Malaki 3
3
1 #
Mat 11:10; Mk 1:2; Luk 1:76; 7:27 Yawe Wamaka yonsi wavwanga wati, “Lolini ndatuma inkombe yane, ino ilanteyanyizizya umwakupita. Lyene mu nsita ino mutenekile umwene wino mukalonda aliza ku Ng'anda yakwe ikulu. Inkombe ya upangano, ino mwalukisya ukulola, iliiza nu kukosola upangano wane.”
2 #
Yow 2:11; Umb 6:17 Uzye aweni alaposya apa wanda uno wene alawela? Uzye aweni alimilila apa wanda uno wene alaloleka? Pasi pano wene alaya wa moto wakwe yasimusyanyi nanti wakwe sopo uwa muntu akufula. 3Wene aliza ku kupingula wa muntu akaswefya zaabu. Wene alasangulula nu kuswefya aina Levi ndi vino umuntu akaswefya zaabu na siluva. Alino lyene yalaleta amawila asuma kuli Yawe. 4Lyene amawila ya antu amu Yuda nu mu Yelusalemu yano yakaleta yalazanzya Yawe, ndi vino yamuzanzyanga uku mpiti.
5Yawe Wamaka yonsi wavwanga wati, “Ndiza pakasi kinu ku kupingula, nga lilyo kwene ndasinila antu akacita vyamalele, na yacizelele, na yayo akatumpwila auze, na yayo akasomba aomvi apa kuyalipila, na yayo akakwilila pa mitwe yakwe yamukamfwilwa na ana asyale, na inamasi kwene. Ndasinila yonsi asincindika.
Ukupeela icikumi
6“Nene indi Yawe, nupya nsisenuka awe. Acino mwe amu mupanda wakwe Yakobo mutaloviwa. 7Ukufuma sile ku manda ya vikolwe vinu mwemo mwafutatila ivipope vyane, nupya mutavisunga. Ndi mwawela kunondi, nani kwene ndawela kunomuli.
“Lelo mwemo mukuti, ‘Uzye tulinzile kucita vyani
pakuti tuwelele kunuli?’ ”
8Uzye umuntu angiyila Leza?
Awe citange cicitike.
Lelo mwemo mukunjiya.
Namwe muuzya muti,
“Umu nzila cii?”
Umu cikumi na mawila.
9Endi, mwe luko lonsi mwatipwa,
pamulandu wakuti mukunjiya.
10 #
Levi 27:30; Mpe 18:21-24; Malg 12:6; 14:22-29; Nee 13:12 Ndetelini icikumi consi uku Ng'anda yane ikulu,
pakuti mu Ng'anda ikulu yane muye ivyakulya.
Lyene njezini mulole ndi ntangayula inzota umwiyulu
nu kumupongolwela upolelelo nyanya wakwe cimwi.
11Ndalesya ivizizi kuti vitonona ivilimwa vinu,
nga na matingi amu vyalo vinu vya matingi,
yatalalukusya amatingi awe.
Ne Yawe Wamaka yonsi natimvwanga.
12Lyene antu amu nko zyonsi yalati mwapolelelwa,
pano impanga inu ilaya isuma iyakwikala mwenemo.
Leza walaya ukuya nu luse
13Yawe wavwanga wati, “Mwemo mwalanda amazwi aipisye apali nene. Lelo mukuuzya muti, ‘Uzye ivyani vino twalanda ivyapali wewe?’ 14Mwalanda mwati, ‘Icasilesile ukutumikila Leza. Uzye ivyani vino twatumbula pa kucita vino wene akalonda nanti apa kwezya ukulanga Yawe Wamaka yonsi ukuti tuli nu ulanda pa viipe vino twacita?’ 15Lelo swemo twalola ukuti antu acilumba alio yali nu longo. Cumi kwene yakacita ya nkota alio yakaikala ningo, nupya yakaezya Leza uku vicitwa vyao. Lelo wene akayata sile.”
16Lyene yayo akaoopa Yawe yatandika ukulanzyanya, nga Yawe auvwa kunoyali nu kutezya vino yalandanga. Ulupapulo lwa ciusizyo ilulembwa pa manso yakwe, ulukalanda pali yayo akaoopa Yawe nu kucindika izina lyakwe.
Uwanda wa kuvunuka wakwe Leza ukwiza
17Yawe Wamaka yonsi wavwanga wati, “Antu yayo yalaya akwane. Pa wanda uwo lino ndacita cimwi, yene yalaya akwane kololo. Ndaya na mizu kunoyali ndi vino umukwasi akaya na mizu ku mwanakwe wino akamutumikila. 18Nupya kwene antu yane yalalola upusano uwaya pakasi ka antu akacita vyaololoke na yakaifya, pakasi ka antu akatumikila Yawe na yayo asimutumikila.”
Currently Selected:
Malaki 3: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
