នាវនតើម 43
43
បែនយាមឹនហាន់តាឞ្រីអេឆីប នទ្រែលមានោៗពាង់
1នាវជីង៝តក្វ៝ង់តាឞ្រីកានាននៃលើមាហោលើមាហោងាន់។ 2ត៝ត់មាលែៈឆាឞារាវាត់តាៈឞើសឞ្រីអេឆីប នៃនើស យាកោបលាសមាអ៝សក៝នពាង់៖ “ហាន់ព្លឹរាវាត់តៃឞាអាបាៈតាឞ្រីអេឆីប រីហ៝ម់”។ 3យូដាអើសមាឞឹពាង់៖ “ឞូនុយ្សអីនៃលាសមាហេននអាងាន់៖ «លាសខាន់មៃមោលែវអ៝សទុតខាន់មៃហាន់តាអ្យា គ៝ប់មោអ៝ន់ខាន់មៃម៝ប់គ៝ប់អោស»។#៤២:១៥, ៣៤ 4អើឞឹ លាសមៃអ៝ន់ពាង់ហាន់នទ្រែលហេន នទ្រីមើទឹងហេនហាន់រាវាត់ឞា។ 5យើនមាលាសមៃមោអ៝ន់ពាង់ហាន់ ហេនមោហាន់ដ៝ង់ យ៝រលាសឞូនុយ្សនៃលែៈលាសមាហេន៖ «លាសខាន់មៃមោលែវអ៝សទុតខាន់មៃហាន់តាអ្យា គ៝ប់មោអ៝ន់ខាន់មៃម៝ប់គ៝ប់អោស!»” 6អីឆ្រាអែលអីឞូក្វាល់យាកោបដ៝ង់លាសមាខាន់ពាង់៖ “ហៃ ម៝សញជោលាសខាន់មៃជានអ្យើសមាគ៝ប់ មឞើសងក៝ចមាឞូនុយ្សនៃលាសហោមគែសអ៝សទុតទូហ្វេហៃ!” 7ខាន់ពាង់អើស៖ “ឞូនុយ្សអីនៃអោបហេនហាច់មពឹលឹនតីលងាន់ នទ្រែលមាអោបនទុលមពោលឞ៝ន់ ពាង់លាស៖ «ឞឹខាន់មៃហោមរេសដ៝ង់? ខាន់មៃហោមគែសអ៝សនោដ៝ង់?» ជេងហេនអើសកើតនាវពាង់អោបនៃ អើមហេនគឹតលាសពាង់ដាៈអ៝សហាន់តាឞ្រីអេឆីប លាស?” 8យូដាទាន់មាអីឆ្រាអែលឞឹពាង់រី៖ “អើឞឹ មៃអ៝ន់អ៝សនៃហាន់នទ្រែលគ៝ប់ទោ។ នទ្រីហេនហាន់អាបៃអ្យារ៝ គៃមាឞ៝ន់រេស លើយអ៝ន់ខឹត នអ៝ប់មាមៃ នអ៝ប់មាឆៅៗមៃ នអ៝ប់មាហេនដ៝ង់។ 9គ៝ប់ឞាញ់ត៝នពាង់មាមៃ លាសមោអោសឆៃគ៝ប់ញជុនពាង់មាមៃ លាសនទ្រីគ៝ប់គែសទោយ្សដាសមៃលែៈទូញជារ់រេសគ៝ប់។ 10លាសហេនមោគុញជ៝ង ហេនឞ្រោៈលែៈគែសឞារតឹព្លឹរ៝”។
11ទុតមាទេលអីឆ្រាអែលអីឞឹរីលាសមាខាន់ពាង់៖ “លាសនទ្រីនអាទោ ខាន់មៃញអោតនទើទុតអ្វែសតាៈឞើសឞ្រីឞ៝ន់អ្យាអ៝ន់មាឞូនុយ្សអីនៃបាៈ ខាន់មៃញអោតនទើបោកាសអាប់នតីលបាៈ ទាកឆុតបាៈ នអ៝ប់មាគារ់តោសអាប់នតីលបាៈដ៝ង់។ 12ខាន់មៃញអោតព្រាក់តាឆាក់អ៝ន់អ៝ក់រាលាវខាន់មរែឞើសនាប់នើសឞារតឹ ព្រាក់អីមារាវាត់តៃឞា នទ្រែលមាព្រាក់អីខាន់មៃឆៃតាបៅនើសដ៝ង់ ក្លាប់លាសឞូវិទាប់។ 13ជេសរីលែវអ៝សខាន់មៃនៃហាន់អាបៃអ្យាម៝ប់ឞូនុយ្សអីរីហ៝ម់។ 14ទាន់កោរាញឞ្រាសនើមអីទុតគែសនាវទើយជានអ៝ន់មាឞូនុយ្សនៃគែសនាវយោៈនអាចមាខាន់មៃ គៃមាបើកអ៝ន់ឆីមោន នទ្រែលបែនយាមឹនព្លឹឆឹតនទ្រែលមាខាន់មៃដ៝ង់។ គ៝ប់អ្យាលាសមោហោមគែសក៝ន ផាលាសទើម”។
យោឆែបតឹមម៝ប់តៃដាសអ៝សនោពាង់
15ជេសរីខាន់ពាង់ញអោតនទ៝សនទើនៃ នអ៝ប់មាព្រាក់អ៝ក់ឞារតឹ នទ្រែលមាលែវបែនយាមឹនដ៝ង់ ហាន់តាឞ្រីអេឆីប ហាន់តឹមម៝ប់ដាសយោឆែបរី។ 16ត៝ត់តាឞ្រីអេឆីប យោឆែបឆៃបែនយាមឹនហាន់នទ្រែលនោៗពាង់ ពាង់លាសមាឞូនុយ្សម៝ត់អ្វាញ់ញីសជៃពាង់រី៖ “លែវខាន់ពាង់លាប់តាជៃគ៝ប់ ជេសរីមឞាងមពោមពា(ឆ្យុម)ជានត្រាវ យ៝រលាសទឹងលែៈខាន់ពាង់អីនៃឆោងនារនទ្រែលមាគ៝ប់”។ 17ពាង់ជានកើតនាវយោឆែបទែដាៈមាពាង់ ជេសរីលែវខាន់ពាង់អីនៃហាន់លាប់តាជៃយោឆែប។ 18ខាន់ពាង់ក្លាចហោងាន់ ឆៃឞូលែវលាប់តាជៃយោឆែប ខាន់ពាង់តឹមលាសនទ្រាង់ខាន់ពាង់នើម៖ “ទឹងឞូញជុនឞ៝ន់ហាន់តាអ្យាអា យ៝រមាព្រាក់តាត្រោមបៅនើសរ៝។ ឞូលែវឞ៝ន់ហាន់តាអ្យាអា យ៝រលាសឞូគៃមាតេៈទោយ្សឞ៝ន់ គៃមាឆ៝ៈលើយឆែសលៀឞ៝ន់ នហ៝មាឆ៝ៈឞ៝ន់គុជានទឹកជឹត”។ 19ត៝ត់តាឞោកមពោងជៃរី ខាន់ពាង់ហាន់ទាច់មាឞូនុយ្សម៝ត់អ្វាញ់ញីសជៃយោឆែប ជេសរីងើយដាសពាង់៖ 20“អើកោរាញ នារឞើសកើយនើសហេនហាន់រាវាត់ឞាតាអ្យាលែៈទូតឹ។ 21ហេនឆឹតត៝ត់តានតុករាលូរី ហេនទ្រីសបៅ ឆៃទុងព្រាក់តាត្រោមបៅឞាហេននើមរីទាទេ រឹងកើតអើម។ នារអ្យាហេនញអោតតៃព្រាក់នៃនទឹមាមៃ 22យ៝រលាសហេនមោគឹត ឞូម៝សតេៈព្រាក់នៃតាត្រោមបៅឞាហេន។ ជេសរីហេនញអោតតៃព្រាក់អាអេងជឹតមារាវាត់តៃឞា”។ 23ឞូក្លោអីនៃអើសមាខាន់ពាង់៖ “លើយអោសរាវៃ គុដាប់មពាន់ហ៝ៈ កោរាញឞ្រាសខាន់មៃនើម កោរាញឞ្រាសឞឹខាន់មៃនើមឆើមអ៝ន់ព្រាក់នៃតាត្រោមបៅខាន់មៃ។ យ៝រលាសព្រាក់ខ្លៃខាន់មៃរាវាត់ឞានើសលែៈរឹងតាគ៝ប់អ្យាទាទេ”។ ជេសរីពាង់បើកឆីមោនអ៝ន់គុនទ្រែលខាន់ពាង់។#៤២:២៥ 24ជេសរីពាង់លែវខាន់ពាង់អីនៃលាប់តាត្រោមជៃយោឆែបរី ឆើមឆ៝ៈទាកអ៝ន់ខាន់ព្រែមារាវជ៝ង់ នទ្រែលមាឆ៝ៈមពាមាអ៝ន់ឆែសលៀខាន់ពាង់ទែឆាដ៝ង់។ 25ខាន់ពាង់លែៈនទ្រាប់លើយទឹងលែៈនទើមាអ៝ន់យោឆែប ទោលគុក៝ប់យោឆែបត៝ត់តានៃ យ៝រលាសខាន់ពាង់លែៈគឹតខាន់ពាង់គុឆោងនារតានតុកនៃ។
26ត៝ត់ឆឹតយោឆែបតាជៃរី ទឹងលែៈខាន់ពាង់ឆ៝ៈនទើនៃញជុនអ៝ន់មាយោឆែប ជេសរីពាន់មឞាសពាង់។ 27យោឆែបអោបនាវអ្វែសលាង់ខាន់ពាង់៖ “អាល៝រនើសខាន់មៃមឞើសមាគ៝ប់លាសគែសឞឹលែៈរាញងាន់ អាសអ្វែសលាង់ដ៝ង់ពាង់? ពាង់ហោមរេសដ៝ង់ឞើស?” 28ខាន់ពាង់អើស៖ “ឞឹហេនហោមរេស កោរាញមេ ពាង់អ្វែសលាង់ដ៝ង់”។ ជេសមឞើសនៃ ខាន់ពាង់ពាន់មឞាសពាង់ទាទេ។
29ជេសរីយោឆែបអ្វាញ់ឆៃបែនយាមឹន អ៝សទូនទុលទែសដាសពាង់នើម ពាង់អោបខាន់ពាង់៖ “អ្យាអ៝សទុតខាន់មៃមឞើសងក៝ចមាគ៝ប់នើសបាស? ទាន់កោរាញឞ្រាសអ៝ន់នាវគែសជេងមាមៃអ៝ស”។ 30យោឆែបរាង៝តហោងាន់ឆៃអ៝សពាង់ ជេសរីពាង់ហាន់ញុមតាត្រោមជ្រោពាង់នើមរី យ៝រលាសពាង់មោអោសទើយអ៝ត់។ 31ពាង់រាពោសមុសមាត់ផ្យៅ លោសអាទីសអ្យា ពាង់ញឆ្រោយ្សអ៝ត់ងាន់ ជេសរីដាៈឞូពឺព្យាង់ត្រាវ។ 32ឞូពឺព្យាង់ត្រាវមាយោឆែបអ៝ន់អេង ផូងអេឆីប អីគុតារីគុឆោងអេង មពោលអ៝សនោពាង់រីអ៝ន់គុឆោងអេង។ នាវវៃតាផូងអេឆីប មោអោសអ៝ន់ឆោងនទ្រែលផូងហេឞ្រើ យ៝រលាសខាន់ពាង់អ្វាញ់នាវនៃបឹងាន់។ 33មពោលអ៝សនោយោឆែបគុឆោងរាលែមាត់ជឹតពាង់រីទាទេ ឞូអ៝ន់ខាន់ពាង់គុតឹងឞោកនោ នតើមឞើសនោឞោកទាក ត៝ត់មាអ៝សទុត ទឹងលែៈខាន់ពាង់នទ្រ៝ត់ទាទេងាន់ មោវ៝ត់អោសមើមទឹងឞូគឹត។ 34យោឆែបដាៈឞូឆ៝ៈនទើឆាឞើសនាប់ពាង់នើមរី អ៝ន់មាមពោលអ៝សនោពាង់ យើនមាបែនយាមឹនឞូអ៝ន់អ៝ក់រាលាវព្រាម់តឹដាសមាខាន់ពាង់អាបាៈ។ ខាន់ពាង់ញេតឆោងនទ្រែលយោឆែបមអាកងាន់។
Currently Selected:
នាវនតើម 43: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
