Luka 18
18
Mulumbe wakwe mukamfwilwa na kapingula wa milandu
1Lyene Yesu aumila alondezi yakwe mulumbe, kuti ayasambilizye vino yalinzile kupepa nsita zyonsi kwaula kunenuka. 2Ayanena ati, “Mu musumba umwi mwali kapingula wa milandu wino atoopanga Leza nupya atacindike umuntu nanti umwi. 3Nu mu musumba kwene ulya mwali mukamfwilwa uwayanga kunoli nu muzonda kuti amuputwile mulandu kulingana ni nsambu zyakwe, ala akuti, ‘Mumvwangileko ningo ku muntu wino twatalana nawe mulandu.’ 4Pa nsita ntali kapingula wakananga kumuputwila mulandu. Lelo pacisila aivwanzya umwisikulu ati, ‘Nanti angala nsiopa Leza, nanti kucindika umuntu, 5lelo pamulandu wakuti mukamfwilwa wi akuncuzya, ndamuputwila mulandu pakuti apokelele insambu zyakwe. Namacita cii kuti atanganola pa kwiza kuno nu muzonda.’”
6Nupya Mwene ati, “Uvwini, vino kapingula uwa lufyengo wavwanga. 7Uzye Leza atangaputwila asololwe yakwe milandu ningo, yano akamulilila umusanya nu usiku? Uzye wene alayatazyela? 8Awe! Namunena vino wene alayavwangila zuwa. Lelo lino Mwana wa Muntu aliza uzye alazana utailo mu nsi?”
Mulumbe wa Mufaliseo na Kasonkisya
9Yesu aumila antu yamwi mulumbe, yano aitailanga vino yene yali aololoke nupya asulanga auze onsi. Ayanena ati, 10“Kwali antu yamwi yaili yano aile ku ng'anda yakwe Leza kukupepa. Wenga wali u Mufaliseo, nu muze wali a kasonkisya. 11Mufaliseo aimilila apepa mu mwenzo wakwe ati, ‘Nakutaizya, we Leza, pano nemo ntakolana na antu yauze ali wa antu alwiswa, aucenjezi, akalongozya nanti yao ali wakwe kasonkisya kwene wii. 12Nkaizilizya ukulya maila yaili mu mulungu, nupya nkapela ni cikumi ca muli vyonsi vino nkazana.’ 13Lelo kasonkisya aimilila katalamukila. Lyene ainamika usyu wakwe pansi kwaula nanti kulingamila mwiyulu, lelo ayuma pa cifuwa cakwe nga avwanga ati, ‘Leza uye na mizu kunondi ne kaifya.’” 14#Mat 23:12; Luk 14:11 Yesu avwanga ati, “Namunena nati, kasonkisya waswilile ukwakwe uwakaele pa manso yakwe Leza. Lelo Mufaliseo waswilile ukwakwe na maifyo yakwe. Pano wensi akaikuzya wene alacefiwa, na wino wensi akaicefya wene alakuziwa.”
Yesu wapolelela ana anono
(Mat 19:13-15; Mk 10:13-16)
15Antu yamwi yaleta ana anono kwene kuli Yesu kuti aiikepo makasa. Lelo lino alondezi yalola cii, yayakalipila. 16Lelo Yesu aama ana anono kunoli, ati, “Lekini ana anono iize kunondi, mutayalesya, pano Uwene wakwe Leza uwakwe yao ali ndi yaa. 17Cumi namunena nati, wino wensi atalapokelela Uwene wakwe Leza wa mwana munono, wene atalingilamo.”
Muntu mukama
(Mat 19:16-30; Mk 10:17-31)
18Intunguluzi ya Ciyuda imwi iyuzya Yesu iti, “Kasambilizya musuma, uzye icani cino ndinzile kucita kuti mpokelele umi wape?”
19Yesu nawe amwaasuka ati, “Uzye pacani wangama musuma? Kusi nanti umwi musuma suka Leza wenga. 20#Kuf 20:12; Malg 5:16 Wamanya Masunde yakwe Leza akati, ‘Utalongozya, utakoma, utaiya, utatumpwila umuzo, wacindika so na nyoko.’”
21Muntu aasuka ati, “Nkayela Masunde yaa yonsi kufuma ku ulumendo wane.”
22Lino Yesu uvwile cii, amunena ati, “Kuli cintu conga sile cino ulizya. Kakazye vyonsi vino wakwata ukapeele ni mpiya zino ulazana ku apina, nga ulaya ni vyuma mwi yulu, lyene wize undondele.” 23Lelo lino umuntu uvwa cii, aya nu ulanda ukulu, pano wali umukama cuze.
24Lino Yesu walola vino waya nu ulanda cuze, avwanga ati, “Catalila akama ukwingila mu Wene wakwe Leza! 25Cangupalila ingamila kupuzya mwi linso lya nsindano, kuluta mukama ukwingila mu Wene wakwe Leza.”
26Antu auvwile cii yamuzya yati, “Uzye lyene, aweni angatuulwa?”
27Lelo Yesu aasuka ati, “Cino umuntu atangacita, Leza wene angacita.” 28Petulo amunena ati, “Lola! Swemo twasya mang'anda itu nu kukulondela.”
29Nga ayanena ati, “Ee, cumi namunena vino kusi nanti umuntu wenga uwasya ing'anda yakwe, nanti umuci, nanti aina aonsi, nanti akwasi yakwe, nanti ana yakwe pamulandu wa Wene wakwe Leza, 30aatangapokelela maila avule kuluta mu mukulo uu, nga nu umi wapee mu mukulo uuliza.”
Yesu wasowela iila lyakwe citatu pa mfwa yakwe
(Mat 20:17-19; Mk 10:32-34)
31Lyene Yesu asenda alondezi yakwe ikumi na yaili pa mbali, ayanena ati, “Uvwini! Tukuya ku Yelusalemu kuno vintu vyonsi vino yakasema yalemvile pa Mwana wa Muntu vili nu kufikiliziwa. 32Wene alakoopelwa ku Akulukuwa, nao yalamusaalula, yalamutuka, nu kumuswila mati. 33Yalamuma ivikoti nu kumukoma, lelo pa wanda wakulenga yatatu alazyukuka aye umumi.”
34Lelo alondezi yatamanyilepo nanti cimwi ca pa vintu vii. Yene yatilwike cino Yesu walandanga, pano calanga cafiswa kunoyali.
Yesu Wapozya Umuntu Uwali Impafu
(Mat 20:29-34; Mk 10:46-52)
35Lino Yesu wapalama pipi na Yeliko, umuntu uwali impafu watenzi pa mbali ya museo, ala akulenga. 36Lino uvwa iumba likupita pipi, auzya ati, “Uzye icani cikucitika?”
37Nao yamwasuka yati, “Yesu uwaku Nazaleti aliwe akupita.”
38Lyene alaizya ni zwi likulu ati, “Yesu! Mwana wakwe Davidi! Uye na mizu kunondi!”
39Antu ali nkolelo yakwe yamukalipila yamunena kuti amyalale. Lelo alino asanzika izwi nu kuluta, ati, “Mwana wakwe Davidi! Uye na mizu kunondi!”
40Lyene Yesu aimilila, apeela ilamulo kuti yamulete kunoli. Lino impafu yapalama pipi, Yesu ayuzya ati, 41“Uzye ukulonda kuti nkucitile cani?”
Nayo imwasuka iti, “Mwene, nkulonda kuti nalola.”
42Yesu ainena ati, “Lyene lolanga. Utailo wako wakupozya.” 43Lilyo kwene itandika kulola nu kulondela Yesu, ala ikutaizya Leza. Lino antu yalola cii, yonsi kwene yalumbanya Leza.
Currently Selected:
Luka 18: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
