Lúkà 11

Yèésù wà tsɛ̀kɔ́ fúnɛ ti nára-kíbí à náa wúùre gbà#á

(Màtéwò 6:9-13; 7:7-11)

1Ó ɖi nɔ́dzɔ́-kã̀, tsí Yèésù ǹɖe lɔ káà wúùre ńǹɖì-kã̀. Kíbí ó wúùre tã́#á, ɔmatsɛ́‐ɛ̀-kã̀ wà fɔ̀ fúu ní: Ɔ̀gá! Kɔ́ àwa gbo ńǹre wúwú kíbí Yòhánà† Awɛ̀fúnɛ kɔ́ ɔmatsɛ́‐ɛ̀ ŋa#á.

2Tsí ó ǹɖe, tsí wà wí fú ŋa ní: Bí à wà wúùre ni ká fɔ̀ ní:

Boba, tse tsí ɔ̀nyà kpó kó mà ní ò dzɛ́ Ɔ̀ɖáyé,

tsí ká wà nɛ́ àrísá fɛ́ɛ.

Wáa dzoyè si ńǹtalɛ̀#ɛ́ kpó.

3Nà fú wa ńdzídzɛ ìmarũ-ɔdzɔ́ kã̀kã̀.

4Mú àbi-wa ŋa tɔrɛ fú wa, iŋɛ́ yèé tse#ɛ́,

àwa gbo, àa náa ń tɔrɛ

fú ɔ̀nyà kpó yèé ŋa tse kò sã̀ nára-wa ŋa#á.

Nà tse tsí àɖã́wò kó máa wá ńǹtá-wa.

5Tsí ó wà fɔ̀ fú ŋa ró ní: Ká fɔ̀ ní ɔ̀nyà-kã̀ wà náàŋírĩ-ŋa, tsí ɖídza-kã̀ si. Tsí ó ǹɖe nóoru ńǹŋàáŋà, tsí lɔ káà kpɛ̀kũ̀ fú idza#á ní: Ídza-mi, fú mi ńdzídzɛ oɖé ɖé! 6Ó ɖi, ídza-òŋu-kã̀ sɔ òŋu náàledzò ńǹsɛ̃̀ɛ̃́, tsí òŋu kò nɛ́ dzídzɛ-kã̀ kpókpó, tsí òŋu kó fúu.

7Tsí ká fɔ̀ gbo ní ídza‐ɛ̀#ɛ́ tsí arũ, tsí wà fɔ̀ fúu ní: Kó máa ɖɔ́kpɔ fú òŋu! Ó ɖi, òŋu ɔma-òŋu ŋa ti sũ̀, tsí òŋu ti kã èkũ̀ gbo ná. Òŋu kàkó nyáa ǹɖe, tsí wáa fúu ńdzídzɛ#ɛ́.

8Òŋu wà fɔ̀ fú ŋa ní fee, bí ó dzɛ́ gìɖì ní ídza‐ɛ̀ kàkó nyáa ǹɖe ńti yèé ó dzɛ́ ídza‐ɛ̀#ɛ́, tsí wáa fúu ńdzídzɛ#ɛ́ fee, bí ó góró nákó ǹɖe, tsí wáa fúu ńŋɛ́ ɔ̀kã̀lɔ́ɔ̀kã̀ kpó yèé ó wà wò#ɛ́ náàtsùgbée kíbí ó wà ɖɔ́kpɔ fúu tó gbà#á.

9Tsí èmi ǹ wà fɔ̀ fú ŋɛ́ ní fee: È bere Ɔ̀ɖáyé ńŋɛ́ yèé wà hã́ ŋɛ́#ɛ́, nákó fú ŋɛ́ ńnɛ̀. È wo iŋɛ́ yèé wà wù ŋɛ́#ɛ́ ńɖɔ̀‐ɛ̀, è nákó ríi. È kpɛ̀kũ̀ fúu, nákó tsíi fú ŋɛ́. 10Fee, ɛnɛ yèé wà bèrè#ɛ́ nákó gbà. Ɛnɛ yèé wà wò#ɛ́ nákó rí. Tsí Ɔ̀ɖáyé nákó tsí èkũ̀ fú ɛnɛ yèé wà kpɛ̀kũ̀#ɛ́.

11Boba-ɔma-kã̀ yèésí wà náàŋírĩ-ŋɛ́, tsí bí ɔma‐ɛ̀ bèrèé nɛ́dzã ni, nákó mú edzò† bɔwɔ́‐ɛ̀#11:11 Ńnɔ́-ìwé kã̀ŋa, à náa mú afɔ̀ yèé ŋa máa: “Boba-ɔma-kã̀ yèésí wà náàŋírĩ-ŋɛ́, tsí bí ɔma-ɛ̀ɛ bèrèé ńkpɔ̃́nɔ́, ni nákó mú òkúta fúu?” 12nàmí bí ó bèrèé nɛ́nyɛ-aɖɛ̀ɛ, ni nákó mú èkéèkère bɔwɔ́-ɛ̀ ná? 13Ɛ̀ŋɛ yèé dzɛ́ ɔ̀nyà-íbàɖí ŋa#á, è náa màá, tsí mú iŋɛ́-ire ŋa fú ɔma-ŋɛ́ ŋa. Máàbàtó Ɔ̀ɖáyé Boba nɔ́ɔ̀rɔ̃. Bí ɔ̀nyà-kã̀ bèrèé ńMímí‐ɛ̀, nákó fúu ńnɛ̀.

Ɔ̀nyà ŋa wà fɔ̀ ní Yèésù wà lo ikpá-Ètsù

(Màtéwò 12:22-30; Mákò 3:22-30)

14Edzò†-kã̀ wà ɖɔ́kpɔ fú ɔ̀nyà-kã̀, tsí sɔɔ́ ɖi mùnù. Tsí ó ɖi nɔ́dzɔ́-kã̀, tsí Yèésù wà lée sɛ̃̀ náànyì-ɛnɛ nyɛ̀ŋɛ̀. Kíbí edzò#ɛ́ sá fùɖá gé#ɛ́, mùnù#ɛ́ kpé ìnyɛ̀ wíwí gbòkã́, tsí ó mu ɔ̀nyà kpó. 15Tsí ɔ̀nyà kã̀ŋa òŋu ǹɖe, tsí wà fɔ̀ ní: Bɛ̀yɛ̀sɛ̀búlù, ɔ̀gã́-edzò ŋa ní fúu ńkpá ní kó wà ń lé edzò ŋa sɛ̃̀ náànyì-ɔ̀nyà ŋa#á.

16Tsí olòmírɛ̃̀ kã̀ŋa gbo ní àŋa kó ɖã́ Yèésù wò, tsí à wà bèrèé ní kó tse iŋɛ́-àwùsì-kã̀ fú àŋa, tsí kó ń nyà ɖíre ní Ɔ̀ɖáyé ní bɛ̀ɛ́ wá#á.

17Ó ɖi, Yèésù ti ma ìsérè yèé wà néwo ŋa#á si, tsí ó wà wí fú ŋa ní: Bí ìlú-kã̀ wà, tsí ɛnɛ-ìlú ŋa#á wà dzogu bá ara-ŋa, ìlú#ɛ́ náa fɔ́. Tsí bí ɔ̀nyà-kpáfɛ ɔ̀kã̀ntso kã̀ŋa gbo wà dzà bá ara-ŋa gé, kpáfɛ#ɛ́ náa fɔ́. 18Bí Ètsù† gbo wà dzogu bá ara‐ɛ̀ fe, bí oyè‐ɛ̀ nákó tse fáà, tsí gbé ró ńǹkɛ̀ɛ́? Iŋɛ́ yèé tse#ɛ́, à wà wí ní Bɛ̀yɛ̀sɛ̀búlù ní fú òŋu ńkpá, tsí òŋu wà ń lé edzò yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa#á. 19Tsí bí à wà fɔ̀ ní òŋu gba ikpá ńɖi-Bɛ̀yɛ̀sɛ̀búlù, tsí wà ń lé edzò ŋa sɛ̃̀ náànyì-ɔ̀nyà ŋa fee, ɔma tiŋà ŋa fe, ńɖi-nɛ̀ɛ́ àŋa òŋu, à wà gba ikpá, tsí wà ń lé edzò ŋa sɛ̃̀ náànyì-ɔ̀nyà ŋa ni? Ɔma tàŋa ká-ŋa ŋa ní nákó kpɛdzɔ́ mú ŋa#á. 20Ó ɖi, bí ó dzɛ́ ní òŋu wà lé edzò ŋa sɛ̃̀ náànyì-ɔ̀nyà ŋa gbà ńǹtá-ikpá-Ɔ̀ɖáyé#ɛ́ fee, ká rí mà ní oyè-Ɔ̀ɖáyé† tó ńɖɔ-àŋa ńnɛ̀ɛ́.

21Tsí ó wà wí fú ŋa ró ní: Bí olílé-kã̀ wà, tsí ó dzɛ́ olí-àmí, tsí ó nɛ́ iŋɛ́-ìdzògu ŋa kpó si, tsí wà ń ɖe ilé‐ɛ̀, olè-kã̀ kpókpó kàkó nyáa tsolèé. 22Ó ɖi, bí ɔ̀nyà-kã̀ wáa tó, tsí nɛ́ àmí lárèé, ɛnɛ nyɛ̀ŋɛ̀ nákó kpaá, tsí dzàdzàbɔ́‐ɛ̀. Tsí ńǹtá-iŋɛ́-ìdzògu yèé ŋa ó nɛ́ àkaralé si gìɖì#ɛ́, ɛnɛ nyɛ̀ŋɛ̀ nákó gbà ŋá nɔ́wɔ́‐ɛ̀, tsí iŋɛ́ yèé ɛnɛ nyɛ̀ŋɛ̀ dzogu, tsí gbà ŋa kpó#ɛ́ nákó kpɛ̃́ ŋa bá enìkéèdzì‐ɛ̀ ŋa. 23Ńbɛ̀ɛ́, ɛnɛ yèé kò wà náànyì-òŋu#ɛ́, ɛnɛ nyɛ̀ŋɛ̀ kò wà mú odzú-ire wo òŋu. Tsí ɛnɛ yèé gbo kò wà kpe ɔ̀nyà ŋa kpérí bá òŋu#ɛ́, ó wà túùnkã́ ŋa ni.

Edzò yèé sɛ̃̀ náànyì-ɔ̀nyà-kã̀#á nákó nyáa sɛ̃̀ wá ró

(Màtéwò 12:43-45)

24Tsí Yèésù wà wí fú ŋa ró ní: Bí edzò† yèé wà ɖɔ́kpɔ fú ɔ̀nyà-kã̀#á sɛ̃̀ náànyì‐ɛ̀, náa lɔ káà wà nɔ́ɔ̀ɖã̀ si, tsí wà lɔ, tsí wà bɔ̀. Tsí náa wà wo ńbí kó míra#á. Tsí bí kò rí, náa wà fɔ̀ ńnɔ́-ara‐ɛ̀ ní: Òŋu kó tédzú sɛ̃̀ lɔ ńlé-òŋu, ńbí òŋu fùɖá ti#ɛ́. 25Tsí náa sɛ̃̀ lɔ káà tó, tsí náa rí ní ilé-òŋu#ɛ́, à gbáa si bérébéré, tsí to iŋɛ́ yèé wà ńnɛ̀ ŋa#á si nɔ́wɔ́ nɔ́wɔ́. 26Tsí náa sɛ̃̀ lɔ, tsí lɔ káà gbɛ̃́ edzò méedze òmírɛ̃̀ kã̀ŋa yèé yàábàɖí láre òŋu ká‐ɛ̀#ɛ́ má ara‐ɛ̀, tsí à náa wáa lɔ káà gbé bɛ̀ ńǹkɛ̀ɛ́. Tsí ńǹtã̀ntã́‐ɛ̀#ɛ́, ayé-ɛnɛ-nyɛ̀ŋɛ̀ náa burú láre ti dzɔ̀ɔ́.

27Kíbí Yèésù wí bɛ́ɛ̀ tã́#á, ɔnɔbɛ̃̀ɛ̃-kã̀ wà náàŋírĩ-èrò#ɛ́, tsí ó ɖúgbe, tsí wà fɔ̀ fúu ní: Ɔnɔbɛ̃̀ɛ̃ yèé kɛ́ efũ̀-ɛ̀ɛ, tsí fɛ́ɛ nɔ́mɔ́ gbo#ɛ́, ó wɛ éwo-ire.

28Tsí Yèésù wà dzɔ́ŋù fúu ní: Òò, ɛnɛ yèé ŋa wà gbɔ́ afɔ̀-Ɔ̀ɖáyé, tsí wà ń tsitsɛ́ tse ŋa#á, àŋa ní wɛ éwo-ire#ɛ́.

Yèésù wà dzɔ́ŋù fú ɛnɛ yèé wà bèrèé ní kó tse iŋɛ́-àwùsì-kã̀ fú àŋa#á

(Màtéwò 12:38-42)

29Tsí ɔ̀nyà ŋa wà ɖũ ìɖì, tsí ká sɔ́má-Yèésù, tsí ó ǹɖe, tsí fɔ̀ fú ŋa ní: Àŋa ɔma-ìsɛ̃̀ɛ̃́ ŋa, à yàábàɖí góró. À wà wò ní òŋu kó tse iŋɛ́-àwùsì-kã̀ fú àŋa. Ó ɖi, à kàkó tse iŋɛ́-àwùsì-kã̀ kpókpó fú ŋa náànyì yèé Yónà agbáfɔ̀-Ɔ̀ɖáyé fɔ̀† tse fú ŋa#á. 30Ó ɖi, kíbí Yónà dzɛ́ iŋɛ́-àwùsì-kã̀ fú ɛnɛ-ìlú-Nìnífì ŋa#á, bɛ́ɛ̀ ké ní òŋu, Ɛnɛ yèé ɔ̀nyà bí#ɛ́†, òŋu gbo, òŋu nákó wáa dzɛ́ iŋɛ́-àwùsì-kã̀ fú ɔma-ìsɛ̃̀ɛ̃́ ŋa#á.

31Nɔ́dzɔ́ yèé Ɔ̀ɖáyé nákó wáa kpɛdzɔ́ fú ɔ̀nyà ŋa#á, ólú ɔnɔbɛ̃̀ɛ̃ ti ìlú yèé wà ńǹyà-ìbú-ayé#ɛ́ nákó ǹɖe ɖóro ńwádzú-ɔma-ìsɛ̃̀ɛ̃́ ŋa, tsí wà bá ŋa fɔ̀, iŋɛ́ yèé tse#ɛ́, ó ti títí ńkpàkũkpàkũ-ayé#ɛ́, tsí wá ńɖi-ólú Sàlòmɔ́†, tsí wáa gba ifɛ̀ɛ́nɔ́. Tsí òláre Sàlòmɔ́ ní à wà rí ńbíbɛ́#ɛ́!

32Nɔ́dzɔ́ yèé Ɔ̀ɖáyé nákó wáa kpɛdzɔ́ fú ɔ̀nyà ŋa#á, ɛnɛ-ìlú-Nìnífì ŋa nákó ǹɖe ɖóro ńwádzú-ɔma-ìsɛ̃̀ɛ̃́ ŋa, tsí ɖáàbi fú ŋá, iŋɛ́ yèé tse#ɛ́, kíbí Yónà dzíkɔ̀-Ɔ̀ɖáyé fú ɛnɛ-ìlú-Nìnífì ŋa#á, à nyíìlò kpaɖà. Tsí òláre Yónà ní à wà rí ńbíbɛ́#ɛ́!

Bí odzú-ɛ̀ɛ wà rere si, ara-ɛ̀ɛ kpó náa wà ńmímá si

(Màtéwò 5:15; 6:22-23)

33Tsí Yèésù wà wí fú ŋa ró ní: À kà tɔ́ kanɖé, tsí ń ɖúkù [nàmí ká mú àwò ɖée málɛ̀]. Kà kàa bɛ́ɛ̀, à náa tɔ́ɔ gú ńǹtá-kpènkpéle, tsí ɔ̀nyà ɔ̀kã̀lɔ́ɔ̀kã̀ kpó yèé wɔlé#ɛ́ kó rírã ni. 34Ó ɖi, odzú wà kíbí kanɖé fú ara bɛ́ ni. Bí odzú-ɛ̀ɛ wà rere si, ara-ɛ̀ɛ gbo kpó náa wà ńmímá si. Ó ɖi, bí ò wà rɔ̃ odzú, ara-ɛ̀ɛ kpó náa kí nóòkùkù. 35Náàtóoríi bɛ́ɛ̀#ɛ́, ó wà ní o tsɔ́ éwo-ara-ɛ̀ɛ rere, àtsùgbée mímá yèé wà ńnɔ́-ɛ̀ɛ si#ɛ́ kó máa ɖi òkùkù.

36Bí ó dzɛ́ ní ara-ɛ̀ɛ kpó wà ńmímá si, tsí ìɖì-kã̀ kpókpó kò wà nóòkùkù#ɛ́, ara#á kpó náa wà ńmímá si kíbí mímá-kanɖé náa wà má si ńǹtá-nɛ bɛ́#ɛ́ ni.

Yèésù wà ɖáàbi fú ɔma-ɛgbɛ́-Fàrísì ŋa òŋu akɔ́nɛ nɛ́kpa-Ɔ̀ɖáyé ŋa

(Màtéwò 23:1-36; Mákò 12:38-40)

37Kíbí Yèésù wíìnyɛ̀ tã́#á, ɔma-ɛgbɛ́-Fàrísì†-kã̀ kpèé ní kó wáa dzɛŋɛ́ ńɖɔ̀-òŋu. Tsí ó dzɛ́, tsí lɔ nóòkpì-ìdzɛ#ɛ́. 38Ńǹwèrè yèé à kpé ìdzɛ#ɛ́ dzídzɛ#ɛ́, Yèésù òŋu kò wɔwɔ́ kíbí ó wà nórò gbà#á. Tsí ɔma-ɛgbɛ́-Fàrísì#ɛ́ kí dzã̀maa.

39Tsí Ɔlá-wa wà wí fúu ní: Ɛ̀ŋɛ, ɔma-ɛgbɛ́-Fàrísì ŋa, bí è wà ńnɛ̀ɛ́. È náa wɛ ànyì-kɔ̃́ŋúkɔ̃́ŋú ŋa òŋu ànyì-àwò ŋa, tsí kɔ inɔ́-ŋa dzɔ̀ɔ́. Ó ɖi, olè òŋu ɔ̀nyà-olí-inɔ́ kíkã ŋa ní è dzɛ́ ńnɔ́-ara-ŋɛ́ si#ɛ́. 40Éwo kò wà fú ŋɛ́! Kò tsi ɛnɛ yèé tse òɖe-ara-ɔ̀nyà#á ké ní tse inɔ́‐ɛ̀ gbo#ɛ́ɛ̀? 41È tédzú kɛ́ iŋɛ́ yèé wà náàwò-ŋɛ́ ŋa#á, tsí ń tsɔ̀yà fú adzìyàkú ŋa, tsí iŋɛ́-kã̀ kpókpó kàkó nyáa mú ŋɛ́ gbɛ̃ɛ̃́rĩ́ ró.

42Tsí ó wà wí fú ŋa ró ní: Ɛ̀ŋɛ ɔma-ɛgbɛ́-Fàrísì ŋa, ɛ̀rá rá ŋɛ́, iŋɛ́ yèé tse#ɛ́, è náa wà fú Ɔ̀ɖáyé nákpálà-ɛ̀kɛ́ɛwá-iŋɛ́ rṹrũ̀ ŋa. Tsí è náa gbàgbé òtítɔ́ tsítse òŋu àmúɖɔ̃̀ nínɛ́ fú Ɔ̀ɖáyé. Iŋɛ́ yèé ŋa nyí ní sì kpã́dzú ní ká wà tse#ɛ́. Ó ɖi, kò tsi ǹ ní ká máa tse àtíbɔ̀ ŋa ni.

43Ɛ̀ŋɛ ɔma-ɛgbɛ́-Fàrísì ŋa, ɛ̀rá rá ŋɛ́, iŋɛ́ yèé tse#ɛ́, bí è lɔ ńlé-ìkpàɖé-ɔma-Ìyúɖà ŋa†, è náa wà wo e dzokó ńwádzú. È náa wò gbo ní ɔ̀nyà ŋa kó wà rɔlɛ̀ kí ŋɛ́ náàbɔ̀ɔ́mɛ̀ ŋa. 44Ɛ̀rá rá ŋɛ́, iŋɛ́ yèé tse#ɛ́, è wà kíbí érì yèé ŋa à kà tse iŋɛ́-kã̀ kpókpó si ńǹtá-ŋa, tsí ká rí ŋa mà, tsí ɔ̀nyà ŋa náa wà rɛ̃̀ ńǹtá-ŋa náàrìmáa mà#á ni. Bɛ́ɛ̀ ké ní inɔ́-ŋɛ́ ŋa gbo gbɛ̃ɛ̃́rĩ́ si, tsí ɔ̀nyà ŋa kò mà#á.

45Tsí akɔ́nɛ nɛ́kpa-Ɔ̀ɖáyé†-kã̀ wà wí fúu ní: Akɔ́nɛ, kíbí ò wí bɛ́ɛ̀#ɛ́, ò wà bú àwa gbo ńnɛ̀ɛ́ nɔ̀!

46Tsí ó ní: Ɛ̃ɛ̃, ɛ̀ŋɛ, akɔ́nɛ nɛ́kpa-Ɔ̀ɖáyé ŋa gbo, ɛ̀rá rá ŋɛ́, iŋɛ́ yèé tse#ɛ́, è náa ɖá ɛ̀wɔ̀ líle ŋa fú ɔ̀nyà ŋa, tsí ɛ̀wɔ̀ ŋa#á náa ɖi arù wíwówo si ńǹtá-ŋa si, tsí à kà nyáa rùú. Tsí è kà tì fɔ̀ ní àŋa kó mɔ́wɔ́ gbè fú ŋa gìɖì gbo.

47Ɛ̀rá rá ŋɛ́, iŋɛ́ yèé tse#ɛ́, gbágbóǹgbàgbò-ŋɛ́ ŋa kpa agbáfɔ̀-Ɔ̀ɖáyé fɔ̀† ŋa wáa lɔ. Tsí báàyí#ɛ́, ɛ̀ŋɛ gbo, è ǹɖe ró, tsí wà ma érì-ɛnɛ yèé à wà kpa ŋa#á. 48Kíbí è wà tse bɛ́ɛ̀#ɛ́, ó wà nyà ɖíre ní iŋɛ́ yèé gbágbóǹgbàgbò-ŋɛ́ ŋa tse wáa lɔ#ɛ́, ó dzɔdzú-ŋɛ́ ńnɛ̀ɛ́. À kpa agbáfɔ̀-Ɔ̀ɖáyé fɔ̀ ŋa, tsí ɛ̀ŋɛ òŋu, è wà ma érì-ŋà ŋa. 49Àtsùgbée bɛ́ɛ̀ ní Ɔ̀ɖáyé wíìnyɛ̀-kã̀ òŋu ifɛ̀ɛ́nɔ́ si#ɛ́. Ó ní: Òŋu nákó bɛ agbáfɔ̀-Ɔ̀ɖáyé fɔ̀ ŋa òŋu adzíkɔ̀ ŋa wá fú ŋa, tsí à nákó kpa ɔ̀kã̀ ŋa nóòkú, tsí tsoró bá àtíbɔ̀ ŋa#á. 50Iŋɛ́ ŋa#á lɔ bɛ́ɛ̀, àtsùgbée ká bere ɛ̀ŋɛ ɔma-ìsɛ̃̀ɛ̃́ ŋa ńnɛ̀. Agbáfɔ̀-Ɔ̀ɖáyé fɔ̀ yèé ŋa kpó à wà kpa nóòkú títí ti ńǹɖònɖálɛ̀-ayé#ɛ́, 51ti ńǹtá-Àbɛ́lì† títí wáa tó ńǹtá-Sàkàríyà atsɛbɔ-Ɔ̀ɖáyé†, ɛnɛ yèé à kpa nóòkú ńkpàtá-ilé-Ɔ̀ɖáyé† náàŋírĩ-ilé#ɛ́ òŋu ìdzɛ̀bɔ#ɛ́, à nákó bèrè ŋɛ́ ńnɛ̀. Ɛ̃ɛ̃, ǹ wà wí fú ŋɛ́ ní fee, ikú-agbáfɔ̀-Ɔ̀ɖáyé fɔ̀ yèé à kpa ŋa kpó#ɛ́ ti ńɖi-ŋɛ́, tsí à nákó bere ɛ̀ŋɛ ɔma-ìsɛ̃̀ɛ̃́ ŋa ńnɛ̀.

52Ɛ̀ŋɛ akɔ́nɛ nɛ́kpa-Ɔ̀ɖáyé ŋa, ɛ̀rá rá ŋɛ́, iŋɛ́ yèé tse#ɛ́, à kɛ́ kɔ́kɔ́rɔ́ yèé à náa ń tsí èkũ̀-Ɔ̀ɖáyé mímà#á fú ŋɛ́, tsí è kò tsíi, tsí e wɔ̀ ńnɛ̀, tsí è wà ɖí ɔ̀nà fú ɛnɛ yèé ŋa wà wo ká wɔ̀ ńnɛ̀#ɛ́ gbo.

53-54Kíbí Yèésù wí bɛ́ɛ̀ tã́, tsí ǹɖe bɛ̀#ɛ́, akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa bínɔ́ kadzá, tsí wà kpɔdzú báa, tsí wà bèrèé náfɔ̀-àrɔ̀kpà àrɔ̀kpà ŋa, tsí wà ń sɔ fɛ́tsa fúu, àtsùgbée ká gbɔ́ oŋù-íbàɖí-kã̀ nárũ‐ɛ̀ gé, tsí ká ń rù néwo.

Currently Selected:

Lúkà 11: ngl

Highlight

Copy