នាវនតើម 48
48
យាកោបអ៝ន់គែសជេងមាក៝នយោឆែប
1ឞើសកើយនៃ គែសឞូមឞើសមាយោឆែបឞឹពាង់ជី។ យោឆែបហាន់ច៝បឞឹពាង់ ពាង់លែវក៝នឞូក្លោពាង់ឞារហៃហាន់នទ្រែលពាង់នើម៖ មានាឆេ នទ្រែលមាអេប្រាអីម។ 2ឞូមឞើសមាយាកោប៖ “ក៝នមៃយោឆែបហាន់ច៝បមៃ”។ យាកោបអីឞូក្វាល់អីឆ្រាអែលដ៝ង់ញឆ្រោយ្សទ៝ក់គុតាគ្រែរី 3ជេសរីលាសមាយោឆែប៖ “កោរាញឞ្រាសនើមអីទុតគែសនាវទើយ ពាង់វាច់អ៝ន់គ៝ប់ឆៃពាង់តាប៝នលុសឞ្រីកានាន ពាង់អ៝ន់គែសជេងមាគ៝ប់។#២៨:១២-១៩ 4កោរាញឞ្រាសលាសមាគ៝ប់៖ «តៃគ៝ប់ជានអ៝ន់មៃគែសអ៝សគែសក៝នឞឹករឹអ៝ក់ងាន់ នហ៝មាគែសអ៝ក់ផូងឞូនុយ្សតាៈឞើសមៃ។ តៃគ៝ប់អ៝ន់ឞ្រីអ្យាមាក៝នឆៅមៃ ជេងនតុកមាខាន់ពាង់នើមនហ៝រ៝»។#២៨:១៣ 5ក៝នឞូក្លោមៃឞារហៃទែសតាឞ្រីអេឆីប ទោលគ៝ប់អេហ៝ៈត៝ត់តាអ្យា កើបជេងក៝នគ៝ប់ អេប្រាអីម នទ្រែលមាមានាឆេ ខាន់ពាង់អីនៃជេងក៝នគ៝ប់ តឹមឞានមារូបេន នទ្រែលមាឆីមោនដ៝ង់។ 6ក៝នមៃទែសឞើសកើយឞើសកើយនៃ អីនៃកើបក៝នមៃ ខាន់ពាង់ឆ៝ៈទើននែសតានែសអេប្រាអីម នទ្រែលមាមានាឆេដ៝ង់។ 7ទោលគ៝ប់ព្លឹឆឹតតាៈឞើសឞ្រីពាដាន-អារាម#៤៨:៧៖ «ពាដាន-អារាម» មោលាស៖ «ពាដាន»។ រាចែលមេៈមៃខឹតតាតីគ៝ប់នើម ទាច់កេងប៝នអេប្រាតាឞ្រីកានាន គ៝ប់ត៝ប់មេៈមៃរ៝ៈត្រ៝ងហាន់ជឹតប៝នអេប្រាតា”។ អេប្រាតាជេងប៝នបេតលេហឹម។#៣៥:១៦-២០
8 អីឆ្រាអែលឆៃក៝នឞូក្លោយោឆែប ពាង់អោប៖ “ឞូម៝សឞារហៃនៃ?” 9យោឆែបអើស៖ “ខាន់ពាង់ក៝នគ៝ប់ កោរាញឞ្រាសអ៝ន់មាគ៝ប់តាឞ្រីអ្យា”។ អីឆ្រាអែលលាសមាពាង់៖ “លែវខាន់ពាង់ហាន់ទាច់តាគ៝ប់អ្យា គ៝ប់ឞែមាទាន់កោរាញឞ្រាសអ៝ន់នាវគែសជេងមាខាន់ពាង់”។ 10ទោលនៃមាត់អីឆ្រាអែលលែៈង៝ អ្វាញ់មោហោមអោសឆៃ យ៝រលាសឆាក់ពាង់លែៈរាញ។ យោឆែបលែវខាន់ពាង់ហាន់ទាច់តាអីឆ្រាអែល ជេសរីពាង់អូត នទ្រែលមាចុមអីឆៅៗពាង់រី។ 11អីឆ្រាអែលងើយមាយោឆែប៖ “អាល៝រនើស គ៝ប់មោគឹតលាសហោមឆៃមុសមាត់មៃនអា យើនមាអាបៃអ្យាកោរាញឞ្រាសអ៝ន់គ៝ប់ឆៃនអ៝ប់មារាន៝យទែសមៃជឹត”។ 12ជេសរីយោឆែបតេកក៝នពាង់ឞារហៃអីនៃបាសដាសកោម៝ក់ឞឹពាង់ ជេសរីច៝នម៝នកោម៝ក់ពាន់អានែស។ 13ជេសនៃយោឆែបលែវក៝នពាង់ហាន់ទាច់តាអីឞឹតៃជឹត ពាង់អ៝ន់អេប្រាអីមមពែសឞើសមាពាង់នើម ជេងមពែសឞើសច្យៅអីឆ្រាអែល មានាឆេមពែសឞើសច្យៅពាង់នើម ជេងមពែសឞើសមាអីឆ្រាអែល។ 14អីឆ្រាអែលតេៈតី ពាង់រាព្លាច់តីមាតេៈតាឞោកអេប្រាអីមអីអ៝ស ជេសរីពាង់តេៈតីច្យៅតាឞោកមានាឆេជេងក៝នឞោកទាក ឞ៝លលាសមានាឆេជេងក៝នឞោកទាកកាដោយ អីឆ្រាអែលជានកើតនៃពាង់លែៈគឹតនហេលនានេៈ។ 15ជេសរីអីឆ្រាអែលទាន់កោរាញឞ្រាសអ៝ន់គែសជេងមាយោឆែប ពាង់លាស៖
“ទាន់កោរាញឞ្រាសអីឞ្រាសអាឞ្រាហាម់ នទ្រែលមាអីឞ្រាសអីឆាក់វៃយើកមឞាស
ទាន់កោរាញឞ្រាសអីម៝ត់ញជ្រាង់គ៝ប់នតើមឞើសជេៈត៝ត់អាបៃអ្យា អីតឹមឞានមាឞូនុយ្សច្យាប់ម៝ត់ញជ្រាង់មពោមពា(ឆ្យុម)ផូងពាង់នើម
16ទាន់តោងពារ់កោរាញឞ្រាសនើមអីលែៈរាក្លាយ្សជេសគ៝ប់ឞើសអាប់នតីលនាវជេរ ទាន់ពាង់អ៝ន់គែសជេងមាក៝នឞូក្លោឞារហៃអ្យា
អ៝ន់ឞូហោមកាសគឹតមារាញាឆាក់គ៝ប់ រាញាឆាក់អាឞ្រាហាម់ ជេងចែ នទ្រែលមារាញាឆាក់អីឆាក់ឞឹគ៝ប់ យ៝រមាឞារហៃខាន់ពាង់អ្យា។
ទាន់អ៝ន់មាឞារហៃខាន់ពាង់អ្យាគែសអ៝សគែសក៝នឞឹករឹអ៝ន់អ៝ក់ងាន់តានែសនតូអ្យា”។#២៨:១៣
17 យោឆែបឆៃឞឹពាង់តេៈតីឞើសមាតាឞោកអេប្រាអីម ពាង់មោអោសមអាក។ ពាង់ក្វាន់តីឞឹពាង់តឹមរាគ៝ល់ឞើសឞោកអេប្រាអីមតេៈតាឞោកមានាឆេ។ 18យោឆែបមឞើសមាឞឹពាង់៖ “មោអោសទីកើតនៃអើឞឹ អីអ្យាក៝នឞោកទាក មៃតេៈតីមាមៃតាឞោកពាង់”។ 19ឞឹពាង់មោអោសអ្យាត់ ពាង់លាសមាយោឆែប៖ “អើនោ គ៝ប់លែៈគឹត គ៝ប់លែៈគឹតជេសមានាឆេជេងក៝នឞោកទាក ពាង់តៃគែសទូផូងក្វ៝ង់ដ៝ង់។ យើនមាអេប្រាអីមគែសទូផូងក្វ៝ង់រាលាវពាង់ងាន់។ រាន៝យទែសអេប្រាអីមមរាអ៝ក់ផូងអេងៗក្វ៝ង់ៗងាន់”។#នក ១:៣២-៤៣; នវ ៣៣:១៧; យោឆ ១៧:១៤; យេរ ៣១:២០; នន ២៧:១-៣៣ 20នារនៃអីឆ្រាអែលអ៝ន់គែសជេងមាខាន់ពាង់ឞារហៃអីនៃ ពាង់លាស៖
“ជឹតនាប់តៃ ទឹងលែៈផូងអីឆ្រាអែល មរាទាន់កោរាញឞ្រាសអ៝ន់នាវគែសជេងមាឞូកើតនអា៖
«ទាន់កោរាញឞ្រាសជានអ៝ន់មៃជេងតឹមឞានមាអេប្រាអីម តឹមឞានមាមានាឆេ»”។
កើតនទ្រីអីឆ្រាអែលកើបអេប្រាអីមខ្លៃរាលាវដាសមាមានាឆេ។#ហេឞ ១១:២១ 21អីឆ្រាអែលងើយមាយោឆែប៖ “គ៝ប់ឞើយមាខឹតជេស យើនមាកោរាញឞ្រាសមរាគុនទ្រែលខាន់មៃ នទ្រែលមាលែវខាន់មៃព្លឹឆឹតតៃតាឞ្រីផូងចែខាន់មៃ។ 22គ៝ប់អុចពាៈនែសអ៝ន់មៃក្វ៝ង់រាលាវដាសមាផូងអ៝សនោមៃ ជេងនែសទាច់តាប៝នឆីកែមនៃ នតុកអីគ៝ប់លែៈទើយពីតតឹមលើសដាសផូងអាមោរីមាដាវ មានាទុតគ៝ប់នើមនៃនើស”។#យហ ៤:៥
Currently Selected:
នាវនតើម 48: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
