យោហាន 7

ទីម៝ងឞ្រាសយេឆូ ហាន់ញេតបុនតាប៝នយេរូឆាលឹម

1ជេសឞើសនៃ ឞ្រាសយេឆូ ហាន់អ៝ក់នតុកតាឞ្រីកាលីលេ ពាង់មោអុចអោសហាន់តាឞ្រីយូដា យ៝រលាសមពោលកោរាញផូងអីឆ្រាអែល អុចតឹងងខឹតពាង់។#យហ ៥:១៨ 2នោកនៃនារញេតបុនផូងអីឆ្រាអែល ឞើយមាត៝ត់ នៃជេងបុនឞូក្វាល់លាស«បុនគុតាចូនងគីងឆី» នាវញេតបុនអីនៃជ៝ៈផាមនារ។#កល ២៣:៣៣-៤៣ 3អ៝សៗឞូក្លោឞ្រាសយេឆូ លាសមាពាង់៖ “មៃលោសឞើសអ្យាហាន់អាឞ្រីយូដា រីហ៝ម់ គៃមាអ៝ន់មពោលអ៝សម៝នមៃឆៃនទើខ្លៃមៃជាន។ 4យ៝រលាសឞូម៝សអុចអ៝ន់ឞូលឺឆាក់ពាង់នើម មោអោសជានការមពោន។ លាសមៃជានការនាវខ្លៃអេងៗ ញហើអ៝ន់ទឹងលែៈឞូនុយ្សឆៃទោ!” 5អីអ៝សៗឞ្រាសយេឆូ នើមនៃ ខាន់ពាង់មោដ៝ង់ញឆីងមាពាង់។ 6ឞ្រាសយេឆូ លាសមាខាន់ពាង់៖ “ម៝ងគ៝ប់ហាន់អេហ៝ៈអោសត៝ត់ យើនមាខាន់មៃទាសអុចខាន់មៃនើម។#យហ ២:៤; ១២:២៣ 7ឞូនុយ្សគុតានែសនតូអ្យាមោអោសទើយឞ្យាញ់មាខាន់មៃ យើនមាខាន់ពាង់ឞ្យាញ់មាគ៝ប់ យ៝រលាសគ៝ប់មឞើសនហេលងាន់នទើខាន់ពាង់ជានទុតអ្យើសងាន់។#យហ ៣:១៩-២០ 8ខាន់មៃហាន់លាប់ញេតបុនរីទោ គ៝ប់មោហាន់អោស យ៝រលាសគ៝ប់អេហ៝ៈត៝ត់ទីម៝ងហាន់”។ 9ជេសឞ្រាសយេឆូ ងើយនៃ ពាង់ហោមគុតាឞ្រីកាលីលេ នៃដ៝ង់។

ឞ្រាសយេឆូ ហាន់តាប៝នយេរូឆាលឹម នោកនារញេតបុន

10ត៝ត់មាអ៝សៗឞ្រាសយេឆូ នៃលែៈហាន់ញេតបុនលែៈផ្យៅ ជេសរីពាង់ហាន់ឞើសកើយដ៝ង់ យើនមាមោអោសអ៝ន់ឞូឆៃ ពាង់ហាន់អេងរាក្លាក់។ 11នោកញេតបុននៃ មពោលកោរាញផូងអីឆ្រាអែល អោបឞូ៖ “អាសពាង់មោឆៃ?”#យហ ១១:៥៦ 12តាផូងប៝នលាន គែសអ៝ក់ឞូនុយ្សតឹមងើយឆ្វីសលាសមាឞ្រាសយេឆូ អាបាៈលាស៖ “ពាង់ជេងឞូនុយ្សអ្វែសងាន់” អាបាៈលាស៖ “មោអោស ពាង់ជេងឞូនុយ្សមរោសរាលាម់ផូងប៝នលាន”។#យហ ៧:៤៥-៤៩; ៩:១៦ 13មោគែសអោសឞូនុយ្សឞាញ់ងើយងក៝ចឞ្រាសយេឆូ យ៝រលាសក្លាចមពោលកោរាញផូងអីឆ្រាអែល ។#យហ ៩:២២; ១២:៤២

14ត៝ត់លែៈងគូលញេតបុននៃ ឞ្រាសយេឆូ ហាន់តាប៝នក្វ៝ង់យេរូឆាលឹម លាប់តាជ៝ង់គូងញីសជានឞ្រាស ជេសរីនតីផូងប៝នលានតានៃ។ 15មពោលកោរាញផូងអីឆ្រាអែល ខាន់ពាង់នទ្រ៝ត់ហីសរាហ៝ល់ងាន់មោវ៝ត់អោស ខាន់ពាង់តឹមលាស៖ “ឞូនុយ្សអីនៃមោព្រ៝តអោសម៝ប់លាប់នតី មើមទឹងពាង់គឹតងាន់នាវកោរាញឞ្រាសនៃ?”#មក ៦:២; លក ២:៤៧ 16ឞ្រាសយេឆូ លាស៖ “នាវគ៝ប់នតីលាសអ្យា មោទីអោសលោសតាៈឞើសនាវគ៝ប់នើម អ្យាលោសតាៈឞើសកោរាញឞ្រាសនើមតើមញជ្វាល់អ៝ន់គ៝ប់វាច់។ 17លាសឞូម៝សអុចជានតឹងនាវកោរាញឞ្រាសអុច ពាង់គឹតរ៝នាវគ៝ប់នតីលាសអ្យាលោសតាៈឞើសកោរាញឞ្រាសនើម មោលាសលោសតាៈឞើសឆាក់គ៝ប់នើម។ 18ឞូម៝សងើយនាវតាៈឞើសឆាក់ពាង់នើម ពាង់អុចនហាវអេងឆាក់ពាង់នើមទើម យើនមាឞូម៝សអុចនហាវមានើមតើមដាៈពាង់ហាន់ ពាង់អីនៃងើយងាន់ មោគែសអោសមរោស។#យហ ៥:៤១-៤៤; ៨:៥០ 19ចែមោឆេ កាល់អែនើសលែៈអ៝ន់នាវវៃមាខាន់អៃមៃ យើនមាមោគែសអោសទូហ្វេឞូនុយ្សតាផូងខាន់មៃញអោតនាវវៃពាង់ងាន់ងេន។ លាសនទ្រីម៝សកោៈខាន់មៃអុចងខឹតគ៝ប់?”#យហ ១:១៧; ការ ៧:៥៣; រម ២:១៧-២៤ 20ផូងប៝នលានអើសមាពាង់៖ “មៃគែសឞ្រាសអ្យើសគុតាមៃរ៝ ទឹងមៃងើយកើតនទ្រី យ៝រលាសមោគែសអោសឞូនុយ្សអុចងខឹតមៃ”។#យហ ៨:៤៨; ១០:២០ 21ឞ្រាសយេឆូ លាសខាន់ពាង់៖ “គ៝ប់លែៈជានការទូនតីលតានារឆាបាត់ អីនាររាលូផូងឞ៝ន់នៃនើស ទឹងលែៈខាន់អៃមៃនទ្រ៝ត់ហីសរាហ៝ល់។#យហ ៥:១-១៨ 22ចែមោឆេ លែៈដាៈខាន់អៃមៃជានក៝សនតោមាអ៝សឞេឞូក្លោ - អីទីងាន់ផូងចែឞ៝ន់ដាៈជានក៝សនតោអីនៃ មោគែសអោសមោឆេ ដាៈ - ជេសរីខាន់អៃមៃជានក៝សនតោអ៝ន់ឞូតានារឆាបាត់ អីនាររាលូដ៝ង់។#៧:២២៖ នាវវៃមោឆេ ដាៈផូងអីឆ្រាអែល ក៝សនតោក៝នឞូក្លោតានារផាមជេសគុអ៝ស ខាន់ពាង់ហោមជានតានារផាមអីនៃឞ៝លលាសនារឆាបាត់ កាដោយ។ 23លាសខាន់អៃមៃជានក៝សនតោអ៝ន់ឞូតានារឆាបាត់ មោគែសអោសតីសដាសនាវវៃមោឆេ ដាៈ លាសនទ្រីមើមទឹងខាន់អៃមៃងខើងមាជីនូយ្សមាគ៝ប់ នាវគ៝ប់ជានឞាសឞូនុយ្សជីតានារឆាបាត់ ?#នន ១៧:១០-១២; កល ១២:៣ 24លើយទឹងអោសលាសឞូជានតីសអីឆៃកាលើនតោទើម អ៝ន់ខាន់អៃមៃគឹតនហេលរីមើទើយកើបតីសទី”។

ឞ្រាសយេឆូ ជេងឞ្រាសក្រីស ងាន់

25គែសផូងប៝នលានអាបាៈអីគុរេសតាប៝នក្វ៝ង់យេរូឆាលឹម នៃលាស៖ “គឹតពាង់អីនៃឞូតឹងជ៝យអុចងខឹតនើសបាស?#យហ ៥:១៨ 26អាបៃអ្យាពាង់គុនតីលាសតាងក្លាងឞាល់ផូង មើមទឹងផូងកោរាញឞ៝ន់មោលាសពាង់? គឹតលែៈផូងកោរាញកើបពាង់ជេងឞ្រាសក្រីស ហើ? 27លាសឞ្រាសក្រីស វាច់ ឞូលាសមោគែសអោសឞូនុយ្សគឹតឞើសតាៈនតុកពាង់វាច់។ តីសមាឞូនុយ្សអ្យាលែៈឞ៝ន់គឹតឞើសតាៈនតុកពាង់វាច់”។#យហ ៦:៤២ 28ឞ្រាសយេឆូ ហោមគុនតីលាសឞូតាជ៝ង់គូងញីសជានឞ្រាសនៃ ជេសរីពាង់នតែរទាង់ងាន់ ពាង់លាស៖ “អើ ខាន់អៃមៃតឹមលាសនទ្រាង់ខាន់អៃមៃនើម ខាន់អៃមៃលែៈគឹតនាល់គ៝ប់ លែៈគឹតឞើសតាៈនតុកគ៝ប់វាច់ដ៝ង់។ យើនមាគ៝ប់មោអោសវាច់តឹងឆាក់គ៝ប់នើមអុច។ កោរាញឞ្រាសនើមតើមញជ្វាល់គ៝ប់ ពាង់ជានងាន់តឹងនាវពាង់មឞើសនឹង ខាន់អៃមៃមោអោសគឹតនាល់ពាង់។#យហ ៨:៥៥; ១៧:២៥ 29យើនមាគ៝ប់គឹតនាល់ពាង់ យ៝រលាសគ៝ប់វាច់តាៈឞើសពាង់ ពាង់ដាៈគ៝ប់វាច់”។ 30នោកនៃឞូអុចញុបឞ្រាសយេឆូ យើនមាមោគែសអោសឞូនុយ្សញុបពាង់ យ៝រលាសអេហ៝ៈត៝ត់ទីនារកោរាញឞ្រាសអ៝ន់។#យហ ៨:២០; ១២:២៣ 31តាផូងប៝នលាននៃគែសអ៝ក់ឞូនុយ្សលែៈញឆីងមាឞ្រាសយេឆូ ខាន់ពាង់តឹមលាសនទ្រាង់ខាន់ពាង់៖ “លាសឞូនុយ្សអ្យាមោអោសទីឞ្រាសក្រីស លាសហោមគែសឞ្រាសក្រីស វាច់តៃ គឹតពាង់ទើយជាននាវខ្លៃអ៝ក់រាលាវមាឞូនុយ្សអ្យាបាស?”

ឞូដាៈផូងតាហែនហាន់ញុបឞ្រាសយេឆូ

32ផូងផារីឆី តាង់ផូងប៝នលានងើយបុកទុកឆ្វីសងក៝ចឞ្រាសយេឆូ កើតនអៃ។ ជេសរីមពោលកោរាញជានឞ្រាស នទ្រែលមាផូងផារីឆី ដាៈផូងតាហែនអីម៝ត់ញជ្រាង់ញីសជានឞ្រាស#៧:៣២៖ មោលាស «ផូងកើលជានការតាញីសជានឞ្រាស»។ អាប់នតុកអេងកើតនៃដ៝ង់។ហាន់ញុបឞ្រាសយេឆូ ។ 33ខាន់ពាង់ហាន់ត៝ត់តារី ឞ្រាសយេឆូ លាស៖ “គ៝ប់គុនទ្រែលខាន់អៃមៃហោមទូប្ល៝ត់ទើម ជេសរីគ៝ប់មរាព្លឹឆឹតតៃតានើមតើមញជ្វាល់គ៝ប់នើស។#យហ ១២:៣៥; ១៣:៣៣ 34ខាន់អៃមៃតៃជ៝យគ៝ប់ យើនមាមោឆៃ យ៝រលាសនតុកគ៝ប់ហាន់ ខាន់អៃមៃមោអោសទើយហាន់”។ 35ជេសរីមពោលកោរាញផូងអីឆ្រាអែល មោវ៝ត់តឹមលាសនទ្រាង់ខាន់ពាង់៖ “អាសនតុកហាន់ពាង់អីរី ទឹងពាង់លាសឞ៝ន់ជ៝យពាង់មោឆៃ? អើមពាង់អុចហាន់តាឞ្រីអេងតឹងផូងអីឆ្រាអែល អីគុចាសច្រាយនទ្រែលផូងអីមោទីផូងអីឆ្រាអែល ជេសរីនតីលាសមាផូងអីមោទីផូងអីឆ្រាអែល លាស? 36នាវពាង់លាស៖ «ខាន់អៃមៃតៃមរាជ៝យគ៝ប់ យើនមាមោឆៃ» ជេសរីពាង់លាស៖ «នតុកគ៝ប់ហាន់ ខាន់អៃមៃមោអោសទើយហាន់» ម៝សគែសនាវខ្លៃលាសព្រែអីនៃ?”

ទាករាលាយអ៝ន់នាវរេស

37ត៝ត់នារញេតបុនងគ្លែៈទុត នារអីនៃជេងនារខ្លៃងាន់ ឞ្រាសយេឆូ ទ៝ក់ឞើសនាប់ផូងប៝នលាន ជេសរីពាង់នតែរទាង់ងាន់៖ “ឞូម៝សជីហីរទាក វាច់ហ៝ម់តាគ៝ប់ ជេសរីញេត។#កល ២៣:៣៦; អេឆា ៥៥:១ 38ឞូម៝សញឆីងមាគ៝ប់ គែសទាករាលាយអ៝ន់នាវរេសហ៝ចលោសតាពាង់ នទ្រីគែសញចីសតានាវកោរាញឞ្រាសងើយ”។#អេឆា ៥៨:១១ 39នាវឞ្រាសយេឆូ ងើយមាទាករាលាយអីនៃ ពាង់អុចងើយមាឞ្រាសហ្វេងអ្វែស។ ឞូម៝សញឆីងមាឞ្រាសយេឆូ ពាង់អីនៃឆ៝ៈទើនឞ្រាសហ្វេងអ្វែសគុនទ្រែល។ យើនមានោកនៃកោរាញឞ្រាសអេហ៝ៈអោសអ៝ន់ឞ្រាសហ្វេងអ្វែសគុនទ្រែលឞូនុយ្ស យ៝រលាសឞ្រាសយេឆូ អេហ៝ៈខឹតទ៝ក់រេសលាប់តានាវច្រេកលើបពាង់នើម។#យហ ១៤:១៦-១៧; ២០:២២

នាវមឹនអេងៗអីឞូគែសមឹនមាឞ្រាសយេឆូ

40ត៝ត់មាផូងប៝នលានតាង់នាវឞ្រាសយេឆូ ងើយនៃ ឞូនុយ្សអាបាៈលាស៖ “ពាង់អីនៃរ៝ឞូនុយ្សនតើយ្សនាវងើយកោរាញឞ្រាសអីមោឆេ លែៈញចីសកាល់អែនើស ពាង់មរាវាច់តានែសនតូអ្យា”។#នវ ១៨:១៥, ១៨ 41ឞូនុយ្សអាបាៈលាស៖ “ពាង់អីនៃរ៝ឞ្រាសក្រីស ”។ យើនមាគែសឞូនុយ្សអាបាៈរាលាច់៖ “ឞ្រាសក្រីស គឹតមាលោសតាៈឞើសឞ្រីកាលីលេ លាស?#យហ ១:៤៦ 42យ៝រលាសតានាវកោរាញឞ្រាសងើយលាស ឞ្រាសក្រីស ទែសឞើសរាន៝យទែសកាដាច់ដាវីត នទ្រែលមាលោសតាៈឞើសប៝នបេតលេហឹម អីនតុកប៝នទែសកាដាច់ដាវីត នើមបាស?”#មកា ៥:២; ១ឆា ១៧:១២ 43នទ្រីជានអ៝ន់ផូងប៝នលានគែសនាវតឹមងខាសងខាតឞាល់ យ៝រមាឞ្រាសយេឆូ ។ 44គែសឞូនុយ្សអាបាៈអុចញុបឞ្រាសយេឆូ យើនមាមោគែសអោសឞូនុយ្សញុបពាង់។

មពោលកោរាញផូងអីឆ្រាអែល មោអុចញឆីងមាឞ្រាសយេឆូ

45ជេសរីផូងតាហែនអីម៝ត់ញជ្រាង់ញីសជានឞ្រាសព្លឹឆឹតតាមពោលកោរាញជានឞ្រាស នទ្រែលមាផូងផារីឆី រី។ ផូងអីនៃអោបផូងតាហែន៖ “ម៝សកោៈខាន់មៃមោញុបពាង់លែវតាអ្យា?”#យហ ៧:៣២ 46ផូងតាហែនអីនៃអើស៖ “ហេនមោគែសអោសញុបពាង់ យ៝រលាសហេនមោវៃឆៃឞូនុយ្សឞ្លាវងើយនតីកើតពាង់អីនៃ”។#មថ ៧:២៨-២៩ 47ផូងផារីឆី លាសខាន់ពាង់៖ “ខាន់មៃលែៈអ្យាត់ដ៝ង់នាវមរោសពាង់ឞើស? 48តាផូងកោរាញក្វ៝ង់ នទ្រែលមាទឹងលែៈផូងផារីឆី មោគែសអោសទូហ្វេឞូនុយ្សញឆីងមាពាង់។ 49យើនមាផូងប៝នលានអីនៃ ខាន់ពាង់មោអោសគឹតនាវវៃផូងឞ៝ន់។ ទឹងលែៈផូងអីនៃកោរាញឞ្រាសលែៈរាតាប់ងាន់រ៝!”#នវ ២៧:១៤-២៦ 50គែសទូហ្វេរាញានីកោដេម ពាង់ជេងផូងផារីឆី ដ៝ង់ អាល៝រនើសពាង់លែៈហាន់តឹមម៝ប់មាឞ្រាសយេឆូ ពាង់អោបផូងផារីឆី ៖ 51“តឹងមានាវវៃផូងឞ៝ន់ លាសឞ៝ន់អេហ៝ៈអោសតាង់ឞូនុយ្សតីសនើមងើយ អេហ៝ៈអោសគឹតនហេលនាវពាង់ជាន អើមទើយផាតទោយ្សពាង់លាស?”#នវ ១:១៦-១៧; ១៧:៦ 52ផូងផារីឆី នៃអើសមាពាង់៖ “មៃងើយតឹមឞានមៃជេងឞូនុយ្សឞ្រីកាលីលេ រាលូកម៝ល់ដ៝ង់។ ល៝ង់មៃអ្វាញ់តានាវកោរាញឞ្រាសងើយ មោគែសអោសទូហ្វេឞូនុយ្សនតើយ្សនាវងើយកោរាញឞ្រាសលោសតាៈឞើសឞ្រីកាលីលេ ”។#២កក ១៤:២៥ 53[ជេសឞើសនៃខាន់ពាង់ព្លឹឆឹតតាញីសជៃខាន់ពាង់នើម។]

Currently Selected:

យោហាន 7: cmoK

Highlight

Copy