YouVersion Logo
Search Icon

មារកោស 15

15
ឞ្រាស​យេឆូ  ​គុ​ឞើស​នាប់​កោរាញ​ក្វ៝ង់​ពីលាត 
(មថ ២៧:១-២, ១១-១៤; លក ២៣:១-៥; យហ ១៨:២៨-៣៨)
1កាស​អោយ​តៃ​អើម​អោយ​មពោល​កោរាញ​ជាន​ឞ្រាស មពោល​កោរាញ​ឞ្រី​យូដា  ផូង​នើម​នតី​នាវ​វៃ​ផូង​អីឆ្រាអែល  នទ្រែល​មា​ផូង​កោរាញ​ជាន​ការ​ផូង​ឞ្រី​យូដា  ​ទឹង​លែៈ​តឹម​ម៝ប់​ឞាល់​តឹម​ញច្រាៈ​នាវ ជេសរី​ដាៈ​ឞូ​ចាប់​ឞ្រាស​យេឆូ  ​លែវ​ញជុន​ពាង់​មា​កោរាញ​ក្វ៝ង់​ពីលាត  ​អី​ឞូនុយ្ស​ផូង​រោម​។ 2ពីលាត  ​អោប​ឞ្រាស​យេឆូ  ៖ “ងាន់​លាស​មៃ​កាដាច់​ផូង​អីឆ្រាអែល  ​បាស?” ឞ្រាស​យេឆូ  ​អើស​មា​ពាង់​លាស៖ “អើ កើត​នាវ​មៃ​លាស​នាវ​អី​នៃ”។ 3មពោល​កោរាញ​ជាន​ឞ្រាស​នតោន​ឞ្រាស​យេឆូ  ​ជាន​តីស​អ៝ក់​នតីល​ងាន់។ 4ជេសរី​ពីលាត  ​អោប​ពាង់​ទូ​តឹ​ជឹត៖ “ល៝ង់​ខាន់​ពាង់​នតោន​មៃ​ជាន​តីស​អ៝ក់​នតីល​ងាន់ ម៝ស​នាវ​ទឹង​មៃ​មោ​អុច​អើស?” 5ឞ្រាស​យេឆូ  ​មោ​អុច​អើស​ដេៈ​រ៝ នទ្រី​ទឹង​ពីលាត  ​គែស​នាវ​នទ្រ៝ត់​ហីស​រាហ៝ល់។#នម ៣៨:១៤-១៦; អេឆា ៥៣:៧
ពីលាត  ​តេៈ​ទោយ្ស​ងខឹត​ឞ្រាស​យេឆូ 
(មថ ២៧:១៥-២៦; លក ២៣:១៣-២៥; យហ ១៨:៣៩—១៩:១៦)
6អាប់​នាម់​តា​នារ​ញេត​បុន​នហ៝ត ពីលាត  ​វៃ​មអើក​ទូ​ហ្វេ​ឞូនុយ្ស​ទោយ្ស​ឞូ​ម៝ស​អី​ផូង​ប៝ន​លាន​ទែ​ទាន់។ 7គែស​ទូ​ហ្វេ​ឞូ​ក្លោ​រាញា​បារាបាស  ​ឞូ​ក្រុង​តា​នទ្រូង។ ឞូ​ញុប​ពាង់​នទ្រែល​មពោល​ឞូនុយ្ស​អី​លែៈ​តឹម​រាទ៝ង់​ដាស​ផូង​រោម  នទ្រែល​មា​លែៈ​ងខឹត​ឞូនុយ្ស។ 8ផូង​ប៝ន​លាន​លែវ​ឞាល់​ហាន់​ម៝ប់​មា​ពីលាត  ​ទាន់​ពាង់​បើក​ទូ​ហ្វេ​ឞូនុយ្ស​ទោយ្ស​តឹង​មា​នាវ​វៃ​ពាង់​ជាន​អ៝ន់​មា​ប៝ន​លាន។ 9ពីលាត  ​អោប​ខាន់​ពាង់​លាស៖ “នទ្រី​ខាន់​អៃ​មៃ​អុច​អ៝ន់​គ៝ប់​បើក​លើយ​អី​កាដាច់​ផូង​អីឆ្រាអែល  ​ឞើស?” 10ពាង់​លាស​កើត​នៃ យ៝រ​មា​ពាង់​លែៈ​គឹត​ជេស​នូយ្ស​នហ៝ម់​មពោល​កោរាញ​ជាន​ឞ្រាស​មោ​នាច នទ្រី​ទឹង​ខាន់​ពាង់​ញជុន​ឞ្រាស​យេឆូ  ​អ៝ន់​មា​ពាង់​នៃ។ 11មពោល​កោរាញ​ជាន​ឞ្រាស​លែវ​ឞាល់​ញឆោច​ផូង​ប៝ន​លាន ងខើង​មា​ដាៈ​ពីលាត  ​បើក​លើយ​បារាបាស  12ជេសរី​ពីលាត  ​លាស​មា​ផូង​អី​នៃ​ទូ​តឹ​ជឹត៖ “នទ្រី​អា​មើម​ខាន់​អៃ​មៃ​អ៝ន់​គ៝ប់​ជាន​មា​ឞូនុយ្ស​អី​ខាន់​អៃ​មៃ​ក្វាល់​លាស​«កាដាច់​ផូង​អីឆ្រាអែល  »​អ្យា?” 13ឞូ​នតែរ​ទ្រើវ​លាស៖ “ងខឹត​ពាង់​តា​ឆី​តឹម​រាកាង់!” 14ពីលាត  ​អោប​តៃ​លាស៖ “ឞូនុយ្ស​អ្យា​ម៝ស​នាវ​តីស​តា​ពាង់?” ផូង​ប៝ន​លាន​នតែរ​ទ្រើវ​លើ​មា​ហោ​លាស៖ “ងខឹត​ពាង់​តា​ឆី​តឹម​រាកាង់!”#ការ ៣:១៣-១៤; ១៣:២៧-២៨ 15អាច​មា​ពីលាត  ​អុច​ជាន​តឹង​នាវ​ផូង​ប៝ន​លាន​ទាន់​នើស គៃ​មា​អ៝ន់​ខាន់​ពាង់​រាម់​មអាក ពាង់​បើក​លើយ​បារាបាស  ។ ជេសរី​ពាង់​ដាៈ​តាហែន​រាពាត់​ឞ្រាស​យេឆូ  ​មា​ម៝ង់​រាឆែ នហ៝​មា​ជាវ​អ៝ន់​តាហែន​ងខឹត​អោឞាល់​តា​ឆី​តឹម​រាកាង់។
តាហែន​ងគ្រើស​ងគ្រាប់​មា​ឞ្រាស​យេឆូ 
(មថ ២៧:២៧-៣១; យហ ១៩:២-៣)
16ជេសរី​ផូង​តាហែន​តេក​លែវ​ឞ្រាស​យេឆូ  ​ហាន់​លាប់​តា​ជ៝ង់​គូង​ញីស​កោរាញ​ក្វ៝ង់។ ត៝ត់​តា​នៃ​ក្វាល់​លែៈ​ផូង​តាហែន#១៥:១៦៖ នតីល​ផូង​តាហែន​អី​នៃ​គែស​ត៝ត់ ៦០០ នុយ្ស។​អ៝ន់​តឹម​ម៝ប់​ឞាល់។ 17ឞូ​ទែ​ឆ៝ៈ​អាវ​ជ៝ង​ចាង់​អី​តឹម​ឞាន​មា​អាវ​កាដាច់​ញឆ៝ស​អ៝ន់​អោឞាល់​ញឆ៝ស ជេសរី​ឆ៝ៈ​រាតាវ​ល៝ក​បារ់​ជាន​មោក​កាដាច់​នទោ​តា​ឞោក​អោឞាល់​រី។ 18ជេសរី​តាហែន​លែវ​ឞាល់​ងើយ​ងគ្រើស​ងគ្រាប់​មា​អោឞាល់​លាស៖ “ហើយ​កាដាច់​ផូង​អីឆ្រាអែល  ! ហេន​យើក​មៃ”។ 19ជេសរី​តាហែន​ទែ​ឆ៝ៈ​ម៝ង់​រែស​រាពាត់​តា​ឞោក​ពាង់ ឆ៝ស​ទាក​ទីវ​តា​អោឞាល់​នហ៝​មា​ជាន​លាស​ច៝ន​កោម៝ក់​យើក​មឞាស​មា​ពាង់​ដ៝ង់។#អេឆា ៥០:៦ 20ជេស​ងគ្រើស​ងគ្រាប់​មា​អោឞាល់​កើត​នទ្រី ជេសរី​តាហែន​ទ្រ៝ស​លើយ​អាវ​ចាង់​ឞើស​ឆាក់​ពាង់ ព្លឹ​ញឆ៝ស​តៃ​អាវ​ពាង់​នើម​នើស ជេសរី​តេក​លែវ​អោឞាល់​អា​នតុក​ងខឹត​តា​ឆី​តឹម​រាកាង់។
តាហែន​ងខឹត​ឞ្រាស​យេឆូ  ​តា​ឆី​តឹម​រាកាង់
(មថ ២៧:៣២-៤៤; លក ២៣:២៦-៤៣; យហ ១៩:១៧-២៧)
21រ៝ៈ​ត្រ៝ង​នៃ​គែស​ទូ​ហ្វេ​ឞូ​ក្លោ​អី​តាៈ​ឞើស​ប៝ន​កីរេន  ​ពាង់​តាៈ​ឞើស​ឞ្រី​លាប់​អា​ប៝ន។ តាហែន​ទែ​ញច៝ប់​អោឞាល់​តូយ​ឆី​តឹម​រាកាង់​ឞ្រាស​យេឆូ  ។ ពាង់​អី​នៃ​រាញា​ឆីមោន  ​អី​ឞឹ​អាលេកឆាន់ត្រុស  នទ្រែល​មា​អី​ឞឹ​រូផុស  #រម ១៦:១៣ 22ជេសរី​តាហែន​លែវ​ឞ្រាស​យេឆូ  ​ត៝ត់​តា​នតុក​អី​ឞូ​រាញា «កោលកោថា  » រាឞ្លាង​លាស​«នតុក​នតីង​ឞោក»។ 23ឞូ​ឆ៝ៈ​នទ្រាញ់​ព្លៃ​យុងយារ​ប៝ន​លាយ​ដាស​ទាក​ឆី​តាង់​ទូ​នតីល​អី​ឞូ​ក្វាល់​លាស​«មឹរ  »​អ៝ន់​ពាង់​ញេត#១៥:២៣៖ ឞូ​អុច​អ៝ន់​គៃ​មា​មោ​អីរ​ជី​នោក​ឞូ​ងខឹត។‌​ពាង់​មោ​អុច​អោស​ញេត។#នម ៦៩:២១ 24ជេស​រី​តាហែន​ទែ​ងខឹត​អោឞាល់​តា​ឆី​តឹម​រាកាង់ នហ៝​មា​ឆ៝ៈ​ញុប​នទើ​ញច្រ៝ស​គៃ​មា​តឹម​ពាៈ​ឞាល់​ខ៝​អាវ​ឞ្រាស​យេឆូ  #នម ២២:១៨ 25តា​ម៝ង​ឆឹន​អោយ​តាហែន​ងខឹត​ពាង់​តា​ឆី​តឹម​រាកាង់។ 26ឞូ​ព្លា​កាដារ​ទូ​រាលាត​ញចីស​មឞើស​នាវ​តីស​ពាង់​លាស៖ «ពាង់​អ្យា​កាដាច់​ផូង​អីឆ្រាអែល  »។#មក ១៥:២ 27តា​នៃ​គែស​ដ៝ង់​ឞារ​ហៃ​ឞូនុយ្ស​នតុង ឞូ​ទែ​ងខឹត​តា​ឆី​តឹម​រាកាង់​កើត​ឞ្រាស​យេឆូ  ​ដ៝ង់ អី​ទូ​ហ្វេ​អ៝ន់​ឞើស​មា​ពាង់ ទូ​ហ្វេ​ជឹត​អ៝ន់​ឞើស​ច្យៅ។#លក ២៣:៣៩-៤៣ 28[នាវ​ត៝ត់​អ្យា​តឹម​ទី​មា​នាវ​លែៈ​គែស​ញចីស​តា​នាវ​កោរាញ​ឞ្រាស​ងើយ​លាស៖ «ពាង់​អី​នៃ​ឞូ​កើប​នទ្រែល​ឞូនុយ្ស​តីស»។#១៥:២៨៖ ឆ៝ម់បុត​អើម​អី​ញចីស​មា​តី​អាបាៈ​មោ​អោស​គែស​ត្រ៝ង​អ្យា។]#អេឆា ៥៣:១២; លក ២២:៣៧ 29លែៈ​ឞូនុយ្ស​អី​ឞ្រោៈ​រ៝ៈ​នៃ ងគ្រើស​ងគ្រាប់​រាតែស​ឞោក​មា​អោឞាល់ នហ៝​មា​លាស៖ “ហើយ​ឞូនុយ្ស​លាស​រើយ្ស​លើយ​ញីស​ជាន​ឞ្រាស​មា​កោរាញ​ឞ្រាស ជាន​តៃ​អី​មហែ​ពែ​នារ​ជេស។#នម ២២:៨; ១០៩:២៥; យហ ២:១៩ 30លាស​នទ្រី​រាក្លាយ្ស​អេង​ឆាក់​មៃ​នើម​ជុរ​ឞើស​ឆី​តឹម​រាកាង់​នៃ​ហ៝ម់!” 31មពោល​កោរាញ​ជាន​ឞ្រាស នទ្រែល​មា​ផូង​នើម​នតី​នាវ​វៃ​ផូង​អីឆ្រាអែល  ​លែវ​ឞាល់​ងើយ​ងគ្រើស​មា​ពាង់​កើត​នៃ​ដ៝ង់ ខាន់​ពាង់​លាស៖ “ពាង់​លែៈ​កើល​អ៝ន់​មា​ឞូ​អេងៗ តីស​មា​ឆាក់​ពាង់​នើម​មោ​អោស​ទើយ​កើល។ 32អ៝ន់​ពាង់​អី​ឞ្រាស​ក្រីស  ​ជេង​ឞូនុយ្ស​លែៈ​កោរាញ​ឞ្រាស​ទែ​កើយ្ស​ងាន់ ពាង់​កាដាច់​ផូង​អីឆ្រាអែល  ​ជុរ​ឞើស​ឆី​តឹម​រាកាង់​អាបៃ​រី អ៝ន់​ហេន​ឆៃ​នហ៝​មា​ញឆីង​ដ៝ង់!” ឞូនុយ្ស​អី​ឞូ​ងខឹត​កេង​ឞ្រាស​យេឆូ  ​នៃ មឺច​រាម៝ត​អោឞាល់​ដ៝ង់។#មក ៨:១១
ឞ្រាស​យេឆូ  ​ខឹត
(មថ ២៧:៤៥-៥៦; លក ២៣:៤៤-៤៩; យហ ១៩:២៨-៣០)
33ត៝ត់​នារ​ងក្លាង​ឞោក​ទោ​មា​លាម​ឞ្រី​ទាក​អី​នៃ​ត្រោក​គែស​ង៝​ទាទេ​នហ៝​មា​ត៝ត់​ម៝ង​ពែ​កេង​មាង់។#អាម ៨:៩ 34តា​ម៝ង​ពែ​កេង​មាង់ ឞ្រាស​យេឆូ  ​នតែរ​ទុត​ហោ​លាស​តា​នាវ​ងើយ​ហេឞ្រើ  ៖ “អេល៝យ អេល៝យ លាមា​ឆាបាច់​ថានី  ?” នាវ​អ្យា​រាឞ្លាង​លាស «អើ​កោរាញ​ឞ្រាស​គ៝ប់ អើ​កោរាញ​ឞ្រាស​គ៝ប់ ម៝ស​នាវ​មៃ​នត្លើយ​គ៝ប់#នម ២២:១ 35ឞូ​បាបាៈ​អី​គុ​តា​នៃ​តាង់​នាវ​ពាង់​នតែរ​នើស​វិ​អ្យាត់ ឞូ​លាស៖ “អោ ពាង់​ក្វាល់​អេលីយា  ​អី​ឞូនុយ្ស​នតើយ្ស​នាវ​ងើយ​កោរាញ​ឞ្រាស​ឞើស​កាល់​អែ​នើស”។ 36គែស​ទូ​ហ្វេ​ឞូ​ក្លោ​ហាន់​ញច្វាត់​ឆ៝ៈ​ឞ៝ក​យុក​តា​ទាក​ឆ្រាត#១៥:៣៦៖ «ទាក​ឆ្រាត» មោ​លាស «នទ្រាញ់​អ្យាស»។ នទ្រាញ់​ព្លៃ​យុងយារ​ប៝ន​លាស​មោ​កុប​អ៝ន់​អ្វែស នទ្រាញ់​ព្លៃ​យុងយារ​ប៝ន​អី​នៃ​ជេង​ឆ្រាត​មោ​ហោម​កាស នោក​នៃ​ឞូ​តាច់​ថ៝ក។​ពូត​តា​ចោង​ម៝ង់​នទឹ​អ៝ន់​ពាង់​ញេត នហ៝​មា​ងើយ​លាស៖ “ក៝ប់​អ្វាញ់​ប៝ត់ គឹត​អេលីយា  ​ហាន់​ញជុរ​ពាង់​ឞើស​ឆី​តឹម​រាកាង់​មោ​លាស​មោ”។#នម ៦៩:២១ 37ជេសរី​ឞ្រាស​យេឆូ  ​នតែរ​ទុត​ហោ នហ៝​មា​រ៝ស​នហ៝ម់​ក្ល៝ក់។ 38តា​ម៝ង​នៃ​ឞ៝ក​អី​ញចីង​តា​ជ្រោ​ទុត​ក្ល៝ស​អ្វែស​តា​ត្រោម​ញីស​ជាន​ឞ្រាស​មា​កោរាញ​ឞ្រាស​ទោ​មា​ហេក​ច្វីក​ជេង​ឞារ នតើម​ឞើស​លើ​នហ៝​មា​ត៝ត់​អា​ទ៝ង់។#នង ២៦:៣១-៣៣; ហេឞ ១០:១៩-២០ 39ទូ​ហ្វេ​កោរាញ​តាហែន​រោម  ​អី​ទ៝ក់​ឞើស​នាប់​ឞ្រាស​យេឆូ  ​ឆៃ​ពាង់​រ៝ស​នហ៝ម់​កើត​នៃ កោរាញ​តាហែន​អី​នៃ​ងើយ​លាស៖ “ឞូ​ក្លោ​អ្យា​អី​ក៝ន​កោរាញ​ឞ្រាស​ងាន់​យា!”#មក ១:១-២, ១១; ៣:១១; ៥:៧; ៩:៧; ១៤:៦១-៦២; យហ ១:៣៤; ការ ៩:២០; នម ២:៧ 40គែស​មពោល​ឞូ​អូរ​បាបាៈ​អ្វាញ់​ឞើស​ងាយ។ តា​មពោល​ឞូ​អូរ​អី​នៃ គែស​មារី  ​អី​តាៈ​ឞើស​ប៝ន​មាដាលា  គែស​មារី  ​អី​មេៈ​យាកើ  ​ជេៈ នទ្រែល​មា​អី​មេៈ​យោឆេ  នទ្រែល​មា​ឆាលោមេ  ​ដ៝ង់។#លក ៨:២-៣ 41លែៈ​ឞូ​អូរ​អី​នៃ​តឹង​កើល​ឞ្រាស​យេឆូ  ​នតើម​ឞើស​ពាង់​គុ​តា​ឞ្រី​កាលីលេ  ។ គែស​អ៝ក់​ឞូ​អូរ​អេង​ជឹត ខាន់​ពាង់​លែៈ​រាងោច​តឹង​ពាង់​ត៝ត់​តា​ប៝ន​ក្វ៝ង់​យេរូឆាលឹម 
នាវ​ញជ៝រ​ឞ្រាស​យេឆូ  ​តា​ត្រោម​មោច
(មថ ២៧:៥៧-៦១; លក ២៣:៥០-៥៦; យហ ១៩:៣៨-៤២)
42លែៈ​នាវ​អី​នៃ​ត៝ត់​តា​នារ​នទ្រាប់​អី​នារ​អេ​ល៝រ​មា​នារ​ឆាបាត់  #១៥:៤២៖ នារ​អី​នៃ​ឞូ​ក្វាល់​លាស​«នារ​នទ្រាប់» យ៝រ​លាស​ឞូ​នទ្រាប់​នទើ​មា​រាលូ​តា​នារ​ឆាបាត់  ​អី​នារ​រាលូ​ផូង​អីឆ្រាអែល  ។ លែៈ​ត៝ត់​កេង​មាង់​នារ​អី​នៃ​ជេស‌#នវ ២១:២២-២៣ 43ជេសរី​គែស​ទូ​ហ្វេ​ឞូ​ក្លោ​រាញា​យោឆែប  ​អី​តាៈ​ឞើស​ប៝ន​អារីមាថេ  ពាង់​ឞូនុយ្ស​លឺ​ក្វ៝ង់​តា​មពោល​កោរាញ​ជាន​ការ​ផូង​អីឆ្រាអែល  ។ ពាង់​ហោម​ក៝ប់​ត៝ត់​នាវ​កោរាញ​ឞ្រាស​ម៝ត់​អ្វាញ់​លែៈ​ឞូនុយ្ស​ដ៝ង់ នទ្រី​នូយ្ស​នហ៝ម់​ពាង់​ឞាញ់​ងាន់​ហាន់​ម៝ប់​ពីលាត  ​ទាន់​ឆ៝ៈ​ឆាក់​ឞ្រាស​យេឆូ  ​គៃ​មា​ត៝ប់។ 44ត៝ត់​ពាង់​ម៝ប់​ពីលាត  ពីលាត  ​គែស​នាវ​មឹន​នទ្រ៝ត់​ហីស​រាហ៝ល់​ងាន់​តាង់​ងក៝ច​លាស​ឞ្រាស​យេឆូ  ​លែៈ​ខឹត​ហើយ្ស​កើត​នៃ។ ពាង់​ក្វាល់​កោរាញ​តាហែន​អី​ងខឹត​ឞ្រាស​យេឆូ  ​នៃ​នើស គៃ​មា​គឹត​នហេល​លាស​ឞ្រាស​យេឆូ  ​លែៈ​ខឹត​ងាន់​មោ​លាស​មោ#១៥:៤៤៖ គែស​អ៝ក់​ឞូនុយ្ស​អី​ខឹត​តា​ឆី​តឹម​រាកាង់​គែស​ឞារ​ពែ​នារ​មើ​ទឹង​ខឹត។45ជេស​ពាង់​តាង់​លែៈ​នាវ​តាហែន​នៃ​ងក៝ច ពាង់​អ៝ន់​យោឆែប  ​ឆ៝ៈ​ឆាក់​ឞ្រាស​យេឆូ  46យោឆែប  ​រាវាត់​ឞ៝ក​លាយ្ស​ងលាង ជេសរី​ពាង់​ញជុរ​ឆាក់​ឞ្រាស​យេឆូ  ​ឞើស​ឆី​តឹម​រាកាង់ ញជ៝រ​ពូត​មា​ឞ៝ក​អី​នៃ​តេៈ​តា​ត្រោម​មោច​លុ​ទូ​នតុក​អី​ឞូ​ទែ​លោក​តា​លុ​ក្លេរ​មា​ជាន​ត្រោម​មោច។ ជេសរី​ពាង់​រាលាៈ​ទូ​មល៝ម់​លុ​រាទ៝ល់​ត្រោម​មោច​នៃ។ 47មារី  ​អី​តាៈ​ឞើស​ប៝ន​មាដាលា  នទ្រែល​មា​មារី  ​អី​មេៈ​យោឆេ  ​លែៈ​គុ​តា​នៃ​ដ៝ង់ លែៈ​អ្វាញ់​ឆៃ​នតុក​ឞូ​តេៈ​ឆាក់​ឞ្រាស​យេឆូ  ​នើស។

Currently Selected:

មារកោស 15: cmoK

Highlight

Share

Copy

None

Want to have your highlights saved across all your devices? Sign up or sign in