Lúkà 14

Yèésù bɔ àkɔ̃̀rɔ̃̀-kã̀ nɔ́dzɔ́-ìmíra

1Ó ɖi nɔ́dzɔ́-ìmíra†-kã̀ ró, tsí onùgbó-ɔma-ɛgbɛ́-Fàrísì†-kã̀ kpe Yèésù ní kó wáa dzɛŋɛ́ ńɖɔ̀-òŋu. Tsí ó lɔ. Tsí ɛnɛ yèé wà bɛ̀ si ŋa#á, à tadzú máa si, tsí ká rí káyí ní nákó tse iŋɛ́-kã̀ séè? 2Tsí àkɔ̃̀rɔ̃̀-kã̀ gbo wà bɛ̀. Ara‐ɛ̀ wú kpó, tsí ó ɖóro ńwádzú‐ɛ̀ si. 3Tsí Yèésù ǹɖe, tsí wà bere akɔ́nɛ nɛ́kpa-Ɔ̀ɖáyé† ŋa òŋu ɔma-ɛgbɛ́-Fàrísì ŋa#á ní: Ɛkpa-Ɔ̀ɖáyé† fú ɔ̀nà ní ká bɔ àkɔ̃̀rɔ̃̀ nɔ́dzɔ́-ìmíraà nàmí kò fú ɔ̀nà?

4Tsí à kpa húwíí kpó. Tsí Yèésù fa àkɔ̃̀rɔ̃̀#ɛ́ wá nábɛ́‐ɛ̀, tsí bɔɔ́, tsí wà wí fúu ní: Kó lɔ!

5Tsí ó wà bèrè ŋá ní: Nɛ̀ɛ́ wà náàŋírĩ-ŋa, tsí bí ɔma‐ɛ̀ nàmí lalá‐ɛ̀ káà tsubú dzì ńkàga nɔ́dzɔ́-ìmíra, ni ɛnɛ nyɛ̀ŋɛ̀ kàkó nyàá gbòkã́ ná?

6Ńbɛ̀ɛ́, à kò ma bí ká dzɔ́ŋù lé ńǹtá‐ɛ̀ fúu gbà ró#ɛ́, tsí à tsikó.

Tɛ ara‐ɛ̀ɛ bɔlɛ̀, tsí Ɔ̀ɖáyé kó kɛ́ɛ si ńǹɖì lákṹ

7Tsí ɛnɛ yèé ŋa à kpè wá nóòkpì-dzídzɛ#ɛ́, Yèésù wà rí ŋa nɛ́kpa nɛ́kpa kíbí à wà dzokó#ɛ́. Tsí ó rí ní à wà wo ìɖì-onùgbó ŋa, tsí ká dzokó. Tsí ó wà tsɛ̀kɔ́-kã̀ fú ŋa ní:

8Bí ɔ̀nyà-kã̀ kpèɛ́ ní ìwɔ kó wáa dzɛ dzídzɛ-ɔɖɔ̃́ bá òŋu, tsí ò káà tó, máa káà dzokó ńǹɖì-onùgbó ŋa. Bóyá à ti kpe ɔ̀nyà-kã̀ gbo yèé dzɛ́ ɔ̀nyà wíwówo lárèɛ́#ɛ́ ní kó wá bɛ̀. Tsí bí ɛnɛ nyɛ̀ŋɛ̀ wáa tó#ɛ́, 9ɛnɛ yèé kpe ɛ̀ŋɛ méèdzì méèdzì#ɛ́ nákó wí fɛ́ɛ ní: Ìwɔ kó ǹɖe fú ɛnɛ nyɛ̀ŋɛ̀, tsí kó dzokó. Bí ó wí fɛ́ɛ bɛ́ɛ̀#ɛ́, nákó tsanɔ́ fɛ́ɛ ní o ǹɖe bɛ̀, tsí káà dzokó náànyì ńǹɖì yèé bɔ̀#ɛ́.

10Ó ɖi, bí à kpèɛ́ nɔ́ɖɔ̃́-dzídzɛ-kã̀ bɛ́ɛ̀, nà lɔ káà dzokó náànyì. Bí ò tse bɛ́ɛ̀, bí ɛnɛ yèé kpèɛ́ wáa tó#ɛ́, nákó wí fɛ́ɛ ní: Ídzà-mi, ǹɖe bɛ̀ wáa dzokó ńwádzú dza! Ńbɛ̀ɛ́, ɛnɛ yèé ìwɔ ŋa méèdzì kpó wà nóòkpì-ìdzɛ#ɛ́, àŋa kpó, à nákó rí ní à bu irɔ̃ si néwo fɛ́ɛ. 11Ó ɖi, ɔ̀nyà kpó yèé wà kɛ́ ara‐ɛ̀#ɛ́, Ɔ̀ɖáyé nákó ɖɛ̀ɛ́ bɔ̀, tsí ɔ̀nyà kpó yèé wà tɛ ara‐ɛ̀ bɔlɛ̀#ɛ́, Ɔ̀ɖáyé nákó kɛ́ɛ si ńǹɖì lákṹ.

Máa tse ore ní ɔ̀nyà ŋa kó tseé sã fú òŋu

12Tsí Yèésù nyí, tsí wà fɔ̀ fú ɛnɛ yèé kpèé#ɛ́ ní: Bí ò wà wo o kpe ɔ̀nyà ŋa ní ká wáa dzɛ dzídzɛ-òsã́ nàmí dzídzɛ-alɛ́ ńɖɔ̀-òŋu, máa kpe ídza-ɛ̀ɛ ŋa òŋu ìnàbí-ɛ̀ɛ ŋa. Máa kpe ɔ̀nyà-ara-ɛ̀ɛ ŋa òŋu olówó yèé wà sɔ́má-ɛ̀ɛ ŋa#á gìɖì gbo. Iŋɛ́ yèé tse#ɛ́, àŋa gbo, à nákó wáa kpèɛ́, àtsùgbée ká sã ore yèé ò tse fú ŋa#á si ńǹɖì‐ɛ̀ fɛ́ɛ ni.

13Ó ɖi, bí ò se dzídzɛ-kã̀ ní ɔ̀nyà ŋa kó wáa dzɛɛ́ bá òŋu, nà tédzú kpe adzìyàkú ŋa òŋu aké ŋa. Tsí nà kpe arɛ̃̀ ńǹgbákú ŋa òŋu afɔ́dzú ŋa gbo. 14Bí ò tse bɛ́ɛ̀, nàa wɛ éwo-ire ńɖi-Ɔ̀ɖáyé, iŋɛ́ yèé tse#ɛ́, à kò bòkó nyáa tse ìrɔ́-bɛ́ɛ̀ sã si ńǹɖì‐ɛ̀ fɛ́ɛ. Ɔ̀ɖáyé ní nákó sãã́ si ńǹɖì‐ɛ̀ fɛ́ɛ ńǹwèrè yèé nákó wáa dzí atsòtítɔ́ ŋa ti náàŋírĩ-òkú ŋa wá náyé#ɛ́.

Yèésù mú ɛnɛ yèé ŋa à kpè fú ɔɖɔ̃́-aya nínɛ́#ɛ́ kpòwe

(Màtéwò 22:1-10)

15Ɔ̀nyà-kã̀ wà náàŋírĩ-ɛnɛ yèé ŋa wà nóòkpì-dzídzɛ#ɛ́, tsí kíbí ó gbɔ́ afɔ̀ nyɛ̀ŋɛ̀#ɛ́, ó ǹɖe, tsí wà wí fú Yèésù ní: Ɛnɛ yèé nákó dzɛŋɛ́ bá Ɔ̀ɖáyé ńǹwèrè yèé nákó wáa dzoyè#ɛ́, ɛnɛ nyɛ̀ŋɛ̀ wɛ éwo-ire héŋú.

16Tsí Yèésù wà kpòwe-kã̀, tsí wà ń dzɔ́ŋù fúu ní: Ó ɖi nɔ́dzɔ́-kã̀, tsí ɔ̀nyà-kã̀ wà wo kó dzɛ ɔɖɔ̃́ lákṹ-kã̀. Tsí ó kpe ɔ̀nyà kpíkpɔ̀ wá ní ká wáa dzɛ ɔɖɔ̃́#ɛ́ bá òŋu. 17Kíbí ìwèrè-dzídzɛ#ɛ́ tó#ɛ́, ó bɛ arú‐ɛ̀ lɔ ní kó lɔ káà kpe ɛnɛ yèé òŋu kã́rã́ si ŋa#á ní ká wá. Ó ɖi, òŋu kpaɖí tã́.

18Tsí arú#ɛ́ lɔ, tsí fɔ̀ɔ́ fú ŋa, tsí à wí fúu nɛ́kpa nɛ́kpa kpó ní àŋa kò bòkó nyáa ródzú, tsí wá. Ɛnɛ-àtsɛ̃̀tsɛ̃̀ wà wí fúu ní: Òŋu ra oko-kã̀, tsí ó kpã́dzú fú òŋu gìɖì héŋú ní òŋu kó lɔ káà kpalɛ̀wòó. Ó ɖi, òŋu tsìkálɛ̀ fúu, òŋu kàkó nyáa wá.

19Tsí olòmírɛ̃̀-kã̀ gbo wà wí fúu ní: Òŋu ra lalá-oko maá, tsí òŋu làkóò káà ɖã́ ŋa wò káyí. Ó ɖi, òŋu tsìkálɛ̀ fúu, òŋu kàkó nyáa wá.

20Tsí olòmírɛ̃̀-kã̀ gbo wà wí fúu ró ní: Ńǹsɛ̃̀ɛ̃́ gé ní à gbɛ̃́ aya wá fú òŋu náàbitɔ̃#ɛ́. Ó ɖi, òŋu kàkó nyáa wá.

21Tsí arú#ɛ́ sɛ̃̀ wáa dzíkɔ̀ ŋa#á fú ɔ̀gá‐ɛ̀ bɛ́ɛ̀. Tsí ɔ̀gá‐ɛ̀ bínɔ́, tsí wí fúu ní: Kóyá fúu, kó ǹɖe, tsí kó wɔ̀ náàŋírĩ-ìlú#ɛ́, tsí kó lɔ ńkpàtá ŋa òŋu náàbɔ̀ɔ́mɛ̀ ŋa, tsí kó gbɛ̃́ adzìyàkú ŋa òŋu aké ŋa má nára-afɔ́dzú òŋu arɛ̃̀ ńǹgbákú ŋa wá. Kó gbɛ̃́ ŋa wá fú òŋu ńbí ńǹsɛ̃̀ɛ̃́, tsí ká wáa dzɛ ɔɖɔ̃́#ɛ́ bá òŋu.

Tsí arú#ɛ́ lɔ. 22Títí kó bɔ oɖé#ɛ́, ó sɛ̃̀ wáa tó. Tsí ó wà wí fú ɔ̀gá‐ɛ̀ ní: Itsɛ́ yèé ó bɛ òŋu#ɛ́, òŋu dzɛ́ɛ, tsí ìɖì tɔ́ bɔ̀ si ró.

23Tsí ɔ̀gá‐ɛ̀#ɛ́ wà wí fúu ró ní: Báàyí#ɛ́, kó fùɖá ńnɔ́-ìlú#ɛ́, tsí kó fa ɔ̀nà ŋa lɔ. Kó fa ɔ̀nà-oko ŋa gbo lɔ. Tsí ɔ̀nyà ɔ̀kã̀lɔ́ɔ̀kã̀ yèé nákó kpàɖé gé#ɛ́, kó tsìkálɛ̀ fúu, tsí gbɛ̃́ɛ̃ wá, tsí ilé-òŋu kó kɔ̃́ kpó. 24Ó ɖi, òŋu wà wí fú ŋa ní fee, ɛnɛ àtsɛ̃̀tsɛ̃̀ yèé ŋa à kpè, tsí à kɔ̀#ɛ́, arũ-ɔ̀kã̀-ŋa-kã̀ kpókpó kàkó kã dzídzɛ-òŋu.

Tã́ná o ɖi ɔmatsɛ́-Yèésù#ɛ́, ó wà ní o kɔ iŋɛ́ yèé ò nɛ́ ŋa#á kpó dzɔ̀ɔ́

(Màtéwò 10:37-38)

25Náànyì-bɛ́ɛ̀#ɛ́, Yèésù wà nɔ́ɔ̀nà làkóò, tsí ɔ̀nyà kpíkpɔ̀ wà tɛ̀ náànyì‐ɛ̀. Tsí ó nyí, tsí wà wí fú ŋa ní: 26Bí ɔ̀nyà-kã̀ wá ńɖɔ̀-òŋu, tsí iŋɛ́-òŋu kò kpã́dzú fúu láre boba‐ɛ̀ òŋu ìná‐ɛ̀, tsí iŋɛ́-òŋu kò kpã́dzú fúu láre aya‐ɛ̀ òŋu ɔma‐ɛ̀ má nára-ìnàbí‐ɛ̀ ŋa gbo, tsí bí iŋɛ́-òŋu kò kpã́dzú fúu láre àyɛ̀-tòŋu ká‐ɛ̀ gìɖì#ɛ́, kàkó nyáa dzɛ́ ɔmatsɛ́-òŋu. 27Ó ɖi, bí ɔ̀nyà-kã̀ kò dzɛ́, tsí kɛ́ egi-ìɖáàgàlàdzà†‐ɛ̀ rù, tsí wà tɛ̀ náànyì-òŋu, ɛnɛ nyɛ̀ŋɛ̀ kàkó nyáa dzɛ́ ɔmatsɛ́-òŋu.

28Tsí ó wà wí fú ŋa ró ní: Nɛ̀ɛ́ wà náàŋírĩ-ŋa, tsí bí ɛnɛ nyɛ̀ŋɛ̀ wà wo kó malé-ìsã́ŋú-kã̀ ni kà dzokó, tsí sére owó yèé nákó lò, tsí ń malé#ɛ́ dzá kpó#ɛ́ tã́ná kó kpée si ńnɛ̀ ná? 29Nákó sérèé, tsí rí ní owó yèé wà nɔ́wɔ́-òŋu#ɛ́ nákó tó, tsí òŋu kó maá dzáà? Bí kò tsi bɛ́ɛ̀, bí ó kpilɛ ilé#ɛ́, tsí maá làkóò, tsí ilé#ɛ́ kò nyáa kpãrũ#ɛ́, ɛnɛ yèé ŋa nákó ríi bɛ́ɛ̀#ɛ́, à nákó wà rã́ã̀rĩ́ fúu, 30tsí wà fɔ̀ ní: Kò tsi ɛnɛ#ɛ́ kpé ilé míma niì? Tsí kò nyáa maá kpãrũ róò?

31Tsí ó wà wí fú ŋa ró ní: Nàmí ólú yèésí gbo wà, tsí bí ó wà wo kó lɔ káà dzogu bá ólú-òmírɛ̃̀-kã̀, ni kà tsɛ̃̀tsɛ̃̀ dzokó, tsí tsèsérè rere ná? Bí ó dzɛ́ ní ɔ̀nyà ɛgbɛ̀rú ɛgbɛ̀rú ɔ̀nà maá (10.000) ní wà nɔ́wɔ́‐ɛ̀#ɛ́, nákó wà tsèsérè ní fee, òŋu nákó nyáa tóòsũ̀-ɛnɛ yèé gbɛ̃́ ɔ̀nyà ɛgbɛ̀rú ɛgbɛ̀rú ɔ̀nà ogú (20.000) bàa, tsí bòkó wáa dzogu bá òŋu#ɛ́ yáà? Nákó tsèsérè bɛ́ɛ̀ nɔ̀! 32Tsí bí ó rí mà ní òŋu kàkó nyáa tóòsũ̀‐ɛ̀#ɛ́, títí ńǹwèrè yèé ɔ̀tɛ̀‐ɛ̀#ɛ́ kò tì sɔ́má‐ɛ̀ gìɖì si wòná#á, nákó ti bɛ ɔ̀nyà ŋa ní ká lɔ káà fɔ̀ fúu ní: Òŋu mú éwo dzó fúu. Afɔ̀ tã́.

33Kíbí ó dzɛ́ bɛ́ɛ̀#ɛ́ fee, ɔ̀nyà-kã̀ kpókpó náàŋírĩ-ŋa kàkó nyáa dzɛ́ ɔmatsɛ́-òŋu, bí ɛnɛ nyɛ̀ŋɛ̀ kò kɔ iŋɛ́‐ɛ̀ ŋa kpó dzɔ̀ɔ́.

34Tsí ó wà wí fú ŋa ró ní: Fee, oŋu iŋɛ́-ire-kã̀ ni. Ó ɖi, bí oŋu kò nɛ́ aɖɔ̃̀‐ɛ̀ ró fee, kí à kó nyáa mú si ńnɛ̀, tsí kó ɖɔ̃̀ ró? 35Bí ó ɖà bɛ́ɛ̀, à kàkó nyáa lòó ró. À kàkó nyáa ń rì fú dzídzɛ gbo. À náa kɛ́ɛ ɖànu gé ni. Ó ɖi, ɛnɛ yèé nɛ́ etí-ìgbɔ̃́ɔ̃̀rã̀ kó máa ń tsoɖi.

Currently Selected:

Lúkà 14: ngl

Highlight

Copy