Lúkà 13

Bí ò kò nyíìlò kpaɖà, nàa tsɛ̀rá

1Náàsòkò nyɛ̀ŋɛ̀#ɛ́, ɔ̀nyà kã̀ŋa wá ńɖi-Yèésù, tsí à wà wíìnyɛ̀ ti nára-ɛnɛ-ɔwɔ́-Gàlìlé kã̀ŋa fúu. À ní: Ɛnɛ nyɛ̀ŋɛ̀ ŋa#á, Kpìlátò† kɔ̀màɖã́ã̀-ìlú#ɛ́ kpa ŋá nóòkú ńǹwèrè yèé à wà tsɛbɔ fú Ɔ̀ɖáyé#ɛ́, tsí àmbara-ŋa gìɖì gbo ɖà ròmá àmbara-ɛbɔ yèé à wà tse#ɛ́.

2Tsí Yèésù wà dzɔ́ŋù fú ŋa ní: Kíbí ɛnɛ-ɔwɔ́-Gàlìlé nyɛ̀ŋɛ̀ ŋa réré tó bɛ́ɛ̀#ɛ́, à ɖédzú íbàɖí-ŋa láre ti ɛnɛ-Gàlìlé-àtíbɔ̀ ŋa#á niì? 3Òò, kò tsi bɛ́ɛ̀ ni. Ó ɖi, òŋu wà wí fú ŋa ní fee, bí à kò nyíìlò kpaɖà, bɛ́ɛ̀ ké ní àŋa gbo, à nákó tsɛ̀rá kpó#ɛ́.

4Tsí ó wà fɔ̀ fú ŋa ró ní: À ti gbɔ́ gbo ní ńǹlú-Yèrúsàlɛ́mì sɔ́má-àɖágúlɛ̀-Sìlòwá#á, ilé-ìsã́ŋú gíga yèé wà bɛ̀#ɛ́, ó ɖíwó kpa ɔ̀nyà méèdzì ɖí nógú, tsí à tsɛ̀rá kpó nɔ̀! À ɖédzú ɔ̀nyà méèdzì ɖí nógú nyɛ̀ŋɛ̀ ŋa#á gbo ní dzàbi-Ɔ̀ɖáyé láre ɛnɛ-Yèrúsàlɛ́mì ŋa kpó#ɛ́ɛ̀? 5Òò, kò tsi bɛ́ɛ̀ ni. Ó ɖi, òŋu wà wí fú ŋa ní fee, bí à kò nyíìlò kpaɖà, bɛ́ɛ̀ ké ní àŋa gbo, à nákó tsɛ̀rá kpó#ɛ́.

6Tsí ó wà kpòwe-kã̀ fú ŋa ní: Ɔ̀nyà-kã̀ wà, tsí ó lɛ́ ɔ̀kpɛ̀-kã̀ nóko‐ɛ̀ si. Tsí kíbí ó wá ní òŋu kó wáa kɔ ɛnyɛ̀#ɛ́, ɔ̀kpɛ̀#ɛ́ kò là si. 7Tsí ó wà wí fú ɛnɛ yèé ó gbà si nárũ-oko#ɛ́ ní: Kó rí gé! Ɔɖɔ̃́ mɛ́ɛta báàyí ní òŋu wà wá ní òŋu kó kɔ ɛnyɛ̀ nɔ́ɔ̀kpɛ̀#ɛ́, tsí òŋu kò wà rí#ɛ́. Ó ɖi, kó wúu taánù. Ó wà gba ìɖì rá gé ni.

8Tsí ɛnɛ nyɛ̀ŋɛ̀ wà dzɔ́ŋù fúu ní: Ɔ̀gá, kó kɔ̀ɔ́ dzɔ̀ɔ́ fú ɔɖɔ̃́-kã̀ ró káyí, tsí òŋu kó sɔlɛ̀ nábɛ́‐ɛ̀ wérí, tsí kó ilɛ̀-kìɖì ɖà ròmá‐ɛ̀. 9Bóyá, náànyìwà#á, nákó wáa là. Ó ɖi, bí kò là ná, kó wáa wúu ńǹkɛ̀ɛ́.

Yèésù gba ɔnɔbɛ̃̀ɛ̃-kã̀ dzɔ̀ɔ́ nɔ́wɔ́-Ètsù nɔ́dzɔ́-ìmíra

10Ó ɖi nɔ́dzɔ́-ìmíra†-kã̀, tsí Yèésù wà ńlé-ìkpàɖé-ɔma-Ìyúɖà ŋa†-kã̀ si, tsí wà tsɛ̀kɔ́ fú ɔ̀nyà ŋa. 11Tsí ɔnɔbɛ̃̀ɛ̃-kã̀ gbo wà bɛ̀, tsí dzɛ́ àkɔ̃̀rɔ̃̀ si. Iŋɛ́-kã̀ wɔ̀ ńǹtá‐ɛ̀ si ɔɖɔ̃́ méèdzì ɖí nógú‐ɛ̀ ńnɛ̀ɛ́, tsí ó kákòó si títí kò nyáa wà sɛ̃́ ɖóro ró.

12Kíbí Yèésù rí ɔnɔbɛ̃̀ɛ̃#ɛ́, ó ǹɖe, tsí wà wí fúu ní: Ìɖá-wa, Ɔ̀ɖáyé gbàɛ́ dzɔ̀ɔ́ nɔ́wɔ́-àrɔ̃̀-ɛ̀ɛ.

13Tsí ó mɔ́wɔ́ lé ńǹtá‐ɛ̀. Tsí ńǹɖì-bɛ̀ gbòkã́#á, ɔnɔbɛ̃̀ɛ̃#ɛ́ sɛ̃́ ɖóro, tsí wà nyɛ Ɔ̀ɖáyé.

14Onùgbó-ilé-ìkpàɖé-ɔma-Ìyúɖà ŋa gbo wà bɛ̀. Kíbí ó rí ní Yèésù bɔ ɔnɔbɛ̃̀ɛ̃#ɛ́ nɔ́dzɔ́-ìmíra bɛ́ɛ̀#ɛ́, inɔ́ bíi gbòkã́. Tsí ó ǹɖe, tsí wà wí fú ɛnɛ yèé wà bɛ̀ ŋa#á ní: Ɔdzɔ́ kã̀kã̀ mɛ́ɛfà ní wà fú itsɛ́ tsítse#ɛ́. Bí ɔ̀nyà-kã̀ wà wo kó bɔ ara‐ɛ̀, ni kó wá ńnɔ́-ɔdzɔ́ nyɛ̀ŋɛ̀ ŋa. Ɔ̀nyà-kã̀ kpókpó kó máa wáa bɔ ara‐ɛ̀ nɔ́dzɔ́-ìmíra.

15Tsí Yèésù wà dzɔ́ŋù fúu, tsí wà fɔ̀ ní: Ɔ̀nyà-atsendzɔdzú ŋa! Nɛ̀ɛ́ tútú wà náàŋírĩ-ŋa, tsí kà tú lalá‐ɛ̀ nàmí kɛ́tɛ́kɛ́tɛ́‐ɛ̀ nókù nɔ́dzɔ́-ìmíra, tsí gbɛ̃́ɛ̃ lɔ nóɖò ní kó lɔ káà mɔmi ná? 16Tsí ɔnɔbɛ̃̀ɛ̃ yèé bɛ́#ɛ́, ɔmalɔ́ma-Àbàràhámì† ní ó dzɛ́#ɛ́. Òŋu gbo wà náàŋírĩ-ɛnɛ yèé Ɔ̀ɖáyé tsã̀ ŋa#á. Tsí Ètsù† ɖèé nókù si títí ɔɖɔ̃́ méèdzì ɖí nógú báàyí ní. Kò sã̀ ní ká túu dzɔ̀ɔ́ nɔ́dzɔ́-ìmíraà?

17Kíbí ó wíìnyɛ̀ bɛ́ɛ̀#ɛ́, ó ɖi anɔ́ fú ɛnɛ yèé wà nyàá kãdzú ŋa#á kpó. Ó ɖi, ɛnɛ-àtíbɔ̀ yèé wà bɛ̀ ŋa#á, à wà náyè títɛ́ si kpó ti nára-iŋɛ́-àfɛ́ŋú yèé Yèésù wà tse ŋa#á.

Yèésù wà kpòwe ti nára-oyè-Ɔ̀ɖáyé

(Màtéwò 13:31-32,34; Mákò 4:30-33)

18Ńbɛ̀ɛ́, Yèésù tɔ́ wà wí fú ŋa ró ní: Òŋu kó kɛ́ kíbí Ɔ̀ɖáyé náa dzoyè gbà#á, tsí ń sàwé iŋɛ́-kã̀ fú ŋa. Òŋu kó tse ìsàwé-kã̀ fú ŋa, tsí ká ń gbɔ́ òkpì‐ɛ̀. 19À nákó nyáa ń sàwé-ɔma dzídzɛ-kã̀ bɛ́. À náa kpèé ní mùtáɖì. Tsí ɔ̀nyà-kã̀ kɛ́ɛ, tsí lɔ káà gbɛ̃̀ɛ̃́ si nóko‐ɛ̀. Tsí ó wù, tsí ɖi egi, tsí ɛyɛ ŋa wáa kɔ́lé si nákpá‐ɛ̀ ŋa.

20Tsí ó wà wí fú ŋa ró ní: Kíbí Ɔ̀ɖáyé náa dzoyè gbà#á, òŋu kó kpòwe-kã̀, tsí ń ɖíreé fú ŋa ró. 21Ó wà kíbí ɔ̀tsɛ̃̀-kpɔ̃́nɔ́ bɛ́ ni. Tsí ɔnɔbɛ̃̀ɛ̃-kã̀ kɛ́ɛ, tsí ń kpo ɔkà-kpɔ̃́nɔ́ àwò mɛ́ɛta títí ó kɛ́ kpó wùdzèè.

Arũ-èkũ̀-ɔ̀nà-oyè-Ɔ̀ɖáyé kò tsédzú, ó ɖi, ká ɖìgírí, tsí ká wɔ̀ ńnɛ̀

(Màtéwò 7:13-14,21-23)

22Ńǹwèrè nyɛ̀ŋɛ̀#ɛ́, Yèésù wáa làkóò ńYèrúsàlɛ́mì, tsí ó gbà ńǹlú lákṹ ŋa òŋu ńǹtá-oko ŋa gbo tã́ná kó káà tó, tsí náa wà tsɛ̀kɔ́ fú ɔ̀nyà ŋa làkóò. 23Tsí ó ɖi nɔ́dzɔ́-kã̀, tsí ɔ̀nyà-kã̀ wà bèrèé ní: Ɔ̀gá! Ɔ̀nyà-ìmarũ oɖé gé ní Ɔ̀ɖáyé nákó gbà là#áà?

Tsí ó wà wí fú ŋa ní: 24Èkũ̀-kã̀ wà, tsí arũ‐ɛ̀ kpamá. Ó ɖi, è ɖìgírí, tsí e wɔ̀ ńnɛ̀. Òŋu wà fɔ̀ fú ŋa ní fee, ɔ̀nyà kpíkpɔ̀ nákó wò ní àŋa kó wɔlé#ɛ́, tsí à kàkó nyáa wɔ̀ ńnɛ̀. 25Ìwèrè-kã̀ nákó wá, tsí olílé#ɛ́ nákó ǹɖe, tsí kã èkũ̀-ilé‐ɛ̀. Tsí ɛ̀ŋɛ òŋu, è nákó wà nóòɖe si, tsí è nákó wà kpɛ̀kũ̀ fúu, tsí wà wí ní: Ɔ̀gá, tsí èkũ̀ fú wa ɖé! Tsí nákó dzɔ́ŋù fú ŋɛ́ ní: Ɛ̀ŋɛ òŋu, òŋu kò ma ńbí è ti#ɛ́. 26Ńbɛ̀ɛ́, ɛ̀ŋɛ gbo, è nákó sɛ̃̀ wà wí fúu ní: Ó wá, tsí wáa tsɛ̀kɔ́ fú ɔ̀nyà ŋa náàŋírĩ-ìlú-àŋa nɔ̀! Tsí àŋa dzɛ, tsí mɔ báa gbo nɔ̀! 27Tsí òŋu gbo nákó dzɔ́ŋù fú ŋɛ́ ní: Òŋu kò mà ńbí è ti#ɛ́. Kóyá! Ɛ̀ŋɛ kó sɔ́ ǹɖe ńɖɔ̀-òŋu bí. Ɛ̀ŋɛ òŋu, ɔ̀nyà-atseébàɖí ŋa ní ɛ̀ŋɛ kpó è dzɛ́#ɛ́. 28Ńǹwèrè nyɛ̀ŋɛ̀ ní è nákó rí gbágbóǹgbàgbò-ŋɛ́ ŋa Àbàràhámì† òŋu Ìsákà† má nára-Yàkúbù†, tsí è nákó rí agbáfɔ̀-Ɔ̀ɖáyé fɔ̀† ŋa gbo kpó, tsí à nákó dzokó bá Ɔ̀ɖáyé si, ńbí ó wà dzoyè#ɛ́. Ó ɖi, ɛ̀ŋɛ òŋu, è nákó kí nóòɖe si. È kàkó rí ɔ̀nà lɔ bɛ̀. Tsí è nákó wà sɔkṹ, tsí wà dzara kpàkpàkpà. 29Tsí ɔ̀nyà ŋa nákó ti nɔ́wɔ́-òntsà òŋu nɔ́wɔ́-bùkúù, tsí à nákó ti ńǹbú-ayé òŋu òro-ayé gbo, tsí wáa dzɛ ɔɖɔ̃́ ńbí Ɔ̀ɖáyé wà dzoyè#ɛ́. 30Ó ɖi, ɛnɛ-iwá kã̀ŋa nákó ɖi ɛnɛ-ànyì, tsí ɛnɛ-ànyì kã̀ŋa gbo nákó ɖi ɛnɛ-iwá.

Ńǹlú-Yèrúsàlɛ́mì ní Yèésù bòkó kú si#ɛ́

(Màtéwò 23:37-39)

31Náàsòkò yèé Yèésù wà wíìnyɛ̀ làkóò#ɛ́, ɔma-ɛgbɛ́-Fàrísì† kã̀ŋa tìmá‐ɛ̀, tsí wà wí fúu ní: Kó ǹɖe bí, tsí kó lɔ ńbòmírɛ̃̀. Ó ɖi, ólú Èróɖì† wà wo ikú‐ɛ̀.

32Tsí ó wà wí fú ŋa ní: Ká lɔ káà wí fú ɔ̀nyà-ègìɖã́ nyɛ̀ŋɛ̀ ní nɔ́mbɛ́ òŋu ɔ̀la, edzò† yèé ŋa wà ɖɔ́kpɔ fú ɔ̀nyà ŋa#á, òŋu wà lé ŋa sɛ̃̀ náànyì-ŋa, tsí òŋu wà bɔ àkɔ̃̀rɔ̃̀ ŋa gbo, tsí nɔ́ɔ̀tɔ́ɔla bɛ́, òŋu nákó tsitsɛ́-òŋu tã́. 33Ó ɖi, ó wà ní òŋu kó rɛ̃ ɔ̀nà-òŋu nɔ́mbɛ́ òŋu ɔ̀la, ɔ̀tɔ́ɔla gbo. Nàmí ńǹlú-òmírɛ̃̀-kã̀ yèésí à kpa agbáfɔ̀-Ɔ̀ɖáyé fɔ̀†-kã̀ wòrí, tsí kò tsi ńYèrúsàlɛ́mì?

34Tsí ó wà wí fú ŋa ró ní: Óò! Ɛnɛ-Yèrúsàlɛ́mì ŋa! È náa kpa agbáfɔ̀-Ɔ̀ɖáyé fɔ̀ ŋa nóòkú, tsí è náa ta ɛnɛ yèé ŋa Ɔ̀ɖáyé náa bɛ̀ wá fú ŋɛ́#ɛ́ nóòkúta kpa. Ó ɖi, ǹ wò ní n kpè ŋɛ́ kpaɖí ńǹrɔ́-kíbí aɖɛ̀ɛ náa kpe ɔma‐ɛ̀ ŋa kpaɖí nábɛ́‐ɛ̀, tsí mú iká bò ŋá bɛ́#ɛ́ ni. Tsí è sì kɔ̀. 35È rí gé! Ɔ̀ɖáyé nákó tsí kɔ ilé-ŋɛ́ dzɔ̀ɔ́ fú ŋɛ́. Ó ɖi, ǹ wà wí fú ŋɛ́ ní è kàkó rí mi ró títí fú àsòkò yèé ɛ̀ŋɛ ká-ŋɛ́, è nákó wà fɔ̀ ní: Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́.

Currently Selected:

Lúkà 13: ngl

Highlight

Copy