Malaki 2
2
1Yawe Wamaka yonsi akunena yasimapepo ati, “Nkupeela ilamulo lii kunomuli, ilyakuti, 2‘Mulinzile ukuncindika muli vino mukucita. Ndi cakuti mutaluvwa kuli vino nkumunena, lyene ndamuponyezya icitipu. Ndaponyezya icitipu pa vintu vino mukapokelela vyakutungilila wikazi winu. Endi, natimviponyezya icitupu mpiti, pamulandu wakuti mwemo mutisile amano api lamulo lyane.
3“ ‘Ndavunuka amu mupanda winu nu kumukantaizya impumi zinu ni vyamumala ya nyama kwene zino mukapeela impolelwa. Ndamuvwintila pa citumba, lilyo ale mwatimukandana navyo. 4#Mpe 3:11-13 Lyene mulamanya ukuti namupeela ilamulo lii, pakuti upangano wane uno nacita pakasi kane na yasimapepo aina Levi, utavunwa. Natimvwanga ne Yawe Wamaka Yonsi.
5 #
Mpe 25:12
“ ‘Mu upangano wane uno nacita pakasi kane na alio, nayalaya umi nu kwikala ningo, na vivyo vili vino nayapeela pakuti yangancindika. Mu manda yalya yene yancindike nu kunkwatila icoopo. 6Yene yasambilizyanga ivyacumi, asi vyaufi awe. Yuvwananga nani, nupya yatacitanga sile ivisuma. Lelo yazwilizyanga auze ukuta ukucita iviipe.
7“ ‘Yasimapepo yapeelwa umulimo wakusambilizya icumi capali Leza. Antu yalinzile ukuya kunoyali ku kusambilila ivintu vino nkalonda kuti yacita, pamulandu wakuti yasimapepo ali nkombe zyakwe Yawe Wamaka yonsi. 8Lelo mwemo mwafutatila inzila yane. Usambilizyo winu waponzya antu avule. Mwavuna upangano wane uno nacita namwe. 9Acino nani, pakumuswilizizya cico, ndaleka aina Izlaeli yamusuule pamulandu wakuti mutakuyela vino nkalonda kuti mwacita, nga nupya mukafyenga antu pa kuyaputwila imilandu na kasoozi.’ ”
Antu yasi acumi kuli Leza
10Uzye swensi kwene tata asi ali wenga kwene? Uzye asi a Leza ali umwi kwene uwatuumvile? Uzye lyene apacani cino tusifikilizya upangano wakwe Yawe ni vikolwe vitu apa kuntaya acumi, cila muntu ku muze? 11Antu aku Yuda yasi acumi kuli Leza nupya yacita ivintu iviipe wakwe cimwi mu Izlaeli nu mu Yelusalemu kwene. Yene yakowezya Ng'anda ikulu yakwe Yawe ino wene watemwa. Yene yatwala anaci ainamasi akapepa tuleza tuluwi. 12Si Yawe asukule umuntu ali wensi uwacita icamusango uu ukufuma mu mutundu wa ina Izlaeli. Nanti angala umuntu wiyo akapeela impolelwa kuli Yawe Wamaka yonsi, wene atalinzile kutwalilila kucita cico.
13Nacuze cino mukacita aici: Mukasambezya kavuwa kakwe Yawe na minsozi inu. Mukalila nu kulosya pamulandu wakuti ndakai wene asisakamala nanti kupokelela amawila inu ni nsansa ukufuma mu minwe inu. 14Namwe imuzya muti, “Uzye apacani cino akucita vivyo?” Apamulandu wakuti Yawe ali kambone wakukusinila pa kuntaya wacumi ku muci wino watwite mu ulumendo wako. 15Uzye Yawe atakuumvile kuti uye umwili nu mupasi onga nu muci wako? Uzye wene wakweti ipange cii pa kucita cico? Umulandu uno wene wacitile cico, apakuti ana yano ulakwata yakaye ana yakwe Leza. Acino uisunge, nga utavuna upangano uno wacisile nu muci wako wino watwite mu ulumendo wako. 16Yawe, Leza wa ina Izlaeli wavwanga wati, “Napata ukutaana. Napata umuntu umwi wino wacita icintu ca unkalwe wakwe cii ku muci. Musininkizye ukuti kutaya nanti wenga uwakuvuna upangano wakwe uwakuya uwacumi ku muci.”
Uwanda wa upinguzi watiupalama
17Mukwanola Yawe mu mazwi inu. Lelo namwe mukuuzya muti, “Uzye fwandi tukumwanola umu nzila ci?” Mukacita vivyo apakulanda imuti, “Yawe Wamaka yonsi akaelenganya ukuti antu akacita inkota yene asuma, nupya wayatemwa.” Nanti imuti, “Uzye Leza wino atakwata akasoozi ali kwi?”
Currently Selected:
Malaki 2: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
