នាវនតើម 40
40
យោឆែបឆើមរាឞ្លាងមឞើយអ៝ន់មាឞារហៃឞូនុយ្សទោយ្ស
1ជេសគែសនាវនៃ គែសឞារហៃឞូនុយ្សជានការមាកាដាច់អេឆីប ទូហ្វេឞូនុយ្សជានការញអោតងោរនទ្រាញ់ ទូហ្វេជឹតឞូនុយ្សជានការញអោតនុមពាង់។ ខាន់ពាង់ជានតីសមាកាដាច់កោរាញខាន់ពាង់នើម។ 2កាដាច់ផារ៝នជីនូយ្សហោងាន់មាលែៈឞារហៃកោរាញនៃ ទូហ្វេឞូនុយ្សញអោតងោរនទ្រាញ់ ទូហ្វេជឹតឞូនុយ្សញអោតនុមពាង់។ 3នទ្រីពាង់ដាៈឞូញុបឞារហៃខាន់ពាង់នៃក្រុងតាត្រោមនទ្រូងកោរាញម៝ត់ញជ្រាង់កាដាច់ នតុកនទ្រូងឞូក្រុងយោឆែបរីនើសដ៝ង់។ 4កោរាញម៝ត់ញជ្រាង់ញជុនឞារហៃខាន់ពាង់នៃដាៈយោឆែបឆើមជានការមាខាន់ពាង់ ទោលខាន់ពាង់គុជ៝ៈនារតាត្រោមនទ្រូងនៃ។
5គែសទូមាង់រី លែៈឞារហៃកោរាញគែសនទ្រូងនៃមឞើយទាទេ ទូហ្វេឞូនុយ្សជានការញអោតងោរនទ្រាញ់ នទ្រែលមាទូហ្វេជឹតឞូនុយ្សជានការញអោតនុមពាង់ យើនមានាវមឞើយខាន់ពាង់នៃគែសនាវខ្លៃអេងឞាល់។ 6ត៝ត់អាអោយ យោឆែបហាន់ម៝ប់ខាន់ពាង់ ឆៃមុសមាត់ខាន់ពាង់ញ៝រឹញឹ។ 7ជេសរីពាង់អោបឞារហៃកោរាញជានការអ៝ន់មាផារ៝ន ឞូទែក្រុងនទ្រែលមាពាង់តាត្រោមនទ្រូងកោរាញពាង់នើមនៃ ពាង់លាស៖ “នារអ្យាម៝សលើសខាន់មៃញ៝រឹញឹនៃ?” 8ខាន់ពាង់មឞើសមាពាង់៖ “ហេនគែសមឞើយ យើនមាមោគែសអោសឞូនុយ្សទើយឆើមរាឞ្លាងនាវមឞើយនៃ”។ យោឆែបលាសមាខាន់ពាង់៖ “គែសកោរាញឞ្រាសទើមទើយឆើមរាឞ្លាងនាវមឞើយ! ទាន់ខាន់មៃមឞើសងក៝ចនាវមឞើយនៃមាគ៝ប់”។
9ជេសរីឞូនុយ្សញអោតងោរនទ្រាញ់មាកាដាច់នៃមឞើសងក៝ចនាវមឞើយពាង់មាយោឆែប ពាង់លាស៖ “គ៝ប់មឞើយកើតនអា៖ គែសតើមព្លៃយុងយារប៝នទូតើមឞើសនាប់គ៝ប់។ 10តើមព្លៃយុងយារប៝ននៃគែសងគីងពែអឹមោអោសគែសនហា ជេសរីទោមាចាត់ងក៝ត កាវពាង់ទាង ជេសរីគែសព្លៃទុមដ៝ង់។ 11ទោលនៃងោរកាដាច់ផារ៝នគ៝ប់ញអោតតាតីគ៝ប់ គ៝ប់ពែៈព្លៃយុងយារប៝នមពែតតាត្រោមងោរពាង់រី ជេសរីគ៝ប់នទឹងោរនៃអ៝ន់តាតីកាដាច់ផារ៝ន”។ 12យោឆែបលាសមាពាង់៖ “មឞើយមៃនៃកើតនអានាវរាឞ្លាង៖ ងគីងពែអឹនៃ ជេងពែនារ។ 13ហោមពែនារជឹត កាដាច់ផារ៝នអ៝ន់មៃលោសឞើសនតុកអ្យា ពាង់អ៝ន់មៃជានការកើតអើម មៃញអោតងោរនទ្រាញ់តាតីពាង់ កើតមៃលែៈជានការមាពាង់ឞើសនតើមនើសដ៝ង់។ 14ត៝ត់មៃលែៈអ្វែសលាង់ដាប់មពាន់តៃ ទាន់លើយច្វេលមាគ៝ប់ ទាន់មៃយោៈនអាចមឞើសងក៝ចនាវគ៝ប់អ៝ន់ផារ៝នគឹត ជេសរីទាន់ឆ៝ៈគ៝ប់លោសឞើសនតុកអ្យា។ 15យ៝រលាសឞូញុបគ៝ប់តាៈឞើសផូងហេឞ្រើ នទ្រាមាញុបទើម គ៝ប់គុតាឞ្រីអ្យាមោដ៝ង់ម៝ប់ជានតីស ឞូញុបគ៝ប់ក្រុងតាត្រោមនទ្រូងច្រាវ”។#៣៧:២៧-២៨
16ត៝ត់មាកោរាញញអោតនុមពាង់ឆៃតានាវមឞើយនៃគែសនាវអ្វែស ជេសរីពាង់លាសមាយោឆែប៖ “គ៝ប់មឞើយកើតនអាមេៈ៖ គ៝ប់គែសពែញជើនុមពាង់តាកាលើឞោកគ៝ប់។ 17តាញជើកាលើទុតរីគែសនុមអាប់នតីលផារ៝នវៃឆា យើនមាគែសឆ្យុមហាន់ច៝កលើយនុមតាញជើឞោកគ៝ប់រីលែៈផ្យៅ”។ 18យោឆែបលាសមាពាង់៖ “មឞើយមៃនៃកើតនអានាវរាឞ្លាង៖ ញជើពែអឹនៃ ជេងពែនារ។ 19ហោមពែនារជឹត ផារ៝នក៝សត៝ងក៝មៃ យោងមៃតាតើមឆី ជេសរីគែសឆ្យុមហាន់ច៝កឆាឆាក់មៃ”។
20ត៝ត់ពែនារនៃ ជេងទីនារកាដាច់ផារ៝នជាននទ្រាប់ញេតងកាសនារទែសពាង់នើម ពាង់ក្វាល់ទឹងលែៈផូងកោរាញពាង់។ កាដាច់ដាៈឞូក្វាល់កោរាញញអោតងោរនទ្រាញ់ នទ្រែលមាកោរាញញអោតនុមពាង់អ៝ន់គុតាងក្លាងផូងកោរាញពាង់រី។ 21កាដាច់អ៝ន់កោរាញញអោតងោរនទ្រាញ់នៃ អ៝ន់ពាង់ជានការតៃកើតពាង់ឞើសនតើម។ 22យើនមាកាដាច់ដាៈឞូយោងក៝កោរាញញអោតនុមពាង់នៃ ជេងតឹមទីកើតនាវយោឆែបទែរាឞ្លាងមាខាន់ពាង់រីនើស។ 23ល៝ង់កោរាញញអោតងោរនទ្រាញ់នៃ ពាង់ច្វេលក្លាក់ទើម មោហោមអោសកាសគឹតមាយោឆែប។
Currently Selected:
នាវនតើម 40: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
