មាថាយ 4

ឞ្រាសយេឆូ ទើយដាសនាវនទើម

(មក ១:១២-១៣; លក ៤:១-១៣)

1ជេសរីឞ្រាសហ្វេងអ្វែសលែវឞ្រាសយេឆូ ហាន់តាឞ្រីរាទាស គៃមាអ៝ន់ឆាតាង់ អីកោរាញមពោលឞ្រាសអ្យើសនទើមពាង់។#ហេឞ ៤:១៥ 2ឞ្រាសយេឆូ អ៝ត់ឆោងឆា ៤០ នាង់ ៤០ នារ ឞើសកើយនៃពាង់ជីង៝តងាន់រ៝។#នង ៣៤:២៨; ១កក ១៩:៨ 3ជេសរីឆាតាង់ អីឞូក្វាល់លាស«កោរាញនទើម»ដ៝ង់ ហាន់ទាច់អាពាង់ លាសមាពាង់៖ “លាសមៃក៝នកោរាញឞ្រាសងាន់ងេន ល៝ង់មៃដាៈលុអាបាៈអ្យាអ៝ន់ជេងនទើឆោងឆា!” 4យើនមាឞ្រាសយេឆូ អើសមាពាង់៖ “មោអោស។ លែៈឞូញចីសជេសតានាវកោរាញឞ្រាសងើយ៖

«ឞូនុយ្សមោអោសរេសតាៈឞើសនទើឆោងឆាទើម‌

រេសតាៈឞើសទឹងលែៈនាវងើយលោសតាៈឞើសមឞូងកោរាញឞ្រាស»”។#នវ ៨:៣

5ជេសឞើសនៃកោរាញមពោលឞ្រាសអ្យើសអីនៃលែវឞ្រាសយេឆូ លាប់តាប៝នក្វ៝ង់យេរូឆាលឹម អីប៝នក្ល៝សអ្វែស ជេសរីអ៝ន់ពាង់តាកាលើច៝រញីសជានឞ្រាសមាកោរាញឞ្រាស តានតុកអីទុតព្រេសនៃ។ 6ពាង់លាសមាឞ្រាសយេឆូ ៖ “លាសមៃក៝នកោរាញឞ្រាសងាន់ងេន ល៝ង់មៃញឆាត់ជឹតទ៝ង់ឆូ យ៝រលាសលែៈឞូញចីសជេសតានាវកោរាញឞ្រាសងើយ៖

«កោរាញឞ្រាសដាៈមពោលតោងពារ់ពាង់នើមអ៝ន់កើលមៃ»

គែសញចីសដ៝ង់៖

«តីតោងពារ់ទ្រើមៃ‌

មោអោសអ៝ន់ជ៝ង់មៃគែសញចិញមាលុ»”#នម ៩១:១១-១២។

7 ឞ្រាសយេឆូ អើសមាពាង់៖ “តានាវកោរាញឞ្រាសងើយលែៈញចីសកើតនអា៖ «លើយអោសរាល៝ងនាវទើយកោរាញឞ្រាសអីឞ្រាសខាន់អៃមៃយើកមឞាស»#នវ ៦:១៦”។ 8ជេសរីកោរាញមពោលឞ្រាសអ្យើសអីនៃលែវឞ្រាសយេឆូ ហាវតាកាលើយោកទុតព្រេស ញហើអ៝ន់ពាង់ឆៃទឹងលែៈឞ្រីទាកតានែសនតូអ្យា នទ្រែលមាទឹងលែៈនទើខ្លៃតាឞ្រីទាកនៃ។#មថ ១៦:២៦ 9ពាង់លាសមាឞ្រាសយេឆូ ៖ “លាសមៃពាន់យើកមឞាសមាគ៝ប់ ទឹងលែៈនទើអីនៃគ៝ប់អ៝ន់មាមៃម៝ត់អ្វាញ់ទាទេ!” 10ឞ្រាសយេឆូ លាស៖ “ហើយឆាតាង់ អ៝ន់មៃទូហ៝ម់! យ៝រលាសតានាវកោរាញឞ្រាសងើយលែៈញចីសជេស៖

«ដាៈខាន់អៃមៃយើកមឞាសមាកោរាញឞ្រាសអីឞ្រាសខាន់អៃមៃនើម‌

ជានការអ្យាត់នាវទូហ្វេពាង់អីនៃទើម»#នវ ៦:១៣”។

11ជេសរីកោរាញមពោលឞ្រាសអ្យើសអីនៃទូឞើសឞ្រាសយេឆូ នៃ ទោមាគែសផូងតោងពារ់កោរាញឞ្រាសវាច់តាឞ្រាសយេឆូ ឆើមកើលជានការអ៝ន់នទើឆោងឆាមាពាង់។#១កក ១៩:៥-៦; ហេឞ ១:៦, ១៤

ឞ្រាសយេឆូ នតើមមឞើសនាវមហែមហានអ្វែសតាឞ្រីកាលីលេ

(មក ១:១៤-១៥; លក ៤:១៤-១៥)

12ត៝ត់ឞ្រាសយេឆូ គឹតយោហាន-បាប់តែម លែៈឞូក្រុងតានទ្រូង ជេសរីពាង់លោសឞើសឞ្រីយូដា ព្លឹគុតៃតាឞ្រីកាលីលេ ។#មថ ១៤:៣-៤ 13ពាង់ហាន់តាប៝ននាឆារែត ជេសរីហាន់គុតាប៝នកាពើនិម អីទាច់កេងងលៅក្វ៝ង់កាលីលេ #៤:១៣៖ ងលៅអីអ្យាក្វ៝ង់ងាន់ ជ៝ងក្លាប់លាស ២៣ កីលោមែត ទិក្លាប់លាស ១៣ កីលោមែត។ តានហារ់ឞ្រីមពោលឆាបូលោន ដាសមាឞ្រីមពោលនាប់តាលី ។ ឞារមពោលអីនៃជេងមពោលអីឆ្រាអែល តា ១២ មពោលខាន់ពាង់ដ៝ង់។ 14ពាង់គុតានៃគៃមាតឹមទីដាសនាវងើយអេឆាយ អីឞូនុយ្សនតើយ្សនាវងើយកោរាញឞ្រាសកាល់អែនើសលែៈញចីសជេស៖

15«អើឞ្រីមពោលឆាបូលោន នទ្រែលមាឞ្រីមពោលនាប់តាលី

អីរ៝ៈត្រ៝ងរ៝ៈមែងទាកងលៅក្វ៝ង់កាលីលេ អើឞ្រីមពែសកាល់តីទាករាលាយយោរដាន់ ឞ្រីកាលីលេ នតុកអ៝ក់ផូងអីមោទីផូងអីឆ្រាអែល គុ!#៤:១៥៖ នតុកទឹងលែៈអីគែសតាត្រ៝ង ១៥ ជេងតាឞ្រីកាលីលេ ទាទេ។

16ផូងប៝នលានតានៃខាន់ពាង់តឹមឞានមាគុតានាវង៝ ក្លាចមានាវខឹត មោគែសនាវរានើម‌

ខាន់ពាង់តឹមឞានមាឆៃនាវអាងទុតក្វ៝ង់ អាងងាន់ អ៝ន់ខាន់ពាង់គែសនាវរានើមយ៝រមានទើអីគែសតាឞ្រីខាន់ពាង់»#អេឆា ៩:១-២។#លក ១:៧៨-៧៩; យហ ៨:១២

17នតើមឞើសនោកនៃឞ្រាសយេឆូ មឞើសងក៝ច៖ “រាគ៝ល់ហ៝ម់នូយ្សនហ៝ម់អ្យើសខាន់អៃមៃ យ៝រលាសនាវកោរាញឞ្រាសម៝ត់អ្វាញ់ឞើយមាត៝ត់ងាន់រ៝”។#មថ ៣:២

ឞ្រាសយេឆូ ក្វាល់ព្វាន់នុយ្សមពោលអ៝សម៝ន

(មក ១:១៦-២០; លក ៥:១-១១)

18គែសទូនាររីឞ្រាសយេឆូ ហាន់ឞ្រោៈរ៝ៈមែងទាកងលៅក្វ៝ង់កាលីលេ ពាង់ឆៃឞារហៃអ៝សនោគុឆែងជាលតាទាកនៃ ឆីមោន អីឞូក្វាល់ពេត្រោស ដ៝ង់ នទ្រែលមាអ៝ន់ទ្រេ ។ ឞារហៃខាន់ពាង់អីនៃជេងឞូនុយ្សជានការវាង់កាទើម។#មថ ១៦:១៨ 19ជេសរីឞ្រាសយេឆូ លាសមាខាន់ពាង់៖ “ហើយអ៝សនោ ហោៈតឹងគ៝ប់ គ៝ប់អ៝ន់ខាន់មៃហាន់ជ៝យឞូនុយ្សអ្យាត់នាវគ៝ប់ តឹមឞានមាឆែងកា”។#មថ ២៨:១៩-២០ 20ទោមាឞារហៃខាន់ពាង់រីនត្លើយជាលព្រុងតានៃ ជេសរីតឹងឞ្រាសយេឆូ រ៝។#មថ ១៩:២៧-២៩ 21ហាន់ត៝ត់អានាប់ឞ្រាសយេឆូ ឆៃឞារហៃអ៝សនោអាអេងជឹត យាកើ នទ្រែលមាយោហាន អីក៝នឆេបេដេ ។ ខាន់ពាង់ទោលគុឆុលជាលតាទូក នទ្រែលមាអីឞឹខាន់ពាង់នើម។ ឞ្រាសយេឆូ ក្វាល់ជាៈឞារហៃខាន់ពាង់នៃហាន់នទ្រែលពាង់។ 22ជេសរីខាន់ពាង់នត្លើយទូក នត្លើយឞឹខាន់ពាង់នើមតារី ហាន់តឹងឞ្រាសយេឆូ រ៝។

ឞ្រាសយេឆូ នតុមនតី នទ្រែលមាជានឞាសជី

(លក ៦:១៧-១៩)

23 ឞ្រាសយេឆូ ហាន់លាមឞ្រីកាលីលេ ពាង់នតីផូងប៝នលានតាញីសរាបុនផូងអីឆ្រាអែល ខាន់ពាង់នើម។ ពាង់មឞើសងក៝ចនាវមហែមហានអ្វែសមានាវកោរាញឞ្រាសម៝ត់អ្វាញ់ ជេសរីជានឞាសទឹងលែៈនាវជីអាប់នតីល។#មថ ៩:៣៥ 24ឞូលឺឞ្រាសយេឆូ លាមឞ្រីឆីរី ដ៝ង់អីតឹមទាច់មាឞ្រីកាលីលេ ។ ជេសរីឞូញជុនលែវទឹងលែៈឞូនុយ្សអីគែសនាវជីអាពាង់ ឞូនុយ្សគែសនាវជីក្វែតអាប់នតីល ឞូនុយ្សឞ្រាសអ្យើសលើស ឞូនុយ្សឞ្រុត នទ្រែលមាឞូនុយ្សរាវែនជ៝ង់រាវែនតី ពាង់ជានឞាសទាទេ។ 25ជេសរីគែសឞូនុយ្សផូងអ៝ក់តឹងពាង់ ខាន់ពាង់តាៈឞើសឞ្រីកាលីលេ តាៈឞើសឞ្រីដេកាពោលីស តាៈឞើសប៝នក្វ៝ង់យេរូឆាលឹម តាៈឞើសឞ្រីយូដា នទ្រែលមាតាៈឞើសកាល់តីទាករាលាយយោរដាន់ ។

Currently Selected:

មាថាយ 4: cmoK

Highlight

Copy