Luka 17

Kwifya nu kwelela

(Mat 18:6-7, 21-22; Mk 9:42)

1Yesu anena alondezi yakwe ati, “Ivintu vikalenga antu kuponela mu maifyo vilinzile kucitika, lelo kalanda ku muntu wino akulenga kuti vicitike. 2Cazipila umuntu wiyo kumunyepelela iwe lyakusiila likulu mu nsingo nu kumusumbila muli yemba, kuluta kuti aleke wenga uwamu ana anono kwifya. 3#Mat 18:15 Caleka cenjelini.

“Munyonko ndi wifya, mukalipile. Ndi wazenzuka, mwelele. 4Ndi wakwifya maila cinimbali mu wanda onga, nga nu kuwela kunuli maila cinimbali, ala akuti, ‘Nazenzuka,’ ulinzile kumwelela.”

Utailo

5Atumwa yanena Mwene yati, “Tukuzizye utailo.” 6Mwene nawe ayanena ati, “Ndi mukweti utailo ukulu wa lumbezu lwakwe musunta, munganena umusamvu uu, muti, ‘Itukule wemwisikulu kumwi ni misisi, ukaileme muli yemba,’ nao ungamuyela.”

Umulimo wa muomvi

7“Umwi uwa munomuli ndi wali nu muomvi wino uwalimanga nanti ukucema imfwele, lino wawela ku vyalo, uzye angamunena ati, iza zuwa ndulye, lino wene atali alye? 8Uzye mucifulo cakwe cii, atangamunena ati, ‘Teyanya mulalilo, nga pacisila uiteyanye nu kuntumikila, kufika lino namala ukulya nu kumwa. Lyene pacisila nawe umalya nu kumwa.’ 9Wene angataizya muomvi pamulandu wakuyela ilamulo? 10Icili conga namwe; lino mwati mucita vyonsi vino mwati munenwa kucita, mulande muti, ‘Sweswe aomvi sile nupya twati tucita vino tulinzile kucita.’”

Yesu wapozya antu ikumi alwile tembwe

11Lino Yesu wali pa lwendo ala akuya ku Yelusalemu, waile apita mu mupaka wakwe Samaliya na Galile. 12Lino akwingila mu muzi, antu ikumi alwile tembwe yamukomanya. Lyene iimilila katalamukila, 13yasanzika mazwi yao yati, “Yesu! Mwene! Ya na mizu kunotuli.”

14 # Levi 14:1 Lino Yesu wayalola ayanena ati, “Yangini mukailange mweisikulu kuli yasimapepo.” Lino yacili yakupita, yapoziwa.

15Lyene wenga uwa munoyali lino walola vino wapoziwa, aswililamo, ala akulumbanya Leza ni izwi likulu. 16Lyene afukama pansi nkolelo yakwe Yesu, amutaizya. Muntu wii, wali u Musamaliya. 17Yesu auzya ati, “Uzye antu ikumi yonsi yatali yapoziwa? Uzye yauze fundimbali yene yali kwi? 18Uzye icani cino yene yatawezile nu kwiza taizya Leza suka sile mwinamasi wii?” 19Nupya Yesu amunena ati, “Katuka pitanga, utailo wako wakupozya.”

Vino Uwene wakwe Leza uliza

(Mat 24:23-28, 39-41)

20Afaliseo yuzya Yesu yati, “Uzye insita ci lino Uwene wakwe Leza uliza?” Nawe ayaasuka ati, “Uwene wakwe Leza usyaiza nu kulolwa. 21Nupya antu yatalati, ‘Lolini, auu kuno!’ Nanti, ‘Lolini, auwa kuku!’ Pano Uwene wakwe Leza uli pakasi kinu.”

22Lyene anena alondezi yakwe ati, “Insita ikwiza lino mulalondesya kulola uwanda wa Mwana wa Muntu, lelo mutalaulola. 23Yamwi yalamunena yati, ‘Lolini, awilya kuku!’ Nanti, ‘Auwi, kuno!’ Lelo mutakasimwilileko nu kuyalola. 24Pano vino inkuwa ikamyansya ukucilinganya ulwelele, kufuma imbali yuze kufika nu ku yuze, avino cilaya na pa wanda wa kwiza kwa Mwana wa Muntu. 25Lelo nkolelo ali nu kucula cuze, nupya antu amu mukulo uu yalamukana. 26#Uta 6:5 Vino cali mu manda yakwe Nowa avino cilaya nu mu manda ya Mwana wa Muntu. 27Antu yalyanga nu kumwa, yatwalanga nu kutwalwa, kufika na pa wanda uno Nowa wingile mu cange lino mulamba wizile ayakoma onsi. 28#Uta 18:20 Vivyo kwene avino cali nu mu manda yakwe Loti. Antu yalyanga nu kumwa, yakalanga, yakazyanga, yakomelanga nu kukuula mang'anda. 29Uwanda uno Loti wafumile mu Sodoma, umoto na maluti vyaponyile kufuma kuli Leza kwiyulu nu kulovya onsi kwene. 30Avino cilaya pa wanda uno Mwana wa Muntu alaloleka

31 # Mat 24:17; Mk 13:15 “Pa wanda ulya umuntu wensi aalazanwa pi paala lya ng'anda yakwe, wene atakike kuti aingilemo nu kutoola viya vyakwe. Mu musango uli onga wensi aalazanwa mu calo atakaswilile ku ng'anda. 32#Uta 19:26 Iusyini muci wakwe Loti! 33#Mat 10:39; 16:25 Wino wensi akwezya kusunga umi wakwe wene alauponzya. Na wino wensi amaponzya umi wakwe wene alausunga. Mk 8:35; Luk 9:24; Yoa 12:25 34Namunena vino usiku pa wanda ulya kulaya antu yaili aizi pamwi pa musanzi onga. Wenga yalamusenda, nu muze yalamusya. 35Anaci yaili yalaasya pamwi apiwe. Wenga yalamusenda, nu muze yalamusya. [ 36Antu yaili yalaomba mu calo. Wenga yalamusenda, nu muze yalamusya.]”

37Lino alondezi yuvwa vii yamuuzya yati, “Mwene, aukwi kuno vilacitikila?” Yesu nawe ayanena ati, “Konsi kuno icala cili, akuno na makozi yakakongana.”

Currently Selected:

Luka 17: MamL13

Highlight

Copy