1 Kòríntì ŋa 12

Ɔ̀ɖáyé mú iŋɛ́ ɔ̀kã̀lɔ́ɔ̀kã̀ kpó bɔwɔ́-ɛgbɛ́-Kírísítò

1Ìnàbí-mi ŋa, màa dzɔ́ŋù fú ŋɛ́ ti nára-iŋɛ́ yèé ŋa Mímí-Ɔ̀ɖáyé† náa fúnɛ#ɛ́ gbo. Ǹ kò wò ní iŋɛ́ nyɛ̀ŋɛ̀ ŋa kó kí náàrì mà fú ŋɛ́. 2È mà ní dzɔ̀ɔ́ dzɔ̀ɔ́ ńǹwèrè yèé è kè ma Ɔ̀ɖáyé#ɛ́, à kɛ́ ŋɛ́ lɔ nóòkpì-iŋɛ ŋa. Iŋɛ ŋa#á kà sì wíìnyɛ̀. Ikpá kò sì wà nɔ́wɔ́-ŋɛ́ gbo, tsí e nyáa kɔ̀. 3Ti nára-bɛ́ɛ̀#ɛ́, ǹ wà fɔ̀ fú ŋɛ́, tsí e mà ní bí Mímí-Ɔ̀ɖáyé wà ńǹtá-ɔ̀nyà-kã̀ si, tsí wà gbɛ̃́ɛ̃#ɛ́, ɛnɛ nyɛ̀ŋɛ̀ kàkó nyáa fɔ̀ láyé ní: Èhée fú Yèésù. Tsí bí Mímí-Ɔ̀ɖáyé kò wà ńǹtá-ɔ̀nyà-kã̀ gbo si, tsí wà gbɛ̃́ɛ̃#ɛ́, òŋu gbo kàkó nyáa fɔ̀ ní: Yèésù ni Ɔlá-òŋu.

4Àa gba ikpá-ɔ̀fɛ́ ŋa ńǹrɔ́ǹrɔ́. Ó ɖi, Mímí-Ɔ̀ɖáyé#ɛ́, ɛnɛ yèé fú wa ńkpá-ɔ̀fɛ́ ŋa#á, ɔ̀kã̀ntso gé ní wà#á. 5Itsɛ́ ŋa gbo wà ńǹrɔ́ǹrɔ́. Ó ɖi, Ɔlá-wa, ɛnɛ yèé àa wà tsitsɛ́#ɛ́ fú#ɛ́, ɔ̀kã̀ntso gbo gé ní wà#á. 6Kíbí à náa tsitsɛ́ ŋa#á gbo gbà#á, ó wà ńǹrɔ́ǹrɔ́. Ó ɖi, Ɔ̀ɖáyé, ɛnɛ yèé náa fú wa náàmí, tsí àa náa tsitsɛ́ ŋa#á, ɔ̀kã̀ntso gbo gé ní wà#á. Tsí òŋu ní náa tse iŋɛ́ ɔ̀kã̀lɔ́ɔ̀kã̀ kpó ńnɔ́-ɔ̀nyà kpó#ɛ́. 7Ɔ̀ɖáyé náa tse tsí à náa rí ní Mímí‐ɛ̀ náa wà tsitsɛ́ ńnɔ́-kṹnukṹ, tsí náa tse bɛ́ɛ̀, àtsùgbée kó dzɛ́ ire fú ɔ̀nyà kpó ni. 8Ɔ̀nyà-kã̀ òŋu, Mímí-Ɔ̀ɖáyé náa fúu ní kó wà wíìnyɛ̀ òŋu ifɛ̀ɛ́nɔ́. Tsí olòmírɛ̃̀ gbo, Mímí-Ɔ̀ɖáyé#ɛ́ ké náa fú òŋu gbo, tsí iŋɛ́ yèé wà ní ká mà#á, náa nyàá fɔ̀. 9Tsí olòmírɛ̃̀ gbo#ɛ́, Mímí-Ɔ̀ɖáyé#ɛ́ náa fú òŋu gbo, tsí náa nɛ́ àkaralé kpàtàkìì-kã̀ si ńǹtá-Ɔ̀ɖáyé. Tsí olòmírɛ̃̀ gbo#ɛ́, náa fú òŋu gbo ní kó wà bɔ àkɔ̃̀rɔ̃̀ ŋa. Mímí-Ɔ̀ɖáyé ɔ̀kã̀ntso#ɛ́ ké ní náa fúnɛ bɛ́ɛ̀#ɛ́. 10Náa fú olòmírɛ̃̀ gbo, tsí òŋu gbo náa wà tse iŋɛ́-àwùsì ŋa. Tsí náa fú olòmírɛ̃̀ gbo, tsí òŋu gbo náa wà gbɔ́ afɔ̀-Ɔ̀ɖáyé fɔ̀ fúnɛ. Tsí náa fú olòmírɛ̃̀ gbo, tsí òŋu gbo náa ɖáa mà ní iŋɛ́ yèé à wà fɔ̀#ɛ́ wà ti ńɖi-Ɔ̀ɖáyé nàmí ó wà ti ńbòmírɛ̃̀ ni. Tsí náa fú olòmírɛ̃̀ gbo, tsí òŋu gbo náa wà wí ìlú-òmírɛ̃̀ ŋa. Tsí náa fú olòmírɛ̃̀ gbo, tsí òŋu gbo náa wà gbɔ́ ìlú-òmírɛ̃̀ ŋa#á fɔ̀ fúnɛ. 11Tsí iŋɛ́ yèé ŋa nyí kpó#ɛ́, Mímí-Ɔ̀ɖáyé ɔ̀kã̀ntso#ɛ́ ké ní náa kpɛ̃́ ŋa fúnɛ kṹnukṹ òŋu tɛ̀ɛ̀ ńǹrɔ́-kíbí ó wùú gbà#á.

Ɛgbɛ́-Kírísítò wà kíbí ara-ɔ̀nyà ni

12Ara-ɔ̀nyà fee, iŋɛ́ ɔ̀kã̀ntso ni, tsí ìɖì ŋa wà nára#á lɔ si ńǹrɔ́ǹrɔ́. Ìɖì ŋa#á sì kpɔ̀. Ó ɖi, ara#á, iŋɛ́ ɔ̀kã̀ntso ni. Bɛ́ɛ̀ ké ní Kírísítò gbo wà#á. 13Ó ɖi, ɔma-Ìyúɖà† gbo, ɛnɛ yèé kò dzɛ́ ɔma-Ìyúɖà gbo, arú gbo, ɛnɛ yèé wà nɔ́wɔ́-ara‐ɛ̀ gbo, àwa kpó#ɛ́, à wìwɛ̀-Yèésù† fú wa, tsí àa ɖi ɔ̀nyà ɔ̀kã̀ntso gbà ńǹtá-Mímí-Ɔ̀ɖáyé† ɔ̀kã̀ntso#ɛ́, tsí ó wà kíbí gbà ńǹtá-Mímí-Ɔ̀ɖáyé#ɛ́, àwa kpó, àa gba omi-éwo-oɖò ɔ̀kã̀ntso, tsí mɔ bɛ́ ni.

14Ó ɖi fee, kò tsi ìɖì ɔ̀kã̀ntso gé ní wà nára-ɔ̀nyà#á. Ìɖì ŋa wà nára#á ńǹrɔ́ǹrɔ́. 15Ɛsɛ̀ kó fɔ̀ báàyí ní òŋu kò wà nára-ɔ̀nyà. Iŋɛ́ yèé tse#ɛ́, òŋu kò dzɛ́ ɔwɔ́. Nákó nyáa wí bɛ́ɛ̀. Ó ɖi, ìɖì-kã̀-ara#á gé ní ó sì dzɛ́ si#ɛ́. 16Tsí etí gbo kó fɔ̀ ní òŋu kò wà nára-ɔ̀nyà. Iŋɛ́ yèé tse#ɛ́, òŋu kò dzɛ́ odzú. Òŋu gbo nákó nyáa wí bɛ́ɛ̀. Ó ɖi, ìɖì-kã̀-ara#á gé ní òŋu gbo sì dzɛ́ si#ɛ́. 17Ara-ɔ̀nyà má dzɛ́ odzú gé fe, bí à má tse fáà, tsí wà gbɔ̃́ɔ̃̀rã̀? Tsí ara#á má dzɛ́ etí gbo gé fe, bí à má tse fáà, tsí wà gbɔ́mɔ́? 18Ó ɖi, Ɔ̀ɖáyé mú ìɖì kã̀kã̀, tsí ń tò si nára#á si kíbí ó wùú gbà#á ni. 19Tsí ó má dzɛ́ ní ìɖì ɔ̀kã̀ntso gé ní ara-ɔ̀nyà dzɛ́#ɛ́, kàkó tɔ́ dzɛ́ ara-ɔ̀nyà ró nɛ́. 20Ńbɛ̀ɛ́, ìɖì ŋa wà nára#á ńǹrɔ́ǹrɔ́. Ó ɖi, ara#á òŋu, ɔ̀kã̀ntso gé ni.

21Odzú kàkó nyáa fɔ̀ fú ɔwɔ́ ní iŋɛ́-kã̀ kò tsɛdzɔ́-òŋu‐ɛ̀ méèdzì. Tsí éwo gbo kàkó nyáa fɔ̀ fú ɛsɛ̀ ní iŋɛ́-kã̀ kò tsɛdzɔ́-òŋu‐ɛ̀ méèdzì. 22Kà kàa bɛ́ɛ̀, ìɖì kã̀ŋa wà nára-ɔ̀nyà, tsí àa náa tsèsérè ní à kò nɛ́ àmí tó ìɖì-àtíbɔ̀ ŋa. Ó ɖi, àŋa gbo, à sì kpã́dzú. 23Tsí ìɖì kã̀ŋa gbo wà nára#á, à kà mú ŋa kpe iŋɛ́-kã̀ tó ìɖì-àtíbɔ̀ ŋa. Ó ɖi, àa náa sì wà tɔ́dzú-ŋa tó bɛ́ɛ̀. Tsí ìɖì kã̀ŋa gbo wà, tsí àa náa rí ibɛ̀ ŋa ní kò wà ní ká kí nóòɖe, tsí àa náa múgírí, tsí wà mú iŋɛ́ bò ŋá. 24Ìɖì-ara yèé ŋa wà, tsí à náa kí nóòɖe si#ɛ́, kò bèrè ní ká mú iŋɛ́ bo àŋa bɛ́ɛ̀. Ó ɖi, Ɔ̀ɖáyé tse ara-ɔ̀nyà, tsí ìɖì yèé à kò wà ń kpe iŋɛ́-kã̀ ŋa#á, ó bu ìɖì si fú ŋa lárè. 25Ó tse bɛ́ɛ̀, àtsùgbée ara-ɔ̀nyà kó máa kpɛ̃́ níìkã̀ níìkã̀ ni. Kà kàa bɛ́ɛ̀, ìɖì-ara ŋa#á ká wà tɔ́dzú-ara-ŋà ŋa. 26Tsí bí ó dzɛ́ ní ìɖì-kã̀-ara#á wà ńǹréré si#ɛ́, ìɖì-àtíbɔ̀ ŋa náa wà gbɔ́ ɖíɖɔ̃̀ fúu. Tsí bí ó dzɛ́ gbo ní ìɖì-kã̀-ara#á wà gba nyínyɛ̀#ɛ́, ìɖì-àtíbɔ̀ ŋa gbo kpó náa wà táyè báa.

27Ɛ̀ŋɛ ní dzɛ́ ara-Kírísítò#ɛ́, tsí ɔ̀nyà kã̀kã̀ náàŋírĩ-ŋɛ́ dzɛ́ ìɖì kã̀kã̀-ara#á. 28Ńbɛ̀ɛ́, Ɔ̀ɖáyé mú ɔ̀nyà kã̀ŋa si ńwádzú fú ɛgbɛ́-Kírísítò#ɛ́ si. Náàtsɛ̃̀tsɛ̃̀#ɛ́, ó mú adzítsɛ́-Yèésù† ŋa si. Èkéèdzì‐ɛ̀#ɛ́, ó mú agbáfɔ̀-Ɔ̀ɖáyé fɔ̀† ŋa tɛ̀ ŋá. Ɛ̀kɛ́ɛta‐ɛ̀#ɛ́, ó mú akɔ́nɛ ŋa gbo tɛ̀ ŋá. Náànyì-tiŋa#á, ɛnɛ yèé ŋa náa tse iŋɛ́-àwùsì ŋa#á gbo wà. Tsí ɛnɛ yèé ŋa náa bɔ àkɔ̃̀rɔ̃̀ ŋa#á gbo wà. Tsí ɛnɛ yèé ŋa náa mɔ́wɔ́ gbè fúnɛ ŋa#á gbo wà. Tsí ɛnɛ yèé ŋa náa gbɛ̃́ ɛgbɛ́-Kírísítò ŋa#á gbo wà. Tsí ɛnɛ yèé ŋa náa wí ìlú-òmírɛ̃̀ ŋa#á gbo wà. 29Fee, àŋa kpó ní dzɛ́ adzítsɛ́-Yèésù#ɛ́ɛ̀? Nàmí àŋa kpó ní dzɛ́ agbáfɔ̀-Ɔ̀ɖáyé fɔ̀#ɛ́? Kò tsi àŋa kpó ní dzɛ́ akɔ́nɛ#ɛ́ gbo nɛ́? Tsí kò tsi àŋa kpó gbo ní dzɛ́ ɛnɛ yèé náa tse iŋɛ́-àwùsì ŋa#á nɛ́? 30Kò tsi àŋa kpó gbo ní dzɛ́ ɛnɛ yèé náa bɔ àkɔ̃̀rɔ̃̀ ŋa#á nɛ́? Kò tsi àŋa kpó gbo ní dzɛ́ ɛnɛ yèé náa wí ìlú-òmírɛ̃̀ ŋa#á nɛ́? Kò tsi àŋa kpó gbo ní náa gbɔ́ ìlú-òmírɛ̃̀ ŋa#á fɔ̀ fúnɛ#ɛ́ nɛ́? 31È múgírí, tsí e wò ní Ɔ̀ɖáyé kó fú ŋɛ́ ńkpá-ɔ̀fɛ́ yèé ŋa kpã́dzú tó bɛ́ɛ̀#ɛ́.

Ó ɖi báàyí#ɛ́, màa ɖíre ɔ̀nà-kã̀ yèé sã̀ láre àtíbɔ̀ ŋa#á fú ŋɛ́.

Currently Selected:

1 Kòríntì ŋa 12: ngl

Highlight

Copy