Lúkà 16

Yèésù ní ká dziná si fú owó lílò

1Tsí Yèésù wà wí fú ɔmatsɛ́‐ɛ̀ ŋa ró ní: Olówó-kã̀ wà, tsí ó gba àtsìtsɛ́-kã̀ si. Àtsìtsɛ́#ɛ́ ní náa rí ìtá-iŋɛ́‐ɛ̀ ŋa#á. Tsí à wáa wí fú olówó#ɛ́ ní: Bɛ́ɛ̀ ní àtsìtsɛ́‐ɛ̀ wà bàdzɛ́ owó‐ɛ̀#ɛ́.

2Tsí olówó#ɛ́ kpèé, tsí wà bèrèé ní: Afɔ̀ mɛ̀ɛ́ ŋa òŋu wà gbɔ́ ti nára‐ɛ̀ ńnɛ̀ɛ́ ná? Kíbí ó tsitsɛ́ ŋa#á gbà#á, kó sére-iŋɛ́ yèé bɔ̀ ŋa#á fú òŋu! Ó ɖi, kàkó nyáa rí ìtá-iŋɛ́-òŋu ŋa fú òŋu ró.

3Tsí àtsìtsɛ́#ɛ́ lɔ ńǹsérè, tsí ó ní: Bí òŋu kó tse fáà báàyí, kíbí ɔ̀gá-òŋu bòkó lé òŋu ńtsɛ́#ɛ́? Òŋu kò nɛ́ àmí, tsí òŋu kó nyáa tsáko. Nákó tsanɔ́ fú òŋu gbo ní òŋu kó lɔ, tsí wà bere iŋɛ́ nɔ́ɔ̀nà wérí. 4Tsí ó ní: Báàyí#ɛ́, òŋu rí iŋɛ́ yèé òŋu nákó tse tsí bí itsɛ́ wáa bàdzɛ́ fú òŋu, ni ɔ̀nyà ŋa ká gba òŋu si ńlé-ŋa#á.

5Tsí ó ǹɖe, tsí kpe ɛnɛ yèé ŋa dzɛŋɛ̀ nɔ́wɔ́-ɔ̀gá‐ɛ̀#ɛ́ wá. Ó kpè ŋá wá kã̀kã̀. Tsí ó wà bere ɛnɛ-àtsɛ̃̀tsɛ̃̀ ní: Ɛŋɛ̀-egbèló ó dzɛ nɔ́wɔ́-ɔ̀gá-òŋu?

6Tsí ɛnɛ nyɛ̀ŋɛ̀ ní: Àɖɛ̃́-ìtsà ɔgɔ́ɔrú.

Tsí àtsìtsɛ́#ɛ́ fɔ̀ fúu ní: Kóyá, kó dzokó, tsí kó gba ìwé-ɛŋɛ̀#ɛ́, tsí kó kɔ si ńǹtá‐ɛ̀ ní ɛŋɛ̀-àɖɛ̃́-ìtsà maá lé nógóòdzì ní òŋu dzɛ#ɛ́!

7Tsí ó wà bere olòmírɛ̃̀-kã̀ gbo ní: Ɛŋɛ̀-egbèló òŋu gbo dzɛ nɔ́wɔ́-ɔ̀gá-òŋu?

Tsí ɛnɛ nyɛ̀ŋɛ̀ gbo ní: Ɛŋɛ̀-bàfó kotokú ɔgɔ́ɔrú ní òŋu dzɛ nɔ́wɔ́‐ɛ̀#ɛ́.

Tsí ó wí fú òŋu gbo ní: Kó kɛ́ ìwé-ɛŋɛ̀#ɛ́, tsí kó kɔ si ńǹtá‐ɛ̀ ní ɛŋɛ̀-bàfó kotokú ɔgɔ́ɔrɛ̃ ní òŋu dzɛ#ɛ́!

8Kíbí ó dzɛ́ gìɖì ní àtsìtsɛ́#ɛ́ kò tse òtítɔ́#ɛ́, ɔ̀gá‐ɛ̀ sì nyɛ̀ɛ́ ńdzídziná yèé ó tse ńbɛ̀#ɛ́. Ó ɖi, ɛnɛ yèé ŋa náa wà wo iŋɛ́-ìtalɛ̀ bí ŋa gé#ɛ́, àŋa òŋu, à náa dziná ńŋɛ́ tsítse bá ara-ŋà ŋa láre ɛnɛ yèé ŋa wà wo iŋɛ́-Ɔ̀ɖáyé ŋa#á.

9Tsí Yèésù ní: Èmi, ǹ wà wí fú ŋɛ́ ní fee, iŋɛ́-owó ŋa náa rúnɛ ni. Ó ɖi, è sì kɛ́ ŋa, tsí ń tse ore fú ɔ̀nyà ŋa, àtsùgbée e nyáa ɖídza bá ŋa. Tsí ńǹwèrè yèé iŋɛ́-owó ŋa#á kò sí ró#ɛ́, ni ká gbà ŋɛ́ si ńǹɖìgbé-àrìtã́. 10Ó ɖi, ɛnɛ yèé tse òtítɔ́ ńŋɛ́ tsígíɖí#ɛ́, náa tse òtítɔ́ ńŋɛ́ lákṹ gbo, tsí ɛnɛ yèé kò tse òtítɔ́ ńŋɛ́ tsígíɖí#ɛ́, kà tse òtítɔ́ ńŋɛ́ lákṹ gbo. 11Bí à kɛ́ iŋɛ́-owó ti ìtalɛ̀ bí ŋa fú ŋɛ́, tsí è kè tse òtítɔ́ ńnɛ̀, nɛ̀ɛ́ nákó kɛ́ iŋɛ́ yèé fɛ́ ìɖéǹɖè#ɛ́ fú ŋɛ́? 12Tsí bí è kè tse òtítɔ́ ńŋɛ́ yèé dzɛ́ ti olòmírɛ̃̀#ɛ́, nɛ̀ɛ́ nákó kɛ́ iŋɛ́ yèé dzɛ́ ti ɛ̀ŋɛ ká-ŋɛ́#ɛ́, tsí ń fú ŋɛ́?

13Arú-kã̀ kpókpó kàkó nyáa dzɛ́ arú fú ɔ̀gá méèdzì náàrìkã̀ntso. Bí ó dzɛ́ bɛ́ɛ̀, arú#ɛ́ nákó dzáfɔ̀-ɔ̀gá‐ɛ̀-kã̀, tsí tamá‐ɛ̀ lárè. Kàkó mú èkéèdzì‐ɛ̀ kpe iŋɛ́-kã̀ gìɖì. Nákó nyàá kãdzú si gé ni. Ó ɖi, ò kàkó nyáa dzɛ́ arú fú Ɔ̀ɖáyé, tsí dzɛ́ arú fú owó gbo náàrìkã̀ntso.

Yèésù wà bá ɔma-ɛgbɛ́-Fàrísì ŋa fɔ̀

(Màtéwò 11:12-13; Mákò 5:31-32)

14Ńǹwèrè nyɛ̀ŋɛ̀#ɛ́, ɔma-ɛgbɛ́-Fàrísì† kã̀ŋa gbo wà bɛ̀, tsí à wà gbɔ́ afɔ̀ yèé Yèésù wà fɔ̀#ɛ́ kpó. Ɔma-ɛgbɛ́-Fàrísì ŋa#á, odzú-ŋa náa gù si ńǹtá-owó tó bɛ́ɛ̀, tsí à wà rã́ã̀rĩ́ fúu.

15Tsí ó wà rɔ́ fú ŋa ní: Àŋa òŋu, à náa wà tse kíbí atsòtítɔ́ ŋa bɛ́ nódzú-ɔ̀nyà ŋa. Ó ɖi, Ɔ̀ɖáyé òŋu sì ma iŋɛ́ yèé wà ńnɔ́-ŋa#á. Tsí iŋɛ́ yèé dzɛ́ iŋɛ́-ìɖéǹɖè nódzú-ɔ̀nyà ŋa#á, iŋɛ́ nyɛ̀ŋɛ̀#ɛ́ náa tsìíra nódzú-Ɔ̀ɖáyé òŋu ni.

16Tã́ná àsòkò kó tó, tsí Yòhánà† kó wá#á, ìwé-ɛkpa-Mɔ̀ɔ́sè† òŋu ìwé-agbáfɔ̀-Ɔ̀ɖáyé fɔ̀† ŋa ní wà si fú ɔ̀nyà ŋa#á. Ó ɖi, ti títí ńǹwèrè yèé Yòhánà wá#á, à ti wà dzíkɔ̀ fúnɛ ní Ɔ̀ɖáyé wà dzoyè ná. Tsí ɛnɛ kṹnukṹ wà ɖìgírí kũkũ ní òŋu kó wɔ̀ ńbí Ɔ̀ɖáyé wà dzoyè#ɛ́ ńkpá. 17Bí ó dzɛ́ gìɖì ní ìgbèrí òŋu ilɛ̀ nákó wáa nɔ̀ ǹɖe#ɛ́, iŋɛ́ tĩ́fĩ́rĩ́-kã̀ kpókpó gìɖì kàkó ɖí bɔ̀ nɛ́kpa-Ɔ̀ɖáyé òŋu.

18Ɔ̀nyà ɔ̀kã̀lɔ́ɔ̀kã̀ yèé nákó kɔ aya‐ɛ̀, tsí káà nɛ́ aya òmírɛ̃̀#ɛ́, ɛnɛ nyɛ̀ŋɛ̀ gbaya ni. Tsí bí ɔ̀nyà-kã̀ gbo sì nɛ́ ɔnɔbɛ̃̀ɛ̃ yèé ɔkɔ‐ɛ̀ kɔ̀#ɛ́, ɛnɛ nyɛ̀ŋɛ̀ gbaya ni.

Yèésù kpòwe-kã̀ ti nára-Làsárò òŋu olówó-kã̀

19Tsí Yèésù tɔ́ wà fɔ̀ fú ŋa ró ní: Olówó-kã̀ wà, tsí náa wà wɔ ìwɔ̀ra-àfɛ́ŋú ŋa, tsí wà bo kenté si ńǹtá‐ɛ̀. Dzídzɛ ɖíɖɔ̃̀ ŋa ní náa dzɛ nɔ́dzɔ́ kɔ́dzɔ́#ɛ́. 20Tsí adzìyàkú-kã̀ gbo wà. À náa kpèé ní Làsárò. Làsárò#ɛ́, ara‐ɛ̀ gbo dzɛ́ odzudzu kpó. Tsí à kɛ́ɛ wáa si náànkpã̀nàkũ̀-olówó#ɛ́. 21Tsí náa wùú ní òŋu má nyáa tó ńɖɔ̀‐ɛ̀, tsí dzídzɛ yèé ŋa wà bù ɖà ńlɛ̀ nábɛ́-kpɔ̃rɔ̃‐ɛ̀#ɛ́, òŋu má wà se ŋá dzɛ. Yèé yɔ gìɖì#ɛ́, adzá ŋa gbo náa wáa lá odzú-odzudzu‐ɛ̀ ŋa#á.

22Tsí iŋɛ́ ŋa#á lɔ bɛ́ɛ̀, tsí adzìyàkú#ɛ́ wáa kú. Tsí adzítsɛ́-ɔ̀rɔ̃† ŋa wáa kɛ́ɛ lɔ ńɖi-Ɔ̀ɖáyé gbe gbágbóǹgbàgbò‐ɛ̀ Àbàràhámì†. Tsí olówó#ɛ́ gbo wáa kú, tsí à kɛ́ òŋu gbo káà rì. 23Kíbí olówó#ɛ́ káà tó ńlé-ikú#ɛ́, ó dzì ńǹréré kpíkpɔ̀ bɛ̀. Tsí ó wáa kɛ́ odzú lɔ ńǹgbèrí, tsí ó rí Àbàràhámì sã́ŋú sã́ŋú sã́ŋú, tsí Làsárò gbo wà néèkíyà‐ɛ̀ si. 24Tsí ó tsí arũ, tsí ɖúgbe kpe Àbàràhámì ní: Boba! Rí ànyínɔ́ fú mi ɖé! Ó ɖi, kó bɛ Làsárò wá, tsí kó wáa mú arũ-ɔmalɔ́wɔ́‐ɛ̀-kã̀ bɔ̀ nómi, tsí ń ta si nárũ-òŋu, tsí igɛ̀-òŋu kó tù ɖé! Ó ɖi, òŋu wà réré ńná ńbɛ̀ kpíkpɔ̀ gbegbé.

25Tsí Àbàràhámì ní: Ɔma-mi! Ò kò tédzú ní ò ti dzayé kpíkpɔ̀ kíbí ò wà náàyɛ̀ si#ɛ́, tsí Làsárò òŋu tse òfò kpíkpɔ̀ɔ̀? Ó ɖi báàyí#ɛ́, à wà tu ɛ̀ɖɔ̃̀ fú Làsárò ni. Ó ɖi, ìwɔ òŋu, ò dzì ńǹréré ńnɛ̀ɛ́. 26Tsí yèé yɔ#ɛ́, Ɔ̀ɖáyé mú ifò lákṹ gbògòlò-kã̀ yèé kò nɛ́ ìkpàkũ#ɛ́ ɖá àŋírĩ-àwa-ɛ̀ɛ méèdzì. Ńnɛ̀ ní bí ɔ̀nyà-kã̀ wà ńɖi-wa bí, tsí wà wo kó wá ńɖi-ŋɛ́, kàkó nyáa wá#á. Tsí ɔ̀nyà-kã̀ gbo kàkó nyáa ti ńɖi-ŋɛ́ bɛ̀, tsí wá ńɖi-tiwa gbo bí.

27Tsí olówó#ɛ́ ní: Boba, bí ó dzɛ́ bɛ́ɛ̀ ná, òŋu wà ńǹkálɛ̀ fúu, kó bɛ Làsárò lɔ ńkpàtá-boba-òŋu ɖé. 28Ó bɔ ìnàbí-òŋu ŋa mɛ́ɛrú si bɛ̀. Ó ɖi, kó bɛ̀ɛ́ lɔ, tsí kó lɔ káà kã́rã́-ŋa gbòkã́, tsí àŋa gbo ká máa wáa wá ńǹɖì-ìréré yèé bɛ́.

29Tsí Àbàràhámì wà dzɔ́ŋù fúu ní: Ìwé-Mɔ̀ɔ́sè òŋu ìwé-agbáfɔ̀-Ɔ̀ɖáyé fɔ̀† ŋa ti wà si fú ŋa ná. Ó ɖi, ká rɛ̃tígbè-afɔ̀ yèé wà ńnɔ́-ìwé nyɛ̀ŋɛ̀ ŋa#á.

30Tsí olówó#ɛ́ ní: Òò, boba, nyɛ̀ŋɛ̀ kò tó nɛ́! Ó ɖi, bí ɔ̀nyà-kã̀ ti náàŋírĩ-òkú ŋa, tsí lɔ káà bá ŋa fee, à nákó nyíìlò kpaɖà.

31Tsí Àbàràhámì wà wí fúu ní: Bí à kò rɛ̃tígbè-afɔ̀ yèé wà ńǹwé-Mɔ̀ɔ́sè òŋu ńǹwé-agbáfɔ̀-Ɔ̀ɖáyé fɔ̀ ŋa#á, bɛ́ɛ̀ ké ní bí ɔ̀nyà-kã̀ gìɖì gbo dzí ti náàŋírĩ-òkú ŋa wá náyé#ɛ́, à kàkó rɛ̃tígbè‐ɛ̀#ɛ́.

Currently Selected:

Lúkà 16: ngl

Highlight

Copy