1 Kòríntì ŋa 11

1Ó ɖi, è náa rí mi tse ńǹrɔ́-kíbí èmi gbo ǹ wà rí Kírísítò tse#ɛ́.

Bí olí-Yèésù ŋa kpérí si, bí ó wà ní ɔnɔbɛ̃̀ɛ̃ ŋa òŋu ɔnɔkɛ̃̀ɛ̃ ŋa ká gbé gbà fáà?

2Ǹ wà nyɛ̀ ŋɛ́ fú kíbí è tɔ́ wà tédzú-mi si ró#ɛ́. Ǹ wà nyɛ̀ ŋɛ́ ní ɛ̀kɔ́ yèé ŋa à tse fú mi, tsí èmi gbo ǹ ń tse fú ŋɛ́#ɛ́, è wà ń tsitsɛ́ tse. 3Ó ɖi, ǹ wà wò ní e mà ní fee, Kírísítò ní kpeéwo fú ɔnɔkɛ̃̀ɛ̃#ɛ́, tsí ɔnɔkɛ̃̀ɛ̃ gbo kpeéwo fú ɔnɔbɛ̃̀ɛ̃, tsí Ɔ̀ɖáyé gbo kpeéwo fú Kírísítò.#11:3 À nákó nyáa gbɔ́ òkpì-kíkã̀ yèé bɛ́ gbo ní: “Ńɖi-Kírísítò ní àyɛ̀-ɔnɔkɛ̃̀ɛ̃ wà ti#ɛ́, tsí ńnɔ́-ɔnɔkɛ̃̀ɛ̃ gbo ní ɔnɔbɛ̃̀ɛ̃ fùɖá ti#ɛ́, tsí Kírísítò gbo ti ńɖi-Ɔ̀ɖáyé.” 4Bí ɔnɔkɛ̃̀ɛ̃-kã̀ wà wúùre nàmí ó wà gbɔ́ afɔ̀-Ɔ̀ɖáyé fɔ̀ fúnɛ, tsí ó mú iŋɛ́-kã̀, tsí ń bo éwo si#ɛ́, Kírísítò, ɛnɛ yèé dzɛ́ oléwo fúu#ɛ́ ní ó wà mú dzɛ anɔ́ bɛ́ɛ̀#ɛ́. 5Tsí bí ɔnɔbɛ̃̀ɛ̃-kã̀ gbo wà wúùre nàmí òŋu gbo wà gbɔ́ afɔ̀-Ɔ̀ɖáyé fɔ̀ fúnɛ, tsí kò mú iŋɛ́-kã̀, tsí ń bo éwo si#ɛ́, ɔnɔkɛ̃̀ɛ̃, ɛnɛ yèé dzɛ́ oléwo fúu#ɛ́ ní òŋu gbo wà mú dzɛ anɔ́#ɛ́. Tsí nákó wà kíbí ɛnɛ yèé fɔ̀ ní à wɔ́ kòóró fúu si bɛ́ ni. 6Bí ɔnɔbɛ̃̀ɛ̃-kã̀ kò sì mú iŋɛ́-kã̀ bo éwo ná, ni kó fá irɔ̃‐ɛ̀ bɔ̀. Bí ó kó sì dzɛ́ anɔ́ fú ɔnɔbɛ̃̀ɛ̃#ɛ́ ní kó fá irɔ̃‐ɛ̀ bɔ̀ nàmí kó wɔ́ kòóró#ɛ́, ni kó mú iŋɛ́-kã̀ bo éwo. 7Ó ɖi, kò wà ní ɔnɔkɛ̃̀ɛ̃ òŋu kó mú iŋɛ́-kã̀ bo éwo. Iŋɛ́ yèé tse#ɛ́, Ɔ̀ɖáyé ɖá ɔnɔkɛ̃̀ɛ̃, tsí ó kɛ́ ìwànwà-Ɔ̀ɖáyé òŋu ká‐ɛ̀, tsí iyì-Ɔ̀ɖáyé gbo wà ńǹtá‐ɛ̀ si. Tsí iyì-ɔnɔkɛ̃̀ɛ̃ gbo wà ńǹtá-ɔnɔbɛ̃̀ɛ̃ si. 8Ó ɖi, kò tsi ńnɔ́-ɔnɔbɛ̃̀ɛ̃ ní Ɔ̀ɖáyé ɖá ɔnɔkɛ̃̀ɛ̃ ti#ɛ́. Kà kàa bɛ́ɛ̀, ńnɔ́-ɔnɔkɛ̃̀ɛ̃ ní Ɔ̀ɖáyé ɖá ɔnɔbɛ̃̀ɛ̃ òŋu ti#ɛ́. 9Tsí Ɔ̀ɖáyé kò ɖá ɔnɔkɛ̃̀ɛ̃ fú ɔnɔbɛ̃̀ɛ̃. Ó ɖi, ɔnɔbɛ̃̀ɛ̃ ní Ɔ̀ɖáyé ɖá fú ɔnɔkɛ̃̀ɛ̃#ɛ́. 10Kíbí ó dzɛ́ bɛ́ɛ̀#ɛ́, ó wà ní ɔnɔbɛ̃̀ɛ̃ kó wà mú iŋɛ́-kã̀ bo éwo náàtsùgbé-adzítsɛ́-ɔ̀rɔ̃† ŋa. Bí ɔnɔbɛ̃̀ɛ̃ wà tse bɛ́ɛ̀#ɛ́, à nákó rí ní ɔ̀nà wà fúu, tsí kó wúùre, tsí wà gbɔ́ afɔ̀-Ɔ̀ɖáyé gbo fɔ̀. 11Tsí nódzú-Ɔlɔ́dzɔ́ òŋu#ɛ́, ɔnɔbɛ̃̀ɛ̃ kàkó nyáa gbé, tsí ɔnɔkɛ̃̀ɛ̃ kó máa wà gbèé. Tsí ɔnɔkɛ̃̀ɛ̃ gbo kàkó nyáa gbé, tsí ɔnɔbɛ̃̀ɛ̃ kó máa wà gbèé. 12Fee, ńnɔ́-ɔnɔkɛ̃̀ɛ̃ ní Ɔ̀ɖáyé ɖá ɔnɔbɛ̃̀ɛ̃ ti#ɛ́. Ó ɖi, ɔnɔbɛ̃̀ɛ̃ ní náa sì bí ɔnɔkɛ̃̀ɛ̃#ɛ́, tsí àŋa méèdzì méèdzì#ɛ́ má nára-iŋɛ́ ɔ̀kã̀lɔ́ɔ̀kã̀ kpó#ɛ́, ńɖi-Ɔ̀ɖáyé ní à ti#ɛ́.

13Ɛ̀ŋɛ ká-ŋɛ́ gìɖì è sérèé káyí. Ó sã̀ ní ɔnɔbɛ̃̀ɛ̃ kó wà wúùre fú Ɔ̀ɖáyé náàrì mú iŋɛ́-kã̀ bo éwoò? 14Tsí kíbí iŋɛ́ ŋa#á ti wà náyé gbaŋgba#á si gbà#á, nákó dzɛ́ anɔ́ fú ɔnɔkɛ̃̀ɛ̃ gbo ní irɔ̃ gúgù kó wà néwo‐ɛ̀ si nɔ̀. 15Ó ɖi ɔnɔbɛ̃̀ɛ̃ òŋu#ɛ́, iyì-kã̀ ní ó dzɛ́ fúu ní irɔ̃ gúgù kó wà néwo‐ɛ̀#ɛ́. Iŋɛ́ yèé tse#ɛ́, Ɔ̀ɖáyé ní tse irɔ̃-ìrɔ́-bɛ́ɛ̀ si néwo fúu, tsí kó bo éwo si fúu#ɛ́. 16Bí ɔ̀nyà-kã̀ wà wo kó dzìnyà ti nára-afɔ̀ yèé bɛ́#ɛ́, àwa, àa kà tse iŋɛ́-òmírɛ̃̀ náànyì-nyɛ̀ŋɛ̀. Tsí ɛgbɛ́-Ɔ̀ɖáyé ŋa gbo kpó#ɛ́, àŋa gbo, à kà tse iŋɛ́-òmírɛ̃̀.

Ɛgbɛ́-Kírísítò ńKòríntì kò wà dzɛ dzídzɛ-Ɔlá-wa kíbí ó wà ní kó dzɛɛ́ gbà#á

17Afɔ̀ yèé ǹ bòkó fɔ̀ fú ŋɛ́ báàyí#ɛ́, ǹ kò bòkó nyɛ̀ ŋɛ́. Òŋu ní wà dzɛ́ ní kíbí è náa wà kpérí#ɛ́, ìkpérí-ŋɛ́ ŋa#á, kà kàa kó wà tse ire fú ŋɛ́#ɛ́, ó wà bàdzɛ́ iŋɛ́ nára-ŋɛ́. 18Náàtsɛ̃̀tsɛ̃̀#ɛ́, ǹ gbɔ́ ní bí è kpérí, tsí bòkó sɛ̃ Ɔ̀ɖáyé#ɛ́, è náa kpɛ̃́ ɛgbɛ́#ɛ́. Tsí ǹ karalé ní iŋɛ́ yèé ǹ gbɔ́ kpó#ɛ́, akpálà-kã̀ dzɛ́ òtítɔ́. 19Tsí ó sì wà gbo ní ɛgbɛ́#ɛ́ kó kpɛ̃́, àtsùgbée ká nyáa ɖá ɛnɛ yèé ŋa wà tɛ̀ náànyì-Ɔlá-wa gìɖì gìɖì#ɛ́ mà. 20Ńbɛ̀ɛ́, ńǹwèrè yèé è náa káà kpérí si bɛ́ɛ̀#ɛ́, kò tsi dzídzɛ-Ɔlá-wa ní è náa dzɛ#ɛ́. 21Iŋɛ́ yèé tse#ɛ́, kṹnukṹ náa kɛ́ dzídzɛ tòŋu ká‐ɛ̀ gé, tsí kpée dzídzɛ nɔ́wɔ́ yíyá. Tsí ebi náa wà kpa ɔ̀nyà kã̀ŋa. Tsí olòmírɛ̃̀ ŋa òŋu náa sì wà mɔtí títí náa wà ŋɔ́ ŋa. 22Kṹnukṹ nɛ́ kpáfɛ si, tsí kó nyáa dzɛ, tsí mɔ bɛ̀ nɔ̀. Nàmí ɛgbɛ́-Ɔ̀ɖáyé ní è wà wo e ń kpe kí ŋa ńnɛ̀ɛ́#ɛ́ɛ̀? Tsí ɛnɛ yèé ŋa iŋɛ́-kã̀ kò sí nɔ́wɔ́ tiŋa gbo#ɛ́ fe, è wà ɖánɔ́ mú àŋa gbo ńnɛ̀ɛ́ nɔ̀. Bí è wò ní n wíìnyɛ̀ fú ŋɛ́ fáà? N wà nyɛ̀ ŋɛ́ɛ̀? Láyé! Ǹ kàkó nyɛ̀ ŋɛ́ fú afɔ̀ yèé òŋu.

23Ó ɖi, ɛ̀kɔ́-kã̀ wà, tsí Ɔlá-wa tse fú mi, tsí èmi gbo ǹ tseé fú ŋɛ́. Òŋu ní wà dzɛ́ ní nóoru-ɔdzɔ́ yèé à ta Yèésù Kírísítò Ɔlá-wa#á, ó kɛ́ kpɔ̃́nɔ́ banɛ́, 24tsí ɖɔ́kpɛ́ fú Ɔ̀ɖáyé, tsí ó tsɛ́ɛ, tsí wà fɔ̀ fú ŋa ní: Ara-òŋu ni. Òŋu bàkó kɛ́ɛ, tsí ń sã́ã̀bi si nárũ-ŋa.#11:24 Afɔ̀ yèé à kɔ si ńgɛ̀rɛ́kì#ɛ́ wà fɔ̀ ní: Yèé bɛ́ ni ara-òŋu yèé òŋu ń fú ŋa#á. Ó ɖi, ká gbà dzɛ, tsí ká wà tseé bɛ́ɛ̀, tsí wà ń tédzú-òŋu. 25Kíbí à dzɛŋɛ́ tã́#á, ó kɛ́ ɔtí gbo ńkɔ̃́ŋúkɔ̃́ŋú bɛ́ɛ̀ ké ró, tsí ń fú ŋa, tsí wà wí fú ŋa ní: Ɔtí yèé bɛ́ fee, ìmɔ̀lɛ̀ titɔ̃ yèé Ɔ̀ɖáyé wà tse bá ŋa#á ńnɛ̀ɛ́. Àmbara-òŋu ni, àmbara-ìmɔ̀lɛ̀#ɛ́ ni. Ká gbà mɔ, tsí àrìkã̀kã̀ yèé à nákó wà tseé bɛ́ɛ̀, tsí wà mɔɔ́ gé#ɛ́, ká wà ń tédzú-òŋu. 26Iŋɛ́ yèé tse#ɛ́, àrìkã̀kã̀ yèé à nákó wà dzɛ kpɔ̃́nɔ́#ɛ́ bɛ́ɛ̀, tsí wà mɔtí#ɛ́ gbo bɛ́ɛ̀#ɛ́, à wà dzíkɔ̀-ikú-Ɔlá-wa títí káà fú nɔ́dzɔ́ yèé nákó wá#á ńnɛ̀ɛ́.#11:26 Ìwé-Màtéwò 26:26-29, Ìwé-Mákò 14:22-25, Ìwé-Lúkà 22:14-20

27Ńbɛ̀ɛ́, bí ɔ̀nyà-kã̀ dzɛ kpɔ̃́nɔ́ nàmí ó mɔtí-Ɔlá-wa#á nɔ́ɔ̀nà kòdzɔkòdzɔ-kã̀, ɛnɛ nyɛ̀ŋɛ̀ dzàbi-ara òŋu àmbara-Ɔlá-wa ni. 28Ó ɖi, kṹnukṹ kó kpa inɔ́-ara‐ɛ̀ wò nára-kíbí ó wà gbé gbà#á. Bí ó kpa inɔ́-ara‐ɛ̀ wò bɛ́ɛ̀ tã́ ná, kó dzɛ kpɔ̃́nɔ́#ɛ́, tsí mɔtí#ɛ́ gbo. 29Iŋɛ́ yèé tse#ɛ́, bí ɔ̀nyà-kã̀ dzɛɛ́, tsí mɔɔ́ náàrì bu ìɖì si fú ara-Ɔlá-wa#á, ɛnɛ nyɛ̀ŋɛ̀ wà dzɛɛ́, tsí wà mɔɔ́ si nɔ́ɔ̀nà yèé Ɔ̀ɖáyé nákó kpɛdzɔ́ múu, tsí ɖáàbi fúu#ɛ́ ni. 30Náàtsùgbée bɛ́ɛ̀ ní ɔ̀nyà kpíkpɔ̀ náàŋírĩ-ŋɛ́ ɖi àkɔ̃̀rɔ̃̀ si, tsí ara kò le ŋá si ró#ɛ́. Náàtsùgbée bɛ́ɛ̀ ké ní ɔ̀nyà kã̀ŋa gbo kú#ɛ́. 31Àa má wà kpa inɔ́-ara-wa wò nára-kíbí àa wà gbé gbà#á, Ɔlá-wa kàá kpɛdzɔ́ mú wa. 32Ó ɖi, Ɔlá-wa òŋu náa fɛtí fú wa, tsí tsɔ̀ wá ńkòtsã́, àtsùgbée kó máa kpɛdzɔ́ mú wa, tsí ɖáàbi fú wa má ɔ̀nyà-ayé yèé ŋa ni.

33Ìnàbí-mi ŋa, kíbí ó dzɛ́ bɛ́ɛ̀#ɛ́, bí è kpérí, tsí è wà wo e dzɛ dzídzɛ-Ɔlá-wa#á, è náa ɖóro ɖe ara-ŋɛ́ ŋa. 34Bí ebi wà kpa ɔ̀nyà-kã̀, ɛnɛ nyɛ̀ŋɛ̀ kó dzɛŋɛ́ ńlé. Ńbɛ̀ɛ́, è kàkó kpérí, tsí Ɔ̀ɖáyé kó kpɛdzɔ́ mú ŋɛ́ ró. Ó ɖi, ti nára-afɔ̀ yèélèé ŋa#á òŋu, bí ǹ wá, àa nákó fɔ̀ ŋá.

Currently Selected:

1 Kòríntì ŋa 11: ngl

Highlight

Copy