpìɖé, tsí ó fú ŋa ńkpá òŋu ɛ̀tsɛ ní ká wà ń lé edzò† ìrɔ́ ɔ̀kã̀lɔ́ɔ̀kã̀ kpó yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa, tsí ká wà bɔ àrɔ̃̀ ŋa gbo. 2Tsí ó bɛ̀ ŋá ní ká lɔ káà bɔ àkɔ̃̀rɔ̃̀ ŋa, tsí ká dzíkɔ̀ ní: Ìwèrè sɔ́má tã́, tsí Ɔ̀ɖáyé kó wáa dzoyè.

3Tsí ó wí fú ŋa ní: Bí à làkóò, ká máa banɛ́ iŋɛ́-kã̀ kpókpó. Ká máa banɛ́ ɔ̀kpá, ká máa banɛ́ àkpò, ká máa banɛ́ dzídzɛ òŋu owó. Ɔ̀nyà-kã̀ kó máa banɛ́ ìwɔ̀ra méèdzì. 4Ó ɖi, ńkpàtá ɔ̀kã̀lɔ́ɔ̀kã̀ yèé nákó gbà ŋá náàledzò#ɛ́, ká máa ǹɖe ńkpàtá#á títí fú ɔdzɔ́-ɖíǹɖe-ŋa ńǹlú#ɛ́. 5Tsí bí à tó ńǹlú-kã̀, tsí ɔ̀nyà-kã̀ kò gbà ŋá, ká ǹɖe bɛ̀, tsí ká gbákpá gbɛ́sɛ̀ náfɔ̀-ŋa, àtsùgbée ɛnɛ-ìlú ŋa#á ká mà ní ó tsɛdzɔ́-àŋa ká-ŋa ńnɛ̀ɛ́.

6Tsí ɔmatsɛ́-Yèésù† ŋa#á ǹɖe, tsí wà rɛ̃̀ ńǹlú ŋa wérí, tsí wà dzíkɔ̀ ɖíɖɔ̃̀ làkóò, tsí wà bɔ àkɔ̃̀rɔ̃̀ ŋa gbo wérí.

Èróɖì wà gbɔ́ ìdzã̀mà-Yèésù, ó ɖi, kò ɖɔ̃̀ fúu

(Màtéwò 14:1-12; Mákò 6:14-29)

7Náàsòkò nyɛ̀ŋɛ̀#ɛ́, Èróɖì† dzɛ́ ólú si nérè-Gàlìlé si. Tsí Yèésù òŋu ɔmatsɛ́‐ɛ̀ ŋa gbo wà ńtsɛ́ si. Tsí Èróɖì wà gbɔ́ ìdzã̀mà-iŋɛ́ yèé à wà tse ŋa#á kpó, tsí kò ma yèésí kó mú ńnɛ̀. Iŋɛ́ yèé tse#ɛ́, ɔ̀nyà kã̀ŋa wà fɔ̀ ní: Yèésù#ɛ́ ni Yòhánà† Awɛ̀fúnɛ ni, tsí ó sɛ̃̀ dzí ti náàŋírĩ-òkú ŋa wá náyé#ɛ́. 8Tsí ɔ̀nyà kã̀ŋa òŋu wà wí ní: Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́ ní sɛ̃̀ wá ró#ɛ́. Tsí olòmírɛ̃̀ kã̀ŋa òŋu wà fɔ̀ ní: Agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ ŋa-kã̀ ní sɛ̃̀ dzí ti náàŋírĩ-òkú ŋa wá náyé#ɛ́.

9Tsí Èróɖì ní: Òŋu ti fɔ̀, tsí à ɖéwo-Yòhánà wá fú òŋu ná. Tsí nɛ̀ɛ́ dzɛ́ ɛnɛ yèé à wà wíìnyɛ̀ ti nára‐ɛ̀ bɛ́ɛ̀#ɛ́ ná?

Tsí ó wà wo odzú‐ɛ̀ kó kã Yèésù#ɛ́ òŋu ká‐ɛ̀.

Yèésù sɛ̃ ɔ̀nyà ɛ̀gbɛ̀lɛ́ɛ̀gbɛ̀-kã̀ ńdzídzɛ

(Màtéwò 14:13-21; Mákò 6:30-44; Yòhánà 6:1-14)

10Adzítsɛ́-Yèésù† ŋa sɛ̃̀ bɔ̀ wá, tsí wáa fɔ iŋɛ́ yèé à tse ŋa#á kpó fú Yèésù. Tsí ó kpè ŋá lɔ nákpálà-kã̀, tsí òŋu-ŋa méèdzì sɔ̃́ŋú, à ǹɖe, tsí lɔ nérè-ìlú-Bètsàyìɖá. 11Tsí ɔ̀nyà-ɛ̀gbɛ̀lɛ́ɛ̀gbɛ̀ yèé wà bɛ̀#ɛ́ mà, tsí à tsɛ́ kì, tsí ròó bá lɔ. Tsí kíbí à káà tó#ɛ́, Yèésù kò lé ŋa. Ó gbà ŋá, tsí wà tsɛ̀kɔ́ fú ŋa ti nára-kíbí Ɔ̀ɖáyé nákó wáa dzoyè gbà#á, tsí ó wà bɔ àkɔ̃̀rɔ̃̀ ŋa gbo.

12Tsí ɔdzɔ́#ɛ́ ɖɛká, tsí ɔmatsɛ́-Yèésù† máàméèdzì ŋa#á ǹɖe, tsí sɔ́ tìmá‐ɛ̀, tsí wà fɔ̀ fúu ní: Kó wí fú èrò#ɛ́ ní ká bɔ́ lɔ, àtsùgbée ká nyáa lɔ ńǹtá-oko ŋa òŋu ìlú tsɛ́kɛ́ tsɛ́kɛ́-ŋà ŋa, tsí lɔ káà wo dzídzɛ, tsí ká dzɛ, tsí wo ìɖìsũ̀ gbo. Iŋɛ́ yèé tse#ɛ́, ńbí yèé àŋa wà si#ɛ́ kí taánù.

13Tsí ó fɔ̀ ní: Àŋa ká-ŋa ká fú ŋa ńdzídzɛ.

Tsí à fɔ̀ ní: Kpɔ̀ɔ́! Kpɔ̃́nɔ́ mɛ́ɛrú òŋu ɛdzã méèdzì gé ní wà fú àŋa#á. Ó wà wò ní àŋa kó lɔ káà ra dzídzɛ wá fú ɔ̀nyà ɛ̀gbɛ̀lɛ́ɛ̀gbɛ̀ yèé ŋa niì?

14Ɔnɔkɛ̃̀ɛ̃ yèé ŋa wà bɛ̀#ɛ́, à lɔ kíbí ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5.000) bɛ́. Tsí ó wí fú ɔmatsɛ́‐ɛ̀ ŋa#á ní: Ká kpérí ɔ̀nyà ŋa dzokó tsùm tsùm lɔ kíbí ìmarũ-ɔ̀nyà maá lé nógóòdzì ńǹɖì kã̀kã̀.

15Tsí ɔmatsɛ́‐ɛ̀ ŋa dzɛ́, tsí à tse tsí ɔ̀nyà ŋa dzokó kpó bɛ́ɛ̀ lɔ.

16Tsí ó ǹɖe, tsí kɛ́ kpɔ̃́nɔ́ mɛ́ɛrú òŋu ɛdzã méèdzì#ɛ́, tsí kɛ́ odzú fú ìgbèrí, tsí wúùre fú Ɔ̀ɖáyé fú dzídzɛ#ɛ́, tsí wà tsɛ́ ŋa, tsí wà ń bɔwɔ́-ɔmatsɛ́‐ɛ̀ ŋa ní ká ń kpɛ̃́ fú èrò#ɛ́. 17Tsí à dzɛ, tsí yó kpó títí ó bɔ̀. Tsí ɔmatsɛ́‐ɛ̀ ŋa se àbùbɔ̀ yèé bɔ̀ ńlɛ̀ ŋa#á, tsí ń ɖà nágbã̀ máàméèdzì, tsí à kɔ̃́ kpó.

Òkúta fɔ ɛnɛ yèé Yèésù dzɛ́#ɛ́ nódzú-ɔ̀nyà kpó

(Màtéwò 16:13-20; Mákò 8:27-30)

18Ó ɖi nɔ́dzɔ́-kã̀ ró, tsí Yèésù lɔ nákpálà-kã̀, tsí wà wúùre, tsí ɔmatsɛ́‐ɛ̀ ŋa gbo wà bɛ̀ si. Tsí ó nyí, tsí wà bèrè ŋá ní: Afɔ̀ mɛ̀ɛ́ èrò#ɛ́ wà wí ti nára-òŋu ná?

19Tsí à wà dzɔ́ŋù fúu ní: Ɔ̀nyà kã̀ŋa ní ó dzɛ́ Yòhánà† Awɛ̀fúnɛ. Ɔ̀nyà kã̀ŋa gbo ní ó dzɛ́ Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́. Tsí ɔ̀nyà kùbɔ̀ ŋa gbo wà fɔ̀ ró ní agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ òmírɛ̃̀-kã̀ ní ó dzɛ́, tsí sɛ̃̀ dzí ti náàŋírĩ-òkú ŋa wá náyé#ɛ́.

20Tsí Yèésù ní: Tsí nódzú tàŋa òŋu fe, nɛ̀ɛ́ òŋu dzɛ́?

Tsí Òkúta tsí arũ, tsí dzɔ́ŋù fúu ní: Òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á.

21Tsí Yèésù kɔ̀ fú ŋa ní: Tsɛ́m! Ɔ̀kã̀-ŋa-kã̀ kpókpó kó máa fɔ̀ɔ́ fú ɔ̀nyà-kã̀ oo. 22Ó ɖi, ó wà ní òŋu, Ɛnɛ yèé ɔ̀nyà bí#ɛ́†, òŋu kó réré kpíkpɔ̀, tsí onùgbó-ìlú ŋa òŋu onùgbó-atsɛbɔ-Ɔ̀ɖáyé† ŋa má nára-akɔ́nɛ nɛ́kpa-Ɔ̀ɖáyé† ŋa ká kɔ afɔ̀-òŋu, tsí sɔ́ òŋu fú ikú, tsí ká kpa òŋu, tsí nɔ́dzɔ́-ɛ̀kɛ́ɛta‐ɛ̀ òŋu nákó sɛ̃̀ dzí ti náàŋírĩ-òkú ŋa wá náyé.

23Tsí ó wà wí fú ɔ̀nyà kpó ní: Bí ɔ̀nyà-kã̀ wà wo kó tɛ̀ náànyì-òŋu, ɛnɛ nyɛ̀ŋɛ̀ kó máa nyíwo ara‐ɛ̀. Kó kɛ́ egi-ìɖáàgàlàdzà†‐ɛ̀ rù nɔ́dzɔ́ kɔ́dzɔ́, tsí kó tɛ̀ náànyì-òŋu. 24Ó ɖi fee, ɛnɛ yèé wà wò ní òŋu kó gba ara-òŋu là, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé mú ikú‐ɛ̀ tà náàtsùgbé-òŋu#ɛ́, ɛnɛ nyɛ̀ŋɛ̀ nákó rí ɔlà. 25Bí ɔ̀nyà-kã̀ ɖìgírí títí iŋɛ́-ayé gbaŋgba ŋa#á kpó dzɛ́ tɛ̀ɛ̀, tsí òŋu ká‐ɛ̀ tsɛ̀rá nàmí ó nɔ̀ fe, èrè mɛ̀ɛ́ wà ńnɛ̀ fúu?

26Ó ɖi, bí ɔ̀nyà-kã̀ wà, tsí iŋɛ́-òŋu òŋu afɔ̀-òŋu ŋa gbo wà tsanɔ́ fúu, òŋu, Ɛnɛ yèé ɔ̀nyà bí#ɛ́, nɔ́dzɔ́ yèé òŋu nákó ti nɔ́ɔ̀rɔ̃ wá#á, iŋɛ́-ɛnɛ nyɛ̀ŋɛ̀ nákó tsanɔ́ fú òŋu gbo. Nɔ́dzɔ́ nyɛ̀ŋɛ̀#ɛ́, òŋu nákó wá òŋu iyì-adzítsɛ́-ɔ̀rɔ̃† ŋa, tsí ɔ̀nyà kpó nákó rí iyì-Boba-òŋu òŋu iyì tòŋu ká-òŋu gbo. 27Òŋu wà wí fú ŋa ní fee, ɔ̀nyà kã̀ŋa wà náàŋírĩ-ŋa bí#ɛ́, à kàkó kú tã́ná à nákó rí kíbí Ɔ̀ɖáyé wà dzoyè gbà#á.

Ìwànwà-Yèésù kpàrɔ̀ nódzú-ɔmatsɛ́‐ɛ̀ ŋa

(Màtéwò 17:1-13; Mákò 9:2-13)

28Kíbí Yèésù wí bɛ́ɛ̀ tã́#á, ó ɖi nɔ́dzɔ́-ɛ̀kɛ́ɛdzɔ‐ɛ̀, tsí ó gbɛ̃́ Òkúta òŋu Yòhánà† má nára-Yàkúbù gbo, tsí à lɔ ńǹtá-òkè-kã̀, tsí ká lɔ káà wúùre. 29Ńǹwèrè yèé ó wà wúùre#ɛ́, ìwànwà-odzú‐ɛ̀ kpàrɔ̀ gbòkã́, tsí èbò-ara‐ɛ̀ gbo wà fṹ pémpém, tsí wà kɔ nyɛ̀nyɛ̀nyɛ̀. 30Gbòkã́#á, ɔ̀nyà méèdzì kã̀ŋa ɖóro gbèé si, tsí wà wíìnyɛ̀ báa. Mɔ̀ɔ́sè† òŋu Èlíyà† ni. 31Kíbí à mú ara-ŋa ŋa Yèésù#ɛ́, iyì-Ɔ̀ɖáyé wà ńǹtá-ŋa si, tsí à wà wíìnyɛ̀ báa ti nára-kíbí ó bòkó lɔ ńYèrúsàlɛ́mì, tsí kó káà tse tsí ètò-Ɔ̀ɖáyé kó tsɛ, tsí kó kú#ɛ́. 32Ńǹwèrè nyɛ̀ŋɛ̀#ɛ́, orũ rá Òkúta òŋu enìkéèdzì‐ɛ̀ ŋa lɔ si. Tsí à dzí, tsí odzú-ŋa má, tsí à rí ní iyì-Ɔ̀ɖáyé wà ńǹtá-Yèésù si, tsí à rí ɛnɛ méèdzì yèé ɖóro gbèé si ŋa#á gbo. 33Kíbí ɛnɛ nyɛ̀ŋɛ̀ ŋa#á bòkó ǹɖe ńɖɔ̀‐ɛ̀#ɛ́, Òkúta wà wí fúu ní: Akɔ́nɛ, ó sã̀ héŋú ní àwa gbo, àa wà ńbíbɛ́ si. Báàyí#ɛ́, àa kó kɔ́ awúrɛ́ mɛ́ɛta fú ŋɛ́. Ɔ̀kã̀ nákó dzɛ́ tɛ̀ɛ, tsí ɔ̀kã̀ gbo nákó dzɛ́ ti Mɔ̀ɔ́sè, tsí ɛ̀kɛ́ɛta nákó dzɛ́ ti Èlíyà.

Òkúta kò ma iŋɛ́ yèé ó wà wí#ɛ́, ó bɔ́ ti nárũ‐ɛ̀ fáyì gé ni.

34Ńǹwèrè yèé ó wà wíìnyɛ̀ bɛ́ɛ̀#ɛ́, irì-kã̀ ɖí, tsí bò ŋá málɛ̀ kpó gbòkã́. Kíbí irì#ɛ́ wà ɖí bò ŋá làkóò bɛ́ɛ̀#ɛ́, odzo tse ɔmatsɛ́ ŋa#á. 35Tsí oŋù-kã̀ ɖɔ̃́ ti ńnɔ́-irì#ɛ́, tsí wà fɔ̀ fú ŋa ní: Ɛnɛ yèé bɛ́#ɛ́, Ɔma bíbí-mi ni, òŋu ní ǹ tsã̀#á. È rɛ̃tígbè‐ɛ̀.

36Kíbí oŋù#ɛ́ ɖɔ̃́ tã́#á, Yèésù òŋu níìkã̀ gé ní ɔmatsɛ́‐ɛ̀ ŋa wà rí#ɛ́. Tsí iŋɛ́ yèé à rí#ɛ́, à tsikó kpíríkpírí, à kò wíi fú ɔ̀nyà-kã̀ kpókpó ti nɔ́dzɔ́ nyɛ̀ŋɛ̀ títí wáa fú àsòkò yèé Yèésù kò wà ńǹtalɛ̀#ɛ́ bá ŋa ró#ɛ́.

Yèésù lé edzò-kã̀ sɛ̃̀ náànyì-maɖé-kã̀

(Màtéwò 17:14-21; Mákò 9:14-29)

37Tsí ó ɖi ńlɛ̀ má‐ɛ̀, tsí Yèésù òŋu ɔmatsɛ́‐ɛ̀ mɛ́ɛta ŋa#á tì nóòkè#ɛ́ wá, tsí ɔ̀nyà ŋa tsɛ́ kì, tsí wáa lɔ káà kpàɖé‐ɛ̀. 38Náàŋírĩ-ŋa#á, ɔ̀nyà-kã̀ wà ɖúgbe ní: Akɔ́nɛ, ǹ tsìkálɛ̀ fɛ́ɛ, rí ɔma-mi ɔnɔkɛ̃̀ɛ̃ yèé fú mi ɖé! Ɔma ɔ̀kã̀ntso gé ní ó dzɛ́ fú mi#ɛ́. 39Tsí edzò†-kã̀ wà ɖɔ́kpɔ fúu. Bí iŋɛ́#ɛ́ wá fúu gé, náa gírí. Tsí bí ó gírí, náa múu ɖúgbe kũkũ gbòkã́, tsí náa wà mìí kpó kpàkpàkpà, tsí arũ‐ɛ̀ gbo náa wà wó fùtùfútù. Tsí kà kɔ̀ɔ́ dzɔ̀ɔ́ bɛ́ɛ̀ gé. Náa múu réré gìɖì héŋú tã́ná kó kɔ̀ɔ́ dzɔ̀ɔ́. 40Tsí òŋu wáa tsìkálɛ̀ fú ɔmatsɛ́‐ɛ̀ ŋa ní ká lé edzò#ɛ́ sɛ̃̀ náànyì‐ɛ̀, tsí à kò nyáa tóòsũ̀‐ɛ̀.

41Tsí Yèésù tsí arũ, tsí ní: Ɛ̀ŋɛ, ɔma-ìsɛ̃̀ɛ̃́ ŋa, ɔ̀nyà-íbàɖí ŋa yèé è dzɛ́ si#ɛ́, è kè nɛ́ àkaralé nɛ́! Ìwèrè mɛ́ɛló màa tse bá ŋɛ́? Gbà mɛ́ɛló màa módzúgbó, tsí wà gba iŋɛ́ yèé è wà tse ŋa#á ná?

Tsí ó nyí, tsí wà wí fú boba-maɖé#ɛ́ ní: Kó gbɛ̃́ ɔma‐ɛ̀ wá fú òŋu.

42Kíbí maɖé#ɛ́ sɔ́ bàa ńɖɔ̀‐ɛ̀ gé#ɛ́, edzò yèé wà ɖɔ́kpɔ fúu#ɛ́ sɛ̃̀ múu tsɔlɛ̀ ró, tsí múu nyílɛ̀ kũkũ, tsí wà mìí kpó kpàkpàkpà. Ńbɛ̀ɛ́, Yèésù gbãdzú fefe bá edzò#ɛ́ ní: Kóyá! Kó sɛ̃̀ náànyì-maɖé#ɛ́!

Gbòkã́#á, edzò#ɛ́ sɛ̃̀ náànyì‐ɛ̀, tsí ara‐ɛ̀ tù dzùù. Tsí ó gbɛ̃́ɛ̃ bɔwɔ́-boba‐ɛ̀. 43Tsí ó mù ŋá kpó, iŋɛ́ yèé tse#ɛ́, à rí ní ikpá-Ɔ̀ɖáyé lákṹ ìɖéǹɖè.

Yèésù wà fɔ̀ ró ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé

(Màtéwò 17:22-23; Mákò 9:30-32)

Ńbɛ̀ɛ́, iŋɛ́ yèé ŋa kpó Yèésù wà tse#ɛ́ wà mu ɔ̀nyà ŋa. Ńǹwèrè nyɛ̀ŋɛ̀#ɛ́, ó nyí, tsí wà wí fú ɔmatsɛ́‐ɛ̀ ŋa ní: 44Òŋu bòkó wí afɔ̀-kã̀ fú ŋa, ká múu si néwo si rere. À nákó mú òŋu, Ɛnɛ yèé ɔ̀nyà bí#ɛ́†, tsí à nákó mú òŋu bɔwɔ́-ɔ̀nyà ŋa, tsí à nákó kpa òŋu nóòkú.

45Ó ɖi, à kò wà gbɔ́ òkpì-afɔ̀#ɛ́. Ó wà kíbí iŋɛ́-kã̀ kpa ìsérè si fú ŋa ní ká máa rírã rí afɔ̀#ɛ́ ni. Tsí à wà sá gbo, tsí à kò nyáa bèrèé nóòkpì‐ɛ̀.

Nɛ̀ɛ́ dzɛ́ ɔ̀gá náàŋírĩ-ɔmatsɛ́-Yèésù ŋa?

(Màtéwò 18:1-5; Mákò 9:33-37)

46Ɔmatsɛ́-Yèésù† ŋa wà dzinya ara-ŋa, tsí ká ma ɛnɛ yèé nákó dzɛ́ ɔ̀gá náàŋírĩ-ŋa#á.

47Kíbí Yèésù ti ma ìsérè yèé wà néwo-ŋa#á, ó kɛ́ maɖé tsígíɖí-kã̀, tsí ń ɖóro nábɛ́‐ɛ̀. 48Tsí ó ní: Bí ìwɔ-kã̀, ò gba ɔma tsígíɖí yèé bɛ́ náàtsùgbé-èmi, èmi ká-mi ní ò gbà#á. Tsí ìwɔ-kã̀ yèé gbà mí#ɛ́, ò gba ɛnɛ yèé bɛ̀ mí wá#á gbo. Ó ɖi, ɛnɛ yèé sɔ ara‐ɛ̀ ɖi tsígíɖí náàŋírĩ-ŋɛ́#ɛ́, ɛnɛ nyɛ̀ŋɛ̀ ní dzɛ́ ɔ̀gá fú ɛ̀ŋɛ kpó#ɛ́.

Bí ɔ̀nyà-kã̀ kò wà kɔ̀ ŋá, ɛnɛ nyɛ̀ŋɛ̀ dzɛ́ tiŋa si ni

(Mákò 9:38-41)

49Tsí Yòhánà† tsí arũ, tsí wà wí fúu ní: Akɔ́nɛ, àŋa rí ɔ̀nyà-kã̀, tsí ó wà lo ɛ̀tsɛ‐ɛ̀, tsí wà ń lé edzò† ŋa sɛ̃̀ náànyì-ɔ̀nyà ŋa. Tsí àŋa kɔ̀ fúu ní kó máa tse bɛ́ɛ̀ ró, iŋɛ́ yèé tse#ɛ́, kò wà tɛ̀ náànyì‐ɛ̀ bá àŋa.

50Tsí Yèésù wà wí fúu ní: Ká máa kɔ̀ɔ́ fúu. Ó ɖi, bí ɔ̀nyà-kã̀ kò wà kɔ̀ ŋá, ɛnɛ nyɛ̀ŋɛ̀ dzɛ́ tiŋa si ni.

Ìlú-oko-kã̀ ńSàmàríyà kò gba Yèésù náàledzò

51Ìwèrè wà sɔ́má, tsí Ɔ̀ɖáyé kó kɛ́ Yèésù lɔ nɔ́ɔ̀rɔ̃. Tsí ó ɖi nɔ́dzɔ́-kã̀, tsí ó tã́ ńnɔ́-Yèésù kpó ní òŋu kó lɔ ńYèrúsàlɛ́mì gé ni. 52Tsí ó bɛ ikɔ̀ tsúwádzú lɔ. Ɛnɛ yèé ó bɛ̀ ŋa#á, à ǹɖe, tsí lɔ ńǹlú-oko-kã̀ ńSàmàríyà, tsí à lɔ káà bere ìɖìsɔ̀-ŋa si. 53Tsí ɛnɛ-ìlú ŋa#á kɔ̀. À kò wà wo ká gbà ŋá náàledzò, iŋɛ́ yèé tse#ɛ́, à wáa làkóò ńYèrúsàlɛ́mì ni.

54Kíbí Yòhánà† òŋu Yàkúbù méèdzì gbɔ́ bɛ́ɛ̀#ɛ́, à ní: Ɔ̀gá, ó dzɔdzú‐ɛ̀ɛ ní ká bèrè, tsí iná kó ti nɔ́ɔ̀rɔ̃, tsí kó wáa ra ŋá kpóò?

55Ńbɛ̀ɛ́, ó nyí wò ŋá, tsí ó lé ŋa nóòkpì-afɔ̀#ɛ́ ní kó kũ nárũ-ŋa.#9:55 Náànyì-kíbí à fɔ̀ ńbíbɛ́ ní kó kũ nárũ-ŋa#á, ìwé kã̀ŋa tɔ́ mú afɔ̀-kã̀ máa ró. Afɔ̀#ɛ́ ní wà dzɛ́ ní: “Tsí ó wà fɔ̀ ní: Ɛ̀ŋɛ òŋu, è kè ma ìsérè yèé wà ńnɔ́-ŋɛ́#ɛ́ gìɖì nɛ́! Ó ɖi fee, òŋu, Ɛnɛ yèé ɔ̀nyà bí#ɛ́, òŋu kò wá ńǹtalɛ̀ bí, tsí òŋu kó wáa kpa ɔ̀nyà ŋa nóòkú, òŋu wá, tsí òŋu kó wáa gbà ŋá là ni.”

56Tsí à ǹɖe, tsí lɔ ńǹlú-òmírɛ̃̀.

Nɛ̀ɛ́ dzɔ kó tɛ̀ náànyì-Yèésù?

(Màtéwò 8:18-22)

57Yèésù òŋu ɔmatsɛ́‐ɛ̀ ŋa, à wà nɔ́ɔ̀nà si làkóò, tsí ɔ̀nyà-kã̀ wà wí fú Yèésù ní: Ńǹɖì ɔ̀kã̀lɔ́ɔ̀kã̀ kpó yèé nákó lɔ#ɛ́, òŋu nákó wà tɛ̀ náànyì‐ɛ̀.

58Tsí Yèésù dzɔ́ŋù fúu ní: Kɔ̀lɔ̀kɔ̀lɔ̀ ŋa nɛ́ ìɖìsũ̀, tsí ɛyɛ ŋa gbo nɛ́ ilé. Ó ɖi òŋu, Ɛnɛ yèé ɔ̀nyà bí#ɛ́†, òŋu kò nɛ́ ìɖì-ńbí òŋu kó mú éwo gbè#ɛ́.

59Tsí ó nyí, tsí wà wí fú olòmírɛ̃̀ ní: Kó tɛ̀ náànyì-òŋu.

Tsí ɛnɛ nyɛ̀ŋɛ̀ dzɔ́ŋù ní: Òŋu tsìkálɛ̀, kó fú òŋu nɔ́ɔ̀nà, tsí òŋu kó lɔ káà ri boba-òŋu tã́ná.

60Tsí Yèésù wà fɔ̀ fúu ní: Kó kɔ òkú ŋa dzɔ̀ɔ́ fú òkú ŋa, tsí ká ri ara-ŋa. Ó ɖi, òŋu, kó lɔ káà dzíkɔ̀ fú ɔ̀nyà ŋa ní ìwèrè sɔ́má tã́, tsí Ɔ̀ɖáyé kó dzoyè.

61Tsí ɔ̀nyà-kã̀ gbo ní: Ɔ̀gá! Òŋu gbo, òŋu kó tɛ̀ náànyì‐ɛ̀. Ó ɖi, kó fú òŋu nɔ́ɔ̀nà, tsí òŋu kó lɔ káà kã́rã́ tòŋu ŋa tã́ná.

62Tsí Yèésù wà wí fúu ní: À kà wà tsáko làkóò, tsí wà nyí wo ànyì. Ó ɖi, ìwɔ yèé wà tsáko, tsí wà nyí wo ànyì#ɛ́, Ɔ̀ɖáyé kàkó nyáa rí ìɖì fɛ́ɛ, tsí o tsitsɛ́-oyè‐ɛ̀.

Currently Selected:

Lúkà 9: ngl

Highlight

Copy